فتح باب الشقة فجريت عليه وأنا بتنطط
-بابتسامة حمد الله ع السلامة.
='ضحك عليا' الله يسلمك يا حبيبي، أخبارك ايه؟
-الحمد لله، هجهز لك الغدا روح غيّر وتعالى.
='كنت همشي بس مسك إيدي' كنتِ بتنطي ليه؟
-'ببراءة' ولا حاجة.
='ضحك' قولي قولي.
-'غمضت عيني' عايزة كتكوت.
=إيه!
-كتكوووت.
=تربيه؟
-أهاا.
=ويبقى فرخة لما يكبر؟
-'رمشت أكتر من مرة' هو هيكبر!
='ضحك' أومال هيفضل كدا؟
-ولما يبقى فرخة هيحصل إيه؟
=هندبحه وناكله.
-'شهقت' أدبح ابني اللي هربيه!
='ضحك بزيادة' طب خلاص هنقلبها عش ونجيب قش عشان الكتكوت يرتاح لما يكبر.
-'زعلت' متتريقش! هروح أجهز الأكل وأنت غيّر هدومك.
'سيبته وروحت المطبخ أجهز الأكل على صنية وشيلتها وخرجت للسفرة نقلت الأكل عليها ورجّعت الصنية المطبخ ولما لفيت عشان أخرج لقيته ساند ع الباب ومربّع ايده'
='مد لي إيده' نربي قطة طيب؟
-'ابتسمت وقربت منه' عشان مندبحهاش في الآخر؟
='مسك ايدي وخرجنا' عشان مندبحهاش في الآخر.
'قعدنا ناكل في جو من الهدوء لحد ما خلص أكل'
='باس إيدي' الأكل حلو جدا ما شاء الله، تسلم إيدك يا حبيبي.
-'ابتسمت' بالهنا والشفا يا روحي.
='وقف' هروح أجهز هدومنا عشان نخرج.
-تمام، هخلص المطبخ وهلحقك.
'لميت الأكل وبدأت أغسل الأطباق لحد ما حسيت به واقف ورايا فلفيت راسي له'
='بابتسامة' ما الغسالة هناك أهي!
-'ضحكت' بحب أعمل رغوة بالصابون وألعب بها.
=طب أساعدك وأحط الأطباق مكانها.
-اوكي.
'ابتسم وقرّب مني باس راسي وبدأ ينشف الأطباق ويحطها مكانها وانا بغسل لحد ما خلصت ووقفت جمبه وهو بينشف الأطباق وبيحطها لحد ما هو خلص'
='مسك إيدي نشفها بفوطة كانت على كتفه' وخلصنااا.
-'ضحكت' هييييه.
='شدّني' يلا عشان منتأخرش.
'أخد هدومه وراح أوضة الأطفال يغير هدومه وأنا غيّرت في أوضتنا عادي لحد ما هو خبط عليا ودخل لقاني بعيط'
='قرّب بسرعة' مالك؟
-'بعياط' مش عارفة ألبس الخمااار.
='وقف لثواني يستوعب اللي حاصل بعدها مسك الخمار' اقفي كدا وريني وشك.
'لفيت له ووشي أحمر ودموعي بتنزل فمسك منديل وبدأ يمسح لي وشي وهو بيضحك عليا'
=اهدي بقا، هلبسك الخمار واظبطهولك بس متعيطيش..حلو؟
-'بهدوء' حلو.
'باس راسي وبدأ يلبسني الخمار لحد ما خلص ولفّني يتأكد إني لبساه كويس'
='لفّني ليه' كدا حلو، قمر يا ولاد وشه أحمر من البكا.
-'ضحكت' عيني اللي بتعيط لأي سبب!
='ضحك' أيوة هي عينك لكن إنتِ استرونج يا حبيبي.
-أهاا.
='حضني' طب يلا عشان منتأخرش.
'خرجنا وركبنا العربية وودانا حديقة وكان الجو هادي ومفيش ناس كتير، نزلت من العربية ودخلت وهو كان بيركن العربية فوقفت جوا أستناه'
