- حكمت المحكمه حضوريا ببراءة المتهم عمار محمود الصياد من التهمه المنسوبه إليه ، رفعت الجلسه
مكنتش مصدقه بجد ان انا جبت البراءه لشخص فشل محاميين كتير يجبوها وسابوا القضيه ، ارتحت اخيرا واستقبلت كمية شكر كبيره من اهله وبالذات مامته اللي حضنتني جامد وعيطت لدرجة خلتني اعيط زيها
- ربنا يخليكي يبنتي يارب ويسترك ويبارك فيكي ، ربنا يفرحك زي ما فرحتي قلبي برجوع ابني
= يا طنط انا معملتش حاجه ، ده واجبي ، وكمان ابن حضرتك كان مظلوم وربنا عمره ما يرضى بالظلم ، حمدالله على سلامته
روحت البيت اللي عايشه فيه لوحدي بعد موت بابا وماما ، ودخلت على السرير علطول ، القضيه دي كانت متعبه اوي انا تقريبا مكنتش بنام مش مصدقه انها خلصت على خير ، وكمان حاسه ان انا ان شاء الله مستقبلي هيتحسن بعد القضيه دي ، المهم بلا قضيه بلا بتاع خليني دلوقت ف السرير القمر اللي وحشني ده كان فينك يا راجل من زمان ، نمت وانا لاول مره ابقى مبسوطه بعد سنين كتير عذاب ، من بعد موت اهلي وانا حياتي اتشقلبت 180 درجه طبعا اتشقلبت للأسوأ ، اااه صح انا مقولتش انا مين اصلا ، انا شجن منصور خريجة حقوق ، اتخرجت من 3 سنين بس بابا رفض اني اشتغل عشان كان بيخاف عليا ، يعني القضيه دي اول قضيه ليا وكسبتها انتوا متخيلين ، انا اتمرمطت جامد اوي يا شباب والله عما لقيت مكتب يشغلني ومفيش حد كان بيدعمني بالعكس كأن العالم كله متفق اني هفشل عشان الجملة المعتاده "انتي بنت" مالها البنت يا رخمين يا اعداء النجاح انتوا مالها ، بس انا مهتمتش بكلامهم وده السبب اللي خلاني انجح دلوقت ، اتمرمطت كتير اوي عشان يبقى ليا اسم في عالم المحاماه والحمد لله جابت ب فايده ، وفعلا بعد القضيه دي جالي قواضي كتير اوي وكنت بكسبها الحمد لله وبعد سنتين تعب بقا ليا اسم كبير اوي وبقيت محاميه معروفه وفتحت مكتب كبير وحياتي اتغيرت ومستوايا المادي اتحسن اوي لغاية ما جه اليوم ده ..
- استاذه شجن ، في واحد برا عايز حضرتك ضروري ، وبقوله مينفعش يدخل من غير معاد بس رافض وبيقول الموضوع مهم جدا ومينفعش يتأخر
= اممم طيب اعتذري من اللي عليه الدور ودخليه يا هاجر وربنا يستر
- حاضر
طلعت برا وثواني ودخل الراجل ده ، وكان باين انه متوتر اوي ، متوتر من اي مش عارفه ، ده انا تافهة والله اكيد مش متوتر مني يعني
- اتفضل اقعد يا استاذ ، تشرب اي
= هاا لا ولا حاجه يبنتي ، انا بعتذر عشان جيت من غير م احجز بس الموضوع مهم اوي يا استاذه والله
- طب ارتاح بس ، حضرتك قلقان لي كده ان شاء الله كل حاجه هتتحل ، تشرب اي بس الاول
= كتر خيرك والله بس ممكن كوباية ميه
