_استحالة، استحالة يا سليم اوافق علي الجوازة دي لا يمكن!
_يا امي..
قاطعته_ولا كلمة زيادة، أنتَ اتجننت!، بقى سليم ناجي، الممثل الشاب المشهور والوسيم، بدل ما تدور على بنوتة من الوسط، او بنات رجال الاعمال، رايح تجبلي بنت لا نعرف هي مين ولا أهلها مين!
_يا امي منة على فكرة كاتبة و...
_بس، يعني إيه كاتبة؟!، ما أي حد ممكن يكتبله كلمتين ويسمي نفسه كاتب!
_افهميني يا امي، أنا بحبها، وهي بتحبني، مش فاهم ايه المانع!!
_تعديل بسيط يا سولي، انت بتحبها، وهي بتحب فلوسك...
مجرد ما سمعت الكلمتين دول من مامته، معرفش ايه حصلي، اتجمدت مكاني، دموعي اتحجرت، ولومت نفسي، كانت حكاية معروفة نهايتها من البداية، بس أنا اللي عاندت وقولت أحاول، قولت أحارب يمكن مطلعش خسرانة، يمكن حبنا يكسب!..
رجعت لورا بقهر، وفي طريقي خبطت تحفة وقعت على الأوض اتكسرت ميت حتة، زي قلبي بالظبط...
خرج هو بسرعة، بينادي باسمي بكل لهفة ووراه مامته بتبصلي بكره..
_منة...أنتِ كويسة يا حبيبتي؟
وجه صوت مامته من وراه_هه، من أولها!، أنتِ عارفة يا قمر الفاظة اللي أنتِ كسرتيها دي جبتها ازاي وبكام؟!
اتكلمت بتوتر_أنا...أنا آسفة يا طنط ممكن ادفع تمنها أيًا كان..
_طنط!! متحلميش يا حبيبتي بكلمة طنط دي، أنا هنا سلوى هانم وبس
_ماما!!
قاطعته_بس، كويس إن المزمزيل هنا عشان تسمع الكلمتين دول، ابعدي عن سليم أحسنلك عشان مدمركيش ومدمرش مسيرتك الأدبية، يا حلوة، وبلاش الشويتين دول عليا!
عيوني دمعت من القهر، قرب مني سليم بنظرة أسف_منة، منة أنا....
_متقولش حاجة يا سليم، حدوتنا منتهية من قبل ما تبتدي
أخدت نفس بقاوم دموعي_ أشوف وشك بخير
سيبتهم وخرجت من البيت، وأنا بلوم نفسي بإني مكانش لازم أجرب من الاول، أزاي فكرت إنّ أهل ممثل وابن ممثل مشهور ممكن يقبلو ببنت عادية من عامة الشعب!، أنا اللي كنت غبية من الأول....
_دمه تقيل جدًا على فكرة، والصيط اللي هو واخده دا عشان باباه مش أكتر، ومبيعرفش بربع جنيه تمثيل
كومنت بسيط، على بوست من ضمن اللي بينزلوا على الفيسبوك، كان عن مسلسل جديد بطله سليم ناجي، ابن ممثل مشهور، وطبعا بما إنه ممثل وشاب صغير فكان لازم يبقى حاجة مش موجودة، ممكن يكون وسيم حبتين، بس من جهتي أنا، كنت شايفاه سخيف..
_هو أنتِ مواركيش غيري ولا إيه؟؟
اتنفضت لما شوفت المسدچ جيالي من الاكونت بتاعه..
_إيه دا في إيه، هو دا الأكونت الأصلي؟
_أنتِ شايفة إيه؟
- إيه الاسلوب دا، ما تتكلم عدل يعني مش عشانك ممثل هتعمل فيها بتاع!
-بتاع!، وبعدين أنا جيت جمبك أنتِ بتتلككي؟، أنتِ اللي ماشية ورا كل بيدچ تتريقي عليا، فاضية للدرجادي؟؟
- فاضية!، أنت إنسان مش محترم على فكرة، وبعدين إيه يعني مش عاجبني تمثيلك!، المفروض تتقبل النقد عادي يعني، ما أنا ليا فانز ومعروفة برضه وبتقبل النقد
_أنا عملت ايه؟، ما أنا اتكلمت ورديت بنفس أسلوبك.
- رديت بأسلوب وقح
_وقح؟، أنت عيانة في دماغك حضرتك! ، انتي اللي داخلة تقللي من شغلي!
- أنا؟ فين دا؟؟
بتتبلى عليا
_أنا أعرفك حضرتك عشان أتبلى عليكي، وبعدين أنتِ لسة معترفة على نفسك!
- هو عشانك ممثل يعني هتشوف نفسك على الخلق وتتبلى عليهم، وبعدين إيه يعني لما أنتقدك، ما أنا مشهورة برضه وليا فانز زيك وبقبل النقد عادي!
_أنتِ بغبغان بترددي الكلام!، ما أنت لسة قايلة الكلمتين دول فوق!
- وكمان بتشتمني، لا بقولك إيه أنا غلطانة إني بتكلم مع شخصية نرجسية سايكو بتتلذذ بإهانة الغير زيك
_أنا عملت كل دا!
- ايه بتبلى عليك تاني؟
_لا حول ولا قوة إلا بالله
خلاص يا ستي أنا آسف حقك عليا متزعليش
- بتاخدني على قد عقلي ؟
_يا ستي هو أنا أعرفك!
- بتزعقلي ليه؟
_والله ما زعقت، هي الكتابة بقى فيها زعيق دلوقت!
- الاسلوب بيبين، وأنتَ باسلوبك دا بتزعقلي
_أنا آسف
- خلاص هسامحك
_يااه بهرتيني بكرم أخلاقك
_بس على فكرة التكبر وحش برضه وعدم تقبل رأي الآخر.
_لا حول ولا قوة إلا بالله!
- خلاص بقولك إيه لا تكلمني ولا أكلمك
_دا عقاب كبير أنا مش قده الحقيقة
- بتتريق؟
_لا
- هعمل مصدقاك
شاف المسدج ومردش، اكمنه يعني ممثل مشهور وليه فانز هيتكبر على الناس لااا دا لولا باباه كان هيبقى نكرة عادي، ولا اكمنه قمر يعني بغمازاته دي!
