- اتفضلي يا.. عروسة!
دخلت ووقفوا في وسط الشقة يبصولها ويبصوا لبعض وفجأة قالوا هما الاتنين سوا - هنعمل اية؟
- بصي، انتي هتنامي مع الاولاد هنا
وشاور علي اوضة..
- وانا هنام هنا
وشاور علي اوضة تانية
- واشبعنا انا مع الاولاد وانت في اوضة لوحدك؟
- خلاص تعالي معايا وننام فيها سوا
- اية دا! لا مقصدش، ما تنام انت مع الاولاد؟
- لا دول زنانين وبعدين انتي خالتهم
- وانت عمهم
' واها اللي وصل ليكم صح، اختي اتجوزت اخوه واتوفوا في حادثة، مين يربي الاطفال؟ ووسط خناقات ومناقشات ملقيوش خل غير ان خالة الاولاد اللي هي انا تتجوز عم الاولاد اللي هو هو.. بما اننا لسة متجوزناش ومش بنفكر في الجواز.. '
- انتي بديل امهم
- وانت بديل ابوهم
- وفي اب بيسهر علي عياله؟
- مفروض.. علشان انهاردة اول يوم ومش عايزة نتخانق هسيبك انهاردة بس.. خلي بالك من بس دي وبكرة نظبط حياتنا، فاهم؟
ورفعت صوباعها في وشه.. نزله
- متشوريش بس بالصوباع دا..
***
فتح عينه بضيق من الدوشة، لقي الاولاد بيتنططوا علي السرير حواليه، لسة هيزعق لقيها في وشه بالظبط.. بتبتسم ببرود و..
- اول قاعدة في الابوة.. طول ما انت اب لازم تعرف انك اينما تكون تكون الدوشة وعليك ان تتحمل
- بس مش الساعة ستة الصبح يعني
حركت كتفها بلامبالاة - الاولاد صحيوا بدري نعمل اية؟
- طيب.. دوشة دوشة
وغمض عيونه.. لقي صوباعين علي عينه الاتنين فتح بخضة
- تاني قاعدة.. طالاما فتحت عيونك وشوفتهم حاوليك يبقي تتعدل وترسم بسمة اولها من البحر الاحمر واخرها حدود ليبيا وتستقبلهم بحضن صباحي دافئ
- لما اصحي وافوق
- دلوقتي
اتعدل بتأفف.. رسم بسمة - اوسع
وسعها اكتر وحضنهم - احلي صباح علي حبايب..
- ها؟
سكت ومبقاش عارف يرد
تدخل طفل فيهم ببراءة - ماما هداية قالتلنا من انهاردة انك مش عمو.. واسمك بابا يونس ونقولك بابا يونس.. نعمل كدا ولا هتزعل؟
اتنهد وحضنه جامد هو واخواته - لا ياحبيبي مش هزعل
- يلا يااولاد روحوا اغسلوا اسنانكم
لسة هيتمدد علي السرير - انت بتعمل اية؟
- اية ياشيخة.. عايزة اية تاني؟
- الفطار..
- ماله؟
- بيسلم عليك، اطلع علشان نجهزه سوا
- نعااام!
- تالت قاعدة في الابوة.. لازم تشارك.. لية؟
- لية؟
عدت علي صوابعها - علشان تحس بجو العيلة، وبقيمة الشغل المبذول والتحمل والصبر والعمل تحت الضغط
- العمل تحت الضغط؟ دا فطار!
- بس ياحبيبي.. سيب البيض.. البيض، دا ملح مش سكر بتحطه فين بس، اقفل التلاجة، سيب البيض البيييض
وقبل ما يكمل في بيضة طايرة جت في وشه
- يونس انت كويس؟
- الصبر.. الصبررر
علي ترابيزة الفطار.. قربت تهمس ليه.
- افتح مواضيع
- يعني اية؟
- يعني اتكلم
- شوفتوا سعر الدولار زاد قد اية؟ والطماطم ياخسارة بقيت..
ضغطت علي اسنانها - يونس.. دول اطفال.. اطفال
- يعني؟
- يعني اتكلم في حاجات تخصهم، اسأل عنهم
- اها صح.. حبايبي عاملين اية في المدرسة؟
قالت البنت بحزن - انا مش عايزة اروح تاني، البنات قالولي اني بقيت يتيمة وان بابا وماما مشيوا علشان مش بيحبوني..
قربت هداية منها وحضنتها - مشيوا بس احنا هنا موجودين، مش قولتلك انا ماما الجديدة؟
- قالتلي كمان انكم في اي وقت ممكن تمشوا، ولازم ابقي كويسة وساكتة علشان تستحملوني يااما لو زعلتوا هتضربوني زي مامتها الجديدة
بصتله بتنهد.. كان بيسمع وملامحه جامدة
- وانت ياحبيبي؟
بلامبالاة - مش بحب المدرسة ولا بحبكم واصلا لو مشيتوا زي ماما وبابا ولا هيهمني لاني مكنتش مهم عندهم..
ومشي.. واخته مشيت وراه، بصوا لـ الطفل الصغير
بصلهم ببراءة ومد ايده ببيض - تاخدوا بيض؟
***
- والحل اية؟
- انا كنت عارفة ان نسمة وعبده طريقتهم مش صح وحاولت اقنعها تعدل من طريقتها بس مكانتش بتسمع كلامي
- مشكلتنا اعمق مما تخيلت، كنت مفكر هنهتم ونحاول نعوضهم حنان اب وام، اتاري مكنش فيه حنان من اصله
- يونس الاول لازم نحط النقط علي الحروف ما بينا
- بمعني؟
- الاطفال دول يهموك؟
- مكنتش وافقت بالمهزلة دي لو ميهمونيش
- مش حكاية انك بتلم لحم ولاد اخوك، يهموك لدرجة انك معتبرهم اولادك؟ هتضحي علشانهم، هتستحمل صداع انهاردة كل يوم ومشاكل هتزيد مع الوقت ولا هتمل؟ وحياتك.. انت اكيد كنت راسملها خطة تانية واكيد كان في دماغك ترتبط و..
- اكيد قبل ما اوافق كنت عارف ان الموضوع مش سهل ياهداية، انا موافق ومستعد لكل دا وخططي المستقبلية كلها شغل واعتقد اللي بيحصل مش هيتعارض مع الشغل بل هيساعدني اني اكبر لاني بقيت مسىول دلوقتي عن اربع افراد وبالنسبة للارتباط فأنا دلوقتي متجوز
صرخت - عليا؟
- انتِ.. متجوزك انتي ياهداية، ولو في غيرك فأنتي اللي هتبقي عليها، انتي يادوب متجوزك امبارح!
- اها بحسب.. يبقي اتفقنا
- دا من ناحيتي، من ناحيتك؟
- بقيت ربة بيت اصلي نظمي فهمي
- يبقي هيا لنناضل ونلاقي الحل بقي..
- أول حاجة نشوف الولاد ناقصهم اية..
***
' الحنان.. الأهتمام.. '
- انا بلاحظ زياد كل يوم بيعيط بصوت مكتوم قبل ما ينام
- ونادين.. بتتكلم مع قطتها علي انها امها وبتعملها حاجات اعتقد انها عايزاها
- وزين؟
- لا دا لاقي الحنان كله في طبق البيض اللي قدامه، سيبك منه
- يبقي..
بصوا لبعض وضحكوا ضحكة شريرة..
