Unicode
No.17 တစ်ဖန် ခေါင်းမော့အလာ ၊ သွေးစများက မေးစေ့တွင် စီးကျနေခဲ့သည်။ခေါင်းတုံးဆံတောက်ကေနှင့် အယ်လ်ဖာက No.17 အား ချောင်ပိတ်ညှပ်ထားပြီး မျက်နှာသို့ လက်သီးချက်များ ဆက်တိုက်ပစ်သွင်းနေသည်။ No.17 က ယင်းကို လက်မောင်းမြှောက်ကာဆီးလိုက်သော်ငြား ပြန်လည်တိုက်ခိုက်ခြင်းမပြု။ဟယ့်ဝေ့က ပတ်ဝန်းကျင်ကို တစ်ချက်ကြည့်ရင်း ကောက်ချက်ချသည်။
" ဒီနေ့ No.17 တော့ အသက်ပါ ပျောက်မလားပဲ "
ကုယွင်ချီ : " ကစားသမားအသစ်ကို ကြော်ငြာတာလေ။ လူသစ်ကစားသမား ရောက်လာတဲ့အချိန်တိုင်း ပထမဆုံးထိုးပွဲက No.17 နဲ့ပြိုင်ရတယ် "
ကစားပွဲတစ်လျှောက်လုံး၌ No.17 က လက်သီးချက်ဟု များများစားစား မထိုးသွင်းခဲ့ရပါချေ။ဒိုင်လူကြီးက လှောင်ချိုင့်အတွင်းရှိ စင်ပေါ်တက်လာကာ ရပ်ရန်အချက်ပြလျှင် No.17 က သံမဏိဆန်ခါကွက်စည်းရိုးကို တိတ်တိတ်လေး မှီနားသည်။သွေးနီနီစွေးစွေးက မျက်နှာ၀ယ် ဖုံးလွှမ်းပေကျံနေ၏။ခေါင်းတုံးဆံတောက်အယ်လ်ဖာက No.17 အား လက်သီးနှင့် အချက်ရေအနည်းငယ် ထပ်ထိုးအံ့ဆဲဆဲ ၊ ဒိုင်လူကြီးက ဟန့်တားလိုက်သည်။အပျော်တမ်း ဖျော်ဖြေရေးပွဲတစ်ခုပေမို့ အကျယ်ချဲ့ရန် မလိုအပ်ပါလေ။
ခေါင်းတုံးဆံတောက်အယ်လ်ဖာဟာ စင်မြင့်ထက်က မဆင်းမီ အဋ္ဌဂံလှောင်ချိုင့်အလယ်တွင် မားမားမတ်မတ် ရပ်၍ လက်သီးဆုပ်ကို အောင်နိုင်သူအသွင် လေပေါ်မြှောက်ရင်း ဘေးပတ်ပတ်လည်ကို ဂုဏ်ယူ၀င့်ကြွားစွာ မော်ချီကြည့်လိုက်သည်။လှောင်ချိုင့်ဖျာပေါ်မှာ ခေတ္တ လှဲလျောင်းနေရသည့် No.17 က ဖြည်းဖြည်းချင်း ထထိုင်လျက် ဒုတိယံပိအကြိမ် ပရိသတ်ဘက်သို့ သတိလက်လွတ် လှည့်ကြည့်မိသည်။
No.17 ၏ မျက်နှာက သွေးနှင့်ဆီဆေးတို့ အတူတကွ ပေါင်းစပ်ရောနှောနေသဖြင့် မြင်သူ စိတ်မချမ်းမြေ့ဖွယ်ပင်။ပါးနှစ်ဖက်က မူလရုပ်ရည်ကို မမှတ်မိနိုင်လောက်အောင် အယောင်ယောင်အကိုင်းကိုင်း။လုဟယ့်ရန်က အဋ္ဌဂံလှောင်ချိုင့်အထက် တစ်မီတာကျော်ပိုမြင့်သော နေရာတွင် ထိုင်လို့ အောက်ကိုငုံ့ကြည့်နေခြင်း။၎င်းတို့နှစ်ဦးကြားတွင် အနက်ရောင်ဆန်ခါကွက်စည်းရိုးက ပိုင်းခြားထား၏။အတွင်း၌ ထိုင်နေသော No.17 ဟာ ခြေသည်းလက်သည်းများ ကျိုးပဲ့နေပါသည့် ပိတ်လှောင်ခံ သားရဲတစ်ကောင်အလား။နှစ်ယောက်သား မတြာ၀က်စာမျှ အကြည့်ဆုံမိသခိုက် No.17 က ဦးခေါင်းကို ခက်ခက်ခဲခဲ လွှဲဖယ်သွားခဲ့သည်။
YOU ARE READING
ယွိ့ယန်နန်ကျစ် {မြန်မာဘာသာပြန်}
Romanceမူရင်းဝတ္ထုအမည် - ယွိ့ယန်နန်ကျစ် မူရင်းစာရေးသူအမည် - မိုက့်ရှန်းကျီးနာ Alpha × Alpha လုဟယ့်ရန်(လေတပ်ဗိုလ်မှူး) × ရွှီကျယ်(စစ်ဆေးဆရာ၀န်) Both Gong and Shou are Alpha .
