Unicode
ရွှီကျယ် ရေချိုးပြီး ထွက်လာသော် ဆိုဖာတွင် ထိုင်နေသည့် လုဟယ့်ရန်က ရုပ်ရှင်တစ်ခုကို မေးထောက်ကြည့်နေသည်။၎င်းဘေး၌ တစ်ယောက်ထိုင်စာနေရာအလွတ်လေးရှိပါသေးသည့်တိုင် ရွှီကျယ်က သူ့ခုတင်ဆီ လျှောက်သွားကာ ထိုင်လိုက်သည်။ထို့နောက် ခေါင်းငုံ၍ ဆံပင်ရေသုတ်နေ၏။
" ညစာစားပြီးပြီလား "
လုဟယ့်ရန်က ရွှီကျယ်ထံ လှည့်မေးသည်။
ရွှီကျယ်ဟာ ရေသုတ်ပဝါကြားထဲကနေ ခေါင်းလေးဖော်ဖြေသည်။
" ဟင့်အင်း "
" ငါ ဟိုတယ်စားသောက်ဆိုင်ကို ဆက်သွယ်ပေးရဦးမလား "
ရွှီကျယ် : " မဆက်သွယ်ပါနဲ့ ၊ ငါ မုန့်၀ယ်ခဲ့တာရှိတယ် "
လုဟယ့်ရန် စားပွဲပေါ်က အလွှာအထပ်ထပ် ထုပ်ပိုးထားသောအိတ်ကို ကြည့်လိုက်သည်။
" ဒါလား ? "
" ဟုတ်တယ် "
လုဟယ့်ရန် အရှေ့တည့်တည့် မျက်နှာမူလိုက်ပြီး တီဗွီဆက်ကြည့်နေသည်။ရွှီကျယ်က သူ့ဘာသာသူ ပဝါတစ်ထည်နှင့် ဆံပင်သုတ်နေရာမှ အသက်ပြင်းပြင်းရှိုက်ရှူလို့ လှမ်းမေးသည်။
" မင်းရော အတူတူစားမလားဟင် "
" ရပါတယ် ၊ ငါ ညစာနဲ့ ဗိုက်ပြည့်နေပြီ "
လုဟယ့်ရန်က ယဉ်ယဉ်ကျေးကျေး ငြင်းသည်။
" အင်းပါ "
ခေါင်းသုတ်ပဝါအောက်က ပျံ့လွင့်လာသည့် ရွှီကျယ့်အသံဟာ ဗလုံးဗထွေး။
တစ်၀က်မျှ ခေါင်းခြောက်အောင်သုတ်ပြီးသော် ရွှီကျယ် စားပွဲဆီသို့ ထသွားလိုက်သည်။အိတ်ကို ဖြည်လိုက်၏။ခေါင်းငုံ့ဖြည်နေစဉ် ဆံပင်တချို့က မျက်နှာပေါ် ၀ဲကျလာသည်။ယင်းက ယားကျိကျိ။ရွှီကျယ် လက်တစ်ဖက် မြှောက်ကာ မျက်လုံးကို ပွတ်လိုက်သည်။
အနှီအပြုအမူက မျက်ရည်သုတ်နေသယောင်မို့ လုဟယ့်ရန်က လှည့်ကြည့်လာသည်။
ရွှီကျယ်က မျက်လွှာချထား၏။ထိုအနက်ရောင်တီရှပ်အင်္ကျီအား အကြင်သူ ၀တ်ဆင်သည်ကို လုဟယ့်ရန် မြင်တာ သုံးကြိမ်မြောက်တည်း။ဖြူဖျော့ဖျော့ နှုတ်ခမ်းတစ်စုံက တင်းတင်းစေ့ပိတ်ထားသည်။အနည်းငယ် စိတ်ဓါတ်ကျ ၀မ်းနည်းအားငယ်နေဟန်။လုဟယ့်ရန် ထူးဆန်းရသည်ပင်။ရွှီကျယ်က သူ့ရဲ့စိတ်ခံစားချက်အပြောင်းအလဲ အတက်ကျကို ထုတ်ပြတတ်သူ မဟုတ်ပါချေ။အကြင်သူဟာ ရယ်မောရသည်ကို နှစ်သက်ပုံမပေါ်သလို စကားကိုလည်း များများစားစား ပြောလေ့မရှိပါသည့်တိုင် လုဟယ့်ရန်ကမူ ရွှီကျယ့်ထံမှ နူးညံ့သိမ်မွေ့လှသော ခံစားချက်အနုတ်အသိမ်းများကို အာရုံခံနိုင်ခဲ့သည်။သူ အတွေးလွန်နေခြင်း ဖြစ်နိုင်ပါသည်လေ။
YOU ARE READING
ယွိ့ယန်နန်ကျစ် {မြန်မာဘာသာပြန်}
Romanceမူရင်းဝတ္ထုအမည် - ယွိ့ယန်နန်ကျစ် မူရင်းစာရေးသူအမည် - မိုက့်ရှန်းကျီးနာ Alpha × Alpha လုဟယ့်ရန်(လေတပ်ဗိုလ်မှူး) × ရွှီကျယ်(စစ်ဆေးဆရာ၀န်) Both Gong and Shou are Alpha .
