ذئاب لا تغفر ©️ - الجزء الثاني ( ذئاب لا تعرف الحب ) ✅

الفصـــل الحادي والأربعــــون

الفصل الحــــادي والأربعون :

في منزل تقى عوض الله ،،،،

سمعت فـــردوس طرقــات خافتة على باب منزلها ، فإتجهت نحوه ، وفتحته وهي تغطي نصف شعرها بحجابها المنزلي ..

ابتسمت إبتســـامة هادئة وهي ترى جارتها إجلال تقف أمامها وتحدثها بصوت خافت :

-ازيك يا فردوس

أجابتها بهدوء وهي تضم طرفي حجابها معاً :

-بخير يا حاجة إجلال ، اتفضلي جوا

أومـــأت برأسها رافضة وهي ترد عليها بإصرار :

-لأ خليها وقت تاني

سألتها بإستغراب وهي ترفع حاجبها للأعلى :

-ليه بس ؟

ردت عليها الجارة إجلال بهدوء وهي تشير بكف يدها المجعد :

-أنا مش هاطول

سألتها بإهتمام واضح في تعابير وجهها قائلة :

-طب خير في ايه ، وغوشتيني !

همست الجارة إجلال وهي تجيبها بحذر بـ :

-بصي أنا عرفت إن البت بطة سقطت ، وأعدة عند أمها بقالها يومين

لطمت فردوس على صدرها بخفة وهي تهتف بصدمة :

-يا لهوي

تنهدت إجلال في حزن وهي تضيف قائلة :

-آه .. ملحقتش تفرح يا عيني !

زمت فردوس فمها وهي تتابع بإمتعاض :

-دي لسه صغيرة ، ربنا يعوضها خير

أكملت إجلال حديثها قائلة بجدية وهي ترمش بعينيها :

-يا رب ، المهم يعني أنا هاروح أخد بخاطرها كمان شوية

أومـــأت فردوس برأسها موافقة إياها وهي تضيف بإقتناع :

-أه ومــاله ، واجب ولازم يتعمل ! دول جيرانا !

-بالظبط

ثم أردفت قائلة بنبرة ممتنة وهي تشير بيدها :

-كويس كمان إنك قولتيلي ، وأنا شوية وهازورها

-طيب ..

ثم تابعت بتوضيح وهي ترفع حاجبيها :

-تيجي بس تقى من برا، وربك يسهلها

وضعت إجلال إصبعيها على طرف ذقنها وهي تسألها بإهتمام :

-يا رب أمين ، ألا هي إزيها الوقتي ؟