كملو ووصلات الوقت وخرجو بجوجات وهي تابعاهم كادعي معاهم وهوما تايوصيوها باش تسد عليها الدار وماتحل لتا حد وبلي عندهم السوارت ..
شدو طاكسي حط كل وحدا فين غادوز ودارو مع بعضياتهم لي سالات اللولة تستنا الاخرى باش يرجعو بجوج، داز الامتحان فأجواء مزيانة وإيمان جاوبات مزيان وخرجات راشقة ليها وبكري من الفوق وقفات قدام لافاك متكية على الحيط كاتسنى فليليان تسالي وتصوني ليها، بقات حاديا لي غادي ولي جاي ورجليها دايرا وحدا على وحدا ويديها فجياب مونطوها البني وشعرها طالقاه ودايرا مايكاب خفيف وعينيها بحال القطة كي مسميها خوها، ماكاينش لي تجي عينيه عليهم ومايسهاش فيهم ولا ينباهر بجماليتهم، جاها الملل وجبدات تيليفونها تاتلعب فيه تا شافت خيال قدامها وهزات عينيها فالشخص وهي تفافا وتقادات فالوقفة ..
إيمان : اا سلطان
سلطان (بابتسامة) : اهلا، صباح زين هادا لي شفتك فيه
إيمان (بخجل) : هه سافا عليك؟ غبرتي
سلطان : هاحنا غير الدنيا ومشاغلها، نتي هانيا؟ كي دوزتي
إيمان : الحمد لله مزيان، الاسئلة كانو فالمتناول
سلطان : اوا مزيان الالة هادشي لي بينا، مانعرف داك القرد تاهو كي دوز، داخل ماحافظ والو وباغي ينجح
إيمان : ماتعرف يجيبو، كلها وزهرو
سلطان : هههه فلافاك زعما؟ موحااال
إيمان : كلشي توقعو منها
سلطان : ليليان تاهي مدوزة اليوم؟ حيت تلاقيت مع أمير الصباح جاي
إيمان : اه هي فلانيكس وكانتسنا فيها نيت تعطلات
سلطان (شاف ساعة) : مازال نص ساعة باش يسالي الوقت
إيمان : اه يمكن حيت خرجت بكري داكشي علاش
سلطان : اممم شنو بان ليك نمشيو لديك الكافي نجلسو فيها بينما خرجات؟
إيمان : واخا يالاه
دار ليها الطريق وتمشاو بجوج وهي متوترا والمشية تلفات ليها، قطعو الطريق وجلسو فالكافي وطلبو شنو بغاو وجلسو تايدويو وهي مرا مرا تسرح فيه، كان وسيم وجذاب لدرجة خلات قلبها يضرب بجهد وماكرهاتش تقرب ليه كثر وتبقا غير تأملو، وفاش كايضحك كاتلقا راسها كاضحك تاهي ماشي معاه وانما لضحكتو هو، قاطعهم صوت تيليفوناتهم بجوج ..
سلطان : هههه قد قد (جاوب) ألو القرد، هانا فالكافي لي قدامك
إيمان : وي ليلي أنا فالكافي لي قدام لافاك
قطعو معاهم وشويا وقفو عليهم بجوج ليليان وأشرف لي تلاح فوق الكرسي وسرح رجليه قدامو وليليان شافت سلطان وفرحات وسلمات عليه وجلسات قدامو ..
سلطان : سافا ليليان
ليليان : بيخير ونتا؟
سلطان : الحمد لله امدرا؟
ليليان : مامتأكداش منو أنا بعدا، حسيت بحالا خرجت ع الموضوع
سلطان : علاش مامراجعاش مزيان؟
ليليان (الصمت)
سلطان (لخوه) : ونتا؟
أشرف : داز طوب، لقيت واحد الساطة سوفاتني
سلطان : اييه اسيدي شكون بحالك
أشرف : اوا شتيي
إيمان : اهاه شي يحفظ ويسهر الليالي وشي يلعب تا يوصل الامتحان وينقل ويجيب نقطة باردا كثر من لي موجد
أشرف : حسدتيني ولا؟
إيمان : هه شلا علاياش نحسدك، على الدماغ الخاوي وتانقالت ومولاها عمرو يربح ونتلاقاو فالكونكورات ونشوفو اش تحط ليهم تما
أشرف : غانخوي ليهم البزطام الغزالة ونطلع عليك 😉
سلطان : وفين المنفعة اصاحبي؟ كي قالت غاتبقى خاوي والبلاد لي ضايعة فهاد الحالة
أشرف : البلاد غاتسنا غير أشرف يضيعها ههه راها ضايعة خلوووق
إيمان : اوا حيت لي بحالك لي ضيعوها اسي وشادين بوسطات مايستاهلوهمش فحين كاينين ناس كابابل ومالقاو الفرصة
ليليان : واصافي تانتوما نساو هاد النقاشات الخاوية ولي مكتابة ليه شي حاجة غايوصلها
إيمان : حنا غير تانوضحو للأخ باش مايمشيش غالط
أشرف : هه شكرا ع التوضيح الاخت
سلطان : شنو بان ليكم فشي خرجة جماعية فاش تساليو الامتحانات ومنها ترتاحو من الضغط وتبدلو الجو
إيمان : صراحة ماكرهتش
ليليان : تانا موافقة غير هو ديروها فالنهار اللخر حيت بعدو موالفين نرجعو للدار وتانجلسو تما ديك السمانة لي كاتفصلنا على السوميستر التالي
سلطان : اوكي، من بعد ونزگيو ومنها نقولوها تا لأمير
ليليان غير سمعات صوتو وتبدل فيها اللون وإيمان تاهي حسات بيها ..
إيمان : ليلي مشينا؟ ماجاتش نتعطلو على ياقوت خليناها بوحدها
أشرف : شكون هادي؟
إيمان (بهمس) : دخول الصحة فالعظام يخ على بشر
ليليان : هادي بنت عمتنا جات من البلاد تونسنا
أشرف : شي تيتيزة هادي؟
سلطان (حمر فيه) : أشراااف (للبنات) اممم اوك يالاه نوصلكم
ليليان : لا لا ماكاين لاش غانشدو طاكسي حسن راك عارف الحومة
تفهمها وتسالمو معاهم ومشاو خلاوهم هوما جالسين وأشرف طلب ماياكل، شدو البنات طاكسي ورجعو فحالهم، مع الدورة للدار بانت ليهم الجوقة مجموعة تما والغوات، شافو فبعضياتهم باستغراب وبداو كايقربو وصوت ماخافيش عليهم تايعرعر، شويا بانت ليهم ياقوت مگفضة على جلايلها وشادا واحد جارتهم شانقا عليها بيد واليد الاخرى شادا بيها عروستها والناس تاتفرج تاحد ماداخل بيناتهم ..
إيمان : واش هاديك ياقوت ولا كانتخايل؟
ليليان : واللهيلا هي 😮 اويلي الموصيبة اش دايرا
إيمان : لا صافي دابا كملات ..
YOU ARE READING
معا حتى النهاية (المراهقة الفاتنة 3)
Romanceالجزء الثالث والأخير من القصة الشهيرة المراهقة الفاتنة .. جزء رومانسي درامي بامتياز
