ضرباتو الفيقة مع الفجر، حل عينيه وطل عليها وهي بين يديه دايرا عندو ومعنقاه بحال يلا حسات بلي راه حداها أو تاتحلم أو مازال فبالها عايشين مع بعضياتهم، تسل منها بشويا وقاد ليها راسها فوق المخذة وهز عليها الغطا حيت كان البرد محرك شويا وهي مصيفة، باسها فراسها وناض من حداها قاد حالتو وخرج من البيت ومن الدار كلها وخلا قلبو معاها، داز للجامع ديال الحومة توضى وصلى مع الجماعة وطلب الله ودعاه باش يفرجها عليه ويسمح ليه ويرجع المياه لمجاريها بينو وبين مرتو، سلم وخرج ركب فاللوطو ديالو للأوطيل فين نازل، يرتاح شويا ويشد الطريق لدارو حيت يومين لي عطاوه فالخدمة سالات وبدون فائدة ..
#عند البنات بانت الشميسة وصونا المنبه وفاقت إيمان هي اللولة، واقفة عند البيت ومترددة تدخل، خافت يكون خوها مازال حدا مرتو وحشمات دخل عليهم وفنفس الوقت خايفة لاتفيق ليليان وتلقاه حداها وديك الساعة الصباح غايدوز مكفس وغاينوض الصداع ثاني، بقات تما تاتفرك يديها تا تهز الريدو وطلات منو ليليان تاتفوه وتجبد، لقاتها قبالتها ..
ليليان : إيمي، فقتي قبل مني ماعرفت كي طرا وجرا
إيمان : هاه؟ اه اه
ليليان : مالك؟
إيمان : واااالو ونتي بيك شي حاجة؟ فقتي مالقيتي حداك حد
ليليان : استغربت لي مالقيتكش، غادا لافاك؟
إيمان : اه ضروري عندي حصة أخيرة فواحد المادة مايمكنش نضيعها راكي عارفا بعض الاساتذة تايرميو المفاتيح فاللخر
ليليان : اه بصح، أنا غانبقى غير فالدار ماعندي والو هاد النهار حيت كلشي كمل
إيمان : هي غانمشي بوووحدي
ليليان : غاتصبري ماعندك ماديري، كنت غانمشي معاك نونسك ولايني هاد الصباح حاسا براسي ماشي هي هاديك وماعندي الخاطر لوالو
إيمان : اوك حبيبا هانيا جلسي رتاحي مع راسك وكملي حفاظتك
دخلات إيمان للبيت وهي مستغربة لي خوها بات ماصبح، ولكن عجبها الحال فاش مابقاش تاشافتو ليليان، هزات تيليفونها تشوف الساعة وهي تلقا رسالة منو كاتب فيها "شكرا وبسلامة عليك" عرفاتو رجع فحالو ..
إيمان : اوووفففف بجوج بيكم تاتعذبو وأنا ماقادرا ندير تاحاجة باش نصالحكم، موقفك اخويا صعييب
ليليان بقات غير فالدار وإيمان مشات لافاك وهي كاطلب باش مايطلعش ليها أشرف فوجهها وداكشي لي كان ماشافتوش ولكن فاش كانت خارجا من المدرج وقفاتها نفس البنت لي كانت معاه ولي وقع بسبابها المشكل ..
البنت : عافاك ممكن دقيقة من وقتك؟ بغيت ندوي معاك
إيمان : وي ختي شنو؟
البنت : نمشيو للكافي حسن هنا الصداع ماغانهضروش براحتنا
إيمان : واخا غير دغيا ماعنديش الوقت بزاف
مشاو بجوجات للكافي وجلسو تما وإيمان رافعة حاجبها وتاتسنا الاخرى تدوي ..
إيمان : كانسمعك
البنت : أكيد عقلتي عليا
إيمان : وي ومن بعد
البنت : احم أنا بغيت ندوي معاك نيت على داكشي لي وقع ديك المرة بيناتنا بثلاثة
إيمان : قولي بيناتكم بجوج شنو دخلني أنا وسطكم؟
البنت : أشرف عاود ليا اش كاين وأنا بقا فيا الحال الصراحة لي كنت سبب الخلاف بيناتكم، ختي نجيك للصراحة، أنا وياه بصح خرجنا واحد النهار ولكن كنا مجموعة بعني ماخرجناش بجوج الراس فالراس كانو معانا صحابو وراك عارفاهم مزيان منهم أميرة، قضينا داك النهار وضحكنا ونشطنا فيه وبدلنا الجو وأشرف كان يعاملني عادي ويضحك معايا وأنا نويتها فشكل، نويتها اهتمام من طرفو وأنه باغي يربط معايا علاقة، هو ماقالهاش نيشان وماطلبهاش مني ولكن عقلي صورها ليا فتصرفاتو لي هي عندو عااااادية، الخطأ كان مني أنا نتيجة تفكيري الغلط وهو ماعندو ذنب أنا لي شفت بعيد
إيمان : لحد دابا مازال ماعرفت لاش تاتعاودي ليا أنا هادشي وشنو علاقتي بيه؟
البنت : أشرف كايبغيك اختي وأنا وهمت راسي بحاجة ماكايناش وصدقت مطيحة بنفسي قدامو وخالقة ليكم مشكل بجوج، وي ماننكرش بلي بقا فيا الحال حيت قمعني قدامك ولكن رجع بعدها واعتاذر مني وشرح ليا اش كاين وتبين أن لافوت مني فالأصل، أنا بغيت غير نصفي خاطرك من جهتو وصافي ونعتاذر منك على سوء الفهم لي جرا
إيمان : هه قراك مزيان شنو تقولي ليا
البنت : لا لا والله اختي ماقراني شي حاجة ولافراسو مايتعاود، أنا جيت هضرت معاك من نفسي حيت بقا فيا وهو انسان ظريف بزاف ومايستاهلش وأنا كنت نشوفو كيفاش كان يتبعك ويطلب السماحة قدامنا كاملين ونتي رافضة وقلت مع راسي يلا شرحت ليك الواقعة نتي غاتسامحيه
إيمان : ماشي غير هادشي سبب المشكل بيناتنا اختي كاين بزاف غير هادشي، احم على كل شكرا ليك وسمحي ليا دابا غانمشي بسلامة
خلات البنت جالسة مبرقة عينيها وتاتقول فنفسها "ايخ شحال حاسا براسها" 😂 ..
ونمشيو #للدوار، فين مربعة فرحة قدام الماريو تاطوي فالحوايج وعقلها غايب لدرجة راجلها دخل للبيت ولقا السلام ومارداتوش عليه، حط جلابتو فوق الفراش وقرب عندها رافع صوتو بسميتها تا تكلمات ..
مراد : فين غارقا؟ مالك هاد اليامات غير ساهية وتفكري اش كاين
فرحة : كاينا واحد الحاجة شاغلا بالي امراد
مراد : شنو هي؟
فرحة : ليليان حاملة
YOU ARE READING
معا حتى النهاية (المراهقة الفاتنة 3)
Romanceالجزء الثالث والأخير من القصة الشهيرة المراهقة الفاتنة .. جزء رومانسي درامي بامتياز
