معا حتى النهاية (المراهقة الفاتنة 3)

البارت 16

ليليان : اه اجدي وقاليا بغا فأقرب وقت يجي يخطبني من دارنا
جلال : مقتانعة بيه؟
ليليان : بزاف، ياك كنت نعاود ليك عليه
جلال : اه ولكن را الزواج هادا يعني خاص الواحد يكون مقتانع مية فالمية ودارس قرارو مزيان ونتوما ابنتي مادازش بزاف باش تعرفتو يعني ماخاصكمش تزربو، فكريني هاد الولد اش تايدير فحياتو؟
ليليان : تايقرى اجدي فكلية الطب
جلال : يعني مازال تايقرى وشحال بيناتكم دالسن!!
ليليان : عاماين هاكاك
جلال : باقي صغير تاهو، مازال الحال على الزواج فوضعكم نتوما وباك على ماقلتليا مانظنش يوافق
ليليان : ولكن اجدي هوما لاباس عليهم وعندهم شركة كبيرة يعني يخدم ويقرا فنفس الوقت عادي، وعائلتهم معروفة فالبلاد وأي واحد يتمنى يتناسب معاهم
جلال : شنو اسم هاد العائلة؟!
ليليان : اسمهم النجاري اجدي، عائلة غنية بزاف وسلطان هو الوريث ديالهم يعني كلشي ديالو سوا كمل قرايتو وخدم ولا ماخدمش غايلقى الشركة ديالو كاتسناه والفلوس كذلك
جلال سمع الكنية وسكت شحال ساهي قدامو وباينا فيه بحال يلا كايتفكر شي حاجة، ليليان شافتو سكت واستغربات وبدات تحرك فيه من يديه تا نتابه ليها ..
ليليان : جدي فين سهيتي؟
جلال : والو ابنتي، قوليا هاد الولد عندو شي خوتو؟
ليليان : اه عندو خوه صغر منو اجدي ياك قلتها ليك من قبل قلت ليك هو أخ زميل ديالي وعن طريقو باش تعرفنا
جلال : ااااااه صافي مزيان، مهم ابنتي يلا فيه الخير الله يقدمو ليك وفكري مزيااااان ودوي تا مع والديك وعلميهم بشنو كاين
ليليان : اه هادشي لي غاندير، جدي فيك الجوع؟ واش شربتي دواك
جلال : لا كلت قبل ماتجي والدوا تا نبغي نعس ونشربو، ناوي نبقى معاك قبل ماتمشي
ليليان : لا أنا غانبات معاك هاد الليلة
جلال : بصح؟ احسن ماغاديري
حركات ليه راسها وابتاسمات وبادلها الابتسامة، تكات راسها على صدرو معنقاه وهو حاط يديه على شعرها كايملس عليه ..
وفجهة خرى عند البنات، مخشيين بجوجات فالفراش ومعانقات، حاطين راسهم على بعضياتهم وعينيهم حمرين مدمعين والألم واضح على ملامحهم، منين خرجات ليليان ناضت إيمان عند ياقوت جراتها وخشاتها معاها فالفراش وبدات تسكت فيها تا نجحات فالأمر ظاهريا أما القلب يعلم بيه مولاه ..
ياقوت (بصوت مبحوح) : فين مشات ليليان؟
إيمان : دبر لراسها تمشي فين بغات
ياقوت : لا اخيتي علاش دبر لراسها؟ تخرج فهاد الوقت تسطات وأنا وصاتني مرات خالي عليكم، ضوري ليها اختي شوفيها فين مشات وگوليها ترجع دابا
إيمان : موالفة تخرج هاد الوقت وترجع من بعد غير نسايها نتي دابا
ياقوت تنهدات تنهيدة عميقة وتكمشات ..
إيمان : علاش ماقلتيش ليا تاتبغي خويا؟
ياقوت تصدمات بالسؤال ماكانتش متوقعاه وهي تقفز جالسة ومخرجة عينيها فإيمان، هاد الاخيرة لي تحركات من وضعيتها بهدوء وجلسات مقابلة معاها كاتشوف فيها ..
إيمان : مالك تصدمتي؟ باينا للعمى اصاحبتي وأنا ماكنتش متيقنة مية فالمية تا لهاد الليلة، تاتبغيه بزاف ياك؟ علاش ماعاودتيش ليا كنت نعاونك
ياقوت : تعاونيني 😢 كيفاش هاديري وهو ماكانش معبرني ولا دايها فيا اخيتي؟ أنا تعلگت فين تفلگت وشفت الفوووگ، نسيت راسي، شوفي حالتي اخيتي واش هو هايديها فوحدة بحالي؟ السيد جا للمدينة قرا فيها وخدم وشاف بنات شكال ونواع وهايجي عدي أنا يبغيني هه شفت بعيييد
إيمان : وعلاه مالكي نتي كي جاك راسك؟ زوينة وألف واحد يتمناك ونتي حسن من هادو لي هنا بمية درجة، وبنت داركم وصريحة ولي فقلبك على لسانك والنفاق والكذوب ماتعرفيش ليهم الطريق، طبيعية فكلشي
ياقوت : وعلاش لي ماشافش فيا؟
إيمان : ياقوت شوفي عارفا هادشي صعيب عليك بزاف ولكن خاصني نقولو ليك وسمحي ليا واخا غايضرك ولكن ضروري تعرفي حيت طال زمان ولا قصار غاتسمعيه غجهة خرى اللهم مني أنا ونحدو هادشي هنا وكلشي مكاتيب .. خويا أمين من صغرو وهو تايبغي ليليان وكلشي عارف هادشي تا من عمتي خديجة عارفا، مشاعرو كانت مفضوحة من جهتها وأنا مازال مافهمتش كيفاش نتي غفلتي على هاد القضية ومارديتيش ليها البال
ياقوت : هه شكون لي گاليك مارديتش البال؟ راني عايقة من شحال هادا ولكن اخيتي القلب ومايريد، وتانا كنت حاضياهم وفاش شت بت خالي ماباغاهش زعمت وفرحت وگلت اليوم ولا غدا ينساها وزايدون داكشي هير ديال الصغر والواحد فاش يكبر مايبقى دايها فيه ولكن كنت غالطة، يلا نسيت أنا تاهو راه نسا
إيمان : كايبغيها اختي ومازال ﻵن تايبغيها وماعمرو نساها هي لي مابغاتوش
ياقوت : وعلاش باغي يتزوج؟
إيمان : بغا ينساها؟ بغا يدخل لحياتو لي تنسيه فيها اختي، فراسك واحد الحاجة قد مابقا فيا الحال من جهتك قد مافرحت ليك اختي حيت ماغاتكونيش نتي هي دك بنت الناس لي غايتزوج بيها خويا باش يديرها وسيلة ينسا بيها وحدة اخرى كنتي غاتعذبي بزااااااف اياقوت، صعيبة تعيشي مع راجل فقلبو مرة خرى صعيبة بزاف، فاش يدوي معاك ولا يضحك معاك ولا حتى يعاشرك يتخيلك هي ويعاملك على أساس نتي هي ..