معا حتى النهاية (المراهقة الفاتنة 3)

البارت 54

تأفأف وهز مخذة دارها على وجهو باش تفهم راسها وتقلب عليه ساعا ماتعاتقاتش معاه وحطات ركبتها على السرير ونترات ليه المخذة رماتها للأرض ..
ليليان : أمين ماتبقاش دير ليا هاكا، فاش نبغي ندوي سمعني وجلس تناقش معايا ماشي تعطيني بالظهر وتسد وذنيك ماتانديرش معاك أنا هاكا
أمين : سوقك خاوي ا ليليان، هضرتك بايخا ماعندها معنى
ليليان : يااااك
أمين : اييييه، مي هاديك وعاد دخلات مايمكنش نجري عليها، ديريها فمقام مك وتعاملي معاها زوين وغاتشوفي بلي ظنك فيها غالط، ماشي گالت ليك جوج كلمات وتجننتي
ليليان : دابا هادوك جوج كلمات هاا؟ كلمة الحق گولها كي جاك طيابي؟
أمين : زوين زوين الله يعيطك الصحة، واخليني دابا نتكى شويا نتسنط لعظامي وسيري نتي جلسي معاها حشومة تخليها بوحدها، أجي داك البيت خمليته بعدا؟
ليليان : هادشي فاش فالح غير واش خملتي واش طيبتي واش زبلتي ففف قرب يطلع ليا هادشي فالراس
أمين : وغانهرسو لمك أنا داك الراس يلا مانضتيش من حدايا وزميتي فمك، شتك بيتي طلعي فوقي تاني
ناضت من حداه تاتنتر وخرجات من البيت للصالون عند الاخرى لقاتها مجبدة فوق مخذة وحالة عينيها فالتلفازة قدامها، جلسات بعيدة عليها حاطا مخذة فوق رجليها وهازة يديها تاتشوف فظفارها ..
نادية : ماوليت نشوف والو فهاد الخرشاشة، الغبرة ضبباتها
ليليان : نعام اخالتي دويتي معايا
نادية : لا مع الحيط لي وراك، شكون كاين هنا من غيري يانا وياك
ليليان (بصوت خافت) : ياربي تصبرني
نادية : شنو راك تگمگي تم سمعيني نشوف
ليليان : والو اخالتي
نادية (بخفوت) : يخويلك الجناب نشاء الله تي وديك المعوقة دمك
ليليان : خالتي نجيب ليك تغطاي؟
نادية : يلا فهمتيها راسك مزيان
جمعات ليليان الوقفة ومشات جابت ليها مانطة سرحاتها فوقها غطاتها ومشات هي للسداري لاخور تكات فيه تغمض عينها شويا ..
أذن العصر وفاق أمين توضى وصلى ودخل عندهم للصالون لقا كل وحدة ناعسة فجهة وليليان مكمشة بلا غطا ومعذبة، قرب عندها بشويا بدا يفيق فيها تا حلات عينيها ..
أمين : أنا خارج دابا للقهوة بيتي شي حاجة من برا؟
ليليان : جيب ليا معاك دوليبران، راسي ايطرطق
أمين : واخا، ليليان غانخليكم بجوج ديري عقلك الله يرضي عليك
ليليان : شتيني بلا عقل ولا؟
أمين : ماغانتعاطاش معاك فالهضرة دابا گدامها، غانبقى نحسب ليك تاتمشي هي ونتفاهم معاك
خنزر فيها وخرج وهي ماضت تاتفوها وتجبد فيديها للفوق، صاوبات المخذة بلاصتها ومشات هزات الطابليت ديالها ودخلات للكوزينة تاتقلب على شي كيكة زوينة تصاوبها، نادية ضرباتها الفيقة وحيدات عليها الغطا وناضت، سمعات الحس فالمطبخ ودخلات عند عروستها ..
نادية : تي شسايرا ديري
ليليان : تانقاد فواحد الكيكة اخالتي
نادية : اييه گادي گادي نشوفوها كي هاطلع، دوا العصر؟
ليليان : دواا اخالتي گبيلة
نادية : اوا ردي واحد المقيريج ديال الما يسخن باش نتوضى
ليليان : دخلي اخالتي للدوش را فيه الما سخون
نادية : وا زيدي مديه ليا فشي سطلة
وداكشي لي دارت ليليان عطاتها شنو بغات توضات ووراتها القبلة فين جات وخلاتها تصلي ورجعات تكمل شنو تادير، خلطات الكيكة وخشاتها فالفران تا وقفات عليها تاني نادية تاتبلق فالكوزينة وتحل البلاكارات تشوف وتهز الماعن تقلبهم وترون وليليان غير حاضياها وساكتة ..
نادية : ديور الحادگات، تي هاد الماعن عمرك حكيتيهم؟ ودوك البلاكارات گرب الدود يخرج منهم وهاد الثليليجة ريحتها عطات
بدات تعيب ليها وتجبد وتحط ليها قدامها، دخلات ليها الشك فعينيها لاتكون ماتاتشوفش مزيان، كان كلشي نقي وهي رجعاتو موسخ مگلگ على حد قولها ..
نادية : معيشة ليا ولدي فالخنز والطوط
ليليان : فين باليك الخنز؟ كلشي نقي ومرتب ومصاوب عمري خليت داري موسخة من نهار دخلت ليها وتا ولدك عمرو قاليا ولا عيب ليا شي حاجة وكون كان بصح الوسخ كي تاتقولي كان هو اللول دوا
نادية : هاي هاي هااااي على بنت المدينية تي شتك تطلقتي وتسيبتي عليا منين خرج ولدي هااا گدامو تمسكني ودابا عريتي على نيابك
ليليان : أنا غير قلت ليك
نادية : تگاليك نشاعالله يا تريكة شفارة، تي ومك طينة وحدة دورو بالرجال وتبوهلوهم بالسحر وترجعوهم خواتم فصباعكم ولكن أما بت نبت ليك هنا مانخليكش تلعبي ليا بولدي كي دارت مك بباك
فاش سمعات سيرة مها ماصبراتش ووقفات قدامها ..
ليليان : إلا ماما ماتجبديهاش، خليني محتارماك عافاك وفوتي سيرة ماما، شنو دارت ليك تادوي عليها بالخايب وشنو درت لك أتا تاتعامليني بهاد الطريقة؟
نادية : دار ليك المعفونة خانزة الگارسون
ليليان : ياكما نسلتو ليك نعطيه ليك تشميه وتشوفيه واش خانز ولا لا؟
رمات ليها هاد الجملة ودازت فيها خرجات من حداها لاتصدق مرتاكبة فيها جريمة وخلاتها اطرطق، والسم بدا يبان ليها فوجهها وعينيها ولاو بحال ديال الشيطان أعوذ بالله، وسيفتها تمسخات فديك اللحظة وهي جالسة تحلف عليها فخاطرها وتوعد ليها بالعذاب، گفضات كمايمها ومشات للماعن ..