فالبلاصة لي حبينا وعشقنا وعشنا فيها أيام مرة وحلوة مع أبطالنا، فالدوار لي تولدات فيه قصة حب وعشق وهيام وترجمات لعائلة كبيرة .. اليوم كان عيد الأضحى من الأعياد الدينية لي تايتحمعو فيها الأهل والحباب، واليوم تجمعات عائلة الخالدي كاملها كبيرها وصغيرها، رجالها ونساها، بناتها وولادها، تجمعو فالدار الكبيرة والصگايط معلقين كلها جاب خروفو ذبحو ولي تشارك وذبح بگرة، والدخاخن طالعة واللغا والضحك طالع ومسموع منين ومنين ماعيناهم 😂، العيالات دايرين يديهم تايقادو بولفاف والرجال مشاو غسلو حالتهم من الدم وبدلو حوايجهم ولبسو البلدي لي مشاو صلاو بيه ورجعو جلسو وسط الدار تايتسناو الماكلة تحط ليهم وسي مراد مترأسهم بهبتو وتايشوف بعينيه فالجمع الكبير لي ولا، كان فقط بناي فقير ساكن بوحدو فبراكة فحومة شعبية مرة ياكل مرة لا، تايطيب لراسو ويصبن لراسو وينعس وحدو والتراب يسرسر عليه، عمرو ظن أنه غايلقا بنت الناس ويتزوجها وتغير حياتو وتولي هاكا، عمرو حلم بعائلة كبيرة بحال هادي لي قدامو ولكن ربي كبير تايبيتها فشان ويصبحها فشان وهو عظيم الشان، هز عينيه للسما وحمد الله وشكرو على نعمو عليه، فعلا صدق فاش قال أنا عند ظني عبدي بي وهو ظن بيه الخير وحصل عليه، دعاه واستاجب ليه، حزن وفرحو وبكا وضحكو، دور عينيه لملكة قلبو لحبيتو لمراتو ولشريكة عمرو، لقاها تاهي كاتشوف فيه كأنهم حسو ببعضياتهم وفكرو فنفس الحاجة وفنفس اللحظة، تبسمات ليه وحركات شفايفها بكلمة "كانبغيك" لي قراها دغيا وضحك، حيت واخا ولاو عندهم الحفايد باقي حبهم كبير وصامد وقوي ..
قادو العايلات الماكلة وعمرو أتاي وحطو قراعي تالموناضا والشلايض على الاشكال وتجمعو على الجلسة لي دارو ملاصقين الطبالي والكراسا بحال شي قصر داروه فالواقع ومراد وفرحة مقابلين لبعضياتهم ووسطهم ولادهم وحفايدهم وخوتهم ولالة نجاة ونجلاء وحليمة وفؤاد تاهوما معاهم لي عجباتهم اللمة ومابقاوش يفلتوها ..
أمين جالس جنب مرتو وبنتو ريحان لي دارت العام فحجرو وليليان هازا ولدها ذو الشهراين فيديها "علاء الدين" (بوك لأميرة القصر) معنقها من كتافها ومحني على وذنها بكلمات الحب والغزل وهي تاضحك فرحانة بيه وفنفس الوقت حشمانة من باها لي حاضيهم وفجنبهم أشرف وإيمان لي حاملة تاهي بربع شهور وعرفات عندها بنيتة وقررات تسميها لمياء، وقبالتهم سلطان وياقوت لي كرشها مقنبلة قدامها قريبة لشهرها وصدق احساس سلطان وعرفو أنها غاتولد وليد وغايسميوه يوسف .. وحداهم توام يحيى مقابلين لتوام مراد ولي باينا شي قصة غاتكون بيناتهم مافيهاش المزاح 😉 .. وادريس تاهو جنب مرتو الباتول لي مامشا تاخذاها ودار عرس زوين ومراد مول ليه مشروع ديالو لي عبارة عن ورشة نجارة الحرفة لي طالما حلم يديرها وباه حققها ليه وخلاه يعتامد على راسو ويقد بمرتو وولادو لي غايجيو .. كملو ماكلتهم وناضو كاملين ناويين يخرجو لجهة الواد يتنزهو، خرجو كاملين سابقين بولادهم وتوخرات فرحة ومراد وبيناتهم محمد علي لي ولا يتمشى على رجيلاتو وشدا فيهم بجوج ..
مراد : داكشي لي بغيت من عند الله عطاه ليا وحياني تاشفت حفادي وفرحت بيهم وفرحت لولادي تاهوما
فرحة : بصح، الوقن دغيا داز وغير البارح تزوجت بيك وماكناش حاملين بعضياتنا وشوف دابا فين ولينا والعائلة لي كبرات كثر وكثر
مراد : الحمد لله
فرحة : غانبقاو هاكا ديما ان شاء الله عمرنا نتفرقو وغانبقاو يد وحدة تا للنهاية
بقاو ورا ولادهم متبعينهم كيفاش فرحانين وكل واحد شاد فنصو الثاني معنقو وتايضحك معاه ..
وعلى هاد المنظر نزل الستار وطلعات الكتبة وانتهت قصتنا 😍
#النهاااااااااية
✔قصة كملات عام ودابا وصلات لنهايتها .. ماسخيتش بيكم ولكن لكل بداية نهاية .. نتمنى تكون نالت اعجابكم وسمحوليا زربت هاد الزربة ولكن كنت مضطرة، امتحانات بداو وغايخصني ناخذ وقت للحفاظة وتانتوما كذلك فيكم لي مازالو يقرا مابغيتش نبقا شاداكم بزاف وفكل مرة نغيب عليكم .. نبغي نشكر كل المتتبعات لي كانو ياخذو من وقتهم ويقراو حروفي .. كل وحدة تابعاتني من اللول تا اللخر وعجباتها فعلا شرف كبير ليا 😍 .. هاد القصة غاتبقا فالذاكرة وعمرها تنسى عرفاتني على ناس غزالين والله يعمرهم ليهم الدار وفيهم لي ولاو قراب ليا بزاااااااااف #إيمان ختي الكبيدة ديالي كانحماق عليك بزااااف الملهمة ديالي ههه وراها عاوناتني فالاجزاء #لمياء كذلك حبيبا ديالي ولي كانت تعاوني فينما نطيح فمشكل مع شي وحدة وتوقف معايا بغيت ربي يفكك على خير ويخليللك وليداتك وتفرحي بيهم ان شاء الله .. #هند الاستاذة ديالي لي كانحتارمها وكانعزها بزاف وكانبقى ديما نتسنا تعليقاتها ليا لي كانو يعاونوني فالقادم .. #ليلى ختيتو الغزالة واخا ماتانهضروش بزاف ولكن فالقلب والبال ديما 😘 .. كااااع بنات الجروب وخاصة المتبعين ديالي ولي محسوبين وعارفاهم مزيان كانحبكم ونمووووووت عليكم والى اللقاء ❤
تسناو القصة الجديدة بعنوان #عشق_البدر غاتنزل قريب 😍 كاتبتكم المحبوبة #ريحان
YOU ARE READING
معا حتى النهاية (المراهقة الفاتنة 3)
Romanceالجزء الثالث والأخير من القصة الشهيرة المراهقة الفاتنة .. جزء رومانسي درامي بامتياز
