ماعرفات راسها باش تبلات، مزيرها من يدها دافعها للحيط وراها ويد الأخرى مكمم ليها فمها وجسمو لاصق عليها حيت القنيتة مضيقة وماساعتهومش بجوج بيهم، بدات تنتر ليه وتحاول تدوي ووالو، ماتاتشوف تا حاجة قدامها غير الظلام ..
سلطان : شنو ندير فيك دابا هااا؟ كنتي ناويا تقتليني المجرمة ماحشمتييش؟ يحسابلك ماغانعرفكش نتي مولات الفعلة
ياقوت : انممم هههمم
سلطان : ششش، غانحيد يديا ويلا غوتي نفضحك ونگوليهم نتي لي فلقتيني اش باليك؟ هاا
حركات ليه راسها فوق تحت واخا ماشافهاش ولكن حس بيها ويديه تهزات معاها، خفف القبضة ديالو بشويا تايتأكد أنها ماغاتغوتش تا نزلها كلها وسمعها تاتنفس ..
ياقوت : واش تا تسطيتي؟ علااش گابضني هوكايا شو الليرحم واليديك طلقني نمشي بحالي ولا نجمعهم عليك ونگولهم جيت مسخرة لموي ونتا شديتيني بيتي تكرفس عليا ونضرب ليك الطر فالدوار
سلطان : اييه تا هادا نظر غوتي وخرجي للدوار وطلقيها وشوفي دك الساعة شكون ايتفضح وطيح سمعتو لارض أنا ولا نتي، كيما كان الحال تانبقا راجل وواخا نديرها ماغاتنقص مني تا حاجة شوفي هير نتي لي بنت وغاتولي سيرتك على كل لسان اييييوا غاتبقاي بايرا طول حياتك ومايديها فيك حد
كلامو دار طن فدماغها وخلاها تراجع على شنو كانت غادير، بداو عينيها يضورو فراسها وهو تايتسناها تجاوبو ..
سلطان : مالك سكتي؟ جاتك اللقوة ولا
ياقوت : لهلا يحييك، وا دابا شنو بيتي من عدي؟
سلطان : علاش ضربتيني بالحجرة؟
ياقوت : تا لي جبدتيني، كنت عاطياك التيساع وحكيتي عليا وهانتا جبتيها فراسك
سلطان : وتانتي غاتجيبيها فعظيماتك من عندي ماغاندوزهاش ليك
ياقوت : لي فجهدك ديرو ويلا وصلتي وذنك عضها
سلطان : هايهاااي على الدريويشة صدقت ماساهلاش، أول مرة شتك فيها كنتي تباني ظريفة وماتهزيش الراس
ياقوت : فينما جيتيني طلقاني، بيتي الظرافة كاينا ويلا بيتي النحس أنا مولاتو نتا ولي بيتي
سلطان : ياك
ياقوت : ايييه، أنا رجعت ليك غير الدقة لي عطيتيني
سلطان : زعما دابا معادلين؟ أنا عطيتها ليك لترمتك ونتي جايباها ليا فراسي زگل ماتقتليني
ياقوت : قلبتي عليها، كنت شادا تيقاري (دفعاتو تا ضرب الحيط وراه) ودابا حيد بالاك خليني ندوز فحالي وخليك بعيد عليا ولا هاد المرة يترحمو عليك ويگولو كان صغير والليعمرها دار
هربات من قدامو تاتعطر فجلايلها وطالقا حلوقها تاتعيط لفرحة باش يفهم راسو ومايتبعهاش، أما هو بقا فبلاصتو ماتحركش تايضحك بينو وبين راسو على الهبيلة لي جات فطريقو ولأول مرة تايحير هاكا وماعارفش شنو يدير معاها أو نقولو ليها باش يربيها علاش ضرباتو القضية لي يموت وماينساهاش وتا طولة لسانها سكتاتو بيها وخلاتو مبهوض فهاد المخلوقة العجيبة لي عمرو شاف بحالها فحياتو، شخصيتها فشي شكل وحسها متميزة، بين ليلة ونهار اكتاسحات تفكيرو وخلاتو يضحك مع راسو كي الحمق ماعارفش كيفاش ولكن لي عارف أن هاد البنت بدات تجذبو بشكل غريب ..
أما ياقوت فجلسات حدا فرحة فالكوزينة وطبسيل ديال الفاكية قدامها تاتنقب فيه وتدوي ..
ياقوت : والله اخالتي كون ما موي تانمشي معاها ولكن هانتي تشوفي على عينيك هي بيدها بوحدها وماكاين لي يعاونها ودابا جايين الخدامة يبنيو الطاج الفوق لخويا صالح وماكاين لي يگابلهم غيري أنا
فرحة : عارفا لي كاين ابنتي وتانا هادشي لي قلت لدنيا، تانتي تابعينك شغالك الله يكون فالعوان
ياقوت : اييه بصح
فرحة : داكشي باش قلت ليها تمشي لعند خويا يحيى تجلس عندو تاتكمل، العام مابقا فيه والو
ياقوت (تاتنقب كاوكاو) : هادا هو الكلام اخالتي
فرحة (مدات ليها سوبيرة) : هاكي هانا جمعت العشوب هنا ديهم لخديجة وعنداك تشتتيهم كي ديك المرة، سيري نيشان لداركم وصلي السخرة ولا بيتي دلحي فشي جنان ديك الساعة دلحي
ياقوت : هاااويلي يا خالتي تي أنا باقا گد شي جنان تي راني كبرت ودرت عوقلي وبا مابقاش يخليني نعتب الدار من غير لابيت نسرح البهايم ولا نجي عدكم هنا
فرحة : حسن ليك ابنتي
وقفات ياقوت تاتسوس فتشاميرتها من زبل كاوكاو وهزاتها عقداتها عند كرشها وهزات طبسيل الفاكية خواتو فيها ..
ياقوت : ندوز بيه الطريق اخالتي
فرحة : سيري بصحتك
خرجات فحالها وخلات فرحة وراها تاضحك وتحرك راسها ..
فرحة : هه حمقة هاد البنت ولكن عزيزة الله يسگم سعدها
وصلات ياقوت للباب ولقات سلطان جالس فوق واحد الحجرة وشاد عود فيديه تايكتب فالأرض دازت من حدا راسو وكانو فيديها شي حميمصات زفاتهم عليه جاو فوجهو وطلقات رجليها للريح خلاتو تايسب فيها وهي تاتقلي ليه السم وتعيب بوجهها حيت عارفاه مقصح فراسو ومايقدش يجري يتبعها اكتفي فقط يتحلف عليها ..
ياقوت (من بعيد) : واهاا شوووف يلا وصلتي ودنك عووضها سمعتي عووووضها يا بلمفلق لاخوور كينيميني
عطاتو بالظهر وكملات طريقها تاتعلف أما هو شد راسو وجلس ..
سلطان : موصيبة كحلة تاتمشى على رجليها، ولكن غير تسناي عليا يا بيا يا بيك ..
====> تسريع الأحداث ..
بعد مرور أسبوع
أنت تقرأ
معا حتى النهاية (المراهقة الفاتنة 3)
عاطفيةالجزء الثالث والأخير من القصة الشهيرة المراهقة الفاتنة .. جزء رومانسي درامي بامتياز
