نسائم حب

الفصل الخامس عشر

اول اسبوعين من رجوعهم للشغل كان سامر بيجيب لها الغدا كل يوم على الساعه 2 ويتغدو مع بعض واحيانا تنضم لهم ريم اذا ماعندها شى ....... اصر على توصيلها لمناوباتها بالليل و يرجع ياخدها وكان هدا تصرفه مع ريم كمان ........... بالنسبه للبيت هى وريم بطريقه غير مباشره اتفقو ان مين بيكون بالبيت بشتغل فيه و بشيل عن التانى ........ لميا كانت بتحاول جهدها خاصه انها مو متعلمه على شغل البيت و لا عمرها حطت ايدها فيه منشان هيك كانت تتصل بخالتها سلمى كتير منشان تساعدها لأن بالها اطول من امها الى بتنرفز بسرعه ......... و سامر ساعدها كمان خاصه لما حس انها مابتعرف شى بشغل البيت ....... يالله كم استحت لما شافها *****ه بالغسيل ........ فصله و حطه بالغساله وهو بعلمها كيف تشغلها ....... هو صحيح فى خادمه بتجى مره بالاسبوع منشان تنظف البيت كله تنظيفه مرتبه بس لأن الكل مشغول فمن الصعب تجى اكتر من مره بس مع هيك كان الكل بساعد بأبقاء المكان مرتب ونظيف .... حست ان سامر اله مراق بأكل البيت فحطت الموضوع ببالها و حاولت تطبخ الأكلات الى بحبها وساعدتها خالتها سلمى الى كانت تمشى معها خطوه خطوه لحتى تزبط الطبخه معها ........ الرضى كان واضح على سامر وهالشى ماخفى على لميا الى بتشوفه دائما بيبتسم لها ووجهه بيشرق لشوفتها وبمدح كلشى بتعمله ...... اكتر من مره ندهلها حياتى .... كان قلبها رح يوقف من الفرحه ... لولا وجود ريم كانت باسته على هالكلمه الى فرفحت قلبها .... بس فى شى لسى منغص عليها ... مابعرف ليش مابقرب علي اكتر ..... معقول كل هالأهتمام على الفاضى ؟ ..... والله خوفي تزوجنى شفقه او من باب الواجب ........ لالا لميا كم مره قلت لك لا تحطى براسك هيك افكار ...... يمكن لازم احسسه انى بريده .... انى بدي يعملنى مرته بكل النواحى ....... معقوله مشاعرى مو ظاهره اله !! ..... لازم تشتغلى على هالشغله يا لميا ........ لازم يعرف مقدار الحب الى بقلبك اله ......

*****
سمعت ريم دقه خفيفه على باب عيادتها ...... تفضل ............. انفتح الباب ودخل اكبر مفاجئه بحياتها ...... مرحبا دكتوره ريم ............. اهلين سيد فراس بشو بقدر اخدمك ......... قرب فراس من المكتب وقعد على الكرسى الى جنبه وهو بقول لا ولا شى كنت مارر اسلم على لميا فقلت اسلم عليكي بما انى موجود هون ......... انرسمت ابتسامه متكلفه على شفايف ريم وهى بتقول ... شكرا كلك ذوق .... وسكتت وهى بتطلع فيه بجديه ............ سألها فراس وهو مستغرب .. بس هيك ............... شو هو الى بس هيك ؟ ............... يعنى مارح تعزمينى على فنجان شاى او قهوه .............. نزلت ريم راسها للملفات الى امامها وهى بتقول .. اسفه مشغوله كتير شوف سامر يمكن فاضى يشرب معك فنجان قهوه ............ بس انا جيت اشرب معك انت فنجان قهوه ................ وقفت ريم ومشيت بأتجاه الباب وهى بتقول بعتذر منك سيد فراس مو فاضيه لفناجين قهوه .. وفتحت الباب وهى بتقول تشرفت بزيارتك وسلامى للوالده ومياس .................. وقف فراس بنرفزه وهو بقول شو مشكلتك انت ؟ .................. رفعت عينها للسما بملل وهى بتقول .. ماعندى مشكله كل ما هنالك انى مشغوله ان شاء الله وقت تانى ................... يعنى هلأ بدك تفهمينى ان ماعندك وقت لفنجان قهوه واحد ولا حتى مجامله .................... سيد فراس لو سمحت .................... لو سمحتى انت ليش هيك بتصدى بالكلام ..................... تنهدت ريم وهى بتقول بجديه ... سيد فراس ارجوك لا تاخد الموضوع على انه شخصى ................ بلى الموضوع شخصى انت من يوم عزيمة الغدا وانت ما بتتحكى على شو شايفه حالك ............. مو شايفه حالى ولا شى وارجوك لا تكبر الموضوع ............... بلى شايفه حالك ................ قاطعته ريم وهى بتقول بحده وعيونه بتنظر له بقوه .. هاى ما اسمها شايفه حالى اسمها بحترم حالى و بقدر نفسى لدرجة انى مابسمح لكل من هب ودب انه يشرب معى فنجان قهوه .. وهلأ لو سمحت عندى شغل و لو مارضيت تطلع انا بنده للأمن يطالعوك ... تفضل ................... عيون فراس كانت بتبرق بحده بتعادل الحده والقوه الى بعيون ريم و طلع بسرعه من غير مايقول كلمه ........