#حطيتك_فعيوني
🌹للكاتبه زهور جمال الدين 🌹🌷
🌿🌲🌲الحلقه التاسعة 🌲🌲 🌿
يومين وهوا فى دوامه يراجى فى رسالة من مباهر..
ما داقش طعم النوم وهوا حاير
خيرها شن صاير معاها
وزعما موضوع تأجيل الحديث فى موضوعهم مع نورى ليه علاقه
حاير ..ومالقاش من يسأل ..شاد التليفون ويراجى فى مرسال منها وخلاص
وهيا عطلت عليه ولا بعتت مرسال ولا رساله
شرين تليفونه
رد
-اسامه: تى وينك ياراجل
-منصور: والله متكى فالحوش ونسيتكم
-اسامه : هيا العريس يلبسو فيه ..قريب نطلعو بالسيارات راهو ..سقد
-منصور: اهو جايكم
وطلع منصور مشى لصحابه فالعرس متع صاحبه
صحابه يضحكو ويبصرو وهوا ساكت ومكتئب وخلاص ..
لانها خلاته فى دوامه وما فاهم شى ..
ضحكو صحابه ..ولبسو فالعريس .. ورقصو
وهوا شاد التليفون فى يده ويقرا فى مسجاتها القديمه
لاحظوه صحابه ...
سألوه خيرك ..
لانهم متعودين عليه جدى .. ميتوقعوش ان الحكاية فيها بنت
فقاللهم انه صايرله شد عضلى فى كتفه غير مقدرش يغيب عليهم
ولما صحابه طلعو فالسيارات وبيدورو بالعريس ..
طلع معاهم ولكن هوا دور من الطريق روح لحوشهم
طول حس ان النيه طايرة
______________
بعد ثلاثه ايام
نورى ومباهر مقعمزين جنب امهم
ومباهر تبكى ..
-نورى: خلاص عاد ليش الدموع توة .. امى الحمدلله حالتها تحسنت
-مباهر : لكن تفيق شوى وترجع ترقد ثانى
-نورى : لانهم يعطو فيها فى دواء منوم
خطر منصور على بال مباهر..
وتفكر ...زعما سمع بامها والا لا
-مباهر: سراج مش قلتلك اشريلى شفرة وتليفون
-سراج : والله ننسى
-نورى: اهوا خط تليفونى.. هاك كان تبى تكلمى اى وحدة من صاحباتك
-مباهر: باهى ليش مشريتليش شفرة لما شريت انت
-نورى: لا هادى شفرتى مخليها هنايا كل مانجى نستعمل فيها مشريتش انا
"نورى متعود على السفر لروسيا بحكم عمله فالخارجيه ........وعنده شقه صغيرة شاريها بالتقسيط بحكم انه مولود فى روسيا ...........ويخلى فيها فى تليفوناته وحاجاته اللى يستعمل فيها فى روسيا "
