#حطيتك_فعيوني
بقلم زهور جمال الدين 🌷
الحلقة الثانية والثلاثون
-
وردة تشوف فى بنتها مباهر حالتها متأزمه ...
فحبت تغيرلها جوها .. كلمت سرور صاحبتها ..
وحكتلها عاللى صار مع مباهر ...
طبعا سرور كلمت اكرام ودارين وعلى طول طارو لعند مباهر
اول ماشافوها بدو يبكو .. وجعهم حال صاحبتهم
وكل وحدة اضم فيها من تركينه وتبكى..
وقالولها هادى عين .وان العين حق ..
وضرورى تعالج عند شيخ قرآن ...
طبعا مباهر محكتلهمش عالقصه الاصلية ..
نقصد عالفيديو والضرب ..
بس قالتلهم ان منصور مخليها عند امها بيش تستريح
-سرور: وين سراج ..عالاقل ايقيمك هوا لو تبى الحمام
-مباهر: منعرفش عليه ..توة كان هنايا ..فجأة جاه تليفون وطلع على طول
-اكرام : خالتى وردة متقدرش على طلباتك يا رورو ... انا بنجيب حوايجى منقعد معاك هنايا لين توقفى على رجليك
-مباهر عيونها دمعو : سلم وخياتى وانشالله مانفقدكم ..
انا معنديش خوات وانتو خواتى ...
باهى توة انا نبي الحمام كيف ندير
-دارين: نرفعك انا على ضهرى
وبدو يضحكو
-دارين : والله نحكى جديات راهو.. تشبحو فيا طول فعرض امالا شن فايدتى
-اكرام : تحكى جديات ..تى خلى نرفعوها بين ايدينا
-دارين : تى اسكتى انتى وياها
قعمزت دارين على حاشية السرير مقابل مباهر ..
وخدت ايديها حطتهم على ضهرها واكرام وسرور قامو مباهر بالشوى ..
شدتها دارين كويس .. وطلعت بيها من الدار ...
وهما يبو يضحكوها ...
زعميتا يضحكو ويقولولها اضحكى يا مباهر
طلعو للممر وصلو للحمام ...
قعمزتها دارين حاشاكم عالمرحاض وطلعت وسكرت الباب
وبدو يانارى يبكو منغير صوت ..مايبوهاش تسمعهم وتتأثر
واتفقو انهم او بيقعدو معاهما معناها بيسايروها وبيضحكوها وبس
______________________________
سراج جاه تليفون من صاحبه بلغه بالحادث
مشى سراج يجرى لمستشفى الحوادث ...
