وعصفت بنا الاقدار

البارت10

وعصفت بنا الاقدار... البارت العاشر
للكاتبه زهراء ( روزايه)...

ردني ردني
يالبگتني 
بليلة أجيتك
دورت روحي اعلى روحي
لا شفتها ولا لگيتك ..
....

لبابه... فزيت فزه كمزت من يمه وايده بعدهه
لازمه زندي وصوتهه عالي وهي تصيح وين
ابوي الشيخ عنكم!!

جراح.. امشي دخلي جوه وعوفي ابوج الشيخ
شمطلعج نص الليل؟!

ايناس.. طلعت مثل طلعت ام بغداد
ماتستحين تتختلين بنص الليل

جراح.. راح اجي افرك حلكج كتلج دخلي
وسدي حلكج تعالي حاسبيني بكد اصبع رجلي..

ايناس.. چااا نسيت الاصول وصدكت روحك
خاطب عودين باجر افرك حلگي كدام الشيخ

لبابه.. حجت هيج ودخلت جوه وهو لازم زندي
سحبت ايدي من عنده وحجيت يعني
باجر هم راح اوكع بمشكله ؟!

جراح.. خلي تولي هاي دواهه السبع باجر
تجي تبوسج من راسج ..

هسه ماعلينه انتي شعندج طالعه؟!
لبابه.. طلعنه اني وفجر وهي انهزمت واني ظليت
جراح.. مانعسانه؟!
لبابه.. لاااا...

جراح.. لو ماضرغام كاعد جان اخذت للحديقه
بس هذا مخبل هسه يفضحنه..

لبابه.. راح اروح انام وباجر مااطلع اخاف
من الشيخ
جراح.. لاهاي فارغه مالج علاقه بيهه
نامي رغد..

لبابه.. تصبح ع خير
جراح.. وانتي من اهل الخير
لبابه.. عفته ودخلت جوه لكيت فجر نايمه
بفراشهه ضربتهه برجلي..

كومي لج حقيره ورطتيني وانهزمتي
فجر.. يمه وكع گلبي عبالي جمغه همزين
طلع جغاح

لبابه.. وتخافين من جمره
فجر.. لااا بس عيب شيكول بنص الليل
يباوعن علينه
لبابه.. والله تفكيرج احسن مني ودومج عندج
حكم ..

تغطيت وعيون جراح كدامي تلمست
مكان ايده ومبتسمه شعور حلو اهتمامه
بيه خلاني احبه وافتح عيني علي...

ثاني يوم ب١١ اندك باب المشتمل صوت جراح
يحجي ويه ماما كالهه خلي تحضر نفسهه لبابه
ورا الصلاة ارجعهه لبغداد تكمل امتحاناتهه

بسرعه حضرت غراضي وتغديت وصليت
واسمع الهورن مالته سلمت ع ماما وفجر
وطلعت...

صعدت بالصدر وامه واكفه بالباب شمرت
ورانه دولگه مي وتوصي بي اول مره اشوفه
بالزي العسكري كلساع اخذ نضره وارجع التفت..

شارع القصر طويل ورفيع حق سياره وحده
واذا تلكتنه سياره لازم ينزل ع البستان
لحدمايوصلني لراس الشارع العام ..

ضرغام يمشي مشي كدامنه يدك هورن
جراح ومايرضه يبتعد صارت السياره
لزك بظهره وماابتعد..

صاح بي جراح ولك وخر خلي انولي
ضرغام.. وين اروح اريد اوصل للشارع منين
افوت..

جراح.. تعال اوصلك وياي لراس الشارع
ضرغام.. لا اريد امشي مشي
جراح.. لعد وخر ولك سويلي درب