وعصفت بنا الاقدار

البارت21

وعصفت بنا الاقدار... البارت الواحد والعشرون
للكاتبه زهراء ( روزايه)...

( بارت طويل لعيونكم استمتعوا بالقراءه )

ياسين.. مايكون خاطركم اله طيب هسه
ادخلن يم نسوانه ارتاحن وانت بامان
ودك صدره بخفه..

ساهره.. مشكور ياشيخ بس ماانريد
تتأذون بسببنه عداوه بينكم وبين جبار

ياسين.. عداوتي ويه جبار طويله ودم اخوي
بالكاع بس عيب وفشل ع يستقوي ع نسوان
ارامل وبنات قاصرات..

كام وكف واحنه كمنه ويمشي ويأشر
كدامه اخذنه لباب دخلنه من عنده وصاح
ام اواب...

اجت مره متوسطه متعوبه حيل
بس وجهه ضاحك من شافتنه بسرعه
رحبت بدون ماتعرفنه وصاحت على مرت
حماهه ام علي ..

احنه دخلنه ويه ام علي وهي ظلت يم الشيخ
تحجي صاله جبيره بيهه قنفات خشب
كعدنه وجوهنه شاحبه كلنه خايفين
ماعدا ماما اشوف بوجهه قوه موطبيعيه..

شويه واجت ام اواب دخلت لغرفه بصف الدرج
وطلعت منهه حجيه جبيره بالعمر وجهه متروس
دگات ورسم حواجبهه اخضر ..

محنيه الظهر كعدت وبيدهه عكاز وتاخذ النفس
بصعوبه لابسه اسود  وبالفوطه مالتهه دنبوس
اصفر يمكن ذهب..

حجت وهي تلهث هله بخاطرنه وهله بالداس
عتبت دارنه..

ساهره.. وبيج حجيه اعذروني اجينه
بدون خبر بس الزمن جار علينه

الحجيه.. منهي منجن مرت المرحوم
علاوي ؟؟

ساهره.. اني حجيه اني مرت علي
وهذني بناتي لبابه وفجر

الحجيه.. ضيفن خطارجن يفاطمه
هله بيجن الدار دارجن والملك مالكجن
الجن صدر البيت والنه العتبه..

ساهره.. كثر الله من امثالج امي
والبيت عامر باهله بس التجئنه الكم
ماعدنه حل ومحد يحمينه والزلم التحمينه
ببغداد واستغلوا ضعفنه...

الحجيه.. عمر الظلم ميدوم يابنتي
واكو رب حليم قوي بلمحه بصر
يخلصنه...

دفنت ابني الشاب وظلت مرته
وجهاله وهو ماله ذنب مايعرف غير
الزرع والحلال وغدروا بي المايخافون
من الله..

وينج يفاطمه حضري الحجره الفوك
وخلنهن يرتاحن وزهبن الغده
الهن..

لبابه..اباوعلهه شنو من حجيه شنو من كلام
ماحسيت غير الضربه برجلي من فجر وهي
دكلي هاي الحجيه نوغانيه( نورانيه)

... شمدريج بعدنه ماشفنه شي؟
فجر.. اسمعي كلامي جانت تحجي وتباوع للحجيه
هاي انسانه مؤمنه وغاح تحب ماما حيل

لبابه.. وانتي منيلج هالحجي شو عندج طلعات
مال كشافات
فجر.. ولي اسمعي كلامي وبس!!

لبابه.. فجر دائما تباوع لشخص تحجي عنه
كلشي اتذكرهه ع جراح كالت ماارتاحله
رغم صغر سنه بس ماتشاركني بأي شي
ومرات احس وراهه اشياء جبيره مخفيه