وعصفت بنا الاقدار

البارت56

وعصفت بنا الاقدار... البارت السادس والخمسون
للكاتبه زهراء ( روزايه)...

العشتهن وحدي محد مار بيهن
لذالك لحد يسولف عليهن.
أنعم الله عله الأيام شكشفت اوجوه
صحيح أذني بس عاشت اديهن...
....

لبابه... اقره برساله واحس نفسي اريد اوكع من طولي
شنو نظراتك وشنو هالميانه الي تراسله ومبينه يعرفهه
ومراسلته قبل وعبالك اكو حديث بينهم

جان غاط بالنوم بس مااتحملت انتظر للصبح كمت
اهز بي جراح اكعظ بسرعه اكعد هو بسرعه فز وكعد
على حيله عباله بيه شي يصيح شكو شكو؟؟

حطيت التليفون كدام وجهه كتله اشرحلي منو هاي
جراح شعندك هاي تصرفاتك والبرود العندك واني
عاذرتك وانت عندك وحده ملهيتك احجي لا هسه
اكلب الدنيا بنص الليل..

جراح.. تخبلتي؟ انطيني مجال افتهم وافهمج
وسحب التليفون من ايدي يقره برساله حطهه ومسحهه
لوتخبلت

كمت اكمز بنص الغرفه وصوتي عالي منو هاي وليش
مسحتهه خاف اشوف الرقم حضرتك مسوي نفسك
مريض ومااطيق لبابه بس يم غيري نظرات وخابص روحك

جراح.. صوتج ولج الناس نايمه تعاي اكعدي وافهمج
لاتتخبلين عليه
لبابه.. شتفهمني احجي اسمعك

جراح.. هاي وحده اعرفهه تريد اطلع جنسيه بدل ضائع
وصار مده تروح وتجي لان رجلهه بالسجن ولازم
معامله لا اكثر ولا اقل اذا هي خفيفه شسويلهه

لبابه.. مبين مو اول مره ادزلك رساله وانت ساكت
جراح.. دزت اول البارحه ومسحتهه وهسه هاي دزت
شسويلهه من تجي مره ثانيه عود ارزلهه

لبابه.. وين حصلت رقمك شنو كل الضباط ارقامهم مطشره لو بس العندي؟
جراح.. ماادري منين لاسألتهه ولاجاوبتهه لبابه
بطلي هالسوالف ماعندي شي لو عندي تلگيني ضام
تليفوني موهذا كدامج

لبابه.. كااااافي طك كلبي من عندك يوم نوال يوم وحده تراسلك وغير حالتك الزفت واسلوبك الماينطاق
روح روح شوف السبع هم عنده شغل ومرات حته ويه
مهندسات يشتغل مايوم وحده دكت علي ولا كسر بخت عقيق ..

بس انت العندي ماشاء الله ماظل شي ماسويته بيه
ضرب اهانه حته نومتك مومثل الناس دمرتني
ماكفاك السويته بيه وبعدك مستمر لاتجذب عليه
كافي تمثيل تسوي نفسك انت الماكو منك والوفي وانت
حرت شسويت بيه..

جراح.. كام سحبني من ايدي ويسد بحلكي لان
صوتي عالي وهو يصيح كاافي تخبلتي لااحد يسمعج
والله ماكو شي وحده لزكه

لبابه.. دفعته حيل وخر عني اياك تلزمني كمت اكرهك
كمت اتخبل من وجودك شنو عيشتي وياك باكل بطني
هم حاسب نفسك رجال عليه والناس حاسدتني؟؟

من حجيت هيج مااحس غير الراشدي على خدي
هنااا فقدت اخر ذره صبر وتحمل انهاريت كمت
اعيط بعلو صوتي تضربني جراح فوك سواد وجهك
تضربني بعد كل التحملته تسوي بيه هيج