روايه بسمه مدفونه في خيالي

تابع البارت 31

روعة بتفكير: ما اتوقع انه بابا يرفض رح اعطيه كرتونة الجهاز ويبلغ عنه بمركز الشرطة !
رونق بامتنان: مشكورة يا قلبي ....غلبتكم معي ...بس انا ما اشوف احد يقدر يساعدني من الي حولي!
لاني ما اضمن رد فعلهم !
روعة بتفهم: صحيح كلامك !
بس بصراحة فياض ما توقعت يعمل فيك كذا !
رونق بحزن : انا كذا حظي الي اثق فيهم واحمل لهم مشاعر حلوة ...اتفاجئ بطعنه منهم غير متوقعة!
للحين مقهورة يا روعة المفروض مسحت فيها الارض بس ما رح يطول سكوتي!

روعة بقلة حيلة: قالت لك امي انفصلي عنه بس انت عنيدة ورأسك يابس
رونق تكتفت وهي تناظر حولها: انفصل!!!
قولي لزوم استقل في بيت لوحدي بعيد عن الي حولنا!
روعة بابتسامة: والحين كيف ترجعين للبيت وما معك جوال
قاطعتها رونق بلامبالاه: هذه محلوله جوالي خلص شحنه واضطريت ارجع للبيت مواصلات!
روعة هزت رأسها : وكل ما تداومين نفس الكذبة !
رونق : لا تخافين رح ادبرها!
روعة طلعت جوالها بابتسامة: خليني اتفقد جوالك
اتصلت على رقم رونق ...لحظات وجحظت عيونهاوهي تسمع صوت : الو
رونق تناظر روعة واعصابها تلفت مين هالرجال الي جوالها معه!
روعة باستنكار: بابا
رونق سحبت الجوال من يدها وناظرت الاسم ...وسرعان ما ضربتها بالكتاب على رأسها بقهر : غبية!
روعة وهي تشوف اسم ابوها خربطت بدل ما تضغط على اسم رونق ضغطت على اسم ابوها ...وبتبرير نطقت : اسفه بابا بالغلط ...لا لا ما في شيء....ان شاء الله سلام!
روعة باعتذار رافقه ابتسامه عبيطه: ضغطت وما انتبهت على الاسم !!!
رونق اعصابها تلفانه من كل شيء حولها وقفت: انا طالعه الحين ما لي خلق لأي شيء!
روعة مسكت يدها : انتظري!
راجعه للبيت !
رونق عفست ملامحها بانزعاج من هالبيت: اكيد لا ...ما اعرف وين رح اروح!
انت لا تشيلين همي !
تركت روعة وتوجهت لخارج الجامعة....من الامور الصعبة انك ما تعرف وش تبغى تعمل!؟
جراح بكفه واهله وفياض وجدها وعبود وزوجة ابوها بكفه!
معقول تقدر تتحمل علشان جراح!
وبنفس الوقت ما تبغى تكون السبب في خراب علاقةجراح بآهله!
بعد وقت وقفت امام البيت ...ترددت ولكن شجعت نفسها وضغطت على جرس الباب!
جدها وليد رح تستشيره بالامر يمكن تلقى عنده حل!
فتح احد الاطفال الباب.....دخلت بانحراج ما هي متعودة. عليهم!
وقف وليد اول ما دخلت رونق الصالة: رونق!
اقتربت بهدوء وسلمت : كيفك يا جدي !
وليد بهدوء: ربي يسلمك!
اليوم اتصلت فيك بس جوالك مقفل ابغاك بسالفة!
رفعت نظرها رونق لجدتها لما تقدمت وسلمت بملامح عابسه!
رونق رجعت خطوة للخلف لما وسيم اقترب منها والشر بملامحه: كله بسببك انت!
خربتي حياتنا..الله يأخذك انت واختك ..من لما طلعتوا بحياتنا ما شفنا خير ...انا اكرهك يا
سكت لما استقرت يد رونق على وجهه وبحده: انكتم!
ما بقى الا البزران يتكلموا!
وجوالي الي سرقته رح تدفع الثمن على فعلتك...ابوك جالس ينتقد الناس وما هو شايف ولده الضايع!
خليه يربيك بالاول وبعدها
قطعت كلامها ورجعت للخلف لما هجم عليها وسيم حتى يضربها ...وقبل ما يلمسها مسكه وليد وبغضب: وسيم!
انت ما تستحي على وجهك تمد يدك على اختك الكبيرة!
وسيم بقهر: ما عندي اخوات!
حياتنا تدمرت بسببها!
حنين تناظر الموقف بصمت ....
وليد دف وسيم لبعيد ...واقترب من رونق تعالي نجلس
قاطعته حنين : رونق يا ليت تسمعي وتنفذين الكلام الي رح يقوله جدك !
ناظرتها رونق وهي معقده حواجبها ..وكأنه قلبها حس بالموضوع قبل ما يتكلموا!
اجلسها وليد برفق ...جلست مثل الدمية يحركونها ..رفعت نظرها لوليد لما تكلم بهدوء: رونق يا ابنتي انت الحين متزوجة وعندك زوج وباكر إن شاء الله يصير عندك عيال ويكون عندك اسرة... واكيد تعرفين اهمية شمل العائلة يعني انت تعرفين اذا تطلقت الام يتشتت البيت والاولاد يكونون ضحية...امك يعني!،
سكت للحظات وبعدها تابع: لو تبعدي عنها وخاصة بالفترة الحالية!
انا ابو وما اقبل ابنتي يخرب بيتها واناجالس اناظر!
يعني إخوانك الصغار وش ذنبهم يتشتتون؟!
الجازي تركت فياض وجاءت زعلانه هنا!
رونق لا تكوني سبب بخراب بيت امك!
حنين تكلمت بانفعال: امك من لما تزوجت ابوك ما شافت خير!
ما صدقنا انه بعد زواجها من فياض استقر وضعهاوصارت الامور تمام ...برجوعك يا رونق عفست حياة امك وخربت حياتها ...وكأنه الجازي ينقصها!
اذا فعلا بتحبي امك اتركيها بحالها
وليد وهو يناظر زوجته بلوم: حنين !
حنين بلامالاه: خلينا واقعيين عشتي طول حياتك بدون الجازي وهذا انت متزوجة وما رح تكوني بحاجتها الخبن بهذا العمر..تقدرين تكملين حياتك بدونها....خلاص اتركوا ابنتي بحالها!
وليد زفر بضيق وناظر رونق بهدوء: بيتي مفتوح لك اي وقت بس الجازي وخاصة بهذه الفترة ابعدي عنها!
اتفقنا!،
مطت شفتها بألم ....وبصعوبه حاولت تسيطر على ملامحها وهي تتكلم: هذه أوامر السيد فياض!
وقفت وهي تتابع كلامها : قدر هنا ؟!
وليد وقف وهي يشوف ملامحها مهما كابرت واضح فيها الانكسار:رونق ا
قاطعته وهي تنادي على قدر: قدر قدر!
حنين بهدوء: الحين اناديها
وليد: وش تبغين بقدر اتركيها
رونق والغصه بحلقها ..ودمعة غصب عنها نزلت ..مسحتها بسرعة : مشكور ما قصرت ...تدري وش المشكلة؟!
المشكلة انك خربطت بالكلام وقلت ابعدي عن امك !
اول مره اشوف احد يطلب من الثاني يبعد عن امه !
الام الي طلب رب العباد بوصلها ...وانت بكل برود تقول اقطعيها علشان بيتها واسرتها !
علشان اولادها!
علشان زوجها !
ترى انا ابنتها قبل ما يتزوجها السيد فياض!
انا ابنتها قبل وسيم!
ليه ذول اولادها لهم حق فيها .وانا ما لي حق فيها !
مطت شفتها بحسرة: ايه صحيح نسيت اني البنت القروية الضايعة الصايعة المتخلفة الي ما لها وجود بينكم !
وانتم عيال الاصل والشرف!
انتم فووووق وانا تحت ما اسوى نعال احدكم !
ليه تهتمون بمشاعري واحاسيسي ..وحاجتي لام فقدتها سنوات طويله !
عشت 18 سنة على اساس اني يتيمة واقدر اكمل حياتي بهذا اليتم ماعادت تفرق!
وبغصه كررت : ما عادت تفرق!
ناظرت قدر لي واقفه جنب حنين ويسمعون كلامها!
اقتربت من قدر وسحبتها وما تركت لها مجال تعترض ....
خرجت من الباب بعد ما لبست النقاب بإهمال ...رفعت نظرها وهي تشوف فارس واقف قريب من الباب ويسمع حديثهم!
ناظرته بكره وتوجهت للخارج بخطوات سريعة...تبغى تبعد عن هالمكان الي يخنقها!
بعد وقت جلست بالحديقة على الارض وانفجرت بالبكاء ...بداخلها تراكمات ما تقدر تكتمها اكثر من كذا! قدر اقتربت منها: ماما
رونق ما ردت عليها وهي مستمره بالبكاء ولسان حالها يردد
«
اريد ان اطير بعيدا............عن سواد القلوب
بعيدا عن سوء الظنون...
بعيدا عن الكذب.....
بعيدا عن النفاق...
بعيدا عن البشر الذين يرتدون ألف قناع ....
*منقول
**
**
**
جالسه بالصالة والهدوء مخيم عليها ..وكأنها بعالم لوحدها.... موجوعة حد الصميم!
نقزت من صوت جراح خلفها: مساء الاناناس لأحلى ناس!
ناظرته وهو يبتسم وبيده ورده حمراء لها!
ما لها نفس بشيء ...وبروح ميته اخذتها بدون اي تعليق!
حاولت تجامله وتبتسم بس ما قدرت!
جلس باستغراب وهو يشوف الحزن والصمت مخيم عليها: وش فيك ؟ !
احد زعلك بشيء هنا!
هزت رأسها بالنفي: لا
جراح رفع حاجب : يعني اليوم اتصل فيك جوالك مغلق ورجعت للبيت قبل ما يخلص دوامك وقدر معك !
صار شيء بينك وبين فياض!
ردت بصوت مبحوح من كثر ما بكت بالحديقة: ما صارشيء
بس انا مزكمة!
وقف باهتمام الحين اعمل لك
قاطعته وهي تمسك يده : ما ابغى شيء ..انت ارتاح !
رن جواله .....رد بهدوء: هلا يمة....ان شاء الله ...جاي الحين!
ناظرها بعد ماقفل الخط : انا طالع لامي ما رح أتأخر!
هزت رأسها بهدوء!
وقفت بهدوء تتفقد قدر نامت وهي تبكي تبغى ديما !!
**
**
*
جالس مع اهله يخططون لعرس زياد وكلما بغى ينزل عند رونق تعترض امه ويضطر يجلس!
راكان بقهر وهو يشوف اخوه وكأنه جالس على جمر يبغى الفرصة حتى ينزل عند رونق !
وضعه ما هو طبيعي ابدا !
متأكد انه مسحور!
ما في رجال يعمل كذا يحارب الدنيا حتى يتزوج بنت ما يعرفها !
لحظة بعد ما راحت رونق عند جدته صفية طلع جراح بسالفة الزواج!
شد على قبضة يده بقهر وهو يردد هالمشعوذة وش عملت حتى لعبت بعقله!
ناظر اخوه وهو يتكلم مع زياد ويبتسم.....مقهور على اخوه لأنه ما هو بوعيه!
جراح صاحب القلب الطيب ما يستاهل هالحشرة هذه!
بعد زواج زياد رح يتحرك وما رح يسمح لهذه المهزلة ابدا!
ام راكان وقفت بابتسامة لما دخلت صفية: هلا والله نور البيت!
سلمت صفية بفرح على ابنتها وعيالها ...مسكت يد جراح وهي تناظره بمحبه: كيف حالك يا ولدي!
جلس جنبها بعد ما قبل يدها : بخير يا جدتي انت كيفك!
مطت شفتها بزعل: لو يهمك حالي كان سألت عني!
من بعد الزواج قطعتني يا ولدي وما عدت تزورني!
ام راكان بكلام مبطن: ما وقفت عليك يا يمه تراه باعنا كلنا !
الله يسامحك يا جراح الي صرنا حنا اغراب وما لنا علاقة بحياتك !
هذه الحياة تدور الدنيا وولدك الي تعبتي بتربيته وبذلتي جهدك حتى يكون احسن الناس يبعيك بالرخص
قاطعها جراح بعد ما تكدر خاطره: يمه!
انا وش قصرت معك !
ام راكان بعصبية: وش قصرت !
انت ما تشوف حالك من اول ما جلست وكل شوي تتحجج حتى تنزل عند الزفت الي تحت !
ما عادت تعجبك جلستنا!
صفية تهدي الوضع: ام راكان علامك معصبة كذا!
ترى عندنا فرح وما في مكان للنكد والزعل !
ما نبغى ننكد على العريس ...ناظرت زياد وابتسمت!
زياد بابتسامة: ربي يسعدك ي جدتي ويطول بعمرك!
**
**
**
**
قفلت الكتاب وناظرت ساعة الحائط الساعة وحدة و للحين ما رجع !
طلعت من الغرفة ...وناظرت باب غرفة جدتها ....توجهت لها اليوم كله ما دخلت عليها ...حست بحركة بالغرفة ...توقعت يكون جراح فتحت الباب ...ناظرت المكان ما في احد ...وام ناصر تغط بالنوم !
تنهدت وقفلت الباب وقررت تنام تريح رأسها من هموم الدنيا!
في اليوم الثاني صحيت مفزوعة فاتتها صلاة الفجر ...استغفرت ربها وقامت بسرعة ...ناظرت المكان جراح ما هو موجود !
استغربت معقول طلع !
صلت الفجر قضاء ...وجلست على السرير تفكر ...قدر مين يهتم فيها وقت دوامها !
ما تثق باهل جراح تخاف يؤذونها!
او يجرحوها بالكلام!
طلعت من الغرفة البيت فاضي ....شكله جراح طلع على دوامه!
قررت تجهز قدر واليوم تأخذها على الجامعة !
جهزت أمورها وطلعت من البيت .....وقفت وناظرت بيت ابوها ....ما لهانفس تشوف امها او ابوها كرهت الحياة بسببهم !
ضياعها وتشتتها كله بسببهم !
وقفت لما ناداها نايف !
عفست ملامحها واقتربت منه وبهدوء نطقت: نعم
نايف بحدة: انت كيف تأخذين البنت
قاطعته رونق: وانت وش دخلك
رد بقهر منها: انا ابوها
مطت شفتها بسخريه: يا حظها بهذا الاب !
نايف بمزاج سيء : رونق لا تخليني
قاطعته رونق بروح ميته: انتم ما عندكم شيء الا التهديد بس التهديد!،
نايف زفر بضيق: اسمعيني البنت ترجعينها عند فياض وإلا قسم بالله اسحبها منك واخلي سعاد تربيها وانت تعرفين عاد سعاد تحبها كثير!
او اخفيها من الوجود وما اخليك تلمحين ظلها!
ناظرته بخذلان: على اساس دقيت على صدرك مستحيل اخليهم يلووون ذراعك بقدر وما رح احرمك منها ....كلكم كذابين ...منافقين!
نايف مسك يد قدر: انا رح ارجعها عند فياض متى ما تخرجتي يصير خير .. الحين البنت وين تجلس وانت حضرتك بالدوام!!!
يا ليت تستخدمين عقلك هذا !
ناظر قدر وتكلم : الحين رح نروح عند ديما!
قدر ناظرت رونق: ماما انا ابغى اروح مع بابا عند ديما...ما ابغى اجلس هنا !
رونق عقدت حواجبها باستنكار: بابا !
من متى هالمعرفة!
نايف ناظرها: ترى انا ابوها اذا ناسيه!
تركها وغادر وقدر مستانسة .... رونق تناظر زولهم بعدم تصديق الحين هذه قدر!
قدر الي كانت ما تفارق ظلها ...الحين ما عادت تسأل عنها استبدلتها بعالم اخر !
وضعت يدها على قلبها ...قلبها يوجعها ما هي قادرة تستوعب الحياة!
رجعت ادراجها حتى تروح للجامعة ...وقفت بالشارع وهي تشوف سيارة جراح موجوده ..مباشرة ناظرت لجهة البيت لثواني وبعدها نزلت راسها بانتكاسه ...اكيد عند اهله جالس!
تنهدت وغادرت بهدوء!
**
**
**
ما حب يصحيها وهو يشوفها مستغرقه بالنوم ومع اتصال صفية واصرارها يفطر معهم ...اضطر يطلع يفطر وبعدها ينزل !
ام راكان عجبتها اللعبة وهي تسحب جراح من رونق خطوة خطوة ...اكيد الحين مقهورة وميته بقهرها !
وقف جراح وهو يناظر ساعته : اسمحوا لي
صفية باعتراض: وين
قاطعها بتبرير: رونق عندها دوام اخاف تروح عليها نومه
ام راكان : لا تخاف ما رح يروح عليها نومة ومتى ما جهزت اكيد رح تتصل فيك ...انت اشرب كوب الشاهي وما عليك،!
جلس على مضض وعقله وتفكيره عند رونق !
رفع نظره لمريم وهي تضع صحن على الطاولة وهي تتكلم مع امه : ان شاء الله خالتي!
كتم ضيقه وش ينقصها رونق لوتعايشت مع اهله مثل مريم !
وامه وش يضرها لو تعاملت معها مثل مريم ! وش يفرقون عن بعض !
صفية بابتسامة تناظر راكان: ياحظك بزوجتك ما شاء الله عليها!
مريم بابتسامة : تسلمي يا جدتي!
راكان بنغزه: انا اعرف اختار الزوجة الصح !
الزوجة الي تحترم اهلي وتقدرهم تكون فعلا تحبني وتقدرني لانه احترامي من احترام اهلي!
هز جراح راسه بضجر من هالسالفة ...وبنغزه: وكمان احترام اهلي لمريم احترام لك !
يعني لو ما احترموا اهلي مريم وقدروها انا اعتبره قلة احترام لك يا راكان !
ام راكان رفعت حاجب : وش رايك انزل ابوس رجل زوجتك حتى ترضى !
ات بالأول شف زوجتك على حقيقتها وبعدها تعال قول هالكلام!
وش اكثر من انها تطرد امك عن الكوشة ؟!!!!
ااااااه منك يا جراح !
جراح بتبرير: يا يمه اقولك ما كانت تعرفك
صفية مطت شفتها: حتى لو ما تعرفها كيف تطرد حرمه كبيرة بهذه الطريقة!-
هذا يدل على قلة
قاطعها جراح : الانسان يرتكب اكبر المعاصي ويستغفر ربه وربنا يقبل توبته!
وحنا ما نسامح ولا ننسى!
راكان قاطعه : نشوف نهاية قلبك الطيب!
لكن لا تيجي بعد فترة ندمان!،ترى ما ينفع الندم بعد ما حملت زوجتك الموقرة!،
ناظره جراح : رجاء انا احترم مريم ولا عمري غلطت عليها بحرف مثل ما انا احترم زوجاتكم يا ليت تحترمون زوجتي لا
قاطعته ام راكان بقوة: مريم محترمه غصب عنك تحترمها ولا عمرها غلطت على الي اكبر منها ما هي مثل زوجتك لا تحترم لا كبير ولا صغير!
اخوانك راكان وزياد تراددهم بالكلام وتردح لهم وكأنهم بزران !
فياض بعمر ابوها لا احترام وبسببها امها الحين زعلانه في بيت وليد!
فتح عيونه بعدم تصديق ما عنده خبر بهذه السالفة!
راكان مط شفته بسخرية: نسينا نخبرك البارحه !
غريبة ما خبرتك زوجتك !
جراح عبس ملامحه وغادر المكان بدون ما ينطق حرف واحد!
الجازي زعلانه في بيت وليد!
رونق ما خبرته!
دخل البيت وتوجه لغرفة النوم ....ما لها اثر!
توجه لغرفة قدر ..المكان فاضي!
بسىعة توجه لغرفةجدته طرق الباب ودخل...رجع قفل الباب بهدوء وهو يشوف جدته نائمة!
مسك جواله واتصل فيها ...عقد حواجبه ..جوالهامغلق!
ليه جوالها دوم مغلق !
اكيد طلعت للدوام!
بس قدر وين ؟!!!
**
**
**
الجازي ناظرت ابوها بقهر: ما يحق لكم تمنعوني من
قاطعتها حنين بقوة: خلاص ترى قلبي طق من الغباء الي معشش برأسك !
تخربين بيتك علشان رونق
ترى ما وصلنا من هالتوام الا وجع الراس!
وليد بهدوء: فكري بعقلك لو مرة وحده !
ناظري عيالك لساتهم اطفال ليه يتشتتون!
رونق كبيرة ومتزوجه
قاطعته وهي تبكي بحرقه تحس رونق جالسه تعيش حياة النبذ الي مرت فيها ايام زواجها من جواد : رونق يبه بالذات تختلف عن الكل ...احسها جسد إمرأة لكن داخلها طفلة ...فياض قسى عليها بالكلام وجرحها وانا أكثر من كذا ما اتحمل!
تراها انسانه ليه يجرحها بالكلام!
انت ما سمعت وش قال لها لما جاءت بيتنا!
وليد بهدوء: يا جازي كمان رونق غلطت بالكلام!
ردت بدفاع: ما غلطت يا يبه والله ما غلطت أنا واقفه !
والكلام الي قالته تكلمت فيه بعد ما كلامه!
وليد بنرفزه: طيب يعني الحين تبغين الطلاق !
ولنفرض تطلقتي وش استفدتي؟!
البنت متزوجه وعايشه حياتها!
وانت؟
وعيالك وش مصيرهم؟!
حنين وهي تشوف عناد الجازي تكلمت حتى تنهي السالفة: ترى رونق البارحه كانت هنا!
الجازي مسحت دموعها وناظرتها بدون تصديق: رونق كانت هنا!
ليه ما احد
حنين بكذب: رفضت تشوفك!
جاءت وتكلمت وهي تتمسخر على عقلك الصغير...تقول الجازي زعلانه علشاني وانا إذا موجوده ما أدري عنها!
الجازي صدمها الكلام وبعدم تصديق نطقت: مستحيل رونق
حنين : وليه ما تقول!!!
تقول عشت حياتي بدوني وما يهمني وجودها الحين..وجودها عدمه واحد ...ولما كانت تزورك كانت تزورك حتى تقهر جواد ومريم!-
يعني كنت أداة غبية للانتقام !
وهذا ابوك كان موجود اسأليه!
الجازي صدمها الكلام ...ما توقعت رونق تقول هالكلام عنها !-
غمض عيونها للحظات بألم من الطعنات الي تلقتها من التوأم!
خلااااااص كافي ...عاشت حياتها على امل تجتمع معهم!
لكن صدقوا لما قالوا الي ينكسر عمره مايتصلح!
وليد اعطى نظرات حادة لحنين على كذبتها!
حنين بلامبالاه بنظرها مصلحة الجازي اولى وما لها الا هالحل!
تحركت الجازي بخطوات تائهة لاحدى الغرف ...وبداخلها وجع من قساوة التوأم!
**

**
*
**
جالسه بالقاعةتستمع للمحاضرة وبصعوبة قادرة تستحضر ذهنها!
انتهت المحاضرة وهي للحين جالسة بهدوء ..تفكر بحياتها ...
رفعت راسها على دخول وعد ..تقدمت وعد بابتسامة نحوها: يا قاطعه وينك زمان ما شفتك!
رونق بهدوء سلمت وما جاوبت على سؤالها !
وعد ابعدت كتاب رونق وجلست مكانه: ايه وش اخبارك؟!
رونق بملل: بخير !
وعد خزتها: وش فيك كذا زعلانه!
تعالي نجلس والله مشتاقه لك زمان ما جلست معك
!
رونق بنفس الهدوء:وعد ممكن تخليها مرة ثانية!
ما لي خلق سوالف!
وقفت رونق وهي تجمع أغراضها : اشوفك مرة ثانية!
وعد وهي تمشي معها: رح اوصلك للمكتبة اكيد رايحه هناك!
سكتت رونق وما علقت!
وعد متعمدة تقهر زياد ..تكلمت بصوت مرتفع وهي تشوفه واقف ومعه شخص ثاني : الحين اعطيك عصيرك المفضل ورح تنسي العالم كله!
وختمت كلامها بضحكة رنانه!
ناظرتها رونق بعدم فهم ...وما انتبهت على وجود زياد وجراح ...مطت شفتها باستغراب متاكده هالبنت عقلها ضارب!
من وين طلعت لها هالنشبة!
بنفس المكان كان واقف مع زياد جاي يبحث عن رونق بما إنه جوالها مغلق....ناظر زياد الي يتكلم بقهر: شفت بعيونك صديقة زوجتك!
شفت الاشكال الي مصادقيتهم!
وسمعت الكلام!
اذا م تعرف ترى هذه البنت ابوها واخوها مروجين مخدرات ...الله اعلم وش العصير المفضل لزوجتك!
جراح من الصدمة انلجم لسانه...وبدون ما ينطق حرف واحد توجه خلف رونق!

انتهى البارت ...لنا لقاء قريب بإذن الله ...دمتم بخير