روايه بسمه مدفونه في خيالي

البارت 39

بعد العصر اجتمعوا عند ابو جواد ...جواد ناظر جراح بهدوء وما نطق !
زياد بهدوء ناظر عمه: وش قلت يا عمي!
ابو جواد ناظر جراح وبعدها جواد ...ونطق بهدوء: السالفة طالت وما هي حلوة قدام الناس هذا الوضع !
الحين جواد يعطي رونق خبر وتتجهز وتنزل لزوجها
قاطعه جواد بجمود: انا قلت لك من قبل يبه رونق وجراح مستحيل يرجعون لبعض ...ما لك نصيب عندنا يا جراح واتمنى بدون شوشرة ترسل ورقة الطلاق وما له داعي نرجع للمحاكم مرة ثانية!
جراح رفع حاجب وبداخله قهر من جواد وبنبرة حادة نطق:اتوقع هذا الامر يخصني انا ورونق
قاطعه جواد بانفعال: رونق ما لها كلمة بعد كلمتي!
ابو جواد ناظر ولده بغضب من عناده ...وبقوة نطق يبغى يضع حد لهذه المهزلة: جواد لهنا وكافي!
سكتت لك بالمرة الأولى وكانت نهاية المطاف خسرنا عبدالله ومريم !
لو ما انتقلت هناك كان الحين موجودين معنا والسبب رونق ...وللحين متمسك فيها!
زياد نطق بانتقاد: ما يصير كلامك هذا يا عمي !
مريم وعبدالله انتهى اجلهم وكل هذه أسباب وربنا ذكر بالقران إذا جاء أجل الانسان ما يتأخر ساعةولا يستقدم
قاطعه ابو جواد بندم : استغفر الله!،
والله يا ولدي فيني حره هنا ما انطفت!
جواد اختنق لفقدان عياله ..عبدالله الي كان ينتظر الساعة الي يزفه ويزوجه ويفرح فيه ..كيف كذا فجأة يختفي وما له أثر !
راكان تكلم بهدوء: ربي يرحمهم ويجعل الجنة مثوى جميع المسلمين...ما نبغى نظل على اعتاب الماضي ونقول لو ويا ليت !
كم تمنيت يرجع الزمن ونصحح اغلاطنا ..انا خسرت مريم بسبب عنادي ....لا تكرر نفس الغلط يا جواد ...وارجع رونق لزوجها ..لا تنسى بينهم ولد !
جراح ناظر راكان مب مصدق انه تكلم كذا ..التفت على جواد يشوف رد فعله جواد تكلم برفض: انت ومريم شيء وجراح ورونق شيء !
زواجهم من الاصل غلط!
ليه نستمر بالغلط؟!
رونق عاشت حياة مختلفة عن حياتنا وليه اظلمها حتى تتأقلم وتعيش حياتكم ؟!
انا ابوها واراعيها انت مب مجبور تتحملها ولا تنسى الأحداث الي صارت بالاخير ما رح تنساها انت واهلك وهي ما رح تنسى
قاطعه جراح :هذا
تابع كلامه جواد وهو يقطع عليه:انا رونق رح اطلقها منك
ابو جواد صرخ بغضب: خلاااص كافي!
وانحنى بتعب وهو يتكلم: انت تبغى تجلطني بكلامك يا جواد ...وش قاعد تهبب ؟!!
جواد بحزم : رونق ما رح ترجع لجراح
ابو جواد تفشل من جراح انتخاه حتى يرجع رونق ويصير كذا ..بنبرة حاده نطق: رح ترجع
جواد لما شاف اصرار ابوه ..عرف انه ما رح يقدر على كلمة ابوه نطق بتعجيز: ترجع بس بشقه بروحها مع اهلك ما تسكن"
راكان باعتراض: كيف وبيته
جواد بإصرار: رونق ما تسكن إلا بروحها في بيت مستقل وغير كذا ما عندي !
جراح عقد حواجبه: وليه اهلي وش فيهم ؟!!
زياد بانتقاد: احمد ربك إنه رضينا تسكن معنا بعد سوالفها
قاطعه جواد بقوة: وليه ما ترضى ان شاء الله يا حضرة الدكتور؟
سحرتوا ولدكم ولبستوا التهمة لرونق حتى تتخلصوا منها...بصراحة انا ما اضمن امك واخواتك يكيدون لها مرة ثانية
قاطعه جراح وعقله يرفض هذا الاتهام لأمه وبقوة نطق: حدك امي ما اسمح لك بكلمة وحده عليها!