روايه بسمه مدفونه في خيالي

البارت 6

مريم جالسه معهم وحاضنه قدر إلي متعلقه برقبتها بقوة ...مريم بابتسامة متورطة : احد يشرح لي السالفة !،
مروة بضحكه : يا حلوك يا مريم وانت ام هذه انتي صرت ام بعمر صغير !
جمانه جلست جنبها : يا اختي ليه مب متقبله احد غيرك !
يا دبه تعالي !
قدر دفنت راسها بصدر مريم
سعاد وهي مولعه :يعني عمي كله حنان نزل مره وحده !
هذه بناتنا ما عمري شفته لاعبهم والا سأل عنهم !
نغم بنغزه : والله عمي يحب عيالي ليث من صغره يسال عنه وياخذه مشاوير وحتى غيث
قاطعتها سعاد بحده: ما حد طلب رايك !
ام جواد بغضب : لا حول ولا قوة الا بالله !
الجازي وقفت : يلا يا مريم وقت الغداء ابوك على وصول !
مريم وقفت سرعان ما جلست لما صرخت قدر وهي متمسكة فيها !
مريم ناظرت جدتها : جدتي فكيني من هالورطه!
ام جواد مب ناقصها صراخ : خذيها معك الحين ان بكت وش يسكتها !
مريم سكتت على مضض تخاف من رد فعل ابوها يمكن ما يبغى صغار !
**
**
**
**
جالسه على اعصابها ...ناظرت جدتها بلوم : ليه يا جدتي ارسلتيها
ام مرعي متمدده على الأرض : تراهم اهلها ولهم حق فيها !
رونق : اخاف عليها انت تعرفينها مب متقبله احد ....وبعدين الحين نزل عليهم الحنان ...زمان صلينا العصر وللحين ما رجعها مب قلت بعد العصر قالك
ام مرعي بضجر : يا صبر ايوب !
قومي اعملي لي شاهي ترى صدعتي راسي !
وقفت بضيق وتوجهت تناظر من الشباك تشوف إذا جاءت او لا !
**
**
جواد متمدد على الكنبه وهو يشوف الجازي رايحه جايه تشتغل ...ومريم جالسه وقدر متعلقه فيها ...مط شفته : والله هالسالفه !
يعني لمتى وانت جالسه حاضنه عليها كذا !
وديها لابوها هو اولى فيها وقومي ساعدي امك !
الجازي إلي تسمع كلامهم : خليها الحين تبكي وش يسكتها !
اقتربت لين منهم وهي تناظر قدر ومريم بغيره
صارت تدف قدر بغيره !
مريم بضحكه : ما كنت ادري اني مهمه كذا !
جواد لما بدأت لين تبكي : يا ليل ابو لمبه !
احملي يا مريم اختك !
ابعدت مريم قدر عنها حتى تحمل اختها !
بدأت قدر تبكي بصوت عالي ...ولين تناظرها وتبكي !
اعتدل جواد بجلسته : والله !
هذه اخرتها افتح حضانه !
طلع الجوال واتصل بنايف ...تكلم بعد ما رد بحزم : يا اخي استحي على وجهك وتعال خذ ابنتك ......على وش تضحك ........وقسم بالله الحين ارميها من الشباك ....والله مريم مب مجبورة فيها ...الحين رح اطلعها برا ترى راسي مصدع منها !
يلا تعااااال ..سلام .
قفل الخط وتوجه لقدر : تعالي
قدر تعلقت بمريم بقوة: ماما ماما
مريم حست بشعور اتجاها ما قدرت تحدده : خلاص خليها يا بابا !
جواد باصرار : راسي صدع منها وبدل ما تحملين ببنات الناس احملي اختك !
الجازي اخذت لين إلي تبكي : خلص اترك الصغيره مع مريم !
حملها جواد متجاهل بكاء قدر لما سمع صوت طرقات على الباب ...توجه للباب وقدر تبكي وتؤشر على مريم : ماااااامااااااااا
فتح الباب وأعطاها لنايف بضجر : اففف وش حاطين بحلقها !
نايف متوهق : لحظه خليها تمشي ما اعرف احمل اطفال اخاف تسقط
قاطعه جواد بحده : اقول احملها بلا هبل !
حملها وقدر مستمره بالبكاء وتنادي ماما
توجه لجناحه اخذ نفس عميق ودخل بهدوء !
نايف يكلم الصغيره بهمس : الحين رح يطلع لك فيلم رعب
قبل ما يكمل وقفت وهي تتخصر : والله جايبها هنا!
رجع همس للصغيره : مب قلتلك هذا الوحش !
قدر ما زالت تبكي لكن بنبره اخف !
تقدم نايف من الصاله وتكلم بحده : متى ما سجلوا المكان باسمك تعالي حاسبيني مين ادخل
قاطعته بغضب: بس امنعك تدخل احد بوجودي!
زفر بغضب واجلس قدر على الكنبة: وقسم بالله لا تخليني ارجع امها واخليها تقابلك 24
قاطعته بقوة،: ومين قالك اني رح اجلس هنا !
مط شفته بملل : راكان رح يستقبلك بالاحضان !
جلست بغضب من راكان المتحكم فيهم ليت ابوها عايش،كان وقفه عند حده!
تكلمت بقهر : اشوفك حملتها على اساس ما تحب الصغار ولا تعرف تحملها !
مط شفته بسخريه بعد ما جلس : تعرفين من ريحة الغوالي
تكتفت بقهر ؛ والله لتندم !
لوى شفته بلامبالاه : يصير خير !
طلع جواله يطقطق فيه وهو كل شوي عيونه تسترق النظر للصغيره جالسه تبكي بصمت وتمسح دموعها بظهر كفها!
رق قلبه لحالها ما يدري ابوه كيف يفكر أكيد الحين تبغى امها ...بس غريبه تعلقها بمريم !
سعاد تهز رجلها بغضب : ايه ناظرها يمكن تشبه امها !،
ابتسم بطريقه نرفزتها : امها احلى !
وقفت بغضب وبصوت ارعب قدر : الله يأخذها ويأخذ امها القرويه !
وتركت المكان ..ناظر قدر إلي رجعت تبكي بقوة من الخوف !
اقترب منها بتردد : تعالي نروح للبقاله !
قدر تهز راسها بالرفض ؛ ماما ....رونق
زفر بضجر : افف من هالرونق وش هالاسم الغريب !
حملها بلطف : خلاص يا بابا
حس بصعوبة هالكلمه !
طلع من الجناح حتى يرجعها لامها مب ضروري تتم للمغرب عندهم مثل ما قال ابوه!،
**
**
**
**
واقفه عند الشباك كل شوي تناظر من الشباك قلبها انفطر تخاف خدعوها واخذوا البنت منها وهي مثل الغبيه !
ام مرعي تحس أصابها دوران من حركة رونق : يا بنت اجلسي
رونق بقهر -:-ليه تعطيهم يا جدتي !،
الحين رح اتصل بالزفت
ام مرعي: لا تتصلين بلاه يظن انك تحومين
قاطعتها رونق بغضب : حامه القرد ان شاء الله ..ما علي من كلامهم الاهم اطمئن على قدر!
طلعت الجوال واتصلت برقمه وهي واقفه عند الشباك ....تكلمت وقلبها يدق بقوة : هذا العصر زمان صلينا ليه ما رديتوا البنت للحين !
نايف إلي جالس مع اهله بعد ما ابوه رفض انه يرجعها الا للمغرب : الناس تسلم بالاول
قاطعته بقهر : الله لا يسلم فيك مغزة ابره
صفر باندهاش : لذي الدرجة تكرهيني،!
ابو جواد اشر له بعيونه يسأله عن المتصل !
نايف حط كتم وناظر ابوه : هذه رونق تسأل عن البنت !
جواد بانتقاد: ما لقت غيرك تسأله !
بدر بانتقاد : وليه الكلام الزايد سالتك عن البنت تجاوب بدون حكي زايد ليت بعض ناس جالسه حتى تعلمك ان الله حق !
ضحك نايف : والله صوتها وكأنها موظفة اتصالات وحتى وهي معصبه حلو
ابوجواد بحده قاطعه : اعتدل يا نايف ....تبغاها نرجعها على الاقل تلم ابنتها وش رأيك؟!
جواد ما عجبته السالفه : فكونا منها باكر حتى تنجب كتيبه وبعدها يطلقها ونبتلش بعياله تراه مب قد المسؤوليه!
نايف ناظر جواله بعد ما قفلت الخط رونق : تراكم تهينوني وانا ساكت !
ابو جواد بجديه : وش قلت ؟!،
اليوم اكلم جدتها
ليث بانزعاج : يا جدي ترى
بدر بتأييد: ليه لا ؟
بدل ما تعيش البنت مشتته هنا وهناك جمعهم في بيت !
قبل ما يتكلم نايف رجع جوال يرن ..فتح خط ابتسم على الهجوم إلي داهمه : انت وين طسيت ...وين البنت ؟!
نايف ببرود ينرفزها: والله البنت ابنتي وما رح ارجعها بكيفي!
قاطعته بقوة: بس ابوك قال بعد العصر رح يرجعها !
نايف بجديه : اذا تبغين ابنتك وش رايك ارجعك لذمتي
سكت لما حس بشيء ضرب على راسه ....ناظر ابوه بقهر ليه ضربه !
ابو جواد بقهر : غبي !
رونق باشمئزاز بس من مجرد الفكرة :الله ياخذني قبل ذاك اليوم إلي رح ارجعلك ..الحين خلصني وين البنت !
قفل الخط بوجهها وبقهر:،ليه ضربتني يبه !
ابو جواد بغضب ؛ وانت على طول تتكلم بدون فهم !
كيف تبغاها ترجع لك بذي البساطه !
جواد مط شفته: والله يطلع لها تدلل تحمد ربها !
بدر مط شفته : يا اخي انت ليه تستحقر الناس هي مب انسانه عندها مشاعر
قاطعه ابو جواد وهو يكلم نايف ؛ فكر بالموضوع وان اقتنعت فيه قناعة تامه خبرني،
ليث ما عجبه كل السالفة : والله يا جدي ما له وجع هالراس
نايف ناظره وهو رافع حاجب : اشوف الكل يتدخل بحياتي ...وكل واحد يعطي رأي
ليث رفع الحاجب: الحين مب عاجبك تدخلنا ايام
قاطعه نايف خاف يطلع فضايحه القديمه : مب كذا. ...انتم اتركوني افكر ويصير خير !
اروح ارجع لها البنت بلاه تعمل لنا فضيحه !
ليث وقف : اروح معك !
ابو جواد وقف : لا انت ولا هو انا بطريقي ارجعها !
**••
**
*•
**
ناظرت جدتها بضيق: شفتي يا جدتي من لنا رجعت البنت شفيها كيف ملتزقه فيني وعيونها متورمه من البكاء ...قلت لك ما ابغى أرسلها !
ام مرعي بضيق :،اكيد رح تستغربهم لانك مب موجوده معها باكر تتعود !
رونق بتذكر : ابوه وش يبغى منك !
ام مرعي ظهر الضيق على ملامحها : ولا شيء !
رونق متأكده في شيء ..ليه وقف معها برا ؟!
خزت جدتها :صايره عندك اسرار
ام مرعي وهي تناظر قدر : يقول يبغى يرجعك
رونق ضحكت من قلبها : تعرفين تنكتين يا جدتي ههههه
ام مرعي تابعت كلامها بوجع : يقول مستعدين يتنازلون عن القضية
قاطعتها رونق بانزعاج : ترى القضيه ماتت وشبعت موت للحين ينتظرون حقهم وعمي ومرزوق عايشين حياتهم
ام مرعي قاطعتها بضيق: حياتهم !
قولي لي عمك يقدر يطلع من محيط القرية ؟!
فتحت رونق عيونها باستنكار: لا تقولين بسبب نايف تراهم من قبل مطلوبين وما يطلعون من باب البيت
قاطعتها ام مرعي : عمك صحيح عليه ديون بس كان يطلع من القريه ما عليه شيكات مثل مرزوق!
قطبت حواجبها باستنكار: ترى كل كلامك هذا له مغزى
لكن لا تفكرين ابدا لاني مستحيل
ام مرعي : انا اقول نقول لهم موافقين وبعد ما يتنازلون نقول لهم مع السلامه خلي هالقيد ينزل عن عيالي ترى قلبي يتعذب الف مره كل يوم !
ارحمي كبري وتعبي وانا بعيد عن عيالي وديرتي ما في رجال يفتح علينا الباب ويدخل
فكري يا رونق بحالنا !
مثل ما ضحى عمك وولد عمك بالمقابل ابذلي بعض التضحيه!
لمعت عيونها بالدموع مب مرتاحه لذي السالفه !
ناظرت جدتها : بالأول يتنازلون
ام مرعي : وهذا إلي رح يصير ....صدقيني ما رح اسمح ترجعين لذمته ليوم واحد !
رونق زفرت بضيق : متى نرتاح من الشقاء والتعب !
رفعت نظرها لاخوها دخل والتعب باين بملامحه من الشغل ...متى يرتاحون من هالتعب !
حضنت قدر وهي تتمنى القادم اجمل !
**
**
**
جالس مع جدته وامه ويسمع لامه المنفعله: انت كيف ترضى انهم يرجعونها ضره على اختك !
راكان ببرود : وش فيها ...اختي جالسه في بيتها معززة مكرمه ...وذيك لها بيت لوحدها بعيده عنها !
ترى الشرع حلل اربعه !،
ام راكان بقهر : وقسم بالله طول ما انا على قيد الحياه ما تتزوج الا وحده وانا اختارها !
ضحك على كلام امه: يا يمه من الحين اقولك انا رح اعدد وإلي رح اخطبها رح تكون بالصورة ومعها خبر !
ام ناصر : ما بتلقى احد يعطيك !
الحين نايف يبغى القرويه والا
قاطعها : والله ما يعرف له هالانسان !
بس يقولون شرطهم بالاول يتنازلون عن القضية حتى يحضر عمها العقد !
ام راكان : وش يضمنهم انها خدعة
قاطعها بحزم : هي السالفه على كيفهم !
والا لعبة اطفال !
ام ناصر : والله دنيا !
هذا اخر دلالهم له !
ام راكان بقهر: والله لو ادري انه عنده هالسوالف ما اعطيه ابنتي!
وانت يا راكان معقول ما تدري عن بلاويه !
لا والغبيه الثانيه تبكي وبنفس الوقت رافضه تتركه تقول تحبه !
مالت عليها ما ادري على وش تحبه !
لانه بدون عقل لو فيه عقل ما خطب طليقة اخوه يقول يحبهاااا!
مالت عليه ما ادري كيف يفكر
ام ناصر بدفاع : والله الجازي توضع على الجرح يبرأ!
انت ما تعرفينها
ام راكان : والله ما اعرفها !
بس يقولون
قاطعتها ام ناصر : لا تسمعين لام جواد تبغضت لها لاجل حنين،! والا الجازي ما شاء الله عليها حاولت تتأقلم معهم بس ام جواد ما تركت لها فرصه!
وجواد نفس الشيء كان قاسي معها انت متخيله سنه وهو خاطب ابنة عمه بدون علمها وطول الفتره خلاها تعيش على انه العاشق الولهان إلي مجبور على الزواج !
مسكينه ربي عوضها واعطاها رجال يخاف عليها ويسعدها !
ام راكان : حتى ام فياض طيوبه وولد خالتي ابو فياض يمدحها للجازي بس سمعت انها بخيله
ضحكت ام ناصر : ههههه وش هالكلام هذا !
انت اتركي عنك هالكلام !
وشوفي ابنتها لولدك ترى البنت صاروخ وما تتعوض مؤدبة ومحترمه!
راكان ابتسم : صاروخ مرة وحده !
ام راكان : قلت له عنها يقول انتظري تكبر على الاقل تكون انهت الثانوي !
ام ناصر باستعجال: على الاقل حجز بالكلام حتى الكل يعرف انها خطيبتك !
راكان هز راسه وهو يتذكر مرة صادف جواد معه زوجته وعياله وكانت مريم معه مب باين منها شيء ..تعجبه البنت إلي كذا : يصير خير !
ام راكان بابتسامه : عسى ربي يوفقك ويفتح لك ابواب الرزق !