روايه بسمه مدفونه في خيالي

يتبع بارت 22

مساء الخير ...ترى انا ماعصبت بس تنرفزت وحسيت نفسي مضغوطه علي امور كلها لازم أنجزها بنفس الوقت 

المهم اترككم مع البارت
********************************************************************************************************

لو جراح هنا يحل الموضوع بطريقته !
صاحت بداخلها وكأنه رح يسمعها «جرااااااح وينك ؟؟»
اخر فرصة لها ناظرت ابوها برجاء: ممكن جوالك ابغى اكلم صدقيتي ما معي رصيد كفاية
هز راسه ووقف : معك دقيقتين لا تطولي انتظرك برا !
هزت راسها واخذت الجوال وبدات تبحث عن رقم جراح ....ارتاحت لما وجدته ...سجلته على جوالها باصابع مرتجفه .....
اتصلت من جوالها على جراح ومع كل رنة تشعر قلبها يسقط بالارض .....
ما احد رد ...رجعت تتصل مره ثانيه وبداخلها تصرخ «رد رد »
حست قلبها هبط لما سمعت : الو
بنفس الوقت فتح جواد الباب : يلا تأخرنا
ناظرت ابوها بملامح باهته وعيون جاحظه ...والصوت يتردد باذنها : الو مين معي
صوت غليظ ما عمرها سمعته ...تأكدت انها غلطت بنقل الرقم ...قفلت الخط بصمت وهي ضاغطه على جهاز ابوها بقهر....كيف ما انتبهت !!
جواد يحثها : يلا غسلي وجهك
سكت لما شافها وضعت جواله على السرير وتوجهت للحمام بعد ما وضعت جوالها على الشاحن ...
غسلت وجهها بقوة ...لتفرغ القهر والعجز الي يسري بجسدها تفرغه بوجهها البريء !
،مسحت وجهها باكمام العباية بدون ما تناظر نفسها ....
وخرجت للخارج وكأنها تساق للموت!
عضت شفتها بقوة وهي تتوعد والله لترد هالحركة من عيون ابو جواد وتخليه يحس بطعم الفقد الي جالسه تتجرعه الحين !
**
**
ام ربيع مبسوطه كثير ...مين قدها ولدها يتزوج دكتورة !
هذا اهم شيء عندها شهادتها تشتغل فيها بأي مكان ....وتساعد ولدها على امور الحياة ...اذا ما كانت موظفة لا يمكن تخطب لولدها.... شروطها تكون موظفة او دكتورة على مقاعد الدراسة وظيفتها مضمونة !
رفعت نظرها لما دخلت رونق وسلمت عليها ...حتى تكون صادقة ما عجبتها ابدا لكن تخصصها يخليها تغض النظر عن هذه النقطة !
ناظرت ولدها تشوف رد فعله....
رفع حاجب بصمت وما فتح فمه بكلمه وحده ...
ام جواد بابتسامة : هذه هي العروس الحلوة !
ام ربيع بمجاملة : ما شاء الله عليها !
كيفك يا رونق؟
رونق تحس بالاختناق كيف جالسه مع رجال غريب وكاشفه وجهها وهي مخطوبه ...ما لها خلق أبدا للمجاملات ...نطقت بدون نفس بصوت ما وصلهم وعيونها بالارض : بخير !
ام جواد تلطف الجو : البنت مستحية
قاطعتها ام ربيع بابتسامة : ادري ربي يحفظها خجوله وش نبغى افضل من كذا !
وبدات ام ربيع تدخل باسئلة تحقيق حول وظيفتها وام جواد تجاوب !
عفس ملامح بضجر من امه وكلامها ...تكلم بهدوء يبغى يطلع مل من ذي الجلسة : الحين يا خالتي اسمحي لنا وان شاء الله خير !
ام ربيع تبغى تثبت رونق لولدها باي طريقه : لحظة خلينا نتفق على موعد التحاليل
قاطعها بجعرفه: ما له داعي ...السموحة يا خالتي بس كل شيء قسمة ونصيب !
رفعت رأسها رونق بصدمه من كلامه ....التقت عينها بعينه وحست وكأنه جبل وانزاح عن صدرها ..علت شفتها ابتسامة تعبر عن قمة فرحتها وراحتها ....ما توقعت الموضوع يمر بسلام كذا !
عقد حواجبه باستنكار وهو يشوف ابتسامتها المستفزة وكأنها فرحانه بهذا الخبر ...مثل ما توقع مجبورة من اهلها ...وجه نظره لام جواد وامه الي تستفسر عن السبب ...رد بتكبر : الله يسامحك يمة قلت لك شرطي بالبنت جمالها
ام ربيع بقهر من ولدها ومنحرجه من ام جواد: والبنت وش ناقصها
مط شفته وناظر ام جواد: السموحة منك يا خالتي مرة ثانيه بس البنت ما هي نفس المواصفات الي ابغاها !
استأذن وطلع وخلفه امه المنحرجة من تصرفه !
تنهدت براحة بعد ما خلص هالموضوع..ما توقعت ينتهي بذي السهولة ... ناظرت جدتها بعيون محروقة: وين قدر؟
ام جواد مستغربه رفض ربيع لها ما اثر فيها ....ردت بمصداقيه،: والله ما ادري يا ابنتي ولا لي علم بهذه السالفة ونايف حسابه عندي!
الحين رح يجيبها لك غصب عنه ..انا اتصلت فيه من لما خبرني جواد وما يرد ..
رونق اقتربت منها ودموعها على وشك النزول ...وصوتها يهتز : ابغى اعرف هالقسوة الي بداخلكم من وين وارثينها ؟!
من اي بشر انتم !
اشك اذا عندكم قلب او ذرة انسانية !
انتم
سكتت وهي تأخذ نفس تحاول تثبت نفسها من البكاء...مسحت دمعة تسللت على خدها اول ما دخل جواد ومعه قدر....ركضت قدر لامها وهي تبكي بصمت !
حضنتها وهي واقفه ...ومسحت على رأسها وظهرها :لا تبكي يا ماما ... انا معك هنا !
رفعت نظرها لجدتها وأبوها وبنبره مقهورة : الله يحرق قلوبكم مثل ما انتم تحرقون قلوب الناس من حولكم ...لا ذمة ولا ضمير!
وما تركت لهم مجال للرد سحبت نفسها وغادرت لغرفتها وقفلتها بالمفتاح ...بعد اليوم ما رح تكون مطمئنة على قدر ...لازم تفكر بطريقه تحافظ عليها ...ما رح تسمح لاحد يقترب منها!
**
**
**
**
ام جواد برعب تصرخ من المشهد الي تشوفه : جواااااد اتركه
جواد ماسك نايف من رقبته بقوة ...نطق وهو صاك على اسنانه بقوة : حذرتك من قبل
ابو جواد يحاول يبعد جواد عن نايف لكن بدون فائدة ...وكأنه ما بعالم ثاني
نايف يحاول يبعده عنه .يحس بالاختناق ...خلاص يحس الروح طلعت منه...وكأنه بلحظاته الاخيره ...للحظة حس الحياة رجعت له بتدخل ليث وبدر ...ابعدوه عنه بالقوة !
جواد يحاول يبعد ليث وبدر عنه وبصراخ : اتركوني عليه هالمنحط ...وقسم بالله
بدر بغضب صرخ : خلااااااص كافي!
ابو جواد جلس بتعب على الكنبة وهو يشوف عياله يتذابحون ...ناظر ام جواد تبكي وهي تتفقد نايف ....ناظر جواد وكأنه ثور هائج وجود الاثنين بمكان واحد ما رح يرسي على خير ...نطق بغضب و هو يؤشر على جواد : من باكر تشوف لك شقه وتطلع من البيت !
هذا اخوك يا قليل الخاتمة !
تبغى تذبحه قدام عيون امك !
ما احترمتني ولا احترمت قلب امك !
ام جواد بصراخ ،: ما احد يطلع من البيت !
خلاص اتركوا البنت بحالها وما رح تصير مشاكل!
يكفي وجعتم قلبي بمشاكلكم !!
جواد زفر بغضب : انا نبهتكم من قبل ابعدوا عن البنت بس ما
قاطعه بدر بغضب اكبرمن همجيته : تراه ابوها واخذها وين المشكله !
هذا انت اخذت من الجازي بناتها والا انت يطلعلك كل شيء وغيرك ممنوع !
بس شاطر تحاسبه إذا ارسل مصروف لها او لا ؟!
هذا ابوها تفهم !
وما لك علاقة فيه ومن باكر رح نرفع قضيه بالمحكمة لحضانة البنت ونثبت انها امها مجنونه بشهادة الجميع ووقتها خلي همجيتك تنفعك !
نايف تشجع بعد كلام بدر ...نطق بتمرد: انا ابوها ورح اخذها بالمحكمة
بلع اخر كلمه بخوف لما تحرك جواد لجهة نايف بس ليث منعه ..سرعان ما اختبئ نايف خلف بدر بخوف من اخوه وكأنه مراهق يخشى اخوته الاكبر منه
ام جواد بدأت تولول ...المشكلة بدأت تكبر اكثر : بدر اختصر
ابو جواد قاطعها بقوة : وهو صادق !
وقسم بالله اذا ما تركت همجيتك يا جواد الا
جواد ناظرهم بقهر : ايه وقفوا مع نايف الي دوم فعايله تشرف !
انا مو ضد انه يشوف البنت بس ما يسرقها بذي الطريقة ولا يجلس الشاطر فيكم يربط هالسالفه بالجازي انا وضعي يختلف عن وضع نايف !
انا ما اخذتهم منها الا بعد ما انخطفوا والا من قبل كانوا معها !
ليث بهدوء تكلم : يا جماعة الخير حنا نبغى نصفي القلوب ما تتنافر بزيادة !
لازم الطرفين يتقبلوا بعض ويلغوا الحاجز الي بينهم ...انت يا عمي نايف فكر بقدر طفله وش ذنبها تعيش على هامش الحياة ؟!
لازم نبسط الأمور وما نعقدها بزيادة !
والمفروض اول حل لذي الامور رونق تعيش هنا في بيت ابوها ...تجلس مع بنات عمها ....تجلس مع جدتها وجدها واعمامها تحس انه لها اهل تتقرب منهم ما هو تاركينها عند جدتي ام ناصر ترى حنا اقرب من بيت عمي ابو راكان ليه تعيش هناك ؟!
كيف تنكسر الحواجز وهي منعزله هناك مع ابنتها ؟!
ام جواد ناظرته بضيق: إلي يسمعك يقول طاردينها وش نعمل تراها رافضه
قاطعها ليث : ما هو برضاها ...بيت ابوها اولى واحد يضفها !
ترى والله ما هي حلوة بحقكم يا جدي !
نايف مط شفته بسخرية: الاستاذ راكان والدكتور زياد قالوا تجلس عند جدتي مين يعترض على قرارهم وكأنهم ملائكه !
ابو جواد ناظره بغضب : انت انكتم !
ناسي فضل راكان عليك ...الحين ما هو عاجبك راكان !
راكان الي ما احد بذي العائلة وقع بأزمة الا ساعده ! انسان متعلم ومثقف وزياد دكتور مثقف فهمان ما هو مثلك يا الساقط!
نايف فتح عيونه باستنكار : دوبك بصفي يبه !
بدر زفر بضيق من هالمشاكل: خلاص نايف انتهينا ! انا اقول مثل ليث الحواجز ما رح تزول إذا ما عاشت مع اخوانها ...يا اخي جربوا وش رح تخسروا !
ابو جواد تنهد وهو يناظر عياله : ماابغى تيجي هنا على الطالعه والنازله تتذابح مع نايف،!
نايف ناظر امه الي تبكي بصمت من الحال الي وصلوا له ...اخوه جواد مجنون ان احد قرب من عياله يتحول لمجنون وما يهمه احد !
بغى يذبحه قدام عيون امه بدون ما يرف له جفن...حزن على امه وقلبها المتقطع بينهم ....تنهد بهدوء: انا اوعدكم ما اتعرض لها بهذا البيت ...ولا كأني اشوفها !
بدر هز راسه :حلو
نبغى تطبيق ما هو مجرد كلام !
خلينا نرتاح من وجع الراس !
جواد نطق وهو يخفي عجزه بالسيطرة على رونق : خليها الحين عند جدتي ام ناصر تراها جالسه عند جدتي ما هو في بيت عمي ابو راكان !
جدتي بحاجة ونيس لها بالبيت !
سلط نظره على نايف : اتمنى هذا التصرف ما يتكرر...انا عيالي خط أحمر افقد صوابي وما اتحكم بنفسي .. اتمنى تضع هالشيء في بالك !
والحين اسمحوا لي !
استأذن وغادر بصمت ...دخل بهدوء ...ناظر الجازي ومريم وعبود جالسين بالصاله وكأنهم يترقبون وصوله !
اعطى نظرات ناريه لعبود ..وتحرك باتجاه غرفته !-
وقف عبود بتردد وتكلم حتى يسترضيه:يبه
طالع جواد بغضب وبنبره مرتفعه نطق : الي ما فيه خير لاخواته ما ابغاه ...بدل ما توقف مع اختك وتمنع هالمهزله تروح تساندهم وتحرق قلبها ؟!
ما عندك اب زفت تستشيره وتقول له كذا كذا ؟!
والا خلاص كبرت وما لي كلمة عليك ؟!
وقسم بالله ان سمعت انك متعرض لرونق الا
قاطعته الجازي بقهر ....ما طاب لها جواد يعمل بعبود كذا وتسكت : علامك عليه كذا ؟!
حتى لو غلط مو بالاسلوب هذا ترى عمي هو
قاطعها بتحذير : لا تتدخلي تراها واصله معي اختصري،!،
تركهم ودخل الغرفه بعد ما ضرب الباب بقوة !
مريم ما تتحمل الاجواء المشحونه بنبره مرتجفه نطقت : ماما
الجازي ناظرتها بضيق: لا تهتمي باكر ينسى وترجع الامور عادي !
عبود بقهر:-شفتي يمه ما يكلمني
الجازي كتمت قهرها : اتركه الحين ابوك متضايق ...باكر كلمه ويطيح الحطب !
عبود عفس ملامحه وهو طالع : يا كرهي لذي الاخت وقسم بالله لو اشوفها بالنار ما ساعدتها !
**
*
**
في اليوم الثاني.... .جالسه على الارض وراسها على السرير .....ما نامت طول الليل ...تخاف تغفى عينها ويسرقون قدر !
شدت بيدها على بطنها الم فضيع ...مع صداع شديد ...تعبانه مب قادره تتحمل الوجع أكثر !
غمضت عيونها وهي تحس قوتها خارت من المرض !
فتحت عيونها بفزع لما حست باحد وضع يده على كتفها ...زفرت بارهاق وهي تشوف قدر تردد : ماما ابغى اكل
رونق تحس نفسها غفت لحظات ...وقفت بصعوبة ..سرعان ما لمع بعقلها فكره ....توجهت للمطبخ وهي تمسك يد رونق باحكام !
بدات تبحث عن الي في بالها ما لقت !
التفتت للخلف على جواد الواقف قريب منها : على وش تبحثين ؟!
ناظرته رونق وتنهدت براحه ..بعدها نطقت : ابغى حبل اربط يد قدر بيدي حتى ما
قاطعها وهو يجلس بملامح متكدره : تراه ما هو حل بكل سهوله يقطع الحبل !
انت طالبه جامعيه كيف يكون الوضع وانت رابطه يدك بيدها؟!
انت صاحية ؟
رونق وقفت وبتساؤل نطقت : اعطيني الحل !!!
جواد زفر بضيق : انا مو مرتاح لهذا الوضع ابدا !
حتى لو ما عشتي عندي تراك غاليه علي وما اسمح لاحد يمسك بسوء ...البارحه الله ستر كان طلعت روح نايف بيديني .....
انا ابغى حل ينهي الخلافات ...ابغاك تعيشي مبسوطه ومرتاحه والاهم تشعرين بالامان لك ولابنتك !،
وما في غير هذا الحل !،
ناظرته وهي معقده حواجبها ...لأنه بنظرها مشكلتها ما لها حل :وش الحل ؟!
جواد يراقب رد فعلها : تتصالحين مع نايف انسي الماضي ..والأهم تعيشي معي في بيتي ...
وقبل ما ترد تابع : صدقيني ما رح تشوفين نايف ترى مريم أختك طول حياتها ما شافته الا كم مرة !
تراه ما هو بذاك السوء بس عقله ما هو مساعده !
ترى بقلبي جمرة وانا اشوفك بعيده كذا عن الجميع وكأنك ما تحملين دمهم !-
ابغاك مثلك مثل بنات عمك !
صفحة جديده ما تكلفك شيء وتضمني قدر جنبك !
وش قلت ؟!
للحظة حست الرؤية ضباب أمامها ...وضعت يدها على راسها ...تحاول تعيد توازنها ..متجاهلة سؤال جواد: وش فيك!
رونق انت بخير !
ابعدت يده عنها بخفه ونطقت: ما فيني شيء !
اخذت نفس بصعوبه وناظرته بخيبة : ليتني ما عرفتكم ...ليتني للحين بالقرية يتيمة افضل من الحياة الي اعيشها !
انا من لما عرفتكم تدمرت حياتي...احس نفسي ضايعه ..ما اعرف وش ابغى من الدنيا!
ما اشوف حولي الا الظلام ....كل شيء جميل بحياتي انطفى وما عاد له اثر !
حتى الامان فقدته !
تدري انا كنت عند فياض احس بالأمان اكثر من كذا !
ايه فياض زوج امي زوج امي حسيت بالامان عنده اكثر منكم ..كنت اطلع واترك قدر عندهم وانا مطمئنه عليها انها بامان !
كنت اتركها عند عمة امي نجوى تخيل اتركها هناك وانا مطمئنة إنها بأمان ...اما الحين انا عند اهلي وبغرفتي ومقفل الباب بالمفتاح وما انام الليل خوف على ابنتي ...فقدت الأمان عندكم ....شفت لاي حد وصلنا !
صفحة جديده وانا دوبني جاية عندكم!
وش الذنب الي اقترفته حتى تكرهوني كذا !
جرجرتك بالمحاكم ما كنت اعرف انك ابوي !
تكلم قول وش الذنب الي اقرفته ؟!
انا
سكتت بمراره تحس خلاص الكلام تبخر من عقلها ...
جواد يناظرها وهي تتكلم ...وبداخله بركان الحين تشعر بالامان عند فياض!
هو ابوها الملجئ لها ...هو الأمان لها ما هو زوج امها !
تقدم منها اكثر ....خلال ثواني كانت بحضنه ...تكلم بقهر : والله ماتذوقي الضيم ورأسي يشم الهواء !
انت كبدي وما احد يتخلى عن قطعه منه !
تركتك هنا ما ابغى اجبرك على شيء وبعدها افقدك للابد !
ابيع الدنيا كلها من اجل عيون عيالي !
ارمي كل همومك على ابوك وعيشي حياتك بسعاده .....
شدها لصدره وهو يمسح على راسها بحنيه !
ما كان منها رد فعل الا البكاء .مشاعر متبعثرة ....هذا ابوها سندها ...هذا ابوها الي دوم تحس مكانه فارغ ...الاب الي من طفولتها ترمي نفسها بحضنه ...وترمي كل صعوبات حياتها عليه ....هذاهو جاء ....تتركه وتكمل حياتها لوحدها وإلا تبدا معه من جديد بحياة لعلها تكون اجمل !
لحظه !
وامها ؟!
هذا الشخص هو كان سبب معاناة امها ...عذبها واوجع قلبها ....كيف تسامحه وتعيش حياة طبيعية !
نهرها شيء بداخلها هذا ابوك وله حق عليك مثله مثل ام ك ...ما لك علاقة بمشاكلهم ..ماضي راح وانتهى ليه تبقى واقفه عنده ...الحياة مشت وكل واحد كمل حياته ..ليه تترك نفسها عالقه بماضي امها وابوها !
ليه دوم تضع نفسها بالمشاكل ...اذا أبوها ظلم امها ليه ما انتقمت الجازي منه بنفسها ..ليه تجعل نفسها اداة انتقام للناس ...هي انسانه وما لها علاقة بماضي امها وابوها ...رح تتعامل مع كل الطرفين بكل حب واحترام وتتواصل مع كل الطرفين ..رح تكون طرف محايد ...وتجرب لعلها هالمرة هذه تبتسم لها الدنيا وتعيش بسعادة وراحة بال !
•
***
**
***
**
الجازي قفلت الجوال بغضب : ما ترد !
رفع حاجب بانتقاد: يعني تلاقينها دوبها واصله تبغينها تروح عند امك !
ناظرته بقهر قلبها يقول رونق ما هي مرتاحة: سمية تقول انها ما رجعت ورح يجلسون أسبوع زياده ...وترى اطق اذا ما اطمئنت عليها !
ام فياض مطت شفتها : والله عاد ما تتحكمين باهلك علشان رونق
عقدت حواجبها الجازي وهي تناظرها ما عجبها نطقها لاسم رونق وكأنها مالت شفتها بقرف او جعرفه : وعلامك تنطقين اسمها كذا
ام فياض باستدراك : أقصد انه ابنتك ما ينخاف عليها ..لو تعاديها بلد كامله الا تقهرهم ..
الجازي تنهدت بتمني : اتمنى يصير كذا !
بس هي يا عمتي كتومه ما تشكي همومها لاحد !
تظهرلنا انها قويه وهي بداخلها انكسارات !
فياض مط شفته بضجر: جازي خلاص قفلي هالسالفه ترى حياتنا ما فيها الا رونق ...ترى كرهت هالاسم من كثرما
قاطعته بقهر : انت اصلا ما تحب رونق وتكره هالبنت..ما ادري وش عملت لك حتى تعاملها كذا !
بس قليل من الرحمة ...طول عمرك قلبك كبير ويتحمل الجميع ....ويمد يد المساعده بدون ما احد يطلب منك الا رونق من لما عرفت انها ابنتي وانت تعاملها بطريقة ما ادري كيف ؟!!
زفر بضيق :-انا ما اكرهها وإذا موجوده على كوكب الارض اخر همي !
البنت نفسها معقده وتتعامل مع الناس بطريقة غير لائقة ابدا ...ما انكر ظروفها صعبه بس هذا ما يخولها تتعامل مع من حولها بطريقة
قاطعته بسخرية : تبغى تضحك لك ولغيرك وتبتسم وهي من الداخل سكاكين تذبحها ....ايه انت وش عرفك بالحزن والضيق والكدر
قاطعها وهو يقف بغضب :ومين قال اني ما اعرف النكد والضيق والهم وانا متزوجك ما شاء الله صاروا رفقاء لنا ...الله يعطيني الصبر ...عيشه تقصر العمر ...
تركهم وطلع
زفرت بضيق رونق وهي تسمع موشح عمتها : كذا ضيقتي خلقه !
الزوج اذا حولت المراه بيته لهم ونكد وضيق ما يرجع للبيت ويقضي اغلب وقته خارج البيت حتى يخلص من نق زوجته
وقفت الجازي بضيق : صادقه ي عمتي والدليل عمي من سفره لسفره ما نشوفه !
فتحت ام فياض فمها بصدمه من ردها!
تنهدت الجازي بتعب : انا اسفه عمتي ما هو قصدي
ما ادري وش صاير بداخلي ..كلما أقول خلاص اجتمع فيهم تفرقنا الدنيا !
ام فياض تنهدت وتكلمت بهدوء : تخيلي إنهم متزوجات !
بناتي كم صار لي ما شفتهم ؟
ومع ذلك عادي الحياة تمشي !
دامك تكلمينها ليه كل هالقلق ؟!
هزت راسها بهدوء ..وبداخلها ماهي مرتاحة : صادقه يا عمتي !
•*
**
*
وضعت حقيبة اغراضها على الأرض وناظرت جواد المبتسم : رح تجلسي مع اختك بنفس الغرفه لانه مثل ما تشوفين المكان
قاطعته وهي تتأمل المكان بهدوء: ما في مشكلة !
هز راسه : الحين اتركك ترتبين اغراضك !
تركهم وغادر بهدوء ...ناظرت رونق اختها مريم واقفه متكتفه ومستنده على الحائط ..تحس وكأنه ما عجبها وجودها معها ....اشاحت وجهها عنها .وتوجهت ترتب اغراضها ....
بعد وقت قصير جلست على السرير ....وقدر جنبها !
مطت شفتها باستغراب مريم للحين على نفس الهيئة !
رمت الشالة جنبها ....اعادت ربط شعرها بعشوائية ..خلعت العباية وعلقتها ..رجعت جلست على السرير ...فتحت كتاب بدات بالمذاكرة بهدوء !
بينمامريم تناظر وتراقب شق التوأم لها ...لابسه بلوزه حمراء ساده توصل لنصف الفخذ باكمام طويله فضفاضة مع تايد اسود ....نحيله كثير بالرغم من البلوزه الواسعه الا نحافتها ظاهره !
بشرتها حنطيه شاحبة ....السواد حول عيونها ملفت للانتباه ...يمكن بالملامح يتشابهون وبالوضع الحالي ما في وجه مقارنه بينها وبين رونق ..هي اجمل من رونق بكثير !
تقدمت من السرير وجلست ومسكت جوالها وبدات تطقطق فيه وعيونها تسترق النظر لجهة رونق !
اعطتها رونق ظهرها تحس نفسها بدات تتعب بعد ما انتهى مفعول المسكن !
ما تبغى تشوف ملامحها المتوجعة !
قدر بصوت خافت: ماما ابغى العابي
كتمت تعبها رونق ونطقت بخفوت : دقيقة
اعطتها العابها ودفنت نفسها تحت غطاء السرير ..وهي ضاغطه على بطنها بقوة!
غفت للحظات ...فتحت عيونها على صوت قريب منها ...رفعت رأسها وناظرت مريم وقدر يلعبون بالالعاب !
رمت راسها على المخدة بارهاق !
**
**
ام جواد باستفسار هامس :كيف رونق معكم ؟!
الجازي مطت شفتها بسخرية : ليه حنا شفناها ؟!
دخلت سلمت بدون اي كلمة وبعدها دخلت غرفة مريم وما طلعت منها الا اليوم الصبح طلعت للجامعة كانت تبغى تأخذ قدر معها بس جواد ما قبل وقال لها البنت بعهدتي وبطلوع الروح حتى انقلع قصدي طلعت !
ام جواد هزت راسها : طيب تكلمت مع مريم
قاطعتها بنفي : لو حرف واحد ما نطقت !
انسانة غريبه ما شفت مثلها ....تناظرني وكأني اكلت حلالها ...ويا خوفي جايه تخرب بيتي من الحين ما رح اسمح
قاطعتها ام جواد : لوبغت تخرببيتك كان جلست عندك من اول يوم عرفنا بوجودها !
ما اقول الا حوبة الجازي وابتلينا بعديمة المشاعر والاحساس استغفر الله استغفر الله
**
***
**
من بيت جدته للدوام مباشرة ....متشوق لها كثير ...توجه للمكتبه لمكانها المعتاد بهذا الوقت ....حس بالصدمة ما هي موجوده !
ناظر حوله يتأكد يمكن غيرت المكان ...ما فيه ...يمكن جلست بالطابق الثاني ....زفر بتعب من البحث وين راحت !
معقول بالكلية وما طلعت منها !
ضرب الارض بقهر لازم يحصل على رقمها !
بنفس الوقت جالسة بالمصلى مع روعة ما لها وجه او عين تشوفه ...اكيد عنده علم والحين يفتح لها تحقيق ومشاكل ...وما هو ناقصها وجع رأس ....
روعة بتفهم : يعني الحين انتقلت عند زوجة ابوك؟!
انا لو مكانك ما اروح انا امي الحقيقية يا دوب اتحمل طلباتها كيف اتحمل زوجة ابوي !
انا اقول ارجعي لجدتك افضل !
رونق مسنده راسها على الحائط ..وعافسه وجهها بتعب :ما عادت تفرق ...ابغى اي حل اضمن فيه قدر تكون بأمان
خليني اجرب وش رح اخسر ؟!
روعة زمت شفتها بتفكير شراني: انا لو مكانك اطلع الشيب برأسها واخليها تندم على الساعة الي وافقت فيه على ابوك !
واعمل بكل جهدي اخلي مريم بصفي ضد زوجة ابوك
ابتسمت بدون نفس : عليك افكار !
تبغين مريم الجبانة توقف بوجهها !
انا اعجز عن وصف شخصيتها اصلا هي عديمة شخصية علشان كذا راكان خطبها ...يبغى وحده غبيه عبيطه تمشي على كيفه وكيف امه
ضحكت روعة بخفه : ترى امه حماتك !
رونق بضيق من السالفه :لا تخليني اندم اني خبرتك !
روعة تربعت بانفعال: وش يضمن لك انه جراح ما هو نفس اطباعهم؟!!
يمكن يكون متسلط مثل اخوه؟!
رونق عقدت حواجبها بحيره: ما اعرف !،
ما ادري احسه الطف بكثير من راكان !
احس رميت نفسي بالبحر وانا ما اعرف السباحة !
والمشكله ما في شخص عاقل مقرب لقلبي استشيره !
روعة فتحت عيونها وفمها بصدمه : يا زفتة وانا مو مالي عينك !
رونق خزتها : اقول اسكتي بس!
عليك افكار مراهقة مثلك مثلي !
احتاج شخص كبير عاقل مرت عليه تجارب
قاطعتها روعه وهي تكش عليها : مالت عليك يا عصلة !
ابتسمت بدون نفس على تعليقها : يا حظك مرتاحة وعقلك ما هو شغال مثلي بالهموم والمشاكل ...تدرين انت بنعمة وما انت حاسه فيها !
نعمة المفروض تشكري ربك وتحمديه صبح ومساء !
عندك ام واب متفاهمين ...علاقتك فيهم حلوة ...عندك اخوان قلوبكم على بعض ...عندك عائلة ...عندك اصدقاء ...حاجاتك الاساسية متاحة ....عندك بيت يحتويك ...تحسين بالامان مع عائلتك ...وفوق كذا دراستك فيه حولك من يشجعك ويساندك تكملين دراسة حتى تكونين اجمل طبيبة !
كل هالنعم الي حصلت عليها ...يعني لو واجهتك بعض المنغصات لا تقارن بالنعم الي حصلتي عليها .....تعيشين بنعيم وغيرك يتجرع الالم والحرمان ....انا جدي يحاول بكل قوته يمنعني من الدراسة يا حظك حولك من يشجعك ...
روعه رفعت عيونها بضجر : تحبين الفلسفة كثير يا ليت هالجد جدي وقسم بالله الا ابوسه على رأسه !
يا كرهي للدراسة !
انت ما تحسين فيني انا قاربت على الانفجار انت متصوره اني انحرم من الطلعات والزيارات كله علشان حضرة الطب !
ياعمي انا قابل اكون عاملة نظافة بالمستشفى بس اعتقوني ابغى اتنفس اشم هواء
رفعت يدها لفمها وهي تؤشر بطريقه كوميديه : هواء هواء ياعالم !
افففففف !
انا اتعذب نفسيا وما احد حاس فيني ...احب السوالف وجلسات الحش والقيل والقال ...تعرفي شعوري لما انحرم من هذا كله علشان اقابل بوجهي كتاب !
انت متصورة اجلس ساعات وجهي،مقابل الكتاب !
ويا ليته بالعربي نفهم شيء كله انجليزي يمكن يشتموني ونا ادري جالس اعيد بالكلام مثل الببغاء!
ضحكت رونق على روعة المنفعلة : يا حليلك يا روعة !
قبل ما ترد رن جوالها ...ناظرت رونق : هذه امي الحين اسمعي وش رح تقول لي !