روايه بسمه مدفونه في خيالي

البارت 20

ام جواد بتحذير هامس لسعاد : ترى عمك يتوعد اي وحده توجه اساءه او كلمة مب زينة لرونق يا ويلها !
سعاد وهي مغطيه وجهها بكف يدها وبداخلها كره ما هو طبيعي للمخلوقة الي جالسه مقابل لها : ما رح انزل نفسي لمستوى هالقروية
ام جواد خزتها وبهمس حتى ما احد يسمع : انكتمي
سعاد رجعت غرتها للخلف بغرور وهي تستند بظهرها على الكنبة بعد ما وضعت رجل فوق رجل وهي تناظر رونق بتقييم !
زوجة بدر كاتمه الضحكه وهي تسمع همسات زوجة سعود لها : شكلها تحفه ....يبغى لها نصورها للذكرى !
شوفي كيف تناظرها وكأنها برص عيونه طالعه لبرا
زوجة بدر بهمس وهي منزله راسها : استغفر الله لا تتمسخرين على خلقة الله !
خزتها وهي معقده حواجبها: صايره شيخه يا اختي عليك !
يرحم دوبك البارحه تقولين فاتك سعاد وهي تركض خلف ابنتها وكأنها بقرة هاربه من المزرعه
زوجة بدر بهمس مطت شفتها: انا ما تمسخرت على شكلها انا وصفت طريقة ركضها توقعت البارحه تسجل دائرة الزلازل زلزال وهي تركض وقسم بالله حسيت بيتنا يهتز
زوجة سعود بذات الهمس : يقال الحين ما اغتبتيها،!
مالت عليك تحاولين تظهرين نفسك من الصالحين الاولياء وانت من جنبها يا حبك للفلسفة!
زوجة بدر صدت عنها : هئ ولا عمرك بتتغيرين وقحة وما بتحبين النصيحة !
ردت وهي معقده حواجبها بنغزه : والله استقبل النصيحة من الشخص الي يطبق كلامه ما هو مثلك يقولون ما لا يفعلون !
عفست ملامحها زوجة بدر : سخيفه !
لو جلست اتعرف على شق التوأم افضل لي !
الا قولي لي وش رايك فيها !
زوجة سعود باندماج : للحين ما شفنا شيء من لما جاءت وهي ساكته والجوال بيدها !
زوجة بدر بابتسامة : عشر دقائق ما تكلمت انا رح افتح معها بعض المواضيع حتى نحكم عليها !
بس تحسيها هادية مسكينة بس بالحفلة شفت ما اقوى شخصيتها !
زوجة سعود عفست ملامحها بحزن :والله ما الومها انا متاكده نفسيتها بالحضيض متخيله وحده تطلقت بعمر 14 ومعها بنت وفجأة تكتشف اهلها والاصعب منفصلين والعداوة بينهم ما هي طبيعية وبالاخير تكتشف انها كانت متزوجه عمها !
بصراحه قلبي يوجعني الله يعينها !
زوجة بدر بتحليل : يا اختي اثم هالبنات برقبة بيت عمي طفشوا الام وظلموها لو أمهم ما تطلقت يكون الوضع بينهم افضل بكثير !
زوجة سعود : على الاقل مريم وضعها افضل من رونق بكثير يعني تحسين جواد ما قصر معها أما هذه تحسين بعيونها الحرمان من كل شيء والكآبة واضحه عليها !
زوجة بدر بتأثر : ان شاء الله ربنايفرجها عليها !

ام ناصر جالسه جنب ام راكان تتكلم بصوت منخفض : ما ادري وش اصابني لما شفتهاداخله علي واكتشفت انها لوحدها عندي ..وقتها اتوقع اصابتني ام الركب من الخوف !
للحين اتذكرها وهي حاطه المشرط على رقبة لبنى !
تصيبني قشعريره من جرأتها !
ام راكان بهدوء : ما ادري وش تبغى فيك !
ام ناصر هزت كتوفها : يمكن تبغى فلوسي وتهرب فيهم بعيد عنا !
تصدقين تسألني كم فلوس معك !
ام راكان فتحت عيونها : وليه تسالك ؟!
ام ناصر هزت رأسها : قلت لك هذه البنت مستهدفه فلوسي يمكن تبغى تسافر برا ومحتاجه فلوس وهذا الي مخوفني تذبخني حتى تاخذ الفلوس !
سبحان الله ما طلعت لامها والله الجازي انها عسل ...صدق انه البطن بستان !