أبو رعب

البارت 1

( أبو رعب )
.. بقلم نورس

..................

بيوم كعدت الساعة بال4 الفجر ..
اباوع للساعة واني مستغرب من نفسي ! .. شلون كعدت بهيج وقت ، وحتى نعاس ماكو

كمت فتحت البردة واني مبتسم براحة ..
اباوع لخيوط الشمس اللي صارت تتخلل من زجاج الشباك وعاكسة بضواها ع الغرفة ..

باوعت لهذاك اللي نايم وانزعج من النور اللي صار على وجهة ، مغمض عيونة بضيق شال المخدة وخلاها على راسة وهو يشتم بكلمات ما مفهومة

كعدت اراجع اخر مادة واني اكلب أوراق على كد ما ضابط المادة .. سديت الكتاب واباوع للغلاف

.. الفيزياء للصف السادس العلمي

ابتسمت وباوعت ع الساعة بال6 حييييل الوكت واكف .. كمت حضرت نفسي للامتحان اقلامي اللي جانوا عبارة عن ( قلمين رصاص وقلم حبر )

مشطت شعري واني واكف مقابيل المراية.. باوعت لطرف المرايا .. جدولي !
مخلي صح على كل المواد اللي امتحنت بيهم وبس الفيزياء كدامهة فراغ..

طلعت من البيت اتمشى بالشارع واني اشوف الشارع هدوء وماكو بشر .. يعني بس اني اللي تعبت واليوم آخر يوم تعب الي
دخلت للمدرسة ورحت امتحن واشوف الأسئلة سهلة وبديت احل واني فرحان ..
اخر سؤال حليتة وبديت اراجع مرة مرتين ثلاثة وأربعة سديت الدفتر واني صافن .. الكل مكمل بس ليش كاعدين ؟..

متردد اسلم الدفتر راجعت لأخر مرة .. وأخير شي غمضت عيني واخذت نفس وحجيت .. اني سويت اللي علية

وبهمة وابتسامة : أستاذ اني كملت

وسلمت الدفتر ، كل اللي بالقاعة بدوا يطلعون وياي .. طلعت اشوف أصدقائي متفاجئين بدال ما يناقشون اجوبتهم كالعادة بعد كل امتحان لكيتهم واحد يحضن الثاني ويودعون بعض

رحت لضهر المدرسة وشفتهم واكفين تمشيت بأتجاهم

: السلام

ردوا .. وعليكم السلام

حجة وهو يخلي ايديه بجيوبة : ها بشر ابن العم ؟

نكزة اللاخ بعكسة وهو يكولة

: وانت تسأل السجاج ؟ لعد شتكول علية

ابتسمت لحركتة وانتجيت ع الحايط واني ارفع تك رجل وحجيت

: ليش لازم بعرتها

رد بعدم اهتمام

: يمعود عود رحت سألت المعاون على درجاتي كلي معليك تنجح على ضمانتي بس يطلعونك بالدفرات .. يعني تكدر تكول اطلع خمسينات

: جنت شايل همك .. هم زين عاد ريحتني خست بالسادس صارلك سنتين

: اي الحمدلله بفضل رضا الوالدين