أبو رعب

البارت 10

( أبو رعب )
.. بقلم نورس

......................

حور: العمدة رجع

وي حجايتها طلع هو من الديوانية هو وجدو
انصدمت ! هذا شرجعة من بعد غياب ،
اكثر من سنتين ؟

اجاني صوت مصطفى يهمس

مصطفى: لا يا الله راح يطيح حظنة وحق الحسنات والسيئات

يوسف: واني اشهد

راحوا الولد تقدموا سلموا عليه وهو يحجي وياهم طبيعي ، بعدة مثل ما هو
سنتين ما تغير منه أي شي

نفس ملامحة الصارمة ، نفس صوتة الخشن من يحجي .. يمكن الشي الوحيد اللي تغير بيه هو ضخامته .. كل ما اشوفة احسه يصير اضخم

شياكل شيشرب؟..

اجت عينة عليه واني صافنة بيه ..
درت وجهي بسرعة منه بضوجة.. ياما وياما جانت بيني وبينة عداوة

وتعاقبت على كومة شغلات بحياتي من وراه واني مالي دخل بيها ..

اجاني صوت جدو

علوان: ها بوية لبوة .. متجين تسلمين على ابن عمج

رجعت اباوعله ...
مركز نظرة عليه ومضيك حواجبه

.. وهاي النظرة اني اعرفها معناتهه اكو شي ما عاجبة

تقربت عليه وحجيت

لبوة: هلو

تجاهلني ودار وجهة يحجي وي جدو .. اتمنيت الكاع تنشك وتبلعني شلون فشلني كدامهم

طبيت للبيت بسرعة ومصطفى وراي يقلد عليه

مصطفى: " هلو " حرامات لو مكملتها هلو عمو تصير اضبط

لبوة: صوفة انطم

مصطفى: شني صاحبتج هو بالمدرسة وتكليلة هلو .. صدك جذب اني منة اله اجيبج بطراك

لبوة: بكيفي

حجيتها ودرت وجهي ازفر نفس بضوجة ومعبسة .. كرص خدي وكال

مصطفى: لا عاد كلشي ولا زعلك ابو الشباب .. تلعبين العصر طوبة ؟

كمزت بفرحة

لبوة: اي بداعتي صار شكد ملاعبين كل احنة

مصطفى: خوش لعد العصر ن.......

بعدة ما مكمل حجايته ومنسمع اله عيطة كمزنة ثنينة على اثرها ..: مصصطفففففى

باوعنالة ثنينة واكف ورانة وعاكد حواجبة
.. كال موجهله الكلام

قسور: بوجهك تبدل ملابسك والكم ربع ساعة انت ويوسف ترتاحون بيها وتجوني للكراج ...

ضلينة واحد يباوع بوجه الثاني
.. واني نفسي يصعد وينزل من الهبطة