أبو رعب

البارت 2

( أبو رعب )
.. بقلم نورس

......................

سهير: ياااا يمة منين هل وليد

زهدية: هذا ابن عمج صفوان

ضليت فاتحة عيوني وحلكي بصدمة
.. اجت شافتنة مرت أكرم شايله ابنها بيدها وحجت
باستغراب

جيهان: شني عمة ابن منو هذا

زهدية: ولجن هذا ابن الحرمة التعدة عليها صفوان .. اجة خالة خلاه بيدي وكال ( هذا ابنكم ما يشرفنة يبقى ابن البو رعب متربي بيناتنة )

جيهان: يااااا عمة .. جا وعود هذا هسه ابوه صفوان ؟

هزت راسها بايجاب
وحجت

زهدية: انه خوفي لو اجة الشيخ وكتلة .. ادري هل خبر ما راح يسره

تقربت اخذت منها الجاهل (الطفل) وهو يبجي .. يا عيني شلون مفرفح ووجهة صاير قطعة حمرة

حجيت

سهير: يمة هذا جوعان

جيهان: هذا بعدة ابن نفاس يريد صدر أمة

كعدت ع القنفة وايدها على راسها بحيرة .. رجعت باوعت للولد ونقلت نظرها لجيهان وحجت

زهدية: خايبة جهينة انتي صدرج مو يدر حليب .. جا دخذي هل وليد ورضعي وسدي جوعة

هي امي حجت هيج لو هاي عاطت ياااااااع

جيهان: شني عمة .. جا ارضع ولد ما اعرفة منين ما منين ، ومنهو كال هذا صدك ابن صفوان .. يجوز يجذبون وجايين يذبون مصايبهم علينة

زهدية: دهر فرج كون .. أكلها الولد فرفح ولتنسين ترة صفوان هو المس عرضهم ، يعني هل وليد محسوب علينة هسه .. واحنة اهله

اباوع للطفل شلون يناشغ .. كسر كلبي

سهير: خطية جيهان .. شوفي شلون يبجي يريد حليب

جيهان: جا وانة شعليه

زهدية: خايبة تكسبين بيه اجر والله .. اعتبري حالة حال مصطفى

جيهان: عمة وانتي تقارنين ابني بهذا والله ولا الي شغلة بيه .. شوفولكم وحدة ترضعه

وعاندت وركبت راسها وما رضعتة ..
كامت أمي لبست عباتهة واخذت الجاهل وطلعت تفتر بالبيوت تدورلة على مرة ترضعه

لحد بعد ساعتين رجعت والولد نايم بيدها .. أخذته منها واني احجي

سهير: ها شصار

حجت وهي تنزع عباتها

زهدية: رحت لبيت ام ياسين .. هم جنتهم ستوها جايبة وخطية أخذته رضعتة لحد ما شبع

سهير: لعد وشلون لو رجع وبجة ؟

زهدية: انه كتلها لو رد وجاع اروحلها وترضعة.. بس بعد اشوف ابوج شيكول على هل مصيبة