يهزمني الحُب وانا جاهل بدرب المُحبين

البارت الرابع

كاسر اشر بأصبعه ع خشمه بمعنى ( على خشمي )
تحركوا كلهم كاسر ومحمد متجهين يأخذون فارس ورعد متجهة للصالون .
:::::::::::::::::::::::::::::::::
عند البنات وامهاتهم فالصالون كان الكل مجتمع
ام فارس : بنت رهف
لفت ام هيام : لبيه
ام فارس : رعد اللي بيجي ياخذنا كلمني فارس وقالي
ام هيام قطبت : هاه م كان مرابط ذا ؟
ام فارس ابتسمت : مدري بس والله اشتقت له
ام هيام صدت بقرف ( الله يصلحتس ي اختي وش اللي حببتس فيه )
ام فارس راحت لأم رعد وقالت لها وهي كان عندها خبر اصلاً
ام رعد : اي اي ي لطيفة ادري
ام فارس : بس تصدقين عاد ابي اعرف ليش جاء ياخذنا وم ترك كاسر يجي بداله زي م جابنا
ام رعد استغربت : من جد والله عاد م امداني اسأله
ام فارس : خليييه لا تسألينه انا مستانسه انه بيجي
ام رعد : والله انتس صدقتي الله يخليه لي ولتس يارب ( كانت ام فارس تعتبر كاسر ورعد عيالها )
عند البنات
هيام زفرت بملل وهي تضبط شعرها : بنات خلصتوا ؟
حنين ردت وهي تكلم رعد : انا باقي اظافري وتوو بديت فيها
حنين : هاه رعد وش قلت ؟
( فز قلب هيام وقالت : رعد ؟؟ يعني رجع يارب ايه يااارب )
رعد : اقولتس مين معتس فالصالون غير امي وخالتي لطيفة ولين ؟
حنين بشك : وش تبي عشان تعرف
رعد بملل : يوخيتي اسأل لا حول ولا قوة الا بالله
حنين ضحكت : مستعد اعدد لك كل اللي موجودين
رعد تحمس بس يحاول م يوضح : ايه
حنين : اممم طيب خوات العروس والعروس برضو هنا العنود وبشرى وسلمى وبيان ، وبرضو امهاتهم وبنات عمتي لمياء خوات العريس جميلة وحلا وصالحه ووعد وبس اتوقع اذا م نسيت احد
رعد م تكلم
حنين : رعد باقي معي
رعد م كان يدري كيف يقولها انه متصل عشان هيام
رعد : ايه موجود بس انشغلت فالسيارة
حنين ضحكت : اما انت برا ؟
رعد : ابشرتس
جات هيام وهي طفشانه من شعرها : حننييين شعري مو راضي يضبط
فزز رعد اول م سمع صوتها وتكلم بدون م يحس ع نفسه : اه ي هيييامي
حنين م سمعت : لبيه قلت شيء ؟
رعد ابتلش : لا ولا شيء
حنين وهي تكلم هيام : بالعكس والله انتس تاخذين العقل لا اله الا الله والجمماال اللي انحط فيتس
هيام تطمنت : والله يعني شعري تمام ؟
حنين ابتسمت : وهو بس الشعر !
هيام استحت : حنييين خلاص تكفين احبك وبعدين مين تكلمين ؟ ( سألت وهي تمثل انها م تعرف )
حنين : رعد
هيام انفجعت : وباقي تكلمينه ؟؟
حنين استغربت : ايه وشفيتس
هيام بهمس سمعها رعد فيه : يغبية تمدحيني قدام مسامع اخوتس م تغارين عليه
حنين ضحكت : الا بالله اغار عليه بس منتس ؟ لا وبحاول امشي مع سلمى فالخطة وازوجتس رعد
هيام نطت وسكرت فم حنين : اسكتي فشلتينااا
حنين ماتت ضحك : انتي مريضة ؟ م يسمع هو مسويه ميوت انا
هيام زفرت براحة : اييه اشوا
( حنين اللي كانت متوقعة انها ضغطت ع الميوت بس للأسف كان رعد يسمع كل حرف نطقت فيه هي وهيام وكان ذااايب ويتسمع بحب ، استوعب ع نفسه )
رعد : لا اله الا الله اجل ذا الحب اللي العرب كلهم يتكلمون عنه وبعدين * طالع لقلبه *وشفيك صاير رهيف ؟؟
حنين : رعد
رعد : سمي
حنين : خلصت انا وسلمى وبشرى وهيام
رعد ابتسم بعدين استوعب وسكت نفسه : طيب؟؟
حنين : ووعد
رعد : اخلصي شفيتس
حنين : لا بس بنجيك نركب
رعد فز : لحظة لحظة سلامات انا سواق العايلة كاملة انا مسؤول عنتس وعن لين وامي وام فارس وام هيام وهييام
حنين لاحظت انه مد في اسم هيام بس م شكت بشيء : طيب عادي بس اللي قلت لك بنركب وتوصلنا وتعطي السيارة كاسر ولا فارس يرجعون للباقين
رعد اقتنع وهو صعب اقناعه : يالله اطلعوا طيب
حنين : ابشر
سكرت وقالت للبنات اللي معها
( بشرى اللي كانت تعششق رعد بس كانت مخبيه عن الكل الحب العظيم اللي تكنه له ) وقالت : مين رعد ؟
حنين لفت لبشرى : اي هو وشفيتس اعلمتس من اليوم انه هو اللي بيجي ياخذنا
بشرى ابتسمت : طيب بس اتأكد المهم بسبقكم انا
سلمى ناظرتها بطرف عين : خيير يالحبيبة تبين تركبين معه بدوننا ؟
بشرى لفت بكرهه : طيب ؟
سلمى : لا والله مع نفستس رجلي برجلتس
بشرى ابتسمت وهي شوي وتقوم تذبح سلمى : طيب تعالي
طلعوا الثنتين م يدرون بـ ( هيام اللي سبقتهم بعد م سمعت كلام بشرى وهي م تدري لييه غارت اساسًا )
هيام ركبت : سلام
رعد لف بكل خلية في جسمه لها : وعلييكم السلام
هيام ارتبكت : رعد
رعد بدون م ينتبه ع نفسه : لبيه
هيام ارتكببت اكثر بعد كلمته : لبييت حاج شغل التكييف اللي ورا
رعد لف وضرب راسه بخفه ( لااا يالدبشة وش لبيه ااخ بس منك )
مد يده ورا وشغله : شوفيني شغلته اذا تحسين انه م يبرد قولي لي
هيام : ابشر
رعد : ايوه وين الباقيين ؟
هيام زفرت بضيق : ليه تسأل !
رعد انصدم من ردها : شفيتس اسأل عنهم عشان اعرف متى امشي
هيام كان عاجبها ردها وم عطت اي رد وشوي وقالت : ايه صح رعد
رعد وهو يحاول يشغل نفسه بجواله : هممم
هيام ( خيير ولبيه اللي قبل شوي ! ) : ررععدد
رعد لف لها : نعم شفيتس تصارخين ؟
هيام : لا بس شكرًا عشان اللي صار بالسوق والله مره شكرًا م امداني اشكرك اسفه
رعد ارتخى : العفو م سوينا شيء
هيام كانت هيمانه صدق فيه وحبته اكثر بكثير من حبه لها وقالت : رعد متى...
فجأة انفتح باب الراكب اللي جنب رعد وركبت بشرى بعد م صرفت سلمى : سلااامم رعّود
رعد انفجع واجتمعت شياطين الارض فوق راسه وقال بصوت هز السيارة : خييييرر يالطيبه تمونيين انزلي ياللي م تستحين ع وجهتس !!
بشرى بأبتسامه وهي اللي كانت تعششق كل شيء فيه حتى عصبيته : شدعوة رعد نسيت اللي بيننا ؟
رعد بغضب الارض : لاااا طالت وشمخّت !! بتنزليين ولا كييف
بشرى لفت ورا وشافت هيام اللي كانت مفجوعة صدق : اوه هيام هنا ههههههههههههههههههههههههههه
اما عند هيام ( اللي كانت بتسأل متى جاء وليه م رجع امس للبيت بس قاطعها دخول بشرى وكلامها ودق قلبها واوجعها اول م "قالت نسيت اللي بيننا" يعني معقول بينهم شيء لا يارب يارب طمن قلبي يارب لا ودموعها بدت تجتمع فعيونها وقالت تهدي نفسها خلاص ي هيام لا تبكين تخربين كشختتس خلااص )
رعد : بشششرى انزلي دام النفس طييبة !!
بشرى نزلت وركبت ورا وهي تتأفف ورعد اللي نزل يشم هواء
بشرى : هيام شفيتس ترا عادي امون مع ولد خالي
هيام : طيب؟ م سألتتس
بشرى عصبت : اسمعي عاد لا يطلع اللي صار قدام احد دفنتتس سااامعه !
هيام ضحكت : لييه اذا منتي قد الموقف ليه تسوينه من اول !
بشرى شدت ع رسغ هيام وكأنها شوي وتكسره : اسسمععيي بس سواء قلتي اللي صار ولا لا انا ورعد لبعض يعني هو قال لأمي احجزي لي بشرى وانا ابيه وهو يبيني فلا تحاولين م بتخربين بيننا !
هيام اللي صدق صدقت كلامها وتوجعت اكثر واكثر : واللعنة فيتس وفيه وش هامني يوم تقولين لي !
بشرى فكتها : لا بس م حبيت اخليتس تكملين احلامتس معه وهو لي ولا تحسبيني م اسمع هرجتس انتي وسلمى ؟
هيام تنكدت وكان ودها بس ترجع غرفتها وتبكي براحتها طنشت وجود بشرى ولفت تراقب رعد
عند رعد ( ي جعلها بالمرض يالله ولا جات الا بعد م كانت هيام بتسأل يارب وش كانت بتقول اه بس  )
تنفس شوي ورجع للسيارة وركب : بشرى
بشرى فززت : لبيييييه
رعد بقرف : دقي ع حنين خليها تطلع
بشرى : ابشر الان ادق
رعد لف وهو يبتسم ورجع يناظر بعيون هيام
هيام ( اللي كانت مصدومة ولييه م سألني انا ؟ انا اقرب لحنين من الزفت بشرى لحظظة كأنه جالس يبتسم هيين هيين ي رعد ! ) كانت دموعها متحجرة بعيونها
رعد في نفسه : افا وشفيها عيونها ضاييقة ؟
كان رعد مو مستوعب غيرة هيام عليه وكأنه ملكها
ولا هي الا ثواني وامتلت السيارة وكان ترتيبهم " جنب رعد حنين وورا وعد عند الباب وفالنص هيام وسلمى وعند الباب الثاني يعني ورا رعد بشرى "
حنين مسكت يد رعد : رعد قبل لا تودينا القاعة وقف عند ايسكريم والله مشتهيته
رعد ابتسم : تم على ذا الخشم ( يأشر بأصبعه ع خشمه )
حنين تقدمت وباست خشمه : يجعلني م انحرم
رعد بهمس : اسألي بشرى وسلمى ووعد وش يبون ؟
حنين بهمس : وهيام ؟
رعد ابتسم وهمس لها : شوكولاتة نسيتي ؟
حنين انفجرت ضحك وهي م شكت لأن رعد م ينسى الاشياء بسرعة : يوووه ي رعد
لفت لهم : بنات وش تبون ايسكريم ؟
بشرى : فانيلا
وعد : مانجو واذا مافيه فراولة
سلمى غمزت لها : عاد انا تعرفين وش احب
حنين ردت الغمزة : معلييتس لاتوصين حريص
حنين : طيب بشرى تبي فانيلا ووعد مانجو وسلمى فراولة وفانيلا مكس وانا نفس سلمى ورجعت لفت : هيام يعيوني م تبين شيء ؟
هيام بضيييق واضح بصوتها : لا
رعد لف فجأة لها وشاف عيونها كيف وسألها : طيب بس اذا مشيت لاتقولين لي ارجع
هيام ناظرت فيه لجزء من الثانية ورجعت تناظر يدينها وقالت : لا معليك م ابيه
رعد صد بضييق من ضيقها : محمد جب ٣ ....
رجع يناظر حنين وقال : اف ف حنين وشذا الكشخة اسمعي اول م انزلتس للقاعة شوفي لي طريق ابي اشوفتس قبل الكل
حنين ابتسمت بفرح : من عيني ذي قبل ذي
رعد ابتسم : ابوسهم عيونتس
لف للعامل اللي ينادي واخذ الطلب وكان حاسب حساب لهيام لف يوزع : بشرى
بشرى قربت واخذته من يده وهي تمسكها : شكرًا رعد
رعد سحب يده علطول : العفو ونادى هييام
هيام رفعت راسها : هاه وش انا قلت م ابيه
رعد : معليتس مو عشان خاطرتس بس م احب الكل ياكل و شخص واحد لا
هيام عصبت : وميين كذب عليك وقال اني محتاجة شفقة منك !
رعد ابتسم : خذيه وانتي ساكته
بشرى ضحكت ضحكة مستفزة : يالله اخذي الشفقة
هيام ناظرتها بحقد ومدت يدها وضربت يد رعد بقوة وطار الايسكريم ع بشرى وقالت بضحكه : هذي الشفقة ووصلت للمحتاجين والله يقدرني ع فعل الخير
صرخت بشرى بصوت متصنع : وججعع يوجعتس يمريضضة خيير !
طارت عييون رعد وصرخ : وكسسر يكسرتس ياللي م تحترمين نفستس السيييارة والنعمة انهبلتييي انتي معاد فيتس طب !
هيام لفت له بعيونها اللي تأسره : قلت لك م ابييه مو غصب يخي ! افهمم م ابيييه
رعد عطى الباقي لوعد وسلمى ( اما عند سلمى كانت تبتسم لأنها تشوف بينهم صفات الزوجين بشكل فضييييع )
( بشرى اللي كانت تحترق فوق م انه عبايتها كلها توسخت جايه تحاول تضغطها وفعلاً نجحت كانت بشرى تففووررر )
:::::::::::::::::::::::::::::::::::
عند ام هيام : هلا محمد
محمد : يمه احنا برا تطلعون ؟
ام هيام : ابشر جايين
محمد : تبشرينن بالجنة يعيوني
سكرت ونادت ام رعد ولين وام فارس
طلعوا وركبوا كلهم
محمد لف : يمه وين هيام ؟
ام هيام : مع رعد
تكهرب محمد وعصب وقال : ومين خلاتس تسمحين لها تروح ؟؟
ام هيام : بسم الله شفيك انت مع ولد عمها وبنات عمها
كاسر ناظره : خير محمد شفيك صدق ؟
محمد : لا ولا شيء
تجاهل الموضوع قدامهم وهو حالف يمين م يخلي هيام
:::::::::::::::::::::::::::::::::::::
عند الرجال فالقاعة
ابو محمد : يولدي ي محمد
ابو رعد : لبيه يبه سم
ابو محمد : جهزتوا كل شيء صح ؟
ابو رعد : ايه معليك كل شيء جاهز وتحت امرك
ابو محمد ابتسم : يالله ع البركة يارب
بدوا يجون المعازيم شوي شوي
ابو هيام : محمد وين رعد ؟
محمد بغضب : باقي م جاء ولا جاب هيام !
ابو هيام عصب : ايشش هيام معه !!
محمد : ايه بالله والبركة فأمي
ابو هيام : لحالللهاا !!
محمد ضحك : لا عاد يبه مو كذا الله يهديك مع البنات
ابو هيام : طيب وشفيك محرق دمك حسبتها لحالها
تركه وراح يساعد اخوه ومحمد منصدم من نفسه صدق ليه م يبيها معه
:::::::::::::::::::::::::::::::::::::
انفجع رعد ع صراخ حنين عليه : بسسسرعة تأخرنا المعازيم جوو
رعد كان طااايير م هو مع احد وقال : طيب هونيها القاعة هنا مشى مسافة طريق ووصلوا ونزلوا البنات ركض
رعد سكر السيارة وراح جهة الرجال وهو مصمم ع فكرته وانه بيأخذ هيام قبل احد يأخذها منه اتجهه لأبوه : يبه سلام الله عليك
ابو رعد : هلا عليكم السلام يالرعد
رعد كان جاد جدًا : انا مع اجواء العرس قررت اكمل نص ديني والحق سالم
ابو رعد فز بضحك وفرح : هذي والله البشارة الزينة ابد طب وتخيير ولك مني اللي ترضيك ان شاء الله
رعد ابتسم : تم بس بعد الزواج بنتمم
قام رعد وقف جنب فارس اول م جات الفرقة وبدوا يحيون الحفل :
مبروك يا سالم عسى الله يرعاك ••• وعسى حياتك كلها سعيدة
عسا الولي يتم فرحتنا وياك ••• ياقاك رب البيت رازق عبيده
يزهاك لبس البشت يا سالم يزهاك ••• والعنود تراها بشوفتك هي سعيدة
بدوا الكل يدخلون بالعرضة ويرقصون ( كان رعد فرحان انه واثق بزواجه من هيام وكان يرقص بحب وبكل قوته )
________
جلسوا بعد التعب وبعد م نزلوا البشوت
فارس تأفف وهو يحاول يتنفس : يويلي انكتمت مع الرقص
رعد : اي والله تكسرت انا
فارس ضحك : صدق وشعندك انت والله لو انه زواجك
رعد ابتسم : قريييب ان شاء الله
فارس انصدم : حلفتك بالله !!
رعد : اي والله ان كان تمت الامور ف ان شاءالله شهر شهرين وانا عريس
فارس فز بفرح وضمه : الله يتمم لك يارب بس م قلت لي مين تعيسة الحظ
رعد مثّل العصبية : تعيسة حظ اللي بتاخذني ؟؟
فارس ضحك : يخوي امزح اخلص مين
رعد : هيام
فارس : ععشششنناا اجل خضعت ؟
رعد اللي كان يحكي لفارس كل شيء : ابشرك وجيتها ع وجهي بعد
فارس ضحك : يارب يتمم لكم ع خيير
:::::::::::::::::::::::::::::::::
عند زواج الحريم اول م ابتدأ ليلهم بصوت الطقاقة :
جعل الفرح يالعنود يطرق على بابتس ويرضيتس
وجعل الحزن تايه عنتس وناسيتس
وجعل ربي يهنيك بسالم دايم الدوم يهنيتس
بدوا الكل يرقصون وفرحانين
هيام اللي تعبت وجلست وجات عندها عجوز : يبنيتي وين امتس
هيام : ليه ؟
العجوز : ماشاءالله عليتس يبنيتي تهبلين وودنا نخطب عندكم وطامعين في نسبكم بس كلامي مع امتس وينها
هيام فزت بخوف : لا يخالة انا متزوجة
ضاقت العجوز : والله وبمين ؟
جات سلمى : بالعقيد رعد
انصدمت العجوز : ماشاءالله تبارك الله يعني الله يهني سعيد بسعيدة وراحت
استحت هيام وحمرت خدودها : خيير سلمى
سلمى ضحكت : اذبحيني اذا م استانستي الا تعاااللي وش صار اليوم يوم نزلتس من السيارة ؟؟
هيام تذكرت كيف كان ينادي اسمها وتنحت
سلمى : هيااام وين وصلتي ؟
هيام : هاه موجودة !
سلمى : ايوه وش صار قولي
هيام : م صار شيء بس يهاوشني عشان الايسكريم
سلمى عصبت : كله من بشرى الله ينتق رقبتها
هيام ضحكت : والله م كأنها بأختتس سبحان من خلق وفرق
سلمى : تشوفييين !
حنين جات : اف بنات تععببتت
هيام : حمدلله انا استعدت طاقتي بكمل رقص
حنين : يحيوانه يوم جيت وجلست
هيام هزت كتوفها بـ( وش علي منتس ؟ )
حنين : هيين اوريتس سلمى تعالي اجلسي
( طلعت هيام ع المسرح وبدت تتمايل وترقص ع الاغنية والطق وم خلت احد بعقله جاو لها اكثر من اربع حريم يخطبون وتقول وبكل جراءة انا زوجة العقيد رعد ويسكتون لأنه سمعته سابقته ويقولون لها ماشاءالله والله يخليكم لبعض وهي تبتسم وترد عليهم )
_________
عند الرجال جاء واحد عند رعد
الرجال : ماشاءالله ع البركة ي رعد اعرست وم عزمتنا ؟
رعد استغرب : مين قالك ؟
الرجال : حرمتي داخل مع حرمتك
رعد انهبل : وش قاعد تقول ومين هي حرمتي ؟
الرجال : بشرى بنت عمتك ولا ؟
انجلط رعد مو لذي الدرجة ( كانت بشرى برضو تعلمهم وتنشر الخبر بدون م يسألونها حتى بس تبي تأكد الامر )
رعد ابتسم : اها لا ابشرك م اعرست ويمكن حرمتك لخبطت
الرجال انحرج : العذر والسموحة
رعد خبط كتفه : ولا عذر ولا شيء عادي يخوي
رفع رعد جواله ودق ع لين
لين فنص المنصة : هلللااا
انفجرت طبلة اذن رعد : وجعع ان شاء الله وراتس تصارخين
لين بصراخ : الللوووه ؟ رعد تسمعني
رعد ( سمعتتس وانسد السمع بعدتس ) سكر ودق ع حنين
رعد : الو حنين
حنين : لبيه
رعد ابتسم : لبيتي في منى اسمعي
حنين : هلا
رعد : وشعندها بشرى زوجتني نفسها !
حنين انصدمت : ايش ؟؟
رعد : اي والله جاوني رجال يباركون لي روحي لها وربيها تكفين ي حنين انا طالبتس
حنين فزت : ابشر بسعدك !
سكر رعد وهو يضحك
____________
حنين اللي قابلت سلمى وهيام
حنين : بنات تخيلوا
سلمى : وش
هيام : قولي !
حنين : بشرى زوجت نفسها اخوي رعد
انفجعوا الثنتين وضحكوا
حنين : يمه علامتس انتي وياها
سلمى : ابد والله معليتس امسحيها في وجهي
حنين رفعت اكمام فستانها : لا والله بمسح بوجهها الارض
سلمى : خذي راحتس
هيام اللي كانت ساكته واول م راحت حنين قالت : عزتي له تزوج ثنتين الليلة
سلمى مسكت كتف هيام : معليتس ارتاحي بيتزوج وحدة وهي انتي
هيام ضحكت بخجل : م اتوقع بس يالله معتس معتس
سلمى راحت تكفخ بشرى مع حنين
اما هيام اللي دق عليها محمد
محمد : هيام اطلعي فالحوش وشوفي لي طريق بندخل المعرس
هيام : البس ولا م يحتاج
محمد : لا لا بس افتحي الباب وارجعي داخل
هيام : طيب
طلعت ومشت فالحوش ووصلت قدام الباب ودق
هيام : مين
محمد : افتحي بلاتس انخبلتي !
هيام ضحكت وفتحت
محمد : ادخلي داخل بسرعة ، وقف يولد اصبر محارمنا بيدخلون
رعد بصوته الرخيم والعالي : وش محارمك !
محمد لف له بعصبية : اختي يولد شفيك انت
رعد ابتسم وهمس فأذن محمد وبصوت مسموع : ايييه هيام
محمد استحقره ولف
هيام وقفت بمحلها وقالت بصوت عالي : مححممدد
رعد ابتسم وقال فنفسه ( يحظظ محمد )
محمد دخل
محمد : خيير ادخلي م تسمعين
هيام : اسمع بس خاتمي طاح عن الباب
ناظر رعد علطول وابتسم اول م شافه وخذاه من الارض وحطه في جيبه
محمد زفر بعصبية : طييب ادخلي مو وقتتس ! بجيبه
هيام : طيب لا تعصب !
دخلت هيام
ودخلوا المعرس وباركوا له
رعد : مبروك ي عريس والله يتمم ع خيير ويجمعكم ع الطاعة والمحبة
سالم ابتسم : وياك يالرعد وعقبالك
رعد ناظر فارس وضحك : اميين اميين
فارس : مبروووك يا اطلق عريس منك المال ومنها العيال
سالم : يبعد راسي يالفارس وعقبالك
فارس ابتسم : ان شاء الله
طلعوا العرسان وبدت القاعة تفضى
جات عجوز لرعد
العجوز : رعد
رعد لف لها واستغرب : سمي يخالة
العجوز : والله يا انك طحت لك ع قمر
رعد م فهم : لبيه ؟ وش تقصدين يخالة
العجوز : زوجتك اقصدها
رعد ضحك وقال : مين زوجتي ؟
العجوز انصدمت : يويلي هيام مو مرتك ؟
رعد انفجر ضحك : الا الا مرتي بس امزح معتس
العجوز : ماشاءالله الله يخليكم لبعض
رعد ابتسم : اميين
فارس دق كتفه : ماشاءالله الاوله بشرى والحين هيام يولد شسالفة ؟
رعد لف له وقطب : حرام اني م اعلم !
فارس ابتسم : وبعدين وش ذي الفرحة وبدا يقلده " الا الا مرتي " خير يبو اثقل
رعد مات ضحك : وش اسوي قلت لك جايها ع وجهي
دق جوال رعد وكانت امه : ي رعد
رعد : لبيه
ام رعد : انت برا نطلع
رعد : ايه برا يمه
ام رعد : يالله طالعين
رعد سكر وطلعوا اهله وشاف سلمى وحنين وهيام مع بعض
حنين : رعد ترا بروح انا وسلمى وهيام مع كاسر
رعد لف يمثل عدم الاهتمام : وش اسوي لتس ؟
سلمى : يخوي وشذا النفسية تعلمك هذا جزاتها
رعد م ركز ع رد سلمى وكان يطالع في هيام بنظرة حادة عشان رجولها اللي كانت طالعه وتقدم وهو ناويها خلاص : هيييام
هيام انفجعت ولفت له : يمه وشفيك !
رعد بعصبية : غطي رجولتس ووجع ان شاء الله !
هيام : هاه ؟ وشافت رجولها وعلطول نفذت وغطتها بالعباية
سلمى بفرح : عشششننا والله وش الغيرة المفاجئة ذي ؟
رعد لف لها : سلمى شرايتس تسدين حلقتس دام النفس طيبة ؟
سلمى : لا جد وشدخلك فيها ؟
رعد عصب : بنت عمي وش متوقعه يعني ؟
سلمى استقعدت له : طيب هذي حنين اختك رجولها طالعه ليش م جيتها ؟
رعد انصدم وطالع بحنين اللي علطول غطت رجولها : حننيين !
حنين بضحك : اسفه والله م انتبهت وفيه هواء يعني لاتلومني
سلمى ابتسمت : هاه يالرعد ناوي تعترف انك غرت على هيام واختك لا ؟
رعد قرب من حنين وهمس فأذنها : سكتيها قبل اكفر فيها
جات العجوز وهي تضحك : انتي هيه اكيد بيغار على زوجته اكثر من خواته
حنين اللي قالت لسلمى تسكت بس رجعوا كلهم يضحكون ع العجوز الا هيام اللي انصدمت ومشت تعجل خطواتها
لحقها رعد لأنه كانت تتجه لسيارته ولفت وقالت بصوت مسموع : حنين تركبين قدام ولا اركب ؟ ( كانت هيام مستعدة لكل شيء عشان م تنكشف انها مو زوجته خصوصًا انها كذبت ع العجوز ام الليث اللي تنشر الاخبار فالديرة كلها )
حنين انصدمت ورعد مو اقل منها !
حنين : لا لا انا بركب قدام وتقدمت وراحت لها ولحقتهم سلمى وهي تضحك لأنها هي اللي نكبت هيام
حنين : هيام شفيتس ؟؟
هيام : اركبي بعدين اقولتس
حنين هزت راسه وركبت
وجاء رعد وركب وتكلم : هيام ناوية تبررين الموقف ولا وش
هيام استحت وقالت : هاه لا لا فاهم غلط السالفة طويلة
رعد : اشرحي طيب واشرحي ليه نص الرجال جايين يباركون لي اني خذيتتس ؟
هيام كان قلبها يدق وكانت تتمنى لو انه حقيقة وتكلمت : نزلت من المنصة وجاتني ام الليث ...... وقالت له السالفة كاملة بدون اجزاء جرائتها مع باقي الحريم
رعد التفت لسلمى وهو يضحك : اموت واعرف اسمي كيف جاء في بالتس
سلمى ضحكت : اقول لا تنفخ خشمك انت انا قلته لأنك اكثر واحد منصبه عالي وكنت اقرب واحد لهيام
رعد ابتسم : اها كله عشان المنصب اجل انكتموا ولا اسمع نَفس علمتكم وش المنصب بيسوي !
هيام بصوت خجول : رعد
رعد م سمعها واخذ جواله واتصل ع كاسر
حنين ضربت كتفه بخفه : رعد هيام تكلمك
رعد لف لهيام والجوال ع اذنه : نعم؟
هيام بتموت من الاحراج : لا ولا شيء
رعد صد اول م وصله صوت كاسر : هلا
رعد : اسمع امي ولين معك ؟
كاسر : ايه ليه؟
رعد : بس اتطمن معسلامة
كاسر سكر
ورجع رعد يلتفت ورا : سلمى
سلمى : هلا
رعد : بنزلتس عند بيتنا ترا
سلمى انبسطت : معليك موافقه
رعد ضحك ولف قدام يسوق
_________________
عند بشرى اللي دخلت غرفة رعد وتعطرت بعطرها داخله ونزلت خاتمها وقالت بأبتسامة خبيثة : م اكون بشرى اذا م جبت راسك
وبدت ترش عطرها فكل زاوية من الغرفة وكان عطرها قووي وواضح ومعروف انه عطرها شغلت المكيف عشان تبرد الغرفة وسكرت النور وطلعت
_________
اما عند رعد اللي وقف عن باب بيت ابو هيام
لف لهيام اللي كانت سرحانه : هيام م ودتس تنزلين
هيام نطت برعب : هاه اوه وصلنا طيب
فتحت الباب ونزلت هي وسلمى
حنين فتحت الشباك : بنات بدلوا واطلعوا الحوش الخلفي ربع ساعة وانا عندكم
هيام بصوتها العذذب : حنييين انزلي من الحين
( رعد ارتخى وطالع فيها بحدة كانت عيونه تششد الواحد  يناظر فيها )
هيام لفت له وحطت عينها بعينه : يمه شفيك تناظر لايكون م تبيها تنزل
رعد ابتسم : لا بالله م ابيها تنزل
هيام زفرت بضيق : رععدد بلا سماجة !
رعد احتد صوته : هيياام قلنا ربع ساعة وهي عندتس
هيام صدت وهي منهبله ع نطقه لأسمها : ايه ايه اخر شيء م بتجي
حنين ضحكت : لا والله م هي انا اللي تسحب ع بنات عمها
سلمى دقت تحية : كفو والله
مشى بالسيارة لبيتهم ونزلت حنين ركض
وطلع ابو رعد : رعد
رعد طفى السيارة وجاه : لبيه
ابو رعد : مين اللي بتأخذها
رعد ضحك وتوه يتذكر : اووه الله يذكرك بالشهادة يبه ادخل ادخل نفتح الموضوع مع جدي
ابو رعد ابتسم : يالله امش
دخلوا المجلس
ابو محمد : رعد بتعرس ؟
رعد ضحك : ان شاء الله يجدي
ابو محمد : وبمين؟
رعد تنحنح : بتعرفون بعدين
ابو رعد : يووه يرعد تكلم !
رعد : امزح بقولك بس اصبر اغير واجيب القهوة واجيكم
ابو رعد بضيق : والله الليل صدق !
طلع رعد وهو يضحك بأعلى صوته
_______
كانت بشرى فالصالة وتسمع ضحكه وهي م فيه شيء يسترها كانت لابسه فستان ابيض متوسط الطول وماسك ع جسمها ركضت ووقفت قدام الباب اللي بيدخل منه رعد
رعد اللي دق الباب : يولد
ام رعد ناظرت من المطبخ م كان فيه احد فالصالة : ادخل يولدي م فيه احد
دخل رعد وانصدم ببشرى قدامه وكانت جميييلة وتشلع القلب صد علطول : يييمهه من اللي عندتس!
صرخت بشرى تمثل الفزع : يويلي ويلاه يخالة الحقيينني
جات ام رعد تركض : وشفيتس ي بشرى
رعد انصصدم ( هذي بشرى !! لا اله الا الله والجمال تبارك الرحمن )
بشرى : يخالة اسفه والله م سمعته كنت نازله مع الدرج ووقفت عن المراية اللي ورا الباب وفجأة فتح الباب رعد يويلي رعد شافننيي !
ام رعد صدت بضيق : عادي يبنتي م صار شيء بنت عمته عادي
بشرى بأبتسامة مستفزة : يارب سامحني
:::::::::::::::::::::::::::::::
عند حنين اللي شافت كل شيء وكانت مفجوعة وقالت بنفسها ( يويلي يارب تحفظ قلب رعد البنت تأخذ العقل ياارب م يسويها ويتزوجها )
دقت ع سلمى : سلمى
سلمى : هلا يبنت تأخرتي وينتس
حنين بفجعه : يارب ي سلمى تكفييين الحقيننيي انتي وهيام
سكرت سلمى ولبست عبايتها هي وهيام وراحوا لبيت ابو رعد
دخلوا مع الحديقة اللي كانت حنين تنتظرهم فيها : بنننااااتت
هيام بخوف : وشفييتس انطقي !!
سلمى برعب : ولعنه تكلمي !
حنين بضييق : رعد يبنات
هيام : شفيييه ؟
سلمى اللي خافت : يويلي وشفيه
حنين بقرف : شاف بشرى وهي بكامل زينتها !
سلمى عصصببت : ايششش !
هيام ضااقت : اها وانا اقول شفيها تخطط وتتزين والله وسوتها اللي م تخاف ربها !
سلمى ركضت داخل : بشششرى
بشرى قامت تترنح : خيير
سلمى بغضب : والله م اعديها لتس والله لأعلم امي عليتس يالله م تستحين !
بشرى ضحكت بصوت عالي : عادي شفيتس تحسستي اعتبريها شوفة شرعية !
سلمى انهبلت : يمريضضه انهبلتيي انتي !!
بشرى صدت بكرهه
( اما هيام اللي كانت فاقدة الأمل فزواجها من رعد صدت ورجعت لبيتهم ودخلت غرفتها واطلقت العنان لدموعها )
_____________
فالمجلس رجع رعد وجلس
ابو رعد : هاه باقي بتعلمنا مين بتأخذ
رعد م كان مركز وكان كل شيء حوله يذكره بمنظر بشرى وكيف كانت جمييلة جدًا تنهد وهو يقول : اتزوج بشرى ؟ ولا انتظر واستخير ؟
فارس نط : انا بقولكم
ابو رعد ضحك : يالله قل لنا
فارس بحماس : هيام
ابو رعد فز بفرحه : ماشاءالله تستاهل كل خير هيومه
ابو محمد : ماشاءالله ع البركة اجل زهب عمرك من بكرا واحنا خاطبين لك
رعد ابتسم : يالله بس م كأنكم مستعجلين
ضحك فارس : خير البر عاجله
رعد : تم اجل
طلع الجد قاضي مع فارس لبيتهم وطفت انوار البيوت معلنه نوم الكل الا رعد اللي طلع غرفته يبي ياخذ شور سريع بدا يشم ريحة عطر بشرى : لا عاد ذي لايكون دخلت غرفتي !! ( تجاهل وهو مصمم ع هيام اللي تلت قلبه من اول مره )
::::::::::::::::::::::::::::::::::
انتهى البارت ادعموني بنجمة وكومنت عشان اتحفز منجد لأني بديت افقد الشغف من بدايتها 😔