يهزمني الحُب وانا جاهل بدرب المُحبين

البارت الثالث والخمسين

لين ابتسمت وشافت ذيب وهو يلف وطلع برا وريحته ثبتت في لين وعند ذيب المثل كانت ريحتها ثابته فيه وابتسم وهو راضي وحس انه بدأ عمر وحياة جديدة بقرب لين ..
رعد قام من عند شبة النار وقال : ذيب الله يسعدك مد لي حطبة
ذيب كان طاااير فالسماء ولا هو صوب رعد ابدًا ومشى وجلس وانسدح تحت انظار رعد والرجال اللي كاتمين الضحكة وهم عارفين ان رعد بيفصل ع ذيب ويغسل شراعه
رعد توسعت عيونه وقال : ذييب !
ذيب لف له بهدوء وقال : عيوني
رعد بحدة : جعلها تطير عيونك م تسمع وشذا استخفيت !!
الرجال كلهم بدون استثناء طاحوا يضحكون على ذيب
رعد لف لهم بقوة وعيونه شوي وتطير من مكانها وقال بصراخ : ورااا بداال الضحك ذاا م تجيبون حطب !
محمد قام وهو يترنح من الضحك وقال : سم يرعد الهيام
رعد لف وتلطم يخفي ابتسامته اللي برزت بعد اسم هيامه
ذيب حك راسه وتربع وقال : رعد وشبلاك علي !
رعد لف له وقال : احلف ؟ م سمعتني وانا اقولك مد لي حطب
محمد جاء ونزله وقال : خلاص يبن الناس هذا الحطب وجبناه
رعد تقدم وباس خشم محمد وقال : م تقصر يحمود
محمد فز وباسوا خشوم بعض " سلام الرجال " وقال بصوته الثقييل : م سويينا شيء يالرعد
رعد اخذ الحطب وضمّه للجمر وشب نارهم من جديد والتموا العيال كلهم حولينها
فارس : وين شيباننا ؟
كاسر ابتسم : يحظي بس ناموا
فارس هز راسه بمعنى " فهمت " وقال : احسن خلهم يرتاحون
ومد يده لجيب ثوبه وطلع جواله وحصل فوق العشر اتصالات من بيادر والواتس مليييان رسايل
فارس فز وقام من الجلسة وهو يقول بنفسه ( الله يسستر )
رعد احتدت نظرته وقال بحدة : فااارس ع ويين ؟
فارس دق ع بيادر وقال : شوي واجي
مشى فارس وابتعد عن المخيم كامل ووصله صوت بيادر وهي تقول : فااارس م بغغييت !
فارس برعب : سلامات وش الاتصالات ذي كلها وش العلم !
بيادر : ضروري اشوفك لازززم ارسل لي لوكيشن حقك
فارس توسعت عيونه وقال : تستهبلييين انا مع اهلي وزوجتي
بيادر قررت تتكلم وقالت بصوتها الباكي : فارس انا تطلقت وطليقي خذا ولدي مني ومعاد عندي سند وتعرفني اهلي متفرقين ولا احد يدري عن الثاني وانت اقرب شخص لي فارس تكفى لاتخليني لجور الايام والشرع محللك اربع والله م اخرب بينكم بس ابي بيت يحتويني وابي قربك ويشهد الله علي اني احبك من اول بس استحيت اطلب منك كذا
فارس اكتفى بالصمت وهو يسمع كلامها وعزوتها فيه
بيادر : فاارس تكفى لا تسكت
فارس تنحنح وقال : وش اقول ي بيادر تبيني اتزوجتس وانتي توتس تطلقتي !
بيادر فزت وقالت : لا لا لي سنتين مطلقة ولي سنتين ابي اكلمك بس اول م شفتك تفكر بالزواج انسحبت
فارس : يعني ليه توو تتكلمين معتس انا من ٨ سنوات ليه م كلمتيني قبل اخذ حنين
بيادر بقرف : حنين ؟ من ذي
فارس : زوجتي
بيادر : اها يعني لو كلمتك قبل حنين ذي بتأخذني قبلها ؟
فارس م كان بحاله وزل وقال : ايه طبعًا
بيادر ابتسمت وقالت : طيب انا راضية اصير الثانية
فارس : بس انا ماني راضي ولا ابي اتزوج اكثر من مره
بيادر : انت دايم تتهرب من البيت وكل شوي اشوفك مداوم مبكر عن موعد دوامك بساعتين يعني انك م تبي بيتك !
فارس ضحك وقال : فاهمة غلط انا اصحى قبل موعد دوامنا بأربع ساعات واروح اشوف الفيلا حقتنا انا وحنين وبعدها او..
بيادر قاطعته وهي تقول : فارس لاتكسر قلبي تكفى
فارس : وشو ؟
بيادر : فكر بالموضوع واذا تبي اجيك راضية والله بجي
فارس هز راسه بنفي وقال : لا لا لاتجين ولا اجيك بنتقابل بالمستشفى اصلاً
بيادر بحزن : اللي تبيه
سكر فارس ورجع للجلسة وانصدم ان البنات كلهم بدون استثناء موجودين
............
عند العيال
كاسر احتدت نظرته وقال بصوته الرخّيم : رعد فارس وراه شيء
رعد بنفس نبرة كاسر قال : طيب اني عارف ان وراه شيء
كاسر قرب لرعد وقال : السواة ؟
رعد : مدري الولد م فيه طب كل م عدلها رجع وعطبها !
كاسر : ووش وش سووا ؟!
رعد همس لكاسر : يكلم وحدة ويخون حنين
فز كاسر من جنبه وهو اللي م يسمح ابدًا يصير شيء لخواته وانفعالي اكثر من رعد اللي كان عاقل ويفهم
كاسر بصراخ : نععممم !! وانت ساااكت له
فزوا الرجال مع فزة كاسر
ذيب بحدة : وش العلللمم !!
رعد مسك ذراع كاسر وجلسه جنبه وهمس له وهو يقول : كاسر انت م تعرف تنكتم ! وش مثلاً اخرب بيتها وهي حامل تستهبل انت فكر بعقلك واترك عواطفك كم مره بعلمك ؟
كاسر استوعب وقال : اسلم وش بتسوي ؟
رعد : طبه عندي
كاسر : اخذ حنين عندك فالبيت ولا اذا م تبي بأخذها انا
رعد ابتسم : حنين اقرب لي منك ترا يعني مستحيل ارفضها بنتي هي واختي وحبيبتي وامي وروحي الثانية هي اللي تفهمني وترشدني للطريق الصح وغير محبتها هيامي دخلت التاسع اليوم وتحتاج من يساندها ويكون معها
كاسر ابتسم وقال : الله يخليك لنا يالرعد
رعد شّد ع فخذ كاسر وقال : امين ويخليكم لي
قاطع حديثهم صوت انثى ولفوا الرجال كلهم ع صوت سلمى وهي تقول : سلااام اسمعوا طفشنا والعجز ناموا بنجي نجلس معكم
منصور : ماشاءالله تبارك الله تعالي تعالي
سلمى اشرت للبنات من وراها وتقدموا كلهم واللي كانوا " حنين ، لين ، هيام ، سلمى ، بشرى ، بيان ، العنود ، خولة ، شوق ، وعد ، صالحة ، جميلة ، عهود " كانوا فيه بنات باقي فالمخيم بس م حصلوا الجراءة انهم يطلعون معهم
حنين فزت اول م شافت رعد وتقدمت وجلست جنبه وحضنها رعد بيده وقال : هلااا بالحنيين كله
حنين ابتسمت وقالت : هلا فييك يالرعد
هيام ناظرت فيه اول م سمعت صوته وحزت بخاطرها وهي اللي كانت تحتاج حضنه وتقدمت وجلست بين حنين وبين عهود
رعد كانت عينه ع هيامه وابتسم وقال بهمس : هيامي
هيام لفت له وقالت : هاه ؟
رعد : تعالي بحضني
هيام عرفت ان رعد حاس فيها وقالت بخجل : لا لا م يحتاج
رعد مد يده وقال : طالبتس م تخلينها بخاطر الرعد
هيام مسحت ع يده وباست يدها بمعنى " الاحترام " وقالت : يروحي يالرعد ارتاح تفداك هيامك
رعد تجاهلها علطول وصار يسولف مع محمد اللي كان جنبه وترتبوا العيال بالطريقة ذي :
رعد • محمد • ذيب • زايد • منصور • ضاري • سامي • حمد • فارس • كاسر
من جنب كاسر بدأ ترتيب البنات من عند :
وعد • لين • شوق • سلمى • بشرى • بيان • العنود • خولة • صالحة • جميلة • العهود • هيام • حنين وكان ختامها حنين جنب رعد وبكذا اكتملت الدائرة حول النار
.....
فارس جلس وقال : ماشاءالله وش المناسبة اللي جابتكم عندنا ؟
صالحة : ابد والله ناموا الامهات والعجز وجابت سلمى الفكرة ولحقناها
فارس : اجل م نقول الا الله يسعد سلمى ع الفكرة ويحيكم
البنات بصوت واحد : الله يبقيك
رعد كان مرتخي ع حنين بس عينه م فكت هيامه كان يناظرها بحب ويشوف كل تحركاتها
منصور : طيب انا الصدق م اعرفكم يعني حدي ثلاثه بس
رعد ابتسم : وش تبي بمحارمنا هاه ؟
لين بحماس : طيب منصور شرايك تحاول تخمن
ذيب ابتسم اول م سمع صوتها وتأملها بكل حب
منصور ابتسم وقال : طيب اللي جنب رعد حنين صح ؟
حنين هزت راسها بنعم وقالت بهدوء : ايه صح
منصور : طيب واللي جنبها هيام الرعد
هيام ابتسمت وقالت بصوتها اللي يعذب سامعه : صح
منصور طالع برعد اللي كان يبتسم ويتأمل هيامه وقال : انا لو م عرفتك يهيام من شكلك بعرفك من نظرات رعد لك
رعد استوعب وابعد عيونه عنها وقال : ادري اني مفضوح بس م يحتاج تكمل الناقص !
منصور : والله العظيييييم المهم اللي جنب هيام م اعرفك والله
سلمى بحدة : منصورر اللهجة !
منصور ضحك وقال : اللهجة لتس انتي لحالتس محد له فيها
سلمى دق قلبها بحب وقالت : يالبى روحك والله
بشرى ولين وشوق بصوت واحد قالوا : عششنننااا سلمى تغاازل
منصور ابتسم وقال : طيب بستبعد ست م اعرفهم وبوصل لبشرى وحبيبتي وبعدها شوق اظن ولين ووعد بس والله وسلامتكم
محمد صفق وقال : تعاااال يقلييل الحياااء كيف عرفت زوجتي هاااه ؟
طاحوا الرجال والبنات يضحكون
ضاري : يحمار اخت زوجته اكيد بيعرفها تستهبل صدق
زايد : انا بروح انام يرجال استاذنكم
كل الرجال بصوت واحد : اذنك معك ، نوم العافية ..
ذيب : نلعب ؟
الكل سمعوا لذيب وفكرته وكانت صراحة وجرأة
لين بحماس : يالله قدام
لف رعد العلبة ووقفت عند منصور يسأل هيام
منصور ابتسم وقال : هيام مستعدة ؟
هيام صغرت عيونها اول م حست بألم ببطنها ومسكته بقوة وانكتمت وكانت تحاول تأخذ نفس بس النقاب كاتمها ولفت ع عهود وقالت بصوت مهزوز : عهود تعالي معي
فزت عهود لبنت خالتها ومسكت يدين هيام تحت انظار الكل وصدمة منصور ومن بينهم الرعد اللي فز وطار ومسك هيام وتركتها عهود وقال بأهتمام : هيامي فيتس شيء ؟
هيام هزت راسها بنعم وقالت : بطني يوجعني
رعد : تقدرين تمشين ؟
هيام : ايه معليك بس ساندني
رعد شالها بين يدينه واتجهة فيها لقسم الحريم وقال بصوته الثقييل : يولللدد طريييق
دخل رعد بدون م ينتظر اي اجابة ودخل فيها للخيمة وقال : كيفتس الحين ؟
هيام : هو شوي يهجد وشوي يهلكني
رعد : اجر وعافية يروحي تصبري راح الكثيير وبقى القليل
هيام : دخلت التاسع اصلاً
رعد : ايه داري معليتس
هيام ابتسمت وقالت : احبك
رعد قرب منها وباس راسها وقال : اهيمتس يهيام رعّودتس
هيام : عادي اذا تبي ترجع للجلسة ارجع انا عند الحريم معليك
رعد هز راسه بنفي وقال : انا شكيت لتس وقلت ابي اروح ؟
هيام ضحكت وقالت : احس اني بولد فبداية التاسع
رعد : لا ان شاءالله كمليه وبعدها اولدي بسلامتتس
هيام : وربي يالرعد احساسي اذا مو الليلة بكرا
رعد : نامي معي طيب
هيام هزت راسها بنفي وقالت : لا لا يرحم اهلك روح نام مع الرجال وانا هنا وان صار شيء ينادونك عادي
رعد قرب وقال : هيامي م تبيني للدرجة ذي ؟
هيام : ماله دخل بس نفسيتي م تتحمل اني انصاغ لك وانام بحضنك م ابي
رعد : واللييل ونفسية الحوامل ذي
هيام ابتسمت وقالت : نفسية الوالد اخس ترا
رعد : اني داري طيب
عهود دخلت وقالت : هيام خالتي تبيتس
رعد لف وقال : عمتي رهف ؟
عهود م كانت تبي تدخل بنقاش مع رعد اللي كان اكبر مخاوفها وقالت بهدوء : هيام بسرعة
هيام قامت بهدوء ومدت يدها لعهود اللي مسكتها وطلعوا برا الخيمة ووراهم رعد اللي اتجهة لقسم الرجال وقال : هيامي اذا تبين شيء دقي علي
هيام بصوت عالي عشان يسمعها : ابششر
طلع رعد ودخلت هيام عند امها وقالت : لبيه يمه
ام هيام فزت من فراشها وقالت : عهود تقولي انتس تعبانه
هيام ابتسمت وقالت : يعني مو مره بس فيني تعب شوي
ام هيام تقدمت وشالت النقاب من راس هيام والشيلة وكانت هيام تعرق وانصدمت امها وقالت : جاتس الطلق !!!
هيام خافت وقالت : لا لا مدري مدري يمه
ام هيام : م نزلت مويتتس ؟
هيام : لا
ام هيام : خلي رعد يجهز السيارة حوضتس انفتح والولادة فالطريق
هيام قشعر جسمها من كلام امها وقالت : طي...طييب يمه
طلعت جوالها ودقت ع رعد ووصلها صوته وهو يقول : لبيه ؟
هيام : جهز سيارتك وتعال اخذني للمستشفى
رعد فز من الجلسة وقال : الااان
سكر رعد ولف لكاسر ومحمد وقال : انتوا يالاثنين معي بسرعة
محمد عرف وفز وقال : هييااامم جااتها الولادة ؟؟
رعد : اييه امش
فز كاسر ورمى له رعد المفتاح وطار لسيارة رعد وشغلها وجابها عند مدخل الخيام وقسم الحريم
اما محمد ورعد طاروا داخل لقسم الحريم ودخلوا
محمد : يمه وينتس ؟
ام هيام : تعال يالرعد وتعال يحمود ادخلوا
دخل رعد وكانت هيام تبكي بهدوء وهي م كانت مستعدة ابدًا وتووها اول يوم بالتاسع
رعد نزل لها وباس خدها وقال : مسك حتى وانتي تعبانة مسسك
هيام مسكت وجهه وقربت ولصقت خشمها بخشمه وقالت : رعد تكفى لاتخليني فكرة ان فيه حريم يموتون من الولادة اكلتني اكل
رعد لف وجهه وباس مبسمها وقال بصوته الرخّيم : م عاش من يخليتس يهيام الرعد وهونيها وتهون يروحي
هيام حضنت رعد بقوة وكأنها تودعه فيها وقالت : اذا صار قدر شين اهتم بأيهم وحطه بعيونك يالرعد
رعد فز برعب من كلمتها وقال : هيااامي تفائلي خيير !
هيام : ان شاءالله خير بس احرص عليك
رعد كان داخله يرجف بس خارجه صامد وقال : معليه خير ان شاءالله
محمد : رعد يالله ؟
شالها رعد ولبسوها عبايتها واتجهوا فيها للسيارة وركب رعد وهو حاط هيام ع فخذه فالمراتب الخلفية ومحمد وكاسر قدام ومشوا متجهين للمستشفى العسكري لأن ملف هيام هناك
...............
عند البنات والرجال
سلمى : الله يستر صدق
حنين كانت بحضن فارس وقالت : يارب تهونها عليها
الكل : امين
لين مشت واتجهت لسيارة كاسر وهي معها المفتاح عشان تأخذ مطارة الموية حقتها وفزت ع يدين ذيب اللي مسكت خصرها وشّدها عليه من ورا وقال : روحي وش تسوين هنا
لين وهي كاتمه الصرخة : ذيييبب خررششتتنيي !!
ذيب ابتسم ولفها عليه وقال : شدعوة م سويت شيء ؟
لين : احلف ؟
ذيب : وش تسوين طيب
لين بعدته منها ومدت يدها واخذت المطارة وقالت : اخذها ابي اعبيها موية احس اني م شربت اليوم
ذيب : اوه صحية حلوتي
لين قطبت وهي تهتم ببشرتها وصحتها وجسمها وقالت : ذيب بسألك سؤال
ذيب دف لين بهدوء وجلست ع مرتبة السايق وسدحها ذيب واعتلاها وقال بصوته الثقييل : اسألي
لين كان قلبها يدق وقالت : طيب كيف اسألك وانت قريييبب كذا !!!
ضحك ذيب وقال : انطقي بس
لين سحبت نفسها وجلست وكان ذيب قريب مررره وقال : غبية قربتي اكثر
لين : مو مهم اهم شيء اجلس المهم كم موية تشرب باليوم ؟
ذيب : ع حسب اذا انا عطشان اشرب ٤ علب واذا عادي علبة ولا علبتين وبعدين وش الموضوع السامج ذا مسوية صحية ع راسي تكفين ارحميني
لين ضحكت وقالت : حبيبي من اليوم تشرب وقت م اقولك تشرب واقصى حد ١٠ علب فاهم ؟
ذيب : يساتر بطني بيصير قربة موية !
" القربة هي وعاء او كيس يحطون فيه الموية زمان 😭 "
لين ابتسمت وقالت : شف ي تشرب ي تنحرم من شوفي
ذيب فز وسحب نقاب لين وشيلتها وقال بحدة : انا محروم طيب خليني اشوف واتمتع
لين طيحت راسها ع المرتبة وزفرت بتعب وهي تقول : اااااه ذيييب ماااللي خللق ارجع البسسها الله يقلعك !!
ذيب ضحك وقرب من رقبتها واستنشق ريحة عطرها وقال : البستس اذا تبين بس خليني شوي
لين : واذا جاء احد واحنا كذا وبعدين صاير تمون وانت بس ملكت !
ذيب بعد وقال بخبث : حبيبي م يهمني اللي يجون انتي زوجتي بالحلال وبالعقد وبكل شيء ولو اسويها معتس محد بيقدر يمنعني لأنتس حلالي وملكي والزواج مجرد عرض وشّد انتباه ومصاريف فقط لا غير فهمتي ؟
لين كان وجهها يحترق احراج وقالت : اللي هو بروح انا ابعد
قام ذيب وسحب لين يقومها معه ووقفت وقالت : حسافة كنت احسبني طويلة الا اول م وقفت جنبك طارت النظرية
ذيب ابتسم وحضنها وقال : يووننه النتففه الحلووة
لين : ذيب انت وش مرتبتك او منصبك ؟
ذيب : مقدم وبعدين تسأل كأنها تعرف فالرتب !
لين ضحكت : لا بس ابي اذا سألوني اجاوب
ذيب ابتسم وقال : طيب وانتي ؟
لين تنحنحت بفخر وقالت : دكتورة وجراحة
ذيب : ماشاءالله في ايش ؟
لين : انا درست قلب واعصاب بس مسكوني للجسم كامل واذا كانت حالات طارئة في القلب يستدعوني
ذيب حضنها وقال : يحبيبي انا
لين حاوطته وقالت : عيوننها خلاص ابعد
ابعد ذيب ولف وتلطم ومشى للجهة الرجال ودخلت لين لقسم الحريم
لين : سلمى حنين كلمتوا هيام شيء ؟
سلمى : مستحيل ترد الحين
لين : دقيقة بدق ع كاسر
دقت لين ووصلها صوته وهو يقول : هاه ليونه وش بغيتي ؟
لين : وش صار ؟
كاسر : ولادة
لين : اماااانه
الكل فز وهم م يسمعون الحوار وقالت حنين : يمه وش صار !!
كاسر : وربي ورعد منهار قسم بالله حالته صعبه
لين برعب : يويلليي ليه ؟؟
كاسر بصوت مكسور : لأن فيه مشكلة م حكوا لنا تفاصيلها بس يقولون مستحيل يطلعون الاثنين عايشين يعني فهمتي ؟
لين انهارت وقالت : لااا اله الاااا الله اسألك بالله يالكاسر !!
سلمى بصراخ : بننتت وش العلللمم !!
لين بعدت الجوال وقالت : بناات هيام حالتها خطيرة وممكن نفقدها او نفقد ايهم
حنين انهارت تبكي وقالت : الله يقويها ويسهلها عليها وتطلع بالسلامة هي وايهم ورعد كيف ؟؟
لين : كاسر يقول انه منهار
سلمى مسكت قلبها وقالت : يااارب م يصير فيها شيء
ام هيام تقدمت وقالت : شفيكم ؟؟
سلمى فزت وقالت : ولا شيء يخالة استريحي
لين رجعت جوالها ع اذنها وقالت : كاسر معي ؟
كاسر : ايه معتس
لين : انا درست في طب النساء والولادة اجيكم مع ذيب ؟
كاسر : اييه تعااالي لأن فارس برضو كان بيدخل بس رعد رفض
لين : الاان بجي
سكر كاسر وطارت لين لذيب وهي تقول : تكفى يالذيب فزعتك
فز ذيب ودخانه بين شفايفه لفه ع جنب وقال : احتززمميي ي ليين الذييب
لين : مشينا اركب سيارتك
ذيب م فهم بس اتجهة لسيارته وركب وركب لين جنبه وطاروا للمستشفى
ذيب : انطقي وش السالفة ؟
لين : هيام في حالة م يعلم بها الا الله واظن ان ايهم منقلب او نشبت احد اطرافه
ذيب ابتسم وقال : والله مدري وشذي لكن الله يسسر لها
وصلوا للمستشفى وطلع ذيب بطاقته ودق له العسكري تحية وقال : المقدم ذيب بن عبدالله بن قايد
ذيب : استررح
فتحوا البوابات له ودخل ذيب ولين مصدومة وهي اول مره تشوف العساكر واحترامهم لبعض والتحية والاشياء ذي
دخلت لين ركض وذيب ماسك يدها ومشابكها بيده وقال بهدوء وصوته الثقييل : لييني شووي شوي
لين لفت له وهي تحاول تاخذ نفس وقالت : مقدر مستعجليين
وصلوا للسيب وشافت اخوانها وفارس اللي وصل من مدة ومحمد اللي يحاول م ينهار
لين : رععد
رعد فز وحضن لين وقال : قالي كاسر ادخلي تكفيين ودعاتتس هيامي وولدي استأمنهم عندتس ي ليوني
لين حاوطت رعد وهي حملت ع عاتقها شيء كبيير بعد تعزوى اكبر اخوانها لها ولا هو بس ع كذا رعد بنفسه تعزوى فيها وسلمها كل شيء
لين بهدوء يعكس العواصف اللي تصير داخلها : ابشر استودعهم ربك وان شاءالله خير
دخلت لين العمليات بعد م سجلت بياناتها وعرفوها كلهم
الدكتور : دكتورة لين تووك مبتدئة صح ؟
لين جلست وقالت : ايه بس عندي خبرة وان شاءالله اكون قدها
الدكتور كان يتأمل لين اللي تلبس لبس الدكاترة وتعقم يدينها ودخلت وشافت هيام تبكي وترجف
لين ابتسمت بضيق وقالت : هييياام يروووحي لييه الدمووع ؟
هيام فزت وحضنت لين وقالت : ااااخ لييينن حمدلله يارب
لين ابتعدت وقالت بجدية : اسمعيني يهيام الرعد تحملي معي بحاول اقلب ايهم واطلعه وبحاول قد م اقدر تكون ولادتتس طبيعي تمام ؟
هيام وهي تتعرق وترجف هزت راسها بنعم وقالت بصوت مهزوز : وين رعد ؟
لين : مو وقته ركزي معي
نزلت لين لهيام وماهي الا دقيقة تحت صدمة الدكاترة والاستشاريين صرخ ايهم بالسلامة وهو طالع من هيام تحت صرخاتها واغمى عليها وشالت لين ولد اخوها وصارت باللحظة ذي منقذة لحياة هيام وايهم وصارت عمة لأول مره بحياتها
لين بحب نزلت دموعها وقالت : ووهه الصغنووننيين الحلووييين
حضنته لين بحنية وقالت : نورت الدنيييا يروح عمتك
الدكتور ابتسم واخذ ايهم ومده للسستر اللي اخذته وراحت فيه للحضانة وطلعت لين بدون م تكلم اي احد وهي ناوية تطمن رعد وقالت : حمدلله ع سلامة هيامك وولدك يالرعد
رعد فز ونزلت دموعه وكانت اول مره تشوفه لين يبكي وقال بصوته الثقييل والمهزوز : حمدلله ع كل حااال الحمدلله يارب ع حسن التمام
فزت لين له وركضت وحضنته وطيح رعد راسه ع لين وحاوط ظهرها وقالت : يالله يالرعد لو تشوفه كيف صغيير
رعد ابتسم ورفع راسه للدكتور اللي طلب رعد يجي يعبي بياناته ويوقع لأيهم ويشوفه
رعد تقدم للدكتور وسجل بياناته ووقع وبصم وكل شيء وخلص وطلع للحضانة
السستر : بيبي هيام سيف ؟
رعد تقدم وقال : ايه هنا
السستر طلعت ايهم بالسرير الزجاج الصغير وكان صغير صدق ابتسم رعد وهو يشوف ملامحه ارتسمت ع ولده وشاله بين يدينه وحضنه وباس راسه وقال : نورت الدنيا يعيون ابوك والحمدلله ع سلامتك ي قلب الرعد ونبض الهيام
اذن رعد بأذنه وكان ايهم ساكت مع ابوه عكس الممرضات اللي كان يصارخ بين يدينهم
رعد : وين هيام ؟
السستر : تعال معي
مشى رعد وايهم بين يدينه وكان صغيييير مقارنة برعد اللي دخل وشاف هيام تستمع للدكتور وكانت كاشفه وشعرها منسدل ع كتوفها ووجهها التعبان وابتسامتها كان هالشيء كافي انه يحرق رعد اللي صرخ بالدكتور وقال : ممكن تطللع ابي اكلم زوجتي
الدكتور فز وطلع بدون اي رد
رعد دخل وقال : حمدلله ع السلامة يهيام الرعد
هيام ابتسمت وقالت : الله يسلمك يالغيييور
رعد ابتسم وباس راسها بقوة وقال : هاتس ولدتس
هيام مدت يدها وخذت ايهم اللي بكى اول م حس بحضن امه وانهارت هيام تبكي معه وقالت : رععد م اتحممل صغييير
رعد ابتسم وطلع الكاميرا حقته اللي جابها معه فالسيارة وثبتها وحط وقت وقال : هيامي ناظري بالكام
ابتسمت هيام وناظرت بالكام وحاوطها رعد وايهم بين يدينهم وصورتهم وكانت اجمل صورة التقطتها عدسة كاميرا رعد
رعد : يحلوو اهليي يعررب
هيام ابتسمت وباست لحيته وقالت : ويحلو ابونا يعرربب
رعد ابتسم وشال ايهم بين يدينه وعطاه للسستر اللي اخذته للحضانة واتجهة لهيامه وقال : اسمعيني بتجلسين معي وببيتي طيب ؟
هيام ابتسمت وقالت : لا بروح عند امي
رعد احتد صوته وقرب منها وقال : في بيتي وكلامي اللي يمشي
هيام بدون اي تردد قالت : اجل شورك وهداية الله
رعد ابتسم وقال : تذكرت يوم خطوبتنا
هيام شهقت وقالت : ممنججدد ييمهه
ضحكوا الاثنين وحضنها رعد وقال : والحين صرتي ام ولدي وعساتس معي لأخر عمري ي ام ايهم
هيام دمعت وقالت : ويخليك لي ي ابو ايهم
ضحك رعد وقال : لا خلاص نرجع لهيام الرعد ؟
هيام ضحكت وقالت : ابشر يرعد الهيام
طلع رعد يسأل متى خروجها ويجهز كل شيء لها
................
في المخيم
رجعوا الكل وبشرتهم لين بقدوم ايهم وسلامة هيام
ابو هيام وام هيام : حمدلله يارب
ابو رعد وام رعد : الحمدلله ع سلامتها
كاسر ابتسم : صرتوا جدان
الكل ضحكوا وقالت ام محمد : الحمدلله ع السلامة وصار عند حفيدي ولد وصرت جدة صحح
ابو محمد : ايييه الرعد اللي كان يلعب بين يدينها صار ابو وعنده ولد
محمد تخصر وقال : احلفوا ولميس ؟
الكل ضحكوا ع ردة فعله وقالت بشرى : وحمود صادز ولميسنا !
محمد ابتسم وقال : يعييونن حموود انتي
ابو محمد بعصبية : اععقببب
ابو رعد بحدة : اححللف ؟
محمد ضحك بصوت عالي وقال : وقسم بالله اني عارف محد بيتكلم الا قاضي ومحمد
ابو هيام : وولدد تمووونن ؟
محمد : سم طال عمرك
ابو محمد : ومتى بيرجع رعد ؟
ذيب : جدي مستعجل مستحيل يرجع بيروح بمرته لبيتهم
ابو محمد : اها صح عشان هيام وطلعتنا وحجزنا للخمس ايام ؟
كاسر : لا بيجي رعد وهيام معه بس بيجون بعد يومين يعني ع اخر يوم
ابو محمد : تم اجل
جلسوا الرجال وطلعوا الحريم لقسمهم وابتدت التباريك والسنابات لهيام وولدها
سلمى بفرحة : م اصدق هيامنا صارت ام
بشرى : بنااات خير غررت !
ضحكت وعد وقالت : عقبال حنيين وعقبال اي وحدة حامل وم علمتنا
سلمى ابتسمت وقالت بنفسها ( وعد تدق بالكلام وكأنها تدري اني حامل ياللييلل صدق )
حنين ابتسمت : امييين يارب بنات تخيلوا دوامي بيصير حضور لأن الشركة استفتحها المدير امس وقالي احضر بس مقدرت
لين : كووويس تطلعين من البيت وتغيرين جو
وعد بحماس : وانا برضو بداوم مع كاسر بس بدون م يعرف كاسر
لين : كلنا بنداوم ايييووه نسسيت اقولكم انا اللي ولدت هيام
البنات صرخوا برعب وقالوا بنفس الوقت : امااااانه ، تستهبليييين ، يمممهه ، احلفييي
لين ضحكت : والله وشليت ايهم قبل امه وابوه
عهود : ماشاءالله يقوووة قلبتس ي ليين
سلمى : اكيييد طالعة ع زوجها قااادحة ليين الذيب
لين ابتسمت وصرخت وهي حاطه يدينها ع وجهها وقالت : يحبيبببيي ي سلمى ويرووحي الذييب والله
حنين : طيب قولي لنا وش صار ؟
لين وقفت وصارت تحكي لهم كل شيء من بكاء هيام لصراخ ايهم
صالحة : الحمدلله انها عدت ع خيير
الكل : اييه والله الحمدلله
جلسوا البنات يسولفون عن الحمل والولادة وضحكاتهم وصراخهم ورعبهم بين الاحاديث طالع
.....................
في المستشفى
فارس دخل غرفة بيادر وقال : بيادر ؟
بيادر قامت وقالت : ارحب يدهر قلبي ورجعانه
فارس ابتسم وقال : الله يبقيتس اسمعيني اجلسي وبقولتس كل شيء
بيادر : انت اللي اجلس تعال
جلس فارس وقال : مستحيل اقدر اتزوجتس ومستحييل افكر فيه اصلاً لأن اخوان زوجتي مستأمنينها عندي وغير كذا مقدر اخون ثقة حنين فيني ومقدر اتزوج عليها خصوصًا انها حامل وتحتاجني يعني م فيه شيء يدعم فكرة زواجنا
بيادر بحزن : فااارس خييير م ابييك تبعد وتطيير من يديني
فارس : بالعقل متى جيت بين يدينتس اصلاً ؟
بيادر : اسمعني معك خيارين لا ثالث لهما ي تتزوجني ي تنقطع علاقتي فيك
فارس ابتسم وقال : هانت عليتس العشرة يعني ؟
بيادر بغضب الارض : بسرعة ي انا ولا حنين !
فارس : حنين فارسها طبعًا !
بيادر انصدمت من ردة وهي كانت متوقعة يقول اسمها وطلع فارس من مكتبها بدون لا يسمع ردها وانهارت بيادر تبكي بحرقة ع مكتبها
اما فارس طلع من المستشفى واتجهة للمخيم وهو ناوي من المنبر ذا اذا طلعت بيادر قدامه يحرقها ويكسرها ويسفل فيها لأنها هي اللي نوت البعاد وصل للمخيم وقال : سلام عليكم
الكل : عليكم السلام
فز كاسر ومسك فارس وقال بحدة : ويين غطسست !
فارس : رحت للمستشفى حقي ليه ؟
كاسر : عشان ميين عشان الزفت ذيك صح وقسم بالله لو ادري انه عشانها م يصير لك طيب !
فارس ابتسم وقال : مو عشانها وبعدين ماله داعي تشك فيني انت بعد ترا كافي رعد وبلاويه وشكوكه
كاسر بحدة : انطق عشانها !!
فارس : وربي مو عشانها بس قابلتها وغسلت شراعها وبلكتها من كل مكان
كاسر ابتسم وقال : اييييه رجاااال
فارس : معليييك زووود يالكاسر
مشوا ودخلوا للخيمة وبدأت حكاوي الجد قاضي تدور بالمجلس
ام محمد دخلت لخيمة الرجال وقالت : قاضي م خلصت كذباتك ؟
ابو محمد قطب وقال : مها م ودتتس تنقلعين ؟
العيال فزوا وقالوا بصوت واحد : عنن الغللطط يجدد
ام محمد ابتسمت وقالت : كففووو احفااادي تربييتتيي
الاباء اعتلى صوت ضحكاتهم وقام ابو محمد بعصاته يهاوش العيال والضحك والكلام والسواليف كانت مأخذه الاجواء
..................
في بيت رعد
وصلوا رعد وهيامه للبيت بعد م كتبوا لها خروج ووصلوا ام هيام ومحمد معهم ونزلت ام هيام ركض لبنتها اللي كانت تمشي بهدوء ومسانده نفسها ع رعّودها
ام هيام : وين حبيب جدته ؟
تقدمت هيام لأمها وسلمت عليها وتحمدت لها بالسلامة وقالت : يمه ايهم بنجيبه بعد يومين يقولون لازم يكون تحت الملاحظة
ام هيام : الله يخسهم يالله الحمدلله ع سلامتكم
هيام ابتسمت : الله يسلمتس يروحي
دخلوا داخل وكان رعد مجهز فراش لهيام فالدور الاول واغراض ايهم وكل شيء ابتسمت وقالت : يروحح هيااامه اللي مجهز كل شيء
رعد همس عشان م تسمعه ام هيام وقال : يهوون ولا تروحين لبيت اهلتس
هيام ضحكت وانسدحت وقالت : اذا خلصت دوامك بدري مر ع ايهم وشوفه وطمني عليه
رعد : ابشري يعيوني
لف رعد لأم هيام وقال : عمتي انتبهي لها تكفين
ام هيام : ابشر لاتوصي حريصه
طلع رعد لدوامه وهو ناوي ياخذ اجازة ومنها يكمل فالمخيم وفالبيت عند هيامه
...................
في المخيم
سلمى : بنات بدق ع هيام
البنات تجمعوا حول الجوال ووصلهم صوتها وهي تقول : هلاااا باللي لها الخاافق يهليي هلاا بسلمى
سلمى بحب : اررحبي يعييونها والحمدلله ع سلامتتس وسلامة ايهم الرعد
هيام : الله يسلمتس يعيوني
البنات بدؤا يباركون ويتحمدون لها بالسلامة وهيام ترد عليهم وحدة وحدة ووصلت لحنين وقالت : وااااه حنيننيي عقبالتس يروحي
حنين ابتسمت : اميين يارب الله يبشرني فيه ولا فيها
هيام : يارب بنت عشان ازوجها ايهم
بشرى : قهرر لميس اكبر ولا كان خذت ولدتس
هيام ضحكت وقالت : صصح لميسسوه لبى عيونها
بعد سوالف مرت سكرت هيام وصاروا البنات يسولفون
..................
عند الرجال
ذياب دخل وسلم والكل ردوا السلام وقال ابو محمد : ذياب انا اعتبرك ولدي مثلك مثل سامي وحمد لكن لازم حق عليك تعتذر لرعد
ذياب جلس وقال : ابشر بس جيت اسلم عليكم واتحمد لرعد بالسلامة ومبروك م جاه وتكفون ياهلي انتبهوا من طارق
كاسر فز وفز ذياب معه ومسك لحيته ومسح عليها وباسها وقال : ذياااب انططق وش بيسوي طارق ؟
ذياب : وقسم بالله يالكاسر اني مدري
فارس : طيب استدرجه واسحب منه كلام
ذياب : مقدر هو مهددني ولا ابي اخسر حياتي وانا توو نويت ابدأ اصحح اغلاطي واعيش حياتي بشكل صحيح
سامي : ايه ذياب انت قلت بتخطب عندنا صح ؟
ذياب : ايه ابي اتقدم لأبو ضاري ع بنته بيان
انصعقوا كلهم بالخبر وقال ذيب : م عندنا لك زواج ي ذياب
ذياب : لاتعطوني رفض وتكسروني وانتظروا برجع لوظيفتي وبحسن من نفسي
سامي بحزن : ذياب تعال معي شوي
ذياب قام وطلع مع اخوه وقال : تكفى لا تأخذ بيان مني
ذياب انصفق بعد كلامه وقال بحدة : وش اللي لا اخذها منك خطبتها ؟؟؟
سامي هز راسه بنفي وقال : لا لا باقي بس ابيها
ذياب : الحياة كذا يخوي م ابيك تكرهني ولا شيء بس انا ابي البنت وبحاول اخذها قد م اقدر واذا م ضبط معي الله يوفقك معها
سامي بحدة : يخوووي م حصلت الا بيااان !
ذياب : ساممي احترم اني اكبر منك !
سامي قطب وقال : مالها دخل بالكبر ابيها وانا اقرب لها
ذياب ضحك وقال : كلنا نفس القرب ترا
سامي صد ودخل الخيمة ومشى ذياب ناوي يطلع من المخيم وفز اول م شاف بيان واقفة عند الباب وتنزل اكياس الزبالة وقالت بصوت عالي : لاتخلصون الكرك ابيي اشرب
سلمى من داخل : الحقيي طيب
بيان رفعت راسها وشالت شعرها من ع وجهها وطاحت عينها بعين ذياب اللي ابتسم وقال : اصير لتس كرك وترضين ؟
بيان م كانت تعرف وجه ذياب وقالت بحدة : انتت ميين وكيف تدخل عندنا !!
ذياب ضحك وقال : ذياب ولد خالتتس عبير
انصدمت بيان ودخلت علطول بدون م تعطي ذياب رد وطلع وهو يحس ان قلبه مو معه ابدًا وان بيان استحلت قلبه بدون اي سابق انذار
:::::::::::::::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم 🤍
( ارححببوواا جميييعًا اشتقتوا لي صح ؟ عادي اعترفوا 😏 ، رجعنا ببارت حلو وملياااان احداث ومن اهمها ولااادة بطلتنا الهيااام يالله صارت ام احس شعورر حللوو ويبكي لأنه انتهى ابرز حدث عندي فالرواية وقربت النهاية استمتعوا بكل لحظة وعطوني رايكم بالكومنت 😢 )