يهزمني الحُب وانا جاهل بدرب المُحبين

البارت التاسع

راح رعد وهو يحترق ع هيام وعلى كل مره مد يده فيها عليها صح انها مرتين بس كانت تنسف داخل قلب رعد
::::::::::::::::::::::::::::::::
رجع رعد للبيت ودخل يأخذ له كم لبسة بحكم انه بيجلس اربع ايام بدون محد يدري طلع للسيارة ومشى للقصيم وسكر جواله وهو ناوي م يرد ع احد حرفيًا كان مصدوم من نفسه كيف ظلم هيام ع حساب البزر بشرى كان طول الطريق يعاتب نفسه ويتذكر كل كلمة نطقتها هيام وتذكر كيف مد يده عليها بأول ليلة لهم مع بعض كان الندم يأكله اكل
وقف في نص الطريق يصلي العصر فرش سجادته وصلى ودعى لنفسه ولهيام ولأهله
قام وصفط سجادته وركب وكمل طريقه
______••______
عند هيام دخلت للبيت وانفجعت امها خصوصًا ان العايلة كلها دروا بطلاق بشرى من رعد
ام هيام بفجعه : طلقتتسس بعد !!!
هيام انخرشت : هاااه من ؟؟
ام هيام ركضت لها : رعد رعد طلقتس ؟!
هيام ضحكت : يمه خوفتيني يعني معاد اجيتس الا وهو مطلقني؟
ام هيام زفرت براحة : لا لا يقلبي الله يحيتس والبيت بيت اهلتس
دخلت هيام لغرفتها : وااااه اشتتقت لحياتي قبل الزواج
نزلت عبايتها وشنطتها الصغيرة وطلعت للصالة
هيام : الا اقول يمه
ام هيام : هلا
هيام : بنروح للمخيم صح
ام هيام : ايه وشفيتس رعد وافق بعد
هيام : اوه م كنت ادري انه بيجي
ام هيام بشك : ليه م يقولتس كل شيء ؟
[ طبعًا قروب العايلة بس الاباء والامهات والعيال ]
هيام تذكرت كيف كان معصب اليوم : اوووه الا الا قالي بس نسسسييت
ام هيام ضحكت : وانتي للحين مغير تنسين
هيام : يعني الشكوى لله
ام هيام : اجل قومي نروح لبيت عمتس ابو رعد
هيام تذكرت حنين وابتسمت : يالله بس دقي ع خالتي ام ضاري تجيب سلمى وتروح
ام هيام ضربتها : وجع ياللي م تستحين خالتتس تطردينها وقدام اختها
انفجرت هيام : وش والله المشكلة مشكلة خالتي بلتني بحب بنتها سلمى
ام هيام قامت تلبس عبايتها وهيام بعد
وصلوا لبيت ام رعد
ام رعد : ياهلا ومسهلا بالهيام وام هيام
ام هيام ابتسمت وسلمت : ياهلا فيتس ي ناديه
هيام : هلا خالتي
ام رعد كانت تدري بسفر رعد عشان كذا م سألت
ام رعد : زين رعد جابتس عندنا
هيام : اي والله عاد ذكرتيني اكلمه
ام رعد : ايه تكفين لي ساعة ادق عليه م يرد
هيام خافت : هاه قولي والله يخالة !
ام رعد : معليه لاتخافين يمكن م عنده ارسال
هيام : وشذا الارسال اللي ساعة تدقين م يرد اخذت جوالها ودقت وفعلاً عطاها مغلق
هيام : لا اله الا الله مو وقتك ي رعد افتح جوالك !
حنين جات وهي توها تصحى : هلا والله بهيام
هيام لفت لها وحضنتها : هلا بالأميرة النايمة
ضحكت حنين : كله من سهرتنا امس
هيام ضحكت : عاد م طولنا وشذا النوم
حنين : لا يحلوه انا نمت عندتس صح ؟ المهم رجعت هنا وجلست ع جوالي واول م اذن صليت ونمت
هيام : ماشاءالله ! عاد لو انكم جلستوا كان ازين م رجع رعد الا الساعة ٣ وشوي وتصير ٤
حنين تكتفت : الا ع الطاري بشرى تطلقت !!
هيام بأبتسامة : خلاص تكفين ابعدي مني طاريها راحت بخيرها وشرها
حنين ضحكت : اي خير حبيبتي هي كلها شر
هيام ضربتها : حننيين !
حنين سكتت شوي وقالت : هيام الله يستر لايعرف انتس انتي اللي مرسله الرسايل
هيام : لا يحياتي الرقم قديم ومو مسجل بأسم احد
حنين : متأكدة ؟
هيام : ايه امشي ندخل قبل يشكون فينا
دخلوا وجلسوا نص ساعة وجات ساره وعيالها بدون بشرى
ام ضاري : سلام بنات
قاموا كلهم وردوا السلام
وصلت ام ضاري عند هيام
ام ضاري : ماشاءالله هيام عندنا اليوم لايكون لحقت بشرى
هيام بقرف : فال الله ولا فالتس زوجي مسافر وجيت عند اهلي
ام ضاري بعصبية : ايييه يالله م نقول الا الله يهني سعيد بسعيدة
هيام ابتسمت بقرف وصدت
سلمى فزت : بنات شرايكم نرقص
هيام قبصتها : ولعنه م تشبعين انتي ؟
سلمى تألمت : الله ياخذتس انتي وقبصتس يملعونه الاوله باقي مسويه علامة زرقاء في فخذي والحين يدي !!
هيام ضحكت هي وحنين
لين : والله صادقة سلمى عاد من زمان عن رقص هيام
بيان نطت : دام هيام بترقص اجل تم
هيام تكتفت : لااا والله شغالة رقاصة عندكم انا !!
لين مثّلت الزعل : والله م رفضتي لسلمى وحنين امس
شهقت بيان : لااا والله ! رقصتي لهم واحنا تخاصميننا
سلمى بهمس : ايه رقصت وشافها رعد عشان كذا ترفض
شهقوا لين وبيان مع بعض وصرخوا : ااااممماااااننهه
سلمى فزت اول م شافت هيام ناوية تقبصها مره ثانية
سلمى : حلفت بالله معاد تلمسيني
حنين قامت تحامي ع سلمى : خلاص ي هيام امسحيها في وجهي
هيام : هييين ي سلوم انتي الحكي م يجلس في بطنتس !
لين قامت وسحبت هيام بعد م جابت السماعة : يالله حلفت تقومين
قامت هيام ورقصت ودخلوا البنات كلهم معهم وشوي ودخلت العنود جايه مع زوجها وجابت بشرى معها
بشرى : ماشاءالله اشوفكم طربانين
هيام ضحكت بضحكة مستفزة لبشرى : اي والله انطربنا
بشرى بقرف : اجل خلوني اشارككم
سحبتها بيان : تعالي يعيوني ويروح رعد ويجي غيره مليون
حنين : والله وهي الصادقة
سلمى : عااااشششت بشرى عاشت اختي
( كانت سلمى ناوية تعدل علاقتها في بشرى بعد م انفسخت الخطوبة )
بشرى ضحكت وبدت تطلع من جوو الحزن بس حاطه خطة ملعونة لهيام
جلسوا البنات وكملوا سواليف وجايبين حب دوار الشمس وشاهي بنعناع وجلسة فناااانة
قامت هيام تدق ع رعد وبرضو م رد
جلست بضيق وقالت : بنات رعد م يرد !
حنين : غرييب عاد مو من عوايده يارب لايكون صار له شيء
هيام فزت : حننيييين فال الله ولا فالتس !
حنين مسكتها : استغفر الله بس يعني مصدومة انه م يرد
بشرى خافت : هيام من متى سافر ؟
هيام م ردت عليها وهي تقول بنفسها ( خلاص مو لازم اقولها وخلاص لازم تفهم انها مالها دخل فيه )
سلمى همست لبشرى : خلاص اسكتي مالتس دخل !
بشرى تذكرت وسكتت
لين فزت : رعد يدددقق عليي
هيام ركضت لها : ردي ردي
لين هزت راسها بموافقة وردت ووصلها صوت رعد
رعد : لين
لين : لبيه
رعد : السبيكر مفتوح ؟
لين استغربت : لا
رعد ابتسم : سلمي لي ع هيام وقولي اني طيب وبخير ووصلت القصيم من ساعة وسلمي لي ع الكل ولعاد تدقون كلها يوم واجي
لين ابتسمت براحة : ابشر يوصل يعيوني
سكر رعد ورجع يقفل جواله نهائيًا
هيام زعلت : سكرر !!!
لين ناظرتها : ايه
هيام ماتت زعل : خير كنت بسمع صوته ع الاقل
لين قامت وحضنتها وهمست : يسلم عليتس اول وحده ويقول وصلوا لها اني بخيير ولعاد تقلق علي
هيام ابتسمت : الله يسلمه من النار
جلست هيام ووضح عليها الضيييق كانت م تسولف وهي كانت مشتاقة له
حنين : بنات متى المخيم ؟
العنود : بكرا
حنين : والله ؟
العنود : اي والله
حنين فزت : ليين تعالي ساعديني بأغراضنا
سلمى ضحكت : ماش انا وبشرى وبيان خلصنا
هيام : اف انا باقي اغلب ملابسي الحلوة والدافية في بيتي
حنين : طيب روحي مع محمد لبيتتس واخذي كل شيء تبينه
هيام : لا لا م يحتاج بروح مع رعد اذا جاء
حنين راحت هي ولين يجهزون : بكيفتس
بشرى قامت : بنات احد بيشرب كرك ؟
العنود : والله وقققتته انا بشرب
بيان وهيام : وانا بعد
بشرى ابتسمت بخبث وهي كانت ناوية شر ع هيام وناوية تحرقها
راحت بشرى تسوي الكرك وام رعد تساعدها
ام رعد : والله م تشيلينه يبنتي ابعدي
بشرى م كانت تبي تخرب خطتها : يخالة تكفين عطيينيي
ام رعد بأصرار : يبنت ابعدي حلفت م تشيلينه
بشرى ماتت غيض وهي اول خطة خربت
جابت الكرك ام رعد وكانت بتصب للعنود بحكم انها الكبيرة بس فزت هيام : والله م تصبين يخالة جيبي
ابتسمت ام رعد برضى : هاتس الله يخليتس لرعد ولنا
هيام ابتسمت : اميين يارب
جات بشرى وصرخت هيام عليها : بشرى خيير خليتي خالتي تشلها !
بشرى صرخت بصوت اعلى : والله يحبيبتي خالتي حلفت م اشيلها تبيني م اتعب
هيام على مشارف ينفذ صبرها وقالت بهمس : الله يعينني عليتس
صبت هيام وشربوا البنات وماهي الا ثواني وكملوا الجلسة حنين ولين
صار الوقت ليل وهيام تنتظر مع حنين فالمقلط
حنين بشك : متأكدة قال بيرجع فالليل
هيام : والله انه قاله حتى قلت بأخذ ملابس قال سلامات لليل قلت
حنين صدت : غرييبة الساعة ١٢ وهو للحين ماله حس
هيام اخذ جوالها ودقت عليه وكالعادة جاها صوت * عزيزنا العميل ان الهاتف المطلوب مغلق الرجاء المحاولة لاحقًا *
هيام زفرت بضيق : حنين توصليني لبيتنا
حنين : يالله امشي
طلع كاسر : خير انتي وياها وين رايحين
هيام : لبيتنا
كاسر صد : بجي معكم
طلعوا كلهم ووصلوا هيام واول م دخلت رجعوا لبيتهم
______••______
الصباح الكل كان مستنفر
ام محمد : جهزتوا العزبة ي ناديه ؟
ام رعد : ايه ايه يخالة
ام محمد : ويين رعد ؟ من اول م سمعت بطلاق بشرى منه وانا م كنت ادري عن الخطبة اصلاً لا انا ولا جده والله لو تشوفين كيف جده عصب ونزل ضغطه اول م سمعه فالمجلس يقول ابشرك يرد فيها على احد من الجماعة !
ام رعد باست راسها : خلاص يخالة سكري ع الموضوع
ام محمد عصبت : لا والله ؟ طيب انا بسكره بس قاضي ؟
ام رعد كانت تدري ان رعد في مشكلة كبيييرة خصوصًا انه م قال لجده وجدته : الله يعين
ابو محمد : يامحمد وين ولدك رعد !
ابو رعد : والله مدري راح للقصيم امس ولعاد رد
ابو محمد بعصبية : وراه مسكر جواله جعل ابواب الجنة تسكر في وجهه اللي م يستحي
ابو رعد شهق : استغفر ربك يبه
ابو محمد : اخلص دق علييه !
ابو رعد اخذ جواله ودق وكان جوال رعد مغلق
ابو رعد : يبه م يرد اكيد انه جاي والخط م فيه ارسال
ابو محمد بتهديد : والله م ظنتي بس الله ياخذني ان اسلمته !
ابو رعد ضحك : ابد ولدي تحت امرك
ابو محمد بسخرية : وانت تنتظرني اخذ شورك ؟
ضحك ابو هيام بصوت عالي وهو اللي دخل ع الكلمة
محمد : اف ي عم والله ي جدي سدد لك وحدة
ابو محمد رمى عقاله ع محمد : اعقب ياللي م تنتخي ! تقول كذا لعمك اعنبوك انت م تستحي !
ابو رعد : هاه يمحمد والله ي ابوي سدد لك وحدة بس تحس فيها اما انا كلام بس
محمد طاح يضحك
فارس : ماشاءالله تضحكون ! بسسرعة تأخرنا
طلعوا الكل وفارس يتوعد في رعد اللي م يرد
فالجمس كانوا البنات مع كاسر اللي يسوق وجنبه جدته ام محمد
ام محمد : يا هيومه
هيام : لبيه يجده
ام محمد : م دقيتي على رجلتس !
هيام : الا والله يجده بس م يرد جواله مغلق
ام محمد : حاولي طيب الحين
هيام استغربت : طيب
دقت هيام ورد رعد فزت اول م شافته رد
هيام بششوق واضح ع صوتها : رععد !
رعد : عيونه
هيام بعتب : خير ان شاء الله وينك من جوالك الكل يدق وانت م تدري عن هواء دارك !
رعد : قلت لتس لاتدقين م برد صح ولا لا ولا لين م قالت لتس
هيام بعصبية : لا يشيخ وش اللي م برد الناس تقلق ترا
رعد ابتسم : الناس ولا هيامي ؟
هيام : وينك ؟
رعد ضحك عشانها م ردت وعرف انها استحت : فالقصيم
هيام شهقت : نعععمم !
رعد فز : وشفيتس !
هيام بضيق : رعد م تدري عن المخيم ولا وش
رعد ضرب راسه وهو توه يتذكر المخيم وقال في نفسه ( اووههو عشان كذا فارس كسر جواله من الدقداق علي يويلي منه ) : والله اني ناسي
هيام : اسمع عمومًا احنا متجهين له الحين وم اخذت ملابس دافية البركة فيك كل ملابسي فالبيت والمفتاح معك
رعد ابتسم : طيب الله يحفظكم مقدر اجي والله
هيام ضاقت صدق : رررععدد !
رعد هام في منطوقها : يروحه
هيام بتهديد : والله اذا م جيت اني لا ازعل علييك
رعد ضحك : تزعلين ؟ وعمرتس كلمتيني وانتي مروقة
هيام تذكرت انها دايم ترد ردود ترفع الضغط ومختصرة جدًا : تكفى يالرعد
رعد فز : ابشري بعزتس
هيام بهمس : تمشي الان والله المخيم بدونك م يسوى
رعد ابتسم : اعتبريني وصلت الرياض
هيام ابتسمت : الله لايحرمني منك استودعتك ربي
رعد : ولامنتس طمنيني عليتس كل شوي ترا فتحت جوالي
هيام : ابشر انتبه للطريق واترك الجوال في خير
ضحك رعد وسكر
اما هيام اللي تغيير مودها بعد صوته وفعلاً اصبح لرعد تأثيير قوي عليها سواء سلبي او ايجابي
ام محمد : ماشاءالله دقيتيها سالفة انتي وياه
هيام ضحكت : وش يجده اول مره اكلمه من بعد م سافر
ام محمد : اخلصي وينه بيجي للبر ؟
هيام : ايه ان شاء الله بس للحين فالقصيم
ام محمد : يويله من جده ويلاه لاتعلمون قاضي قولوا انه توه وصل بيته وبيأخذ كم لبسه وبيجي
الكل : ابشري
عند رعد اللي مسك خط راجع للرياض قاطعه صوت جواله معلن اتصال جايه
رعد شاف اسم فارس : ارحب
فارس بعصبية : ولعنه يرعد ولعنه !
رعد انفجر ضحك : افااا ليه
فارس : تستاهل يحيوان عشان ثاني مره ترد
رعد : والله م شفت اتصالك كان جوالي طافي
فارس : تخسى اعرف انك ضايق ومقفل جوالك عمد
رعد ابتسم بضيق : دامك عارف ي الفارس وشفيني ليه العتب ذا كله
فارس : احسن عشان ترد وتشكي لي كل همومك م تخليني ع نار مدري وينك فيه ولا ترد ولا شيء ع الاقل ارسل رسالة اتطمن فيها !
رعد : اسف والله حقك علي
فارس : خلاص اقطع الشر بتجي المخيم
رعد : ايه ايه ساعتين ولا ثلاث وانا عندكم
فارس : اسمع ترا جدي بيذكيك اليوم
رعد ارتعب : يوووه ليه
فارس : عشان بشرى
رعد قال بقرف : ابعد مني سيرتها !
فارس : معليه والله لاتقولي كل شيء من طقطق للسلام عليكم
رعد : اسمع بسكر وانت اشغل جدي
فارس رد بموافقة وسكر رعد وكمل دربه
_______••______
عند الاهل الكل وصل للمخيم
فارس بأبتسامة عذبت عيونها وهي تطالعه وقالت في نفسها
حنين ( اه يارب كل يوم يعذبني بضحكاته وسواليفه يارب اجعله من نصيبي )
فارس : اسمعوني زين الساعة ٥ العصر بجيب دبابات للعيال طبعًا
تكلمت حنين وهي اصلاً تبي تدخل معه بنقاش خير شر : لا والله لكم رب واحنا مالنا رب !
فارس لف لها بقوة : نعم نعم ؟
حنين خافت بس كملت : وشو نعم نبي نلعب
فارس بعصبية خفيفة : وويين تلعبين ان شاء الله استاذة حنين؟
حنين ( يعييون حنين والله ) : هاه وين العب داخل في خيمتنا ! صح ولا لا يبنات
الكل وقفوا معها : ااييييه صح
فارس ابتسم ع جنب وهمس لكاسر : بتمسك اختك ولا اجيها !
كاسر طالعه بقوة : سلامات خلاص بكلمها انا
فارس : اعجل طيب
كاسر مسك حنين : حنين سلامات شتبين بالدباب ولد انتي
حنين بضحكة : اسمعني عاد م عندي انا سواليف هذا للعيال وهذا للبنات كلنا فالهوا سوا
كاسر : طيب انا اوريتس والله لأقول لجدي
خافت حنين : لا لا هونت خلاص م ابيه حسيبك ربي
ضحك كاسر ورجع لفارس : تم يولد العم
فارس ابتسم : كفو عليك ذيببااان
حنين رجعت للبنات : اف الله ياخذهم بينبسطون واحنا بناكل تراب هنا
هيام : عادي عندي الصراحة م ابيه اخاف منه
سلمى : ياليل ذي الرقيقة يختي حنا نبيه طيب !
هيام : بسم الله وش قلت طيب
بشرى : بنات اسمعوا مالنا الا حل واحد
لفوا لها كلهم : وش ؟
بشرى : نطلب رعد
هيام ضحكت : حبيبي ناسية ان رعد العن القوم واكثرهم عصبية
بشرى : ادري م نسيت بس نحاول يمكن يلين ويقتنع
حنين : انا عن نفسي اطلب جدي ولا اطلب رعد
هيام وسلمى ولين وبيان : واحنا والله
بشرى انبسطت : خلاص طيب انا بكلمه
سلمى فزت : نعم نعم !! نسيتي انتس طليقته !
بشرى : واذا قلت عشان وناستنا
حنين عصبت : خلاص عاد تراتس مصختيها !
بشرى ارتفع صوتها : خلاااص بكيفكم بسم الله اكلتوني
حنين مستقصدة تقهر بشرى : هيام كلميه بيخضع لتس وبيجي على وجهه
سلمى فهمتها : ايه ايه تكفين ياهيام الرعد
هيام ماتت بعد منادات سلمى لها : هاه لا خير بنات م ابي
سلمى : اقول لايكثر وبتكلمينه اول م يجي وعساه بس ينصرنا
هيام تكتفت : مع اني م اظن وشكلي بلقم هواش بس لعيونكم
البنات ضحكوا كلهم
_________••________
العصر امتلت اسوار المخيم بصوت سيارة رعد معلنه وصوله
رعد بصوت عالي : سلام الله علييييكم
الكل فز ماعدا الجد قاضي : وعلييكم السلام
رعد نزل ودخل بيت الشعر يسلم ووصل عند جده
رعد غمض عيونه اول م ضربته عصا جده ع كتفه بقوة
( كانت ضربات ابو محمد تكسر العظام حتى عياله م يتحملونها بس رعد كانت صامد قدامه ولا تألم )
رعد ابتسم : تمون يأبو محمد
ابو محمد بعصبية : وييين كنت غاااطس هاه ؟
رعد احتد صوته : قريب كنت معزوم وحلفوا علي امسي عندهم وجيتك اليوم الثاني
ابو محمد : وسالفة بنت عمتك ساره !! ليه انا اخر من يعلم
رعد بعصبية : احمد ربك انك م عرفتها لأني انا نادم اني عرفتها
ابو محمد بعصبية : تستاهل شرع اللي يخلي زوجته من اول يوم ويروح يخطب اعنبوك م تستحي !
رعد : حصل خير والشيطان شاطر
ابو محمد : قم اذلف من وجهي
رعد طلع متجهة لمخيم الحريم يسلم ع امه وهيام بس استوقفه صوت فارس : رعد
رعد لف له : لبيه
فارس : لاتروح عندهم فيه حريم من الجماعة
رعد : ادري طيب شفت رجالهم
فارس : طيب ومكمل تروح !
رعد زفر بعصبية : فارس لاتغثني خلاص بسلم ع امي واجي
فارس : اوه عشان امك طيب قل من اول
راح فارس للخيمة وكمل رعد لمخيم الحريم
رعد : يولد يأم رعد تعالي
ام رعد فزت : لبيه يارعد جايتك
رعد ابتسم اول م شافها وسلم عليها وقال : شوفي لي طريق
ام رعد تأكدت هالمره م تبي تعيد غلطتها مع بشرى وشافت م فيه احد الا سلمى وهيام كانوا يشيلون المنقل حق الجمر يبون يدخلونه الخيمة
ام رعد : يبنات اعجلوا رعد بيدخل
سلمى : اصبري يخالة ذا حار وثقييييل
هيام : ايه ايه دقيقة بس
رعد ابتسم اول م سمع صوتها وقال : خلي هيام تجي
ام رعد : هيام اذا خلصتي تعالي
هيام كان وراها شغل ومجهزة كم فعالية معها : يخالة والله اني مشغولة تكفين انا يالله قبلت اساعد سلمى
ام رعد : خلاص يبنتي
ولفت لرعد وقالت : هيام مشغولة م بتجي
رعد بان الضيق بملامحه : قولي لها رعد يبيتس
ام رعد : يبن الحلال وشذا كل ذا اشتياق توك امس مدري قبله شايفها
رعد : يمه !
ام رعد : رح رح الله يصلحك
وقفلت الباب الفاصل بينهم
رعد طغت العصبية ع ملامحه وطلع لسيارته واخذ فروته ولبسها وتلطم بشماغه وكانت عيونه حمراء رجع للخيمة وجلس بهدوء
محمد : ولد رعد
رعد لف له بدون م ينطق
محمد : تلعب معنا ع الدبابات
رعد : سلامات ؟ لا م ابي
فارس نط : والله ان تلعب شوفني حلفت
رعد : اف ي فارس ليييه تحلف م ابي يخي جايك من سفر وتعبان احمد ربك اني جيت للمخيم !
فارس : مالي دخل كلنا نسافر ومع ذلك نستانس
رعد عصب زيادة وصد وهو م يبي يغلط ع احد وينتظر بس تصير مشكلة ويطيح ضرب باللي كان سببها
وصلت الدبابات وكانت ١٥ دباب
فارس ضحك : جاهزييييين
رعد : الله لايشغلنا الا بطاعته
فارس ضربه ع راسه : اصه وقم خل مني الزعل مو وقته
رعد مسك يده ولفها ورا ظهره وتألم فارس
فارس : وجع فكني يكلب
رعد ابتسم وهمس له : ايه لعاد تمد يدك يورع وانت منت بقدها
فارس تكلم اول م فكه رعد : اعقب حرام اني قدها وقدود
رعد : ايه ايه واضح
ركبوا وبدا العب والمزح والطهبلة
_______••_______
حنين كانت تراقبهم من فتحه في احد الاشرعة وقالت : الله حسيبهم هيااام
هيام جات : نعم
حنين : ولعنه ورا م كلمتي رعد يوم جاء يسلم ع امي
هيام : يوه كنت مشغولة ونسيت من سالفة الدبابات
سلمى ضربتها : والله محد ضيعتس الا النسيان اللي ماله سنع
هيام : حشى تراني انسان وانسى شفيكم
حنين : دقي عليه بسرعة
هيام : اف طيب
دخلت هيام الخيمة واخذت جوالها من شنطتها ودقت عليه
رعد كان واقف ع الدباب وشاف اتصالها ورد
هيام : الوه رعد
رعد ابتسم اول م سمع صوتها بس م نسى رفضها له : خير
هيام انصدمت : يمه عساه خير صدق
رعد : خلصي وش بغيتي
هيام : اسمع تعال عند المخيم حقنا
رعد : يالله جايتس
هيام سكرت وركضت للباب وانتظرت وكلها دقيقتين ورعد يقول : هيام
هيام فتحت وكانت ورا الباب : ادخل م فيه احد
رعد دخل وشافها لابسه فروتها كانت بيضاء وشعرها يلاعبه الهواء ووجهها كان جمييييل بشكل يوجع صدق
سحبها لحضنه وقال : لبيه يهيام الرعد امريني
هيام انكتمت : اول شيء فكني شوي واموت ابي نفس
رعد هز راسه بنفي : ابدٍ والله م تروحين من حضني
هيام ارتفعت وباست لحيته
ارتخى رعد من حركتها وقال : تبين تموتيني انتي ؟ اعنبوتس ارفقي بحالي جايتس ع وجهي ولو تقولين طب فالنار طبيت فيها
هيام كان خدينها وخشمها حُمر : تكفى يالرعد
رعد ضاع بعد عزوتها فيه : تم والله انه تم
هيام انبسطت : نبي نلعب داخل بالدبابات لو تعطونا اثنين بس
رعد ابتسم : اها كل الحب ذا عشان تلعبين
هيام : انت عارف حبي لك م يحتاج
رعد حضنها بقوة : انشهد اني ضعت فيتس يبنت سيف
هيام ضحكت : طيب بتجيبها صح
رعد : من العين ذي قبل ذي
هيام تجرأت وحاوطت رقبته بيدينها : وش اسوي انا بعدك
رعد حط خشمه بخشمها : تبيني اسوي شيء يخليتس تكرهين الساعة اللي طلبتيني فيها الدباب؟
هيام كانت هيمانه في ملامحه : مثل ايش مثلاً
قرب رعد من مبسمها وكان ناويها خلاص وفزت هيام وتركته
هيام بصوت خجول : ررععدد
رعد ضحك : يعيونه
هيام : بروح انا وتكفى لا تنسى
رعد : نساتس موتتس مستحيل انسى لتس طلب
هيام ابتسمت برضى وهي تشوف كيف بدا رعد يتحسن معها
هيام : الله يخليك لي
( كان كل شيء بين رعد وهيام تحت انظار بشرى اللي كانت تبكي بحرقة وهي تدعي ان الله ياخذ حقها وينفصلون )
طلع رعد وهو متشقق من الفرحة وقال بصوت عالي : يالفااارس
فارس ابتسم : يالبيييه يالرعد
رعد : جيب دبابين ودخلهم مخيم الحريم
فارس : ماشاءالله اشوفك وقفت بصفهم مين اللي اقنعك هيام ولا حنين
رعد : هيام والله واخلص بسرعة
فارس اشر ع خشمه : ع ذا الخشم
رعد قرب وسلموا ع خشوم بعض
ماهي الا ثواني وطلعوا صوت ضحك البنات ووناستهم
:::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم 🤍
( هاه شرايكم اكتبوا بالكومنت عشان اقرأ واشوف ترا اخذ افكار منكم وتراني دلعتكم اسمعوني كل بارت حددت له ٣ الاف الى ٤ الاف كلمة عشان تستمتعون وتتحمسون ✨ )