يهزمني الحُب وانا جاهل بدرب المُحبين

البارت التاسع والعشرين

الكل كانوا فرحانين وينتظرون هيام تطلع بفارغ الصبر
محمد ابتسم : رعد اقدر ادخل لهيام ؟
رعد : ايه بس الحين نايمة
محمد هز راسه بمعنى " فهمت "
كاسر : يالله مشينا ؟
ام هيام بتعب : يالله بس من بيجلس ؟
رعد رفع راسه لها وقال : انا يخالة بجلس معها
ام هيام ابتسمت لرعد وطلعت وطلعوا الكل معها
الكل راح مع محمد وحمد وكاسر سحب وعد ع طرف وقال : تعالي معي
وعد بخوف وكان ودها تهرب منه : م معك سيارة !
كاسر ابتسم : الا سيارتي موجودة
وعد : بروح مع اخواني طيب
كاسر بحدة : وبعدين !
وعد رجعت خطوتين ورا وقالت : وشووو م ابي اجي معك مين بيجي معك اصلاً عشان اتطمن ؟
كاسر مسك يدها وسحبها وركبها السيارة وقال قبل يسكر الباب : نسيتي انتس زوجتي ؟
وعد ارتعدت بعد كلمته وقالت : لا م نسيت
كاسر : طيب ؟
م ردت وعد وسكر كاسر الباب ومشى ووقفه صوت حمد بضحك : خير يالطيب هات بنتنا
كاسر لف له بأستحقار : حمد لاتغثنني معادها ببنتكم قدهي زوجتي !
حمد ضحك بصوت عالي : انتبه لها
كاسر م رد وركب السيارة وكانت وعد مصدومة وقالت وهي ساده خشمها : كاسر انت تدخن
كاسر لف لها : ايه
وعد شهقت : تستتهببلل ؟؟
كاسر احتد صوته : خيييرر ؟
وعد : لا بس مو كويس لك يعني
كاسر ضحك : ادري طيب
وعد برعب : طيب كيف تجلس مع فارس ؟
كاسر : م اجلس معه اصلاً
وعد : من تخاوي طيب ؟
كاسر ابتسم وقال : ذيب
وعد شهقت : اماااانه ذيب !!
كاسر لف لها : ايه ليه ؟
وعد هزت راسها بنفي : لا لا ولاشيء
كاسر ابتسم وطلع بوكيت الدخان وجاب ولاعته وشغله وقال : تنكتمين منه ؟
وعد رفعت كتوفها بمعنى " مدري " وقالت : اول مره اجلس مع واحد يدخن يحسرتي بس
كاسر رفع حاجبه : يحسرتتس ؟
وعد ضحكت بخوف : شدعوة بتجلس تدقق ع كل كلمة اقولها ؟
كاسر لف وكمل سواقته وكان طاااييرر وم كان عند وعد مشكلة وكانت تحب السرعة وقالت : وين بتنام الليلة
كاسر ابتسم وغمز لها : بين احضانتس
شهقت وعد : هااااه !!
انفجر كاسر يضحك وقال : وشفييتس !
وعد : تستهبل صح ؟
كاسر : ايه استهبل
وعد ارتاحت وقالت : طيب بسألك كم سؤال وجاوب بصراحة
كاسر اشر بأصبعه ع خشمه وقال : على خشمي
وعد : كم عمرك ؟
كاسر : ٢٤
وعد : الله صغيييررر !
كاسر لف لها بقوة : وانتي ؟؟
وعد ضحكت : ٢١ وتوو دخلتها بعد
كاسر : طيب انخرشت قلت الحين اكبر مني !
وعد : طيب متى حبيتني ؟
كاسر ابتسم اول م تذكر يوم العيد وقال : يوم العيد
وعد غطت وجهها بيدينها وصرخت بكتمه وقالت : لاااااااا
كاسر ضحك وقال : وشفيتس ؟
وعد : شكلي كان زفت صدق
كاسر ابتسم بحب : اذا شكلتس الزفت كان كذا اجل الحلو ؟ م نسأل الله الا الثبات
وعد ضحكت بخجل وقالت : طيب كم طولك لأنه مو طبيعي والله !
كاسر ضحك وهو كان ينتظرها تسأله ذا السؤال وقال : ١٨٨ قصير صح ؟
وعد صرخت : هااااااههه !!!!!
انفجر يضحك عليها وقال : وانتي ؟
وعد : خلها مستورة تكفى
كاسر : قولي بس
وعد غطت عيونها وقالت بهمس مسموع : ١٥٩
انفجر كاسر يضحك وكان يصفق وهو يمشي ١٩٠ وخافت وعد وقالت : اقول انتبه للسيارة بس
كاسر ابتسم وهو يمسح دموعه وقال : اماانه طولتس ١٥٩ ؟
وعد : والله شفيك انت !
كاسر : احستس طويلة متأكدة انتي ؟
وعد ضحكت : الله يسلم الكعب
كاسر : اهاااا
وعد لفت للشباك وقالت : متى زواجنا ؟
كاسر : متى ودتس ؟
وعد : مدري بكيفك انت
كاسر ابتسم بخبث : والله ودي الليلة
وعد لفت له بقوة : حشى عاد مشفوح انت !
كاسر ابتسم وقال : اندري عنتس ! مفروض انتي اللي تحددينه ترا
وعد ضحكت بخبث : بعد سنة
كاسر لف لها بقوة : ححشششى صددقق !
ضحكت وعد بقوة وقالت : امزح بعد شهرين كذا ودي بعد عيد الاضحى
كاسر ابتسم بضيق : ع انه بعييييد لكن ابشري
وعد : كاسر انت شاعر ؟
كاسر : انا عقبتس وعقب الحب اللي مدري كيف دخل قلبي من عقبتس وانا شاعرتس ولا ابي اكتب الا لتس ولا والله م ينقال عني شاعر بس متذوق وفقط
وعد : اها طيب جد جد وين بتنام الليلة ؟
كاسر : فالونيت
وعد قالت تبي تبعد الشكوك : برد هناك ؟
كاسر ابتسم : ليه ودتتس تنامين معي !
وعد بصوت حاد : كااااسسر !
كاسر لف لها : لبييييه يعيون كاسر وروحه
وعد بهدوء : لبيت حاج وتسلم عيونك وروحك بس لعاد تقول كذا
كاسر : ابشري
وعد : تبشر بالجنة
كانت ذي اخر كلمة قالتها وعد وبعدها كان الصمت سيد الموقف حتى وصلها للمزرعة ونزلت بدون اي رد ودخلت بسرعة ولف كاسر وشافها داخل وسكرت الباب وراها وقال : يساتر اصبري طيب !
مشى كاسر للمجلس وكانوا يحددون عقوبة سعيد
...........••..........
وصلوا حنين وفارس ونزلوا ركض من الطيارة وطاروا علطول وأستأجر فارس سيارة واتجهوا للمستشفى علطول
وصلوا له ونزل وقال : حنيني تكفين لا تبكين قدام رعد انتي اخته اللي بعده واللي يشوفها اكبر واحن قلب وعقل ولازم توقفين معه
حنين كانت ماسكه البكية وقالت : بحاول والله
فارس مسك يدها ودخلوا وراح للأستقبال وقالت النيرس : كيف اخدمك ؟
فارس : وين هيام سيف قاضي ال******* ؟
النيرس : الدور الرابع غرفة ٢٣٤
فارس ابتسم : مشكورة
راحوا هو وحنين وركبوا المصعد وطلعوا للدور الرابع
وكانوا يدورون ع رقم الغرفة ويمشون بالأسياب بس استوقف فارس ركض حنين وهي تقول : رعععد
رعد لف بقوة وهو اشتاااق لذا الصوت وقال : يالبييييه يالحنيين
فتح يدينه وركضت حنين وحضنته وانهارت تبكي بحرقة وقالت : ااااه يالرعد تمنيت اني حولك وتمنيت اني اول من يعرف بالسالفة وتمنيت اني جنبك واواسيك اسفه يخوي اسفه يالرعد
رعد شّد عليها ونزلت دموعه وقال : والله اني احتجتتس جنبي كنت ابي ابكي براحتي واقولتس كل اللي فالخاطر ولكن حمدلله ع سلامتكم والله نورتوا
فارس كان يحترق غيرة بس يحاول م يوضح وقال : طيب وانا مالي رب ابي اسلم
وخرت حنين ومسكت يد رعد وشّد عليها رعد وجاء فارس وسلم عليه بحرارة وقال : خطاكم الشر يبو محمد
رعد ابتسم : خطاك اللاش يالفارس
حنين جلست وجلسوا كلهم معها وقالت : وش بتسوي بسعيد
رعد احترق وقال : حننييين ماهو وقتته تجيبين طارييه
فارس ابتسم : خلاص بس هي تسأل
رعد مسح وجهه وقال : بذبحه طبعًا تحسب بخليه يعيش
فارس بحب : اييييهه وصلنا اخباااار حلوه !!
حنين استغربت وقال رعد وهو مبتسم : ايييييه
حنين : خير وشسالفة ؟
رعد ابتسم لها وقال : بتصيرين عمة
حنين م استوعبت وقالت : ايش ؟
فارس ضحك : حنين هيام حامل
شهقت حنين بقوة وقالت بصراخ : ككذاااابيييينن !!
رعد احتد صوته : اقصصري صوتتس
فارس فز ومسكها وقال بحدة : خخيييرر حنيين !
حنين جلست وقالت بهمس : اسفه بس والله فرحتت
فارس كان يحترق صدق وهو مشكلته انه يغاااار وغيرته ماهي من صالحه وقال يبي ينسي نفسه : وكاسر تملك صح ؟
رعد ابتسم بفخر : ايه حمدلله
حنين ارتفع صوتها مره ثانية وقالت : امااااانه !!!
فارس بحدة وبعصبية : حننييينن وجعع يحننيين وجع !!
حنين ضحكت وقالت : خير وشفيك انت تدعي
رعد ضربها بخفه وقال : تستاهلين انطمي
فارس صد بغضب وقام وقال : يالله نستأذن بنروح للمزرعة
حنين مسكت ذراع رعد وقالت : م ابي ابي اجلس مع رعد شوي
فارس كان يصر ع اسنانه وقال : حنيين قومي بسرعة وين بتجلسين اصلاً رعد بيدخل عن هيام وهم ماسمحوا الا لشخص واحد !
حنين قامت بقّل حيله ومسكت ذراع فارس وقالت : معسلامة يحبيبي يالرعد طمني عليك انت وهيامك
رعد ابتسم : الله يحفظكم ويوصل يعيوني
طلعوا من المستشفى وترك فارس يدها بقوة وراح يسابقها بخطواته للسيارة انفجعت حنين وقالت وهي تحاول تجاريه : فارس شفيك ؟
فارس م رد وفتح باب السيارة وركب وشغلها وركبت حنين ولفت عليه وقالت : فاارس شفيييك !
فارس لف لها وهو يفور : مافييني شيء خلااص لاتزعجيني
حنين شهقت : ماشاءالله انت تنقلب ع كيفك ؟ عجب والله عجبب !
فارس صرخ عليها : حنننيينن انتتي مانتي شااييفة صوتتس اللي طاللع فالسيب والكل يسمعهه ولا تبيني اتكللمم عن احضانتس لرعد وكلامتس المعسول لهه !!
حنين ضحكت وقالت : تغار علي من اخوي ؟
فارس بحدة : ايييه اغااار اعنبوتس انا اغاار عليتس من ظلتس ومن اخوانتس واهلتس ومن نفستس ابيتس لي لحالي
حنين ابتسمت وقالت : اسفه طيب
فارس صد وقال : خلصنا
سكتت حنين وتجاهلت فارس وكانت تنتظر متى تنزل وتشوف اهلها اللي اشتاقت لهم مرره
..............••..............
فالمزرعة تحديدًا مجلس الرجال كانت الساعة ٨ الصباح
كاسر بتعب : طيب وش حددتوا ؟
حمد : ماهو حنا اللي نحدد القانون يقول ٢٠ سنة
ابو سعيد قام ورمى شماغه عندهم وقال : ذا جاهي عندك ياسيف ويامحمد تكفون يعيال عمي لاتحرموني مو ولدي
ابو رعد بحدة : والله انك غالي ياظافر ولكن مستحيل نسكت تخييل لو انه ذبح هيام وذبح ولد رعد !
ابو سعيد شهق : ورعد بيجيه ولد ؟؟
ابو هيام : ايه بنتي حامل بولد الرعد
الكل فزوا يباركون ويذكرون ربهم والكل متحمس لولد رعد ويفكرون كيف بيصير اذا ابوه كذا هيبة وله مكانته في كل مجلس وفي كل رجال
ابو سعيد بترجي : تكفوون ربعي يربعي
ابو هيام بحدة : خلاص بنخليها ١٠ والله اني معاد اتنازل اكثر من كذا
الكل وافقوا واتفقوا ع عشر سنين وم يبون سعيد يواجهة رعد وطلعوه علطول من المزرعة واتجهوا الشيبان للمحكمة
كاسر بتعب : شكله معاد يمدي ع الونيت
محمد ابتسم : تستهبل انت والله ان تحرقك الشمس
كاسر : حتى الخيام يولد حااااارة مافيه مكيف وبيت الطين بارد بس البنات فيه
محمد قام : انا والله بروح انام مع بشرى
كاسر بنظرة : مسوي تقهرني ترا زوجتي داخل يحمار
محمد ضحك ولف علطول وقال : اررححببوووااا
كاسر فز وشاف فارس وحنين وراح لهم يركض وهو يقول بصوته الثقييل : ارححببووااا فيي ذمتتتيي
الحريم طلعوا علطول ورحبوا بحنين ودخلوها وطلعت ام فارس وام هيام لفارس يسلمون عليه
فارس ابتسم : حمدلله والله اني بخييير بعد شوفتس يميمتي
ام فارس كانت شادة ع يد ولدها وقالت بحب : والله انها مرحبا في ذمتي يولدي لييين معاد يبقى من المرحبا مرحبا
ضحك فارس وباس راسها بقوة وقال : عساني م انحرم منتس وعساتس معي يمه طول عمري
ام فارس ضحكت ووقفت وراه عشان تعطي اختها مجال
فارس فز لخالته : ارحبيي يأم محمد
ام هيام ابتسمت : الله يبقيك يولدي
فارس باس راسها ورفع يده فالسماء وقال بصوت عالي هز المكان : خخطاااكم الشششر فيي هياااام الرررعدد
الكل : خطاك اللاش ، خطاك الشر ، وياك
حنين ناظرت من بعيد وقالت بهمس : الحيوان مزعلني بس يشّدني صوته الرجولي !
لين صرخت من وراها : حنننييييينننن
حنين لفت بقوة وانصدمت من حضن لين القوي لها وهي تبكي وقالت : لييني خلااص خرشتيننيي !
لين ضحكت وسط دموعها وقالت : احبتس يكلبه وحشتيني
حنين باست خذها وقالت :  م يوحشتس غالي امشي ندخل
دخلوا وسلمت ع البنات واول م جلست فزت لسلمى اللي دخلت والقهوة والشاهي معها وقالت حنين : عساتس ع القوة يروحي
سلمى ابتسمت : الله يقويتس يحنين الفارس وارحبي في ذمتي توو م نورت السعودية
نزلت سلمى الصينية واقبلت لحنين تسلم عليها بحرارة وقالت حنين : شخبار عروستنا
سلمى صفقت وقالت : مااالت ع حظيي باقي اقل من شهر وانا للحين م شريت ولا شيء
شهقت حنين : تسستتهببليييينن !
سلمى بضيق : ليتني والله
حنين ضحكت : عادي بكرا نطلع للرياض ونتقضى كل شيء ونخلص في اسبوع
سلمى بزعل : خلييتس من عرسي يارب هيام تطلع علطول م ابي ليلة عمري بدونها
حنين ضاقت وقالت : الله يشفيها هيامنا والله يقويها وتطلع بالسلامة وجعلها خاتمة الشر
دخلت ام هيام وقالت : اللهم اميين يارب وارحبي يحنين الفارس
فزت حنين وسلمت ع ام هيام وقالت : الله يبقيتس يعمة وخطاتس الشر في بنتتس وفي اختي هيام
ام هيام ابتسمت بحب وقالت : خطاتس اللاش يبنتي
حنين جلست بعد م سلمت عليهم كلهم وفزت من جديد وضحكوا البنات عليها وقالت بشرى : خلاص اهلكتوها
حنين لفت لها بحدة : شفييتتس امي ذي
ام رعد ضحكت واقبلت ع بنتها وسلمت عليها وتحمدت لها بالسلامة وجلست حنين وهي جد تعبت وقالت : سلمى هيام حامل
سلمى ضحكت : ايييهه ملعونه م قالت لنا وانتي لاتصيرين مثلها وقولي لي !
حنين ضحكت : ابشري بس الحين م فيه شيء
سلمى همست : باقي م لمستس ؟
حنين هزت راسها بنفي وقالت : لا
سلمى : احسن لتس اصبري
حنين : ايه والله اني ادري
قاطع سواليف الحريم طق الباب وصوت محمد : ببششرى
بشرى قامت بهدوء عشان حملها وقالت : لبيه
محمد باس راسها وقال : كيفتس اليوم ؟
بشرى ضحكت : طيبة معليك م بعد وصلنا للتعب
محمد ابتسم : ابي انام داخل انا وكاسر
بشرى توسعت عيونها وقالت : وش اسوي وين احطكم ؟
محمد تكتف وقال : كم فيه غرفة ؟
بشرى : غرفتين
محمد : وانتوا وين ؟
بشرى صارت تشرح له وقالت : الحريم الحين في المجلس وفيه غرفتين نوم فيها اغراضنا كلنا وفيه مطبخ وحمام بس
محمد ضرب راسه وقال : نظفوا لنا غرفة وحدة بسرعة
بشرى ضحكت : سم
محمد راح ولف لها وقال : سم الله عدوينتس
دخلت بشرى وقالت : بيان سلمى قوموا معي
بيان كانت منسدحة ع حضن العنود وقالت : ياليل وشتبين ؟
سلمى ناظرتها وهي تصب للحريم قهوة وقالت : لبيه ي بشرى
بشرى كشت في وجهه بيان وقالت : مااالت عليتس شوفي سلمى وتعلميي منها اعنبوتس لو تجلسين كذا محد جاتس يعرس بتس
بيان ضحكت وقالت : م ابي اعرس اصلاً
ام رعد ابتسمت : كلنا قلنا كذا وكلنا اعرسنا
بشرى : المهم انا ليه اقومكم ووعد موجودة
وعد لفت لها بقوة وقالت : وشدخلني الحين ؟؟
الكل ضحك من وعد وقالت بشرى وهي تضحك : ابد زوجتس وزوجي يبون ينامون داخل
ام محمد فزت : مععصيي
وعد ضحكت : كفوو يجدة اطلعي عليهم اغسليهم
ام محمد قامت ووعد معها وطلعت وقالت : كااسسررر محممدد
محمد وكاسر وفارس اتجهوا لها
نزلت ام محمد زنوبتها ورمتها عليهم
كاسر ضحك : اح ليه يجدة
محمد بألم : ااففاااا يجدة تضربين سمي ولدتس
فارس ضحك بقوة : حمدلله طلعت منها شكلهم شكوا عليها
كاسر : وعد تعالي
وعد كانت عند الباب وشهقت وقالت ( عمى كييف شافني ؟؟ ) ورجعت داخل ركض
وقالت ام محمد بعصبية : كلاامك معيي ياصبي !
كاسر انفجر يضحك وقال : لبيه يجدة
ام محمد بحدة : الحين خيمتين برا م كفتكم !
محمد وكاسر : ححررررر
ام محمد تخصرت وضحكوا العيال عليها وقالت : جعلك انت وياه في نار جهنم وانا استغفر ربي اذلفوااا !
كاسر ركض اول م شافها ترفع الزنوبة مره ثانية وطار محمد وراه وضربت في فارس وطاحوا العيال يضحكون عليه
فارس بألم : تمونين يجدتي
ام محمد بحدة : اقول جب زنوبتي لا اغسلك معهم
فارس شلها من الارض وحطها عند رجولها وقال : تأمرين امر يأم محمد
راحت ام محمد والعيال شوي ويموتون من الضحك وانطلق فارس ونزل عقاله وطاح فيهم ضرب
كاسر كان يدمع ضحك والم وقال : ااااااه بططنننييي
محمد ركض للحمام وقال بصراخ : مققدددر مقددرر
فارس وقف وهو يضحك وقال : ليت رعد هنا عشان تعرف تضحك انت وياه !
كاسر جلس وهو يمسح وجهه وقال : والله انه ودي انه معنا
فارس قام ومد يده لكاسر وقال : م يحتاج عندنا نسخة من رعد المهم هات يدك
كاسر مسك يد فارس وقام معه وقال : لذي الدرجة اشبهه ؟
فارس ابتسم : انشهد بالله انكم نسسسخة
راحوا لبيت الشعر وقال كاسر : والله ودي ان عيال عمتي سارة موجودين
فارس : م جاوكم ؟ غريبة
كاسر : لا والله ودي بذيب مبطي منه
محمد جاء وقال : يلعنم الطفش يشيخ
كاسر ابتسم : م كفاك الضحك قبل شوي ؟
فارس : اندري عنه !
ضحك محمد وجلس وقال : الكل راح للمحكمة ؟
هز كاسر راسه بنعم وقال : فارس انت قابلتهم ؟
فارس : ايه ع الخط بس م سلمت عليهم
كاسر : رايحين عبث احس لازم يكون زوج المخطوفة موجود
فارس : لا معليك حمد يعرف فالاشياء ذي وهو محامي معروف يعني
كاسر : صح والله
محمد انسدح : يالبييييه يالهبوب الباردة
كاسر رمى المناديل عليه وقال : اعنبوك وش هبوبه كأننا في فرن
ضحك فارس وقال : والله انه صادق فيه هبوب باردة
كاسر فك اول زر في ثوبه وقال : ييععيياااال !!
ضحكوا فارس ومحمد عليه وقال كاسر : والله لا اطب ع الحريم حرررر بنموت هنا
فارس قام وتشمر وقال : معك معك يبو محمد
محمد قام : والله اني معكم
ضحكوا وراحوا ركض ووصلوا لباب المطبخ الخلفي
...............•••..............
فالمستشفى
رعد كان نايم وماسك يد هيام اللي صحت وقالت بهدوء : رعد
رعد فز علطول وقال : لبيه
هيام ابتسمت : بسسم الله عليييك
رعد مسح وجهه بيدينه وقال : امريني
هيام : م يأمر عليك عدو بس ابي الحمام
رعد وخر من طريقها ومد يده لها ومسكتها هيام ودخلت الحمام وكان رعد عن الباب وخلصت وغسلت وطلعت وقالت : متى يطلعوني ؟
رعد ابتسم : مستعجل الحلو ؟
هيام ضحكت : لا والله بس ملل
رعد : الدكتور قالي بعد يومين
هيام زفرت بملل : ااافف مطوليييينن
رعد ضحك : شدعوة وش ناقصتس ؟
هيام جلست ع الكنب وقالت : ابي فطور
رعد اشر بأصبعه ع خشمه وقال : الااان يكون عندتس
هيام مدت يدينها له ونزل رعد وصار طولها وقال : لبيه ؟
هيام مسكت وجهه وباست خشمه وقالت : عساني م انحرم يعرب
رعد ابتسم وفك يدينها من وجهه وباسهم وقال : ولا منتس
وطلع وقال بحدة : لاتفتحين لأحد !
هيام اشرت له بمعنى " ابشر " وطلع رعد يقول للنيرس تجيب الفطور
النيرس : تمام بعد شوي وبيكون عندكم كم رقم غرفتها ؟
رعد : ٢٣٤
النيرس : خلاص تمام
رعد لف وراح لهيام اللي كانت تنتظره ودخل وقال : كلها دقايق وبيجيبونه
هيام شهقت : عزززتي لي احسبك بتروح تجيب من برا
رعد ضحك وقال : لايعيوني م يصلح وانتي توتس طالعه من العمليات
هيام زفرت بعصبية : رععدد لاتصييير حساس ورح جب لي من مطعم
رعد توسعت عيونه وقال : لا عاد طالت وشمخّت من متى صوتتس يرتفع علي ؟
هيام : الله ! تسمي ذا صوت عالي ؟
رعد ضحك وانسدح ع الكنب اللي جنبها وقال : بنام انا وعليتس بالعافية واذا احتجتيني نادي بأسمي
هيام : تعال حط راسك عندي
رعد قام وعدل نومته وكان راسه عند هيام اللي كانت تلعب بشعره وباست راسه وشمت ريحة العود اللي فاحت وقالت : يالبيه يالرعد
رعد ابتسم وهو مغمض عيونه ودخل بنومته ووصل الغداء ودخلت النيرس بهدوء ونزلته وقالت : الف سلامة اختي هيام
هيام ابتسمت : الله يسلمتس
طلعت النيرس وطفت النور وتركت لمبة خافته عند الباب وسكر الباب وحطت ع بابهم ممنوع الازعاج
..............••..............
فالمحكمة
المحامي : ارحب حمد
حمد ابتسم : الله يبقيك
المحامي : تمت اموركم وبيتعاقب سعيد ظافر ال ****** بـ٩ سنين طويلة وشاقة ومليانه بالأعمال
حمد : م تقصر والله
ابو سعيد سكت واتفقوا على ٩ سنين كعقوبة واخذوا سعيد واختفى من انظارهم بعد م ودع ابوه وكان ابوه يصارخ ويبعده منه ويكرر كلمة : فشلتني ونزلت راسي عن عيال عمي
حمد : نرجع يخال ؟
ابو رعد : ايه
رجعوا للمزرعة كلهم ماعادا اهل سعيد اللي رجعوا للرياض واختفوا من انظار اهل ابو محمد ..
...............•••............
فالمزرعة
كاسر بهدوء : يالله ؟
محمد دخل راسه وكان المطبخ فاضي وقال : امششوا
دخلوا ركض ودخلوا غرفة قدامهم وسكروا الباب وراهم بدون م يلتفتون بس فزوا ع صوت حنين : خخييييررر ؟؟؟
فارس كان بيلف بس صرخت حنين : لاااا معي البنات
فارس رفع يدينه وقال بحدة : استسلم والله وبعدين قصرري صوتتس يحنين
كاسر ومحمد رفعوا يدينهم برضو وقال كاسر : طيب اسمعوا بنغطي عيوننا وانتوا اطلعوا عشان نبي ننام
وعد : ماشاءالله م كفاك ضرب وتهديد جدتي ؟
كاسر ابتسم : اما انتي والله لا التفت لتس
لين : بعد !!
سلمى قالت بصوت مرتفع : اققوولل ورا م تضفون وجيهكم برررا
كاسر عرف انهم متغطين بحكم انهم يهددون ورفع ثوبه ولف بقوة وقال : تحسبيين انتس اذكى مني ؟
الكل فزوا من ذكاء كاسر وكيف عرف انهم متغطين وقالت بشرى : يههبب اشهد انه اخو الرعد
فارس لف وضحك وقال : ععززز يولد عمي
كاسر خبط كتفه وقال : اححتزززم انت وحمود
محمد ضحك ونزل شماغه ولفه بقوة وقال : جاهزين ؟
البنات وقفوا وقالت وعد : يرحمم امك لاا
كاسر نزل شماغه هو وفارس ولفوها ( المقصد انهم يجلدون ويلسعون البنات يارب تعرفون الحركة ذي 😭 )
حنين : فارررس اععقلل
فارس : اعقبي صدق ماهو انتي اللي تقولين لي اعقل
كاسر لف لفارس : لا عاد الا اختي !
فارس ومحمد : يارجااالل طيييرر
كاسر ضحك وقال : خواتي في وجهي
ركضوا لين وحنين ودخلوا في حضن كاسر
وعد حزت بخاطرها انه م تذكرها وراحت ورا شوق وسلمى وبيان والعنود وقالت سلمى : عزتي لنا
حنين ولين ضحكوا وقالت لين : القموا صدق
فارس ابتسم وفتح الباب وطلع وقال : محمد امش ذا خاين
محمد طلع وقال : طيب خل خيانته ع جنب انا ابي انام
فارس وكاسر طاحوا يضحكون والتفت محمد عليهم وابتسم بتعب : والله معليييش دايييخ
وعد حقدت ع كاسر اللي كان طاير فيها قبل يملك عليها والحين ولا كأنها موجودة وقالت : ابد بنروح للمزرعة ادخل يمحمد ونام
محمد ابتسم : الله يسعد امتس ياوعد الكاسر
وعد توسعت عيونها وقالت : وعد وعد بس م يحتاج اسمه
كاسر سكت وناظر فيها بحدة وقال : افا
وعد مسكت يد شوق وطلعوا وطلعت سلمى وبيان وبشرى والعنود معهم
لين بهمس : اح اح صدق
كاسر همس لها : وشفيتس ؟
لين : زعلت عشانها تحل لك وم اخذتها في وجهك
فز كاسر وهو توه يستوعب وقال : حررااام م تززعلل واخليها
حنين ضحكت وقالت : كفو ذا العشم فيك يخوي
طلع كاسر وحنين ولين اتجهوا للبنات
كاسر بصوت عالي : وعد تعالي
وعد تجاهلته وكملت وهمست لها شوق : بنت روحي له
وعد : شووقق مالتس شغل امشي معي ولاتتركيني م بيقرب اذا انتي معي
شوق هزت راسها بنعم وكملوا طريقهم واستوقفهم يد كاسر اللي مسكت وعد ولفها بقوة لجهته وقال بعصبية : اكلمتتس اناا !
شوق فزت وراحت ركض لبيان اللي مدت يدها لها وقالت : اشوواا اني لحقت عليتس
بيان ضحكت : والله كنتي بتبتلشين بالعرسان
شوق ضحكت وكلموا طريقهم لسلمى وبشرى وحنين
وعد بحدة : وخررر مننيي
كاسر : وعد اعقللي يوعد !
وعد تخصرت : احلف ؟ يعني انسى ان وعد موجودة وانت قبل تملك طاير فيها وكل شوي تطلع بوجهي والحين يوم ملكت طرت ولعاد شفتك !
كاسر ابتسم ع جنب وقال : يبنت الحلال توني ملكت امس وهيام ورعد صار لهم اللي صار ولازم اكون مع اخوي ولا نسساتس موتتس م نسيتتس
وعد : طيب اترك هيام الرعد ع جنب الحين قبل شوي وضخّمت صوتها بمعنى انها تقلده وقالت : خوواتتي فيي وجههيي وزوجتك البطة السوداء ؟
ضحك كاسر وقرب يبي يحضنها بس بعدته وعد وقالت : تببططييي عظظظم
كاسر توسعت عيونه : اييش ؟
وعد بحدة : تبطي عظم !
كاسر بعصبية : خيير وعد خيير ؟
وعد قالت : انزل شوي لو سمحت
نزل كاسر لها وتساوى مع طولها وقال : لبيه
وعد همست له وقالت : ماهو انا اللي تنساني وارجع ركض لحضنك ولا كأنه صار شيء
كاسر كانت عيونه ع خصرها وحاوطها بيدينه وقال : انا اللي جيتتس يحلوه ماهو انتي يعني معليتس كبريائتس موجود
وعد فزت وقالت : كاااسسر ابعدد
كاسر نزل ورفع شيلتها وباس نحرها وقال : اااااه ياعطرها ونحرها وخصرها اااه ياويل حالي صدق
وعد ضاعت صدق بعد كلام كاسر وكان عكس بدر في كل شيء وقالت تبي تغيضه : مااش بدر احسن
كانت اكبر غلطة سوتها انها ذكرت بدر عند كاسر وترك خصرها وقال بصوت هز روحها : ااايييشششش !!!
وعد شهقت : ولا شيء نمزح نمزح
كاسر لف علطول وراح بدون اي رد وهو يرتعد من العصبية ووده يرجع ويعطيها كف بس تركها بدون اي شيء وركضت وعد وراه وقالت : وقسم بالله امزح ابي اشوف ردة الفعل عندك اسسففه
كاسر تجاهلها وكمل طريقه وقالت بصوتها اللي يهيمه كاسر : ياكاسر الوعد
لف كاسر بكل خلية لها وقال : عييوونه
وعد ركضت له اول م وقف ونطت وحاوطت يدينها برقبته واجبرت كاسر ينزل لها وابتسم وحاوط خصرها وقال : حيوانه تزعليني وترضيني بنفس الثانية
وعد ضحكت : م عااااش م يزعل كاسر الوعد
كاسر : عساني م اكسرتس يارب خليها وعد الكاسر احسن
وعد : لا م يصير عادي اكسرني والله اني راضية
كاسر باس راسها وقال : يكببرر الحبب
ضحكت وعد وتركها كاسر وتلطم وقال : روحي للبنات
وعد هزت راسها بنعم ولفت وراحت للبنات وطلع كاسر للغرفة عشان ينام مع محمد وفارس اللي سبقوه
.............••............
الساعة ٧ الليل بالمستشفى
هيام بملل : ررععدد خلااص قووم
رعد كان حاط يده ع عيونه وقال بصوت ضخم ومرعب : يعني م بتسكتين ؟
هيام بحدة : اعنبوك الساعة ٧ وانت م صليت ولا صلاة خاف ربك
رعد فز وقال : ليييه م صحيتيننيي ؟
هيام بحدة وهي تنرفزت من صلاة الظهر وهي تصحي فيه : اححلللفففف !
رعد قام ركض للحمام وتوضىء وطلع ومسح وجهه ويدينه وقال : لاتفتحين لأحد
هيام : صل عندي فيه سجادة
رعد : والله ؟
هيام اشرت بيدها ع السجادة وعدلها رعد وكبر وصلى الصلوات اللي فاتته وهو معصب من هيام ويحسب انها م صحته الا الحين
هيام بملل : رعد اذا خلصت الصلاة رح للدكتور واكتب خروج انا كلمته وقال اقدر اطلع
رعد ارتعد واحترق دمه وهو يصلي صلاة العشاء وم صدق ع الله يسلم وطار لهيام ومسك فكها ورجع راسها ع المخدة وقال بحدة : ككيييففف طلعتتيي وانتي كذاااا !!!!
هيام شهقت : رعععدد
رعد كان يرجف من الغيرة اللي خلته اعمى وقال : اننططققييي
هيام مسك وجهه وقالت : النيرس كلمته ووصلت له كلامي النيررسس يالرعد
رعد خف شوي عليها بس م تركها وقال بحدة : وكييف وصللل لتسس ؟
هيام : عادي دكتورر شفييك انت هو اللي فحص علي !
رعد شّد شوي وقال : تتسستهبلييين انا قلت لهم يحطون لتس دكتورة !
وفشلت كذبة هيام ع رعد وقالت : حتى ولو دكتور عادي يشوفني اصحى ع نفسسك
رعد بحدة : ههييااااام !!
هيام كانت ترجف وقالت : لبيه يعيون هيامك
ارتخى رعد وتركها علطول وقال : ااه يهيام احرقتي الرعد وهو اللي يحرق وعذبتيه وهو اللي يعذب وخذيتي قلبه وهو اللي محد وصل لقلبه وسميته بأسمتس ونسبتيه لتس وصار لتس وهو خاضع لكل شيء تقولينه
هيام ارتعدت بعد كلامه وقالت : الله يسامحك انت اللي خذيت هيام وخليتها تهييم وتضيع برعودك ورعدت بقلبها وخطفته وم صار ينبض الا بأسمك وصوتك وحكيك وسواليفك والله اني لك وخاضعه لعيونك ونظرتك الخاطفة والمرعبة واني هيامه بهيبتك ورجولتك اللي تسوى قبايل والله اني احبك يالرعد والله م التفت عن طريقك ولايبعدني عنك الا الموت
رعد ابتسم وشلها بين يدينه وقال : جاهزة اهربتس !
هيام ضحكت : يالله
لبست هيام ملابس المستشفى وتلطمت بشماغ رعد بحكم ان ما معها عباية وطلع رعد ووقع واخذ علاجاتها وطلع ركض لها واخذها من الغرفة وطلع وحصل منصور تارك له سيارته عن الباب ومفتاحها مع الامن اللي سلم رعد المفتاح وركب هيام وركب هو جنبها واتجهوا للرياض لبيتهم وهو يبي يرتاح معها يوم قبل يرجعون اهل المزرعة
::::::::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم 🤍
( شرااااييييكم بالفجعة الحلوة الحين انقلعوا يومين م فيه بارت 😭! امزح والله بكرا ان شاءالله فيه بارت بس مدري متى احبكم استمتعوا بالبارت الحلو 🫶🏻 )