يهزمني الحُب وانا جاهل بدرب المُحبين

البارت الثامن والخمسين

مشوا وذيب وبلال يطقطقون ع خالد تحت هواشه لهم
وصلوا لعمارة سكنهم ودخلوا وسكروا الباب وراهم
خالد : عيال معي جوال تبون تكلمون اهلكم ؟
فزوا ذيب وبلال عنده وكتموه
ذيب بحدة وهو يهمس : حمااار انت اقصصر حسك لا يسمعونك اللي بالشقق تلوك للقاعدة !
خالد برعب : يويلي صدق نسيييت
بلال طلع من باب الشقة ولف بأنظاره وم شاف احد ورجع وسكر الباب وراه وقال بحدة : احمد ربك محد موجود !
ذيب : هات بكلم اهلي
خالد مد الجوال لذيب واخذه ودخل احد الغرف وسكر الباب وراه وقال بنفسه ( يارب لين صاحية يارب ترد ) كتب رقمها وهو حافظه عن ظهر قلب وضغط زر الاتصال وهو يحس الادرينالين ارتفع ودقات قلبه بدأت تتعالى وتنسمع وانهار ذيب اول م وصله صوته معشوقته صوت اشتاااق له بالحييل فالخمس شهور اللي مضت صوت تمنى انه يموت ولا يفقده وكانت الكلمات اللي تطلع من منطوقها ع بساطتها تذبح وتنسف قلب ذّيبها
لين : الو
ذيب تنحنح وقال : الو ؟
لين فزت من سريرها وطاحت ع الارض وطاح الجوال
ذيب ضحك وقال : ااسلللم ابشري بالعوض
لين بصراخ : ذذذييييب !!!!
ذيب بحب : يعييون ذيبتس ي ليني
لين دمعت وهي ترجف وقالت : يمه يمه قلبي ذييب وححشتتننيي
ذيب ابتسم : م يوحشتس غالي يروحه
لين : شخبارك يروحي وعلومك عساك طيب وبخير تأكل وتنام كويس تكفى علمني ادق تفاصيلك
ذيب كان منسدح وهو اول مره يحس انه مرتاح من بعد الاشهر اللي راحت وقال : مستعدة اقولتس كل شيء
لين وهي تشاهق : اسمع تراني ابكي من الفرحة تكفى لا تضيق من شهقاتي
ذيب ابتسم بضيق وقال : ان ضقت ترا عشان ماني عندتس وان ضقت عشاني م شفت ليني لي خمس شهور وان ضقت عشاني م قدرت اكلمتس اول مره اسف
لين وهي تمسح دموعها وتشرب مويتها تهدي نفسها : لا لا يالدنيا لا تعتذر والله عادي كل شيء هان علي بعد صوتك
ذيب كان بيتكلم بس قاطعه صوت دق الباب بقوة
ذيب فز وفتح الباب وقال بحدة : ووشش العلللم
خالد برعب : العقييد احممد برراا فالصااالة
ذيب كتمه وقال : خلاص تصرف كأن م فييه شيء اهجد فكر كأننا بمدرسة ومهربين جوالاتنا والوكيل دخل علينا
خالد ضحك وقال : الليييل صدق فاضي انت اطلع معي
رفع ذيب الجوال لأذنه وقال : معي ؟
لين : وش السالفة بتسكر تكفى لا
ذيب : بعد تكفى والله م اسكر ابشري شوي واجيتس سوي ميوت
لين : ابشر انتبه لنفسك واحبك
ذيب : يحبيبي اهيمتس
طلع ذيب وحط الجوال داخل شرابه ومشى للصالة مع خالد ووصلوا ودقوا تحية لأحمد
احمد : استريحوا
استراحوا العيال وهم يناظرون ببعض وبلال كاتم انفاسه برعب
احمد : ذيب وين كنت
ذيب : بالحمام
احمد : بس خالد م قال نفس كلامك
ذيب كان واثق وقال : وش قالك خالد ؟
احمد بحدة : بالغرفة
ذيب : طيب ؟ طلعت للحمام اجلس بالغرفة طول الوقت فكر شوي
احمد : احلف ؟ معك جوال صح
ذيب ابتسم ع جنب وقال : دور للجوال وان حصلته لك مني اجلس مدتي كاملة اخدم فالحدود وان م حصلت جوال بحكم انك تتهمني بدون دليل اطلع لأهلي انا واخوياي بحلول العيد سامع ؟
احمد قام ووقف قدام ذيب وكان ذيب اطول واعرض منه وقال بحدة : تم
مد يده لذيب اللي صافحه بقوة وقال احمد : فسخ ملابسك الان
ذيب توسعت عيونه وقال : بداية قوية حسبت بتدور بالشقة اول
احمد : خلص يعسكري !
ذيب ارتفع صوته الثقييل وهو يقول : اقل منك برتبة م تحس عيب عليك تقولي عسكري ؟
احمد : عجججلل !
فسخ ذيب جاكيت بدلته وفسخ التيشيرت وبدأ احمد ينفض فيها ويفتش بعمق
احمد : سروالك
ذيب ابتسم وقال : لذي الدرجة عاجبك المنظر وتبيني اكمل ؟
احمد بصراخ وعروقه بارزة لأنه يخاف ذيب يفوز بالتحدي : وييميين بالله اي كلمة ثانية تحسب عليييك سااامع !
ذيب رفع يدينه مستسلم وكان ببنطلون البدلة بدون اي شيء يغطي صدره كانت عضلاته ظاهره لهم كان منظره يفتن ويوجع قلبها وهي تناظره من ورا الشباك
ذيب فسخ سرواله وتقدم احمد وفتشه وم حصل شيء ورجع لذيب ومد يده يتحسس الجوال بس استوقفته يد ذيب وهو يقول : تبطططيي عظظم تلمسني
احمد تفشل وحمر وجهه وقال وهو متوتر : البس خلاص وبكرا تعال عندي اعطيك الاذن وتمشون للأهاليكم
ذيب لبس بنطلونه وقال : م تقصر حضرة العقيد
احمد طلع وناظر يمين ويسار وشاف اصيلة تجمع بقايا اكل طاحت منها قبل يطلع احمد بشوي
احمد : لو سمحتي غادري المبنى غير مسموح لك تتواجدين فيه
اصيلة م ردت وطلعت علطول ركض وهي جات تبي تشوف خالد وانصدمت من منظر ذيب وتغيرت موازينها ووصلت لبيتهم وقالت بنفسها ( يويل قلبي وشذا اللي شفته قبل شوي !! )
" في عمارة السكن "
خالد وبلال فزوا يحضنون ذيب اللي حاوطهم وهو يضحك
خالد بفرحة وهو يبكي : ااااخ مددرري كيييف اشكرررك ومددرري كييف سووييتهاا يخخي انت رججااال بنن رجاااال واشهد بالله ان عبدالله جااب رجال !!
بلال وعيونه تدمع : وقسم بالله مدري شلون نشكرك صدق الله يسعدك ويوفقك ويفتح عليك يحبيبي انت !
ذيب ابتسم : شدعوة يعيال م بيننا تكفون هو قاهرني من اول وحصلت الفرصة وكنت اتمنى يقرب ويحاول يلمسني عشان احرجه واخربط موازينه وسويتها وهذانا بكرا ماشين لبيوتنا
خالد : وبعض الناس بيعرس قريب
ذيب : وانت وبلال من الحضور ان شاءالله
بلال : الله يوفقك وينور دربك ي ابو عبدالله
ذيب رفع رجله وطلع جوال خالد وقال : ثواني
خالد ابتسم : ابد خذ راحتك يحبيبي
ذيب مشى ولبس تيشيرته ودخل الغرفة وسكر ع نفسه بالمفتاح وقال : ليني ؟
لين غفت وهي تسمع كل شيء وم ردت عليه
ذيب بحدة : لييين
لين فزت وشافت جوالها ومرت ٤٥ دقيقة وذيب يناقش احمد تقدمت وفتحت الميوت وقالت : هممم
ذيب ابتسم وقال : نمتي ؟
لين بصوتها الناعس : يعني نص نص
ذيب : اقفل ؟
لين بحدة : احد قالك تقفل الحين ؟
ذيب ضحك وبدأ يسولف للينه عن كل شيء صار له وقالها عن الرصاصة تحت خوف وهواش لين له وضحكاتهم وسواليفهم اللي مرت ٤ ساعات وهم يسولفون مع بعضهم
لين : ايه ذيب زواجنا شهر ١٠ باقي ولا لا ؟
ذيب ابتسم : ايه ع خييير ان شاءالله
لين ابتسمت وقالت : احححبببببك اششتتققت لك مرره
ذيب : خليني اشوف الشوق ذا اذا جيتتس
لين ضحكت وقالت : وشقصدك ؟
ذيب ابتسم وقال : انتي عارفه وشقصدي المهم بسكر يروحي انتبهي لتس كويس
لين باست الجوال بكل قوتها وقالت : اححببك ابششر وانت برضو انتبه لنفسك
ذيب بتخدر : شفيني ذبت انا ! وشذا السحر والله م اعديها لتس معليه معلييه
لين وهي تضحك : استودعتك ربي
ذيب : في امان الله
سكر ذيب وحذف رقمها من جوال خالد وقال : خالد فيه رقم ازعجني
خالد مسك جواله ودق عليه ووصله صوت اصيلة تقول : سااااعة عشان ترد سااااعة !
خالد فز وقال : اصييلة !!
اصيلة : اجل ؟ تنتظر احد ثاني
خالد ابتسم وقال : شوي سريع سريع جدتك هي اللي مسؤولة عنك صح ؟
اصيلة انصدمت وقالت : ايه بس هي
خالد : خلاص بجي بكرا مع اهلي واتقدم لك
اصيلة دق قلبها وقالت : طيب بسألك ذيب متزوج لأني شفت دبلة وانا ارتب شقتكم
خالد ابتسم وقال : ايه متزوج
اصيلة ضربت راسها بخفه وقالت بنفسها ( وانا حبيته استغفر الله يارب الله يوفقه معها والله يهنيها فيه )
خالد شهق وقال : دببللة !!
اصيلة : لععننه وش طاعونك !! ايه دبلة
خالد ضحك وقال : ذيب لقينا دبلتك
ذيب طل براسه من المطبخ وقال : سألتك بالله ؟
خالد : اصيلة حاولي تقرأين الاسم اللي عليها
اصيلة : سبقتك مكتوب ذيب اللين
خالد : بسس حصلناها
ذيب ابتسم : حمدلله يارب وينها ومع مين ؟
خالد : اصيلة
ذيب : هات اكلمها
خالد مد لذيب الجوال واخذه وقال : اصيلة الدبلة معتس الحين ؟
اصيلة بحزن لأنها فعلاً حبت ذيب قبل خالد بس وقت انها تصحح غلطها وقالت : ايه
ذيب : دقايق وانا عندتس طلعيها برا عند الباب عشان م تنتظرين فالليل
اصيلة : وش ليله الله يصلحك قد حن صبح
ذيب ابتسم وقال : اللي ودتس
رجع الجوال لخالد وقال : بجي معك
ذيب : اقول امسك محلك بس
خالد : مالي دخل بجي يعني بجي !
ذيب : البلشة صدق
مشى للباب وخالد معه وطلعوا وكان الجو بارد وريحة الصباح منتشرة مع ريحة الحطب والنار وطبخ بيت ام حاتم في اخر الشارع وصلوا وكانت اصيلة واقفة تساعد جدتها في خبز الخبز
خالد : صباح الخير يالخير كله
اصيلة لفت وابتسمت وقالت بهمس : صباح النور ينور عمري وضّيه
ام حاتم : هلا هلا صباح النور
ذيب تقدم وقال : وينها
اصيلة نزلت الدبلة علطول ومد ذيب يده واخذها ولبسها في يده اليمين
اصيلة استغربت وقالت : باقي م اعرست ؟
ذيب : وش يهمتس ؟
اصيلة بحدة : وش اللي يهمني طبعًا م يهمني بس عشانك لبست دبلتك باليمين
خالد : ووش فرق ؟
اصيلة : اذا لبسها باليمين يعني انه خاطب او مملك وينتظر يوم الزواج ويلبسون دبلتهم باليسار فهمتوا ؟
ذيب : انا م سألتتس عشاني فاهم بس الدبشة خالد م يدري وين يدربي راسه
خالد : يرجال ع شحم بس
ذيب ابتسم لأم حاتم وقال : ودعناتس ربي ي ام حاتم وانتبهي لنفستس زييين
مشى ذيب وقال خالد : بكرا بيجونكم ضيوف ي ام حاتم جهزي لهم الكرامة
ام حاتم : الله يحفظكم وابد بابي مفتوح دايم
لف خالد ومشى ورا ذيب ووصلوا لبلال اللي جهز كل اغراضهم ورتبها بالسيارة وقفل باب الشقة وحطه بالاماكن المخصصة للمفاتيح
بلال : توكلنا ع الله ؟
ذيب : بسم الله مشينا
ركبوا وكان ذيب هو اللي يسوق وحركوا من الجنوب للرياض ..
.......................
في بيت رعد
دخلت هيام وايهم بحضنها نايم وكانت تستعجل خطواتها عشان م تقابل رعد وهي غارت من سلمى عليه
رعد دخل وسكر باب بيتهم وطلع وم حصلها وقال بهمس : هوو امداها تطلع والولد بيدها ؟
مشى وطلع مع الدرج ووصل لغرفتهم ودخل وشاف ايهم نايم وهيام م هي فيه وتأكد انها فالحمام تقدم وجلس عالسرير ينتظرها تطلع ويشوف وش فيها
" هيام فالحمام "
وقفت عند المراية وهي بمنشفتها بعد م اخذت شور سريع مدت يدها واخذت فرشاة شعرها وصارت تمشطه وتحط ماسكات وكريمات ومن دلع البنات وانتهت وهي تعطر نفسها بعطر بعد الشور وكان ريحته ياسمين نثرت منه ع شعرها ورطبت جسمها بكريم وكانت ريحتها تجنن مسك وياسمين كانت قطنه نااااعمة وهذا ماهو بصالحها عند الرعد طلعت بهدوء وهي تدعي انه نايم ومشت بخطواتها بهدوء وطلت براسها وكان رعد جالس ع السرير ويناظر بجهتها وقال بصوته الرخّيم : احلفي ؟ سمعت صوت فتحتس للباب يغبية
هيام فزت من صوته وطلعت وهي تدّعي الهدوء وقالت : طيب وش اسوي لك ؟
رعد ابتسم اول م شم ريحة هيامه بالغرفة وركبتها وسيقانها اللي طالعة وخصرها اللي نحته حزام الروب حقها وشعرها الاسود ونحرها وعظام ترقوتها كانت تفتن بشكل كبير قام ومسك يدها ولفها له وقال : زعلانه ؟
هيام بهمس : قصر حسك ماني ناقصة ايهم ترا
رعد : يبنت الحلال ايهم لو بيقوم قام من صوتتس قبل شوي ولعاد تقلبين وتغيرين المواضيع وعلميني زعلانه ؟
هيام كملت اكثر من سنة مع رعد بس ماهي قادرة تتحمل كانت تهابه وتهاب حجمه وعرضه وطوله كان مرعب بالنسبة لوحدة قصيرة ونتفه مثل هيام كانت ساكته وتطالع فيه
رعد : اذا خلصتي تأمل فيني علميني زعلتي ومن ايش
هيام كانت تبيه يبعد منها وقالت برد مختصر جدًا : لا
رعد قرب من وجهها وقال وهو مقطب حواجبه ومثقل صوته كان هيييبة : لا ايش حبيبي تكلمي
هيام : ماني زعلانه وشفيك
رعد ابتسم وباس خشمها وقال : ايه اشوا كنت بهاوش
هيام ضحكت وقالت : اللي يزعلني يراضيني وانت تبي تهاوشني
رعد حط راسه ع كتفها ولف وجهه وبعد بيده شعرها وقرب وصار يضرب بأنفاسه ع نحر هيام واستنشق عطرها بكل قوته وباسها بخفه وقال : يالبييييه يالهييياام
هيام لفت بوجهها وكانت مقابلة رعد وقطعت المسافة بينهم وقالت : وشفيك ؟
فزت برعب اول م رفعها رعد من الارض وثبتها ع خصره وقال : اشتقت تسمحين لي ؟
هيام توسعت عيونها وقالت : يارب انك تستهبل !!
رعد : وشو لا طبعًا م استهبل ؟
هيام : تشوف اني باقي بالروب صح يعني توو تروشت تقلع م فيه
رعد ابتسم وقال : تسمحين لي اعطيتس حبي مو انام معتس يحلوه
هيام نزلت وغطت وجهها بفشلة وقالت : وش فرق !
رعد انفجر يضحك عليها وقال : اذا كان بخاطرتس م اردتس يبنت سيف
هيام : رععدد
رعد ضحك ومشى للحمام ودخل واخذ شور سريع وطلع ولبس وطالع في هيام وكانت مشغله ع اللابتوب فلم وجايبه فشار وعصيرين وقالت بصوتها الانثوي اللي ينصاغ له رعد : رعّودي تعال بدأ ترا
رعد ابتسم وتقدم وانسدح وسحب هيام بسهولة وارتطمت بصدره العاري وضحك وقال : اه توجع ترا !
هيام ناظرت بوجهه وقالت : انت اللي ساحبني تستاهل !
ابتسم وقال : تابعي بس جعلتس توجعيني دايم وجعتس لي عافية والله
باس راسها بقوة وحاوط خصرها وشّدها عليه وابتسمت هيام وهي تحس بحب رعد لها دايم وم عمره ابعد واذا ابعد تقدم وعوضها عن كل شيء كانت دايم تشكر ربي ع رعد كملوا يتابعون بحب واثنينهم بأحضان بعضهم ...
.........................
في بيت فارس
فارس سكر الباب وراه وقال : حنيني بتنامين صح ؟
حنين ابتسمت وكانت بتقوله انها بتنام بس فجأة تلاشت بسمتها وصرخت بأعلى صوتها وهي ماسكه بطنها وبدأت دموعها تنزل فز فارس برعب وطار لها ومسكها بيدينه وقال بصوته الثقييل والمرعوب : حننيينيي وشفييتس !!
حنين بصراخ وهي تشاهق : ولااادتتيي بوولدد
فارس برعب : اايششش !!!
حنين اغمى عليها بين يدين فارس اللي شالها ومشى واخذ عبايتها وطلع لسيارته وطار فيها للمستشفى حقه ونزل والكل عرف فارس وتقدموا يساعدونه
النيرس برعب : Doctor Fares is this ur wife ?
*دكتور فارس هي زوجتك صح ؟*
فارس وهو معرق ويرجف : Yes she's my wife and she is going into labor now we have to take her to the operating room
*ايه نعم زوجتي وهي بالمخاض الان ولازم ننقلها غرفة العمليات حالاً ! *
النيرس هزت راسها بمعنى " فهمت " ومشت بحنين ونقلوها لغرفة العمليات في قسم الاطفال والولادة وشوي ودخل فارس وهو لابس لبس العمليات ودخل بحكم ان عنده خبرة كبيرة بالولادة وكان ناوي يولد حنينه ويصير اول من يشوف بنته وفعلاً دخلوه علطول وبدأت الولادة وصحت حنين بحكم انها ولدت طبيعي وكانت تصارخ وتصارع الموت بعيونها حتى سمعت صوت بنتها وهي تبكي وارتفع فارس وهو يبكي وحاضن بنته بين يدينه ويبوس راسها بخفه وهو يقول : يالله يحنيني شوفي كيف صغيرة
حنين ابتسمت ورجعت راسها ودموعها اخذت مجراها وتقدمت النيرس واخذت بنته وودها للحضانة وتقدم فارس وباس راس حنينه بكل حب وقال : حمدلله ع سلامتس يدنيتي وروحي وكوني وعساها من مواليد السعادة والاكيد انها منهم دامتس امها يحنين فارستس
حنين بكل صعوبة حاوطت رقبة فارس وقالت بهدوء وبصوتها المهزوز : والله اني محظوظه فيك يعمري وعساك لي ولها سند وذخر لبى عيونك
باس راسها مره ثانية وابعد اول م تقدموا النيرسِس واخذوا حنين للقسم وطلع فارس وشاف الساعة وكانت قبل اذان الفجر بدقايق واتصل ع امه وهو عارف انها تصحى فالوقت ذا وفعلاً م اخذت ام فارس ثواني وردت وقالت بصوتها الناعس : لبيه يعيون امك ؟
فارس بكى علطول وطاح ع ركبه وقال بصوته الباكي وهو يشاهق : يمه صرت اب يميمتي
ام فارس فزت بفرحة وبكت وقالت : سألتك بالله يالفارس سألتك بالله !!
فارس ضحك وقال وهو يمسح دموعه : والله يمه جابت حنيني بنت وانا اللي ولدتها انا اول شخص مسك بنتي وحضنتها يمه صغيرة مررره
ام فارس ضحكت معه وقالت : الحمدلله ع التمام والحمدلله ع كل حال والله يجعلها قرة عينك وعين حنينك يالفارس
فارس : بشري العرب معادني بصوبكم والله بروح لحنين وبرسلتس كل شيء وتعالوا وقت الزيارة
ام فارس ابتسمت وقالت : ابشر يسند امك
سكر فارس وطلع لغرفة حنين علطول ..
.........................
في بيت كاسر
صحى كاسر يشرب مويه و يصلي الفجر وفتح القروب وشاف رسالة ام فارس وكانت تقول فيها :
لقد اشرقت الأرض وازدادت وتلألأت انوارا من حولنا فتسائلت ما سر هذا الجمال فإذ بخبر قدوم مولودتك يالفارس يزف الي دعواتي بأن تكون من مواليد السعادة وأن يرزقك الله وحنينك برها وصلاحها
وردود القروب كانت ردود تباريك لها
ابو رعد : حمدلله ع التمام والف مبروك م جاتس يبنتي حنين وم جاك يالفارس يعيون عمك
ابو هيام : ماشاءالله تبارك الله وش الاخبار الزينة الف مبروك يعيالي وعساها قرة لعيونكم
محمد : اااووووه وش الاخبااااار الحلووة ذي ماشاءالله تبارك الرحمن يالفارس وعساها من مواليد السعادة يارب
رعد : ماشاءالله الحمدلله ع التمام واسأل المولى ان يجعلها من الذرية الصالحة ويرزقكم برها وينبتها نباتًا حسن يارب وتستاهل الشحم يالفارس وحنيني بيوصلها سلامي م يحتاج
كاسر ابتسم وكتب حروف بسيطة تعبر عن فرحته لأخته وولد عمه وهو يقول : مبروك يحنين الفارس وعساها من مواليد السعادة اخيرًا صرنا خوال
رفع عينه وشاف ذيب يكتب وشهق وقال : شف الكلب !!
ارسل ذيب تباريكه وهو واقف قدام شرفة لين وشوي ووصله اتصال من كاسر
ذيب رد وقال : ارررححبببب
كاسر ضحك وقال : اببققه يالله
ذيب : اطلع وحشتني ترا
كاسر قطب : وين اطلع ؟
ذيب : انا قدام بيتكم
كاسر فز وطلع ركض وقامت وعد وهي تقول : يممه شسالفة كااسر !
كاسر تكلم وهو يركض ويقول : م فيه شيء يبنت عبير م فيه شيء
" كانوا شوق ووعد وحمد وسامي م يحبون احد يناديهم بأسم ابوهم ابدًا "
طلع كاسر وقال بصوته الثقييل : جعللهاا ترححبب ملايين يبو عبدالله
ذيب ضحك وقال : الله يبقيييك ويسلمك يبو محمد
تقدموا وسلموا ع بعضهم السلام الحار واثنينهم مشتاقين لبعضهم بالحيييل
ذيب : عللومك ؟
كاسر : والله ع م يسررك وبغيت اقول اقلط وتذكرت اننا ع اذان وبنصوم
ذيب ضحك وقال : بقلط كذا ولا كذا عندكم وحدة تخصني وملكي وودي اسلم عليها
كاسر ابتسم وقال : اووهوو بتطييير لين الحيين اقلط نفداك
دخلوا المجلس وقال كاسر : ثواني اشوف صاحية ولا لا
ذيب : خير يبوي بطلع لجناحها اعرفك م بتخليني اخذ راحتي
طاحوا كلهم يضحكون وقال كاسر : سم ادلك ولا سابقني ؟
ذيب بحب وهو يأشر ع قلبه : قلبي دليلي
كاسر : الله الله وشعنده الذيب ؟
مشى ذيب وطلع لجناح لين ودخل وسكر الباب وراه وقال بهمس : يارب نايمة ابي اصحيها
دخل ذيب غرفتها وطل براسه وفعلاً كانت لين بسابع نومه والغرفة باردة وبطانيتها مو عليها وكانت حاضنه نفسها بقوتها بحكم انها تدفي نفسها تقدم ذيب وانسدح وراها وحضنها وكان دااافي ابتسمت لين وقالت : ذيب ؟
ذيب حط راسه ع راسها وقال : لبيه ي لين الذيب
لين فزت برعب ولفت بكل قوتها وقالت وهي تمسح عيونها وترجف : ذذيييب !!
ذيب ضحك وفتح يدينه لها وطارت لين تحضنه وهي تبكي وقالت : جيييت قبل العيد جيييت يكل اعيااادي
ذيب شّد عليها وقال : خليتس كذا بحضني لنهاية العمر ي لين ذيبتس
لين ابتسمت وبعدت وجهها وقالت : متى نتزوج ؟
ضحك ذيب وقال : جاهزة ؟
لين : ايييه كل اغراضي بمحلها من شهرين
ذيب : ليلة العيد وانتي ببيتي
لين ابتسمت وقالت : تمم
ذيب باس خشمها وقال : تمم يروحه
رجعت لين تحضنه وابتسم ذيب بحب وقال بهمس : اسمعي دامني احل لتس وانتي زوجتي بنام معتس والله تعبان ولا فيني من راح لبيتنا
لين توسعت عيونها وقالت : حبيبي اذا م اوسعك الفراش توسعك العيون والحضن امرني بس
ضحك ذيب وانسدح وعلطول تسكرت عيونه وقال وهو دايخ وبدأ صوته يثقل : صحيني الظهر ارجع لأهلي قبل يدرون ويذبحوني
لين ضحكت وقالت : ابشر يحبيبها
قربت لين وهي م شافت عين ذيب المفتوحة وكانت تبي تبوس خده بس غدر فيها وتلاحقت لين اللحظة ولفت وجهها وباس ذيب خدها وقال : حيوانه ترا اقدر اعتليتس واسويها !
لين ضحكت وقالت : اقول اهجد لا انادي كاسر
ذيب ابتسم وسحبها لحضنه ونام علطول عكس لين اللي كانت تتأمل ذيب ومصدومة انه بحضنها وفي سريرها وبغرفتها ابتسمت برضى ونامت مع ذيبها بهدوء ...
..........................
في بيت ابو محمد
كان الكل مستنفر لحنين ومولودتها والكل موجود بدون اي استثناء
رعد : وينهم كلمتهم ؟
محمد : ايه بيجون الساعة ١٢
رعد شاف جواله وقال : بعد نص ساعة المجالس جاهزة ؟
كاسر وهو يشّد حزامه وسلاحه : ايه يالرعد كل شيء جاهز
رعد ابتسم وعدل حزامه وخنجرة ورشاشه وتقدم ودخلوا المجلس ينتظرون وشوي ودخل ذيب وقال : كوويس وصلت بدري
رعد فز وقال : ارررحححببب
محمد : ذييبب مررحبااا يالذييب
ذيب ابتسم وقال : ابقههم يالله
تقدم وسلموا ع بعضهم وجلسوا وقال رعد : شعلومك ومتى وصلت ؟
كاسر : الوسخ نايم عندي
رعد : ماشاءالله طيب ؟
كاسر : مع زوجته قبل الزواج
رعد ضحك وقال بمزح وهو يحسب خنجره : اععقبب والله لت اذببحك
ذيب ابتسم وقال : انا لكم يخوان ليني
محمد : اها صرتوا اخوان لين وقبل عيال محمد
ضاري دخل وزايد وابو ضاري وابو رعد وابو هيام معهم وقالوا بصوت واحد : ذييبب
ذيب ابتسم وقال : اررححبوواا ياهلي
تقدموا وسلموا ع بعض وقال ابو ضاري : حمدلله ع السلامة يالذيب
ذيب : الله يسلمك يتاج راسي
ضاري : ومتى العرس ؟
ذيب ضحك وقال : كل شيء حجزته وجهزته قبل اجي للرياض وزواجي يوم العيد فالليل
رعد ابتسم وقال : زييين م سويت وابشر بالمعونة وابشر بالوقفة
ابو ضاري صفوا عياله جنبه وقال : م تقصرون ياهل قاضي ربعي وناسي وخوال عيالي
ابو رعد : ابشروا بكل علمن يشرف ويطيب الخاطر
رعد ابتسم وباس راس ابوه وقال : فارس جاء ترا
طلعوا كلهم وفعلاً ماهي الا دقايق ودخل فارس بسيارته وحنين وبنتهم معهم بحكم انها بخير وبصحة قوية
رعد طلع رشاشه ورفعه فالسماء وقال بصوته الرخّيم : ارححب يالفاااررس
فارس ابتسم ونزل وقال : الله يبقيييك يالرعد
تقدم رعد وحضن فارس وباس راسه ونزل وباس فارس خشم رعد وقال : يالبيه يالرعد اشهد بالله ان من كبر حظ بنتي يوم مثلك خالها
رعد ابتسم وباس خشمه وقال : والله انها تبشر باللي يطيب خاطرها
تقدموا الرجال وسلموا ع فارس السلام الحار وقدموا له المعونة وتقدمت حنين بهدوء وطلعوا سلمى وهيام يساعدونها ودخلوا وشال فارس بنته ومدها لجدها ابو رعد اللي اخذها وهو يضحك وقال : بسم الله عليها الرحمن الرحيم اذنت في اذنها ؟
فارس هز راسه بنعم وقال : اذن انت بعد يعمي
سمى بالله ابو رعد واذن في اذنها وباس راسها اول م خلص وقدمها لرعد اللي قال : بسس ذي لولدي ايهم
ضحكوا كلهم وقال فارس : والله انه تممم ان قالها الله
دخلوا للمجلس وقام كاسر وقال : رعد هاتها يخوي
رعد ضحك ومدها لكاسر اللي حضنها وقال بحب : ارحبي يادهر قلب خالتس ورجعانه
رعد بمزح : والله لا اعلم وعد
ضحك كاسر ودقه برجله وقال : يشييينك يالرعد
رعد مسح لحيته وشنبه وهو يقول : والله اني مزييون
محمد : يويلي ويلاه افيييه صدق يالثقة الخايسة
طاحوا العيال يضحكون ع نظرة رعد لمحمد وابتسم محمد برعب وقال : يخوي امزح لو م انت مزيون بزوجك اختي استوعب شوي ؟
رعد مسك كتفه وقال : حبيت الترقيع
ضحك محمد ورعد معه وقام وقال : بدخلها هات
كاسر مد بنت فارس لخالها رعد وشالها بين يدينه ودخل فيها لقسم الحريم
" عند الحريم "
فزوا لحنين وبدؤا يباركون ويسلمون عليها وانسدحت بتعب بحضن امها وهي تمسح ع شعرها وتبوس راسها وقالت بحب : حمدلله ع سلامتتس يبنتي ومبروك م جاتس
حنين ابتسمت وقالت : الله يبارك فيتس يمه
هيام بفرحة : حمدلله جبتي بنت م يحتاج ادور لأيهم عروس اذا كبر
حنين ضحكت وقالت : بدال م تباركين تدورين زوجة لولدتس ؟
ضحكت هيام وقالت : مبروك يالدنيا والحنين كله وعساها من مواليد السعادة يروحي
سلمى ابتسمت وقالت : مبروك يحنين الفارس يحظها بنتتس دام مثلتس امها وعساها من مواليد السعادة
حنين : امين يروحي انتي وياها وعقبالتس ي سلومتنا
سلمى بمزح : خنتيني اصلاً ولدتي بدري وانا باقي للتاسع
ضحكت هيام وقالت : نفسي كملت للتاسع
سلمى : شفتي اطلق بنت عمة انا
هيام قطبت وقالت : خير امتس خالتي م اني متعودة اسميها عمة
ضحكت ام ضاري وقالت : يحبيبي يهيومه لعبت بمخها اخت ابوها واخت امها من الرضاعة بس كله من جدتس الله يرحمها
ام هيام ضحكت وقالت : امين يارب والله انتس حستينا
هيام ابتسمت وقالت : معليه يخالة تصير تصير
لين ضحكت وقالت : هي م تصير بس يالله
وعد : منجد
شوق ضحكت وقالت : طيب لاتخربونها شفيكم
هيام بقهر : وعد ولين ؟ وشفيهم يعني حمييير
ضحكوا البنات وقاطع سواليفهم صوت رعد وهو يقول : يووللد طررييقق
هيام كانت ترضع ايهم وقالت لها امها : روحي لرعد يبنت
قامت هيام وهي متفشلة وغطت صدرها وتركت ايهم في حضنها وقالت : هلا وش..
وكلمت وهي تقول : يووونهه هذي بنت حنيينن بسم الله علييها زوجة ولدنا
ضحك رعد وقال : ماشاءالله شبكتي معي ؟
ضحكت هيام وقالت : احتزم يحبيبي
طالع رعد في ايهم وكان ع اطراف شفايفه الصغار اللي شابهت شفايف امه حليب وكان يرضع اصبعه
رعد ابتسم وقال بخبث : كنتي ترضعينه ؟
هيام لفت وتوسعت عيونها وقالت : ايه وش تبي ؟
رعد ابتسم وقال : بدخل اسلم ع حنين وحسابي معتس بعدين
هيام عبست بوجهها وقالت : دز بس
دخل رعد وكاسر مشى اول م دخلت هيام مع البنات وسلموا ع حنين وعطوها معونتها وباركوا لها
رعد بحب : وصرتي ام ي امي ودنيتي كلها
حنين : الله لايحرمني منكم يالرعد والكاسر
كاسر ابتسم وقال : ولا منتس يالحنين
رعد باس يدها وقال : مبروك يعيون اخوتس مبروك يحبيبي انتي
حنين ضحكت ودموعها اخذت مجراها وقالت : الله يبارك فيك يالرعد
رعد فز وحضنها وقال : ليييه الدموع يالدنيييا ليييه يسند الرعد وقوته وصموده لييه ؟
كانوا الكل يشهدون ع علاقة حنين ورعد ببعضهم وكيف انهم جسدوا كلمة اخوان بمعناها الحرفي ولا يهونون البقية
حنين شّدت ع رعد وقالت : ابد مشااعر كيف اني انا وانت اول من خلا امي وابوي جدان
ضحك رعد ودموعه بعيونه وقال بصوت عالي : الله ياخذني عادها يعرب !
حنين ضربته ع ظهره وقالت : مجار يحبيبي
بعد رعد وقال : يالله توصين شيء ؟
حنين : سلامة قلبك
قام رعد ومسك ذراع كاسر وطلعوا مع بعض للمجلس ورجعوا الحريم حول حنين والسوالف وكانت بنتها بحضن ام محمد اللي كانت تتأملها وقالت : سبحان الله خذت من نادر كثييير ملامح
ام فارس دمعت عيونها وقالت : كنت بقوله والله نفس عيونه
ام رعد بحزن : اصلاً فارس نسخة ابوه الله يجعله فالجنة
الكل : امييين
لين وهي تبي تغيير الموضوع : اييه حنيني وش بتسمينها ؟
حنين ابتسمت وقالت : مدري بشوف فارس
وعد : صدق والله شوفيه وخططوا وعلمونا
لين : زواجي ليلة العيد
الكل فز وقالوا بصوت واحد : ننععمممم !!!
لين برعب وهي تضحك : وشفيييكم !
وعد ضربتها وقالت : يمعففنه كييف بيمدينا نتجهز !!
ام رعد : مشييينا م فيه وقت
استنفروا الحريم يدقون ع العيال اللي انخرشوا وكل واحد اخذ اهله وطلعوا للمحلات بعد فجعة لين لهم
لين طلعت من البيت وهي تضحك وشافت ذيب وقالت : ورطناهم والله
ذيب ضحك وتقدم وقال : وانتي الحين زي الحلوين تكرفين وتهتمين بحنين يالله
لين ضربته وقالت : دززز يحيوان !
ضحك ذيب وطلع لسيارته ومشى من بوابات بيوت اهل قاضي يستعد لزواجه اللي بعد يومين ..
::::::::::::::::::::::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم 🤍
( سلام يحباني شخباركم رجعنا ببارت جديد اتمنى تعطونه كل الحب وتعطوني النجوم كلها تقديرًا للتعب 🥺 ، استمتعوا فيه وعطوني رايكم بكل شي احبكم اشوفكم ببارت قريب 💞 )