A sky fulls of scars [ Sungjake ]

အခန်း ၁

Unicode

အခန်း -၁.၁

" အကိုက ကြည့်ကောင်းလိုက်တာ "

ဘေးတိုက်မြင်နေရတဲ့ မျက်နှာချောချောမှာ အချိုးကျမြင့်မားတဲ့ နှာတံက ထင်း၍နေသည်။ ကြားနေရတဲ့ ပြင်သစ်စကားသံတွေကို တစ်လုံးစ နှစ်လုံးစသာ နားလည်ပေမဲ့ ထိုနီစွေးစွေး နှုတ်ခမ်းတွေရဲ့ လှုပ်ရှားပုံတွေကိုတော့ နီခီ အစအဆုံးအလွတ်ရချင်သည် ။

သူနှင့် အသက် အတော်အတန်ကွာတဲ့ စီနီယာက ဆောင်းဦးပေါက်ရာသီရဲ့ နေရောင်ခြည်ခပ် နွေးနွေးလေးနဲ့ ဆင်တူသည် ။ စိတ်လိုလက်ရ ပြုံးလိုက်လို့ ထိုနှုတ်ခမ်းစွန်းလေးတွေ အပေါ်ကို ကော့တက်သွားချိန်က တကယ်ကို လှသည်။

သို့ပေမဲ့ စီနီယာ့ရဲ့ ပြဇာတ်တွေက ညဘက်သန်းခေါင်မှာ သည်းသည်းမည်းမည်း ရွာချလိုက်တဲ့ မိုးနဲ့ တူသည် ။ အိပ်မက်ဆိုးတွေနဲ့ ဆင်တူပြီး တစ်ခါတစ်ရံ အေးစက်၍... တစ်ခါတစ်ရံတော့ ခြောက်ခြားဖွယ်ကောင်းပြန်သည်။ စီနီယာနဲ့ လုံးလုံး မလိုက်ဖက်သော်ညား ထိုပြဇာတ်တွေနဲ့သာ စီနီယာ့ကို တွဲဖက်မြင်ရလေ့ရှိသည် ။

ရှင်းမ်ဂျယ်ယွန်းက စာပေအနုပညာလောကမှာ နာမည်ကြီးတဲ့ ပြဇာတ်ရေးဆရာတစ်ယောက်ဖြစ်သည် ။ လွန်ခဲ့တဲ့ တစ်နှစ်ကစ၍ ရုပ်ရှင် ဇာတ်ညွှန်းတွေအထိပါ ကမ်းလှမ်းခံခဲ့ရတဲ့ စီနီယာဟာ နီခီ့တို့ရဲ့ အနုပညာဌာန မှာတော့ နာမည်ကြီးသည့် စီနီယာတစ်ဦးပင် ။

မေဂျာက သူငယ်ချင်းတစ်စု၏ ကောင်းမှုနှင့် ပြဇာတ်တစ်ခုကို ပေတေတေ လိုက်ကြည့်ခဲ့တဲ့ နီခီက ပြဇာတ်,ဇာတ်ဆောင်တွေနောက်မှ ထွက်လာပြီး အဆုံးသတ် ကျေးဇူးတင်စကားပြောနေခဲ့တဲ့ စီနီယာကို စတင် သတိထားမိခဲ့တာဖြစ်လောက်မည်။

ထိုနောက်ပိုင်းမှာ စီနီယာ့နောက်ကို တစ်ကောက်ကောက်လိုက်ရင်း မှတ်စုစာအုပ်တစ်အုပ်နဲ့ စီနီယာ ဂျယ်ယွန်းလုပ်သမျှကို လိုက်မှတ်နေတဲ့ နီခီက သူ့ရဲ့ စာတမ်းတွေအတွက် မဟုတ်ပဲ စီနီယာနဲ့ နီးစပ်ချင်လို့ဆိုတာတော့ သူကိုယ်တိုင်ပဲ သိသည် ။

အကိုဂျယ်ယွန်းက သဘောကောင်းပေမဲ့ မာနတော့ကြီးလေသည် ။ အချိန်တိုင်းမဟုတ်ပဲ ပြုံးသင့်သလောက်ပဲ ပြုံးတာကြောင့် နီခီက အကိုရဲ့ အပြုံးလှလှတွေကိုတော့ ဖောဖောသီသီမြင်ရလေ့မရှိ ။