ဤသို့ဖြင့် ရက်ကနေ လအထိ အချိန်များကုန်လွန်ခဲ့သည်။ကျွန်မနှင့်မြနန္ဒာတို့သားအမိ သိပ်မတွေ့ဖြစ်ခဲ့ကြ။ကျွန်မကို အမှတ်တမဲ့ရင်ဖွင့်မိပြီး မျက်ရည်ကျခဲ့သော ထိုညကိုတော့ တခါတခါသတိရမိသေး၏။PG တတိယနှစ်မို့ ကျွန်မမအားပါ။နောက်ဆုံးနှစ် စာမေးပွဲဖြေရမည့်ရက်နီးလာခြင်းကြောင့် စာအုပ်ပုံများကြားတွင် ခေါင်းနစ်လိုက်၊လူနာများနှင့်အလုပ်ရှုပ်လိုက်ဖြင့် မအားနိုင်အောင်ရှိရသည်။အခန်းထဲတွင်လည်းမနေဖြစ်တာများလာသည်။တခါတရံ ယူစရာတစ်ခုခုရှိ၍ အခန်းပြန်လာလျှင်တော့ အခန်းရှေ့တွေဆုံတတ်သည်။ပိုင်ပိုင်က သူ့ပုံစံအတိုင်း ရင်းနှီးနွေးထွေးစွာနှုတ်ဆက်လျှက် မမကိုသိပ်မတွေ့မိဘူးဟု ပြောတတ်ပြီး မြနန္ဒာကမူ ပြုံးပြဖော်ရလာသည်။
"minor လားကေသီ"
ကျွန်မ OT note ရေးနေတုန်း မမဝေ ရောက်လာပြီးမေးသည်။
"ဟုတ်တယ်မမ၊minor ပဲ၊အခုမှပြီးတာ"
ဆရာဂျေမီသည် minor case များကို ကျွန်မကိုခွဲစေပြီး major case အများစုကိုတော့ သူဦးဆောင်ခွဲကာ ကျွန်မကို assistant လုပ်ခိုင်းလေ့ရှိသည်။အသက်အန္တရာယ်သိပ်မများသော case များကိုမူ ကျွန်မကို ဦးဆောင်ခွဲစေပြီး သူက ခွဲခန်းထဲတွင် ထိုင်ခုံဖြင့် စောင့်နေတတ်သည်။ခွဲစိတ်ဝါသနာပါလွန်းပြီး ပညာလိုလားသော ကျွန်မကိုဆရာက သိပ်အရေးပေးပါသည်။ဆရာ့ကျေးဇူးကြောင့် green crossတွင်အတွေ့အကြုံများရခဲ့၏။ထိုအတွေ့အကြုံများကြောင့်ပင် PG မပြီးခင်မှာပင် ခွဲစိတ်မှုတော်တော်များများ လုပ်နိုင်ခဲ့ပြီဖြစ်၏။
"ကေသီ ညနေအားလား"
"အားတယ်လေမမရဲ့၊မနက်ဖြန်မှ ကေသီ night ဝင်ရမှာ၊ဘာဖြစ်လို့လဲ"
"ဒီည HS(house surgeon) လေးတွေ farewell ရှိတယ်လေ၊ကေသီလာမယ်မလား"
"ဟုတ်သား မမရယ်၊ကေသီမေ့နေတာ၊ဘယ်မှာလုပ်မှာတဲ့လဲ"
"9လမ်းက စာသောက်ဆိုင်တစ်ခုမှာအခန်းယူထားတယ်ပြောတယ်၊ gp ထဲမှာလိပ်စာပို့ပေးထားတယ်"
"gp ထဲတောင်ဝင်မကြည့်မိပါဘူး၊စာမေးပွဲနီးလာတော့ စာတွေကများ Pressureကများနဲ့၊ အလုပ်ကိုရှုပ်နေတာပဲ၊ညနေကျရင် မမကိုဝင်ခေါ်မယ်လေ ၊အတူတူသွားရအောင်"
YOU ARE READING
To Cathy With Love
General Fictionတစ်သက်နှင့်တစ်ကိုယ်မရောက်ဖူးသည့် အရက်ဘားတစ်ခုတွင် မြနန္ဒာဟူသော အမျိုးသမီးတစ်ဦးကို ကျွန်မ ရှာဖွေနေကြောင်း သူငယ်ချင်းတွေမြင်ခဲ့လျှင် "ကေသီ၊နင်ရူးသွားပြီလား" ဟုအမေးခံရပါလိမ့်မည်။ *** ဇာတ်လမ်းထဲမှာပါတဲ့ အဖြစ်အပျက်၊အကြောင်းအရာနဲ့ ဇာတ်ကောင်တွေကို စာရေးသူ...
