မျန်ရဲ့ဝိညာဉ် ကူး​ပြောင်းလာတယ် ||မြန်မာဘာသာပြန်||

[103]

[Unicode]

အခန်း(၁၀၃):ကန်စွန်းဥနှင့် အာလူးများ ဝယ်ယူခြင်း

ချင်မျန်သည် ကန်စွန်းဥနှင့် အာလူးတွေမှ ကန်စွန်းကစီဓာတ်နှင့် အာလူးကစီဓာတ် ရလာရန်အတွက် ရွာရှိ အမျိုးသမီး ရှစ်ဦးကို ငှားရမ်းခဲ့သည်။ အခွံခွာရန် လူနှစ်ဦးနှင့် ကျန်နှစ်ဦးကိုတော့ လှီးဖြတ်ရန်အတွက် ဖြစ်၏။ နောက်ထပ် လူလေးယောက်က​တော့ဖြင့် ကြိတ်ချေပြီး ကစီဓာတ်ကို ပြုလုပ်စေသည်။ ဒီတစ်ခါမှာတော့ သူအရင်က ငှားထားတဲ့လူတွေကို ထပ်မငှားတော့ပေ။ ယင်းအစား သူသည် အကျင့်စာရိတ္တကောင်းမွန်ပြီး အလုပ်တွင် လုံ့လဝီရိယရှိတဲ့ တခြားအလုပ်သမား​တွေကိုသာ ရွေးချယ်၍ ငှားရမ်းခဲ့သည်။ ဤနည်းအားဖြင့် ရွာအတွင်း ဟန်ချက်ညီအောင် ထိန်းသိမ်းနိုင်ခဲ့သည်။ ​နောက်​တစ်​ဆင့်​က​တော့ ပို၍ အ​ရေးကြီး၏။ သို​သော်ငြား ချင်မျန်သည် လျှို့ဝှက်ချက်ကို ထုတ်ဖော်ခံရမည်ကို မကြောက်ဘဲ အ​စေခံ​တွေကို ခွဲ၍တာဝန်ယူစေခဲ့သည်။

ချင်မျန်နှင့် လဲ့ယ်ထျဲတို့က​တော့ အာလူးနှင့် ကန်စွန်းဥတွေ ဝယ်ယူမှုအတွက် တာဝန်ရှိသည်။လဲ့ယ်ထျဲက အလေးချိန်ကို စစ်ဆေးပြီး ချင်မျန်က​တော့ စာရင်း​ကောက်ကာ ငွေပေးချေရမည်။

ကိစ္စတွေကို သေသေချာချာ စီစဉ်ပြီးတဲ့နောက် ချင်မျန်သည် လူတွေဆီသို့ သတင်းကို ထုတ်ပြန်ခဲ့၏။ အများကြီးဝယ်ရင် သိမ်းရတာ အဆင်မပြေပေ။ ထို့ကြောင့် နှစ်ရက်တစ်ကြိမ် ဝယ်ယူကြသည်။

ယ​နေ့မှာတော့ ချင်မျန်သည် စာရေးတံ၊ မှင်၊ စက္ကူ၊ မှင်ကျောက်တို့ကိုယူကာ ဂိတ်တံခါးပေါက်ဆီသို့ ရောက်လာသည်။ ထိုအချိန်တွင် လဲ့ယ်ထျဲက​တော့ မြို့တွင်း၌ အထူးတလည် သွား​ရောက်၍ လဲလှယ်ထားရသည့် ကြေးဒင်္ဂါးသေတ္တာတစ်လုံးကို သယ်ဆောင်လာသည်။ ဦးလေးဖူက​တော့ စားပွဲနဲ့ ကုလားထိုင်တွေကို ယူလာကာ သစ်ပင်ရိပ်အောက်တွင် ထားလိုက်သည်။

နံနက်စောစောတွင် ရွာသားများသည် အိမ်မှ ကန်စွန်းဥနှင့် အာလူးတွေကို ယူပြီး ခြံဝန်းဆီသို့ မရောက်မီ တံခါးဝတွင် တန်းစီနေကြသည်။ နွေရာသီကား ကန်စွန်းဥထွက်သည့် ကာလမဟုတ်ပေ။အနှီကန်စွန်းဥအများစုကို ဆောင်းရာသီအတွက် သူတို့၏မြေအောက်ခန်းထဲတွင် သိမ်းဆည်းထားသည်မို့သာ ဈေးက နည်းနည်းမြင့်၏။ ဆဋ္ဌမမြောက်လသည် အာလူးရင့်မှည့်ချိန်ဖြစ်ပြီး ရွာသားများ ယူဆောင်လာသည့် အာလူးတွေက​တော့ မြေဆီလွှာအနည်းငယ်စွန်းထင်းနေဆဲဖြစ်သည်။ ယခုနှစ် ယခုလိုအချိန်တွင် လယ်သမားများသည် အာလူးများကို ရိတ်သိမ်းကြသည်။ပေါ​ပေါများများရှိသည်မို့ အရမ်းကြီးလည်း အဖိုးမထိုက်တန်တာ​ကြောင့် ရောင်းဖို့ ဘယ်တုန်းကမှ မတွေးခဲ့ကြပေ။ စားပွဲပေါ်၌ ဟင်းအဖြစ်သာ ချက်စားကြသည်။ ယခုမူ အပြင်ထွက်​ရောင်းစရာပင်မလို သာယာ​အေးချမ်းဖွယ်ခြံဝင်းမှ ပိုက်ဆံဖြင့် လဲလှယ်ပေးပြီး အာလူးတွေကို ဝယ်လိုခဲ့သည်။ လူတိုင်း အပြုံးတွေ​ဝေနေခဲ့သည်။