Oops! This image does not follow our content guidelines. To continue publishing, please remove it or upload a different image.
Thea
"Thea! Thea, snap out of it!"
Napasinghap ako nang biglang may tumama sa pisngi ko. Napakurapkurap ako at namalayan ko na lamang na rumaragasa na ang mga luha ko at para nang sasabog ang puso ko habang humahangos.
Nakita ko si Ate Chyna sa harapan ko. Bakas man ang matinding takot sa kanyang mukha, nakikita ko ang determinasyon sa nanlilisik niyang mga mata. "Thea! Tulungan mo kami sa paglalagay ng mga harang sa pinto!"
Napatingin ako sa gawing likuran ni Ate Chyna at nakita sina Kuya Harry at Kuya Collins na nagsisigawan habang pilit na hinaharang ang kanilang katawan sa isang pintong para bang yumayanig at ano mang oras ay bubukas na.
"Chyna! Thea! Tulungan n'yo ako rito bilis!" sigaw ni Ate Avril na pilit tinululak ang isang may kalakihang cabinet, hindi alintana ang bigat o kahit ang mga dekorasyong nasa loob nito.
Dali-daling tumayo si Ate Chyna at tinulungan si Ate Avril. Nang maiwang mag-isa, doon ko lang napagtantong nakaupo pala ako sa sahig. Doon ko lang naaalala ang karumaldumal na ginawa ni Nash kay Missy.
Si Nash . . . siya ang marahas na kumakalampag sa pinto. Siya ang pinipigilan nina Kuya Collins at Kuya Harry na lumabas mula sa kuwarto.
Sa isang iglap, umalingawngaw ang sunod-sunod na naglalakasang mga kalabog. At sa pagkakataong ito'y nanggagaling naman ito sa main door ng unit.
Hindi pa rin kami tinatantanan ng staff na nasa labas at mukhang mas naging desperado itong pumasok.
"Shit! Ano bang nangyayari rito?!" bulalas ni Kuya Collins na halos napapatalon na dahil sa lakas ng paghampas ni Nash sa pinto.
We were trapped. Nash was violently trying to get out of the bedroom, while the staff outside was violently trying to get inside the unit. Both of them have one destination—us.
"Thea! Harang!" sigaw ni Kuya Harry at tumingin sa direksiyon ng front door ng unit.
Sa pagkakataong iyon ay para bang nahimasmasan ako. Agad akong bumangon at tumakbo palapit sa isang coffee table na gawa sa metal. Hindi ko alam kung paano 'yon nangyari pero nagawa kong mabuhat ang mesa kahit pa sobrang bigat nito. Lakad-takbo ko itong dinala patungo sa front door na nagsisimula na ring yumanig dahil sa pagkalampag ng staff mula sa labas.
Wala sa sariling dumako ang tingin ko sa peep hole. May kung anong nag-uudyok sa akin na sumilip, pero bago ko pa man magawa ay nahagip ng paningin ko sina Ate Chyna at Ate Avril kaya naman dali-dali akong tumakbo patungo sa kanila at tumulong.
Nang malapit na kami sa bedroom habang tulong-tulong na dala ang cabinet, nakita kong parehong nagkatinginan sina Kuya Harry at Kuya Collins. Tumango si Kuya Harry kaya naman mabilis na tumalon si Kuya Collins paalis sa kanyang puwesto.
Lumapit sa amin si Kuya Collins upang tumulong sa pagharang ng cabinet sa harap ng pinto. As soon as we had one side of the door covered, dali-daling tumalon palayo si Kuya Harry hanggang sa buong pinto na ang naharangan ng cabinet.
