أنفال (باللهجة العراقية)

Part 7

أنفال
Part 7
بقلم روجينا

***********************

أنفال

باوعت تجاه الباب شفته واكف بصف الباب يباوع علينا خجلت نصيت راسي بقى هيج شوي بعدين طلع من المطبخ راح باوعت على غزل كلت

_ لج غزل اخوج شنو هذا

ضحكت و كالت

_ شبي

_ اي مو طلع من المطبخ شوكت رجع

_ هو هيج يعني ماتحسين على خطواته

بقيت كاعدة غزل طلعت حلو اكلت منهم شوي صحصت شوي شوي بدوا يجون خطارهم نسوان عمامهم و بناتهم عمات ما شاء الله عائلتهم جبيرة المطبخ صار خبصه و هوسه طبت وحدة لابسة جبه خليجيه كلها مطرزة ب ذهبي كلش فخمه أيدها مليانه ذهب بس مو طويلة شفت انعقج وجهه غزل

_ شبيج غزل ليش انكلب شكلج

_ تشوفين هذيج

أشرت على ام الجبه هزيت راسي

_ هاي مرت ذياب

_ اي وشكو بيها شنو المشكلة

_ ولج هاي تتعارك ويا ذبان وجها صار فترة مرتاحين منها ما دام رجعت يعني رجع وياها المشاكل لا تستغربون لان من اليوم راح يطلع كل يوم صوت عركاتهم

_ الله يصلح بينهم

صار وكت العشاء كمنا نعاونهم و نصب الاكل ما شاء الله مسوين هواي أكل تمن و عليه لحم و الي ما ياكل لحم مسوينلة دجاج

فرشوا سفرة للزلم بالاستقبال و صاروا ولدهم يدخلون طلعت من المطبخ عيب شيكولون عليه كعدت بصف بيبي كالت

_ وينج صار من الصبح ما شايفتج بس الولد كال اجيتي ويا غزل لهذا ما سالت

_ اي بيبي اجيت ويا غزل ما لحكت اجي اشوفج

_ ميخالف حبيبتي ابقي ويا البنات شتسوين تجين يمي بس ديري بالج على نفسج زين

_ اي بيبي بس خل يطلعون ولدهم اروح

_ زين يمه

بقيت كاعدة بصف بيبي فزيت على صوت الجدة الجبيرة تحجي و تأشر عليه

_ ام شعر اسود كعدي بصفي