သိုင်းလောကတစ်ခုလုံးကဗရုတ်သုတ်ခတွေချည်းပဲ!

အခန်း (၁) ဝုန်းဝုန်းဒိုင်းဒိုင်းအချိန်နောက်ပြန်ခရီးသွားလိုက်ရပြီ

Unicode>>

ဝုန်းဝုန်းဒိုင်းဒိုင်းအချိန်နောက်ပြန်ခရီးသွားလိုက်ရပြီ

နွေဦးအခါသမယ သုံးလပိုင်းတွင် သိုင်းလောကတစ်ခွင်၌ မိုးတိမ်များအုံ့မှိုင်းကာ မိုးဖွဲဖွဲရွာနေလေသည်။

ချင်ဟွိုင်မြစ်ရေပြင်ကို ဖြတ်၍ ဗျပ်စောင်းသံသာသာက အဝေးတစ်နေရာမှ ပျံ့လွင့်လျက်ရှိသည်။ ကမ်းစပ်ရှိ သစ်ပင်သစ်ခက်များအောက်တွင် မက်မွန်ပန်းများ ဟိုဟိုသည်သည်အနှံ့ ဝေဆာလျက်ရှိပေ၏။ နဂိုက နွေဦးအလှအပများကို ခံစားကြည့်ရှုရင်း အလည်အပတ်ခရီးထွက်ဖို့ အချိန်ကောင်းဖြစ်သော်လည်း သိုင်းလောက၌ အင်မတန်ကြီးမားသော ကိစ္စတစ်ရပ် ဖြစ်ပွားသွားခဲ့လေသည်။

နေလတောင်ထွဋ်စံအိမ်‌တော်ရဲ့ သခင်လေးရှန်ချန်းလင်မှာ သစ်ပင်ပေါ်က ပြုတ်ကျလာပြီး အတိတ်မေ့သွားလေသတည်း....

သည်သတင်းမှာ အလွန်အမင်း ထူးခြားလှပေသည်။

တစ်လောကတစ်ခုလုံးရှိ သူရဲကောင်းသိုင်းသမားအပေါင်း အသိပင်.. ယနေ့ခေတ်ဝူလင်သိုင်းလောကရှိ ဂိုဏ်းအသီးသီးမှာ မြစ်ထဲတွင် ငါးများစွာ ကူးလူးသွားလာနေသကဲ့သို့ များပြားနေသော်လည်း အမှန်ဧကန်စင်စစ် အာဏာရှိပြီး လွှမ်းမိုးနိုင်သော နာမည်ကျော်မိသားစုမှာမူ လေးခုသာရှိလေသည်။

အရှေ့မြောက်ပိုင်းဒေသရှိ ဝူရွှယ်မန်၊ နောက်မြောက်ပိုင်းဒေသရှိ သွမ့်ချင်ဂူ၊ အနောက်တောင်ပိုင်းဒေသရှိ ထန်စံအိမ်တော် နှင့် သည်ကျန်းနန်ဒေသရှိ နေလတောင်ထွဋ်စံအိမ်တော် တို့ပင်။

ထို့အပြင် ဤကံဆိုးရှာသော ရှန်ချန်းလင်သည် နေလတောင်ထွဋ်စံအိမ်တော်၏ အရှင်သခင် ဂိုဏ်းချုပ်ရှန်ဖုန်း ချစ်မြတ်နိုးရဆုံးသော မျက်ရှုသားရတနာလေးပင်ဖြစ်၏။ တစ်လောကလုံးတွင် သူအား မကြားဖူးသည့်သူမရှိ၊ မသိသည့်သူမရှိပါသော ဓနဥစ္စာပြည့်စုံကုံလုံပြီး ကျက်သရေရှိချောမောလွန်းလှသည့် သခင်လေးတစ်ပါးပါပေ။

.

.

.

"ကျွန်မရဲ့ကံဆိုးတဲ့လင်အာလေးရယ်"