Embracing Arms

Chapter 33

Chapter 33

Umaga na naman at ang lapad ng ngisi ko sa salamin habang sinusuklay ko ang aking mahabang buhok. Simula nang mapanuod ko ang magic show ni Troy hindi ko alam kung bakit lagi na lang akong masaya. Sinabi ko kay Nero na madalas niyang tawagin si Troy para mag magic show pero hindi siya pumayag dahil may trabaho daw ito at kailangan ito sa kompanya.

Nagkibit balikat na lang ako kaya sinabi ko sa kanyang bumili na lamang siya ng mga kalapati na sinunod naman niya. May kulungan na kami ng kalapati sa kwarto ko at dalawang kalapati itong mag asawa.

"Nero, bumangon ka na. Patukain mo na ang mga kalapati natin, nagugutom na sila." Tiningnan ko siya sa repleksyon ng salamin, hindi pa rin siya bumabangon.

Siguro ay kalahating oras na siyang nakahiga sa kama at kanina pa siyang nakikipagmatigasan sa akin.

"Ilang beses ko bang sasabihin sa'yo Florence na hakbangan mo muna ako? Ako na! Ako na ang maglilihi sa atin dalawa! Baby, baka magkatuka ang anak natin sa kakatingin mo sa kalapati!" Umirap na lang ako sa hangin.

"Nero, ilang beses ba kitang hahakbangan? Noong isang araw hinakbangan na kita, kahapon ng umaga, tanghali, hapon at gabi. Nero, wala na akong ginawa kundi humakbang na nang humakbang sa'yo. Wala na tayong magagawa, ako na ang naglilihi." Nagpatuloy ako sa pagsusuklay sa harap ng salamin.

Lagi na lang siyang nakahilata sa kama at nagpapahakbang sa akin. Sino ba ang naniniwala sa hakbang na 'yan? Mga shokoy lang naman.

"Florence, this will be the last. Ako na ang maglilihi baby, mahal na mahal kita. Ayaw na ayaw kitang nahihirapan." Madramang sabi ni Nero habang nakahiga sa kama. Hindi ko na alam kung matatawa na ako sa kanya o ano.

"Nero, mabigat na ang tiyan ko. Ayoko nang humakbang nang humakbang. Get up, kapag namatay ang mga kalapating 'yan hindi kita mapapatawad." Narinig ko siyang nagmura sa sinabi ko.

"Ngayon naman minumura mo ako Nero? Anong klaseng asawa ka? Bakit hindi mo ako pagbigyan? Nangako ka sa harap ng simbahan Nero, nangako ka na pasasayahin mo ako." Padabog kong ibinaba ang suklay na hawak ko.

Napaupo na si Nero sa kama dahil sa sinabi ko habang nakaawang ang kanyang bibig at may kunot na kunot na noo. Ilang beses niyang ginulo ang buhok niya.

"Hindi kita minumura Florence. What the— it's just that—Oh --" hindi na niya matuloy ang sasabihin niya.

"You are fighting with me Nero! Hindi mo ba alam na napapanuod ka ng mga anak mo sa tiyan ko? Hindi mo ba alam na nasasaktan din sila sa ginagawa mo?" lalong umawang ang bibig niya sa sinabi ko.

"Florence, nakahiga lang ako dito. Wala akong ginagawang masama sa'yo, nakahiga lang ako dito. Oh damn." Napasubsob na lang siya sa mga palad niya.

"Bakit ayaw mong patukain ang kalapati natin?!" sigaw ko sa kanya.

"Florence, simula nang dumating ang mga kalapating 'yan. Hindi mo na ako sinalubong ng umaga ng 'Gising na ang daddy, naghanda na ako ng breakfast' 'Look, ayaw pa rin gumising ng daddy nyo' 'Nero wake up, kakain na tayo' hindi ko na ito narinig. Alam mo ang lagi kong naririnig sa'yo baby? Nero patukain mo ang kalapati!" natawa na ako sa sinabi ni Nero.