لست عانس

لست عانس ١

#لستُ_عانس١
#زينب_الموسوي#
الزواج حق من حقوق الانسان
والله سبحانه وتعالى اعتبره مكمل للدين ستر وامان لكل الطرفين
بعد هذا كله هل من حق المراءه بمجتمعنا ان تبحث لنفسها عن زوج مناسب مثل مايفعل الرجل ؟
اي عمر نعتبر بيه المراءه مناسبه للزواج واي عمر نعتبر فاتها القطار عانس ؟
انشرهذي القصه لاختنا شفاء
كلمة عانس في هذه القصه لانقصد بيها الاساءه للبنات غير المتزوجات انما هو وصف يستخدم في مجتمعنا وصاحبة القصة ماعارضت على هذي التسميه
شفاء عراقيه عاديه بالملامح عائله متوسطه مواليد ٨٣عندي اخوات تلاثه لقاء اكبر مني متزوجه ودعاء ووفاء اصغر مني وعندي اخوان عادل متزوج زوجته مواليد ٩٠ وهو ٨٠ ومحمد متزوج وزوجته مواليد ٩١وهو ٨١
هسه هذا الموديل صار البنات الصغار الكيوت يتزوجن واحد اكبر منهن بعشر سنين واكثر
اني من البنات العاديات صعب واحد يلاحظني
اني من البنات الي يسموهن نادرات وبزمنا هذي الكلمه ماعادت تجذب الخطاب بقدر كلمه صاكه وزغيره دلوعه
كنت بايام الحصار خياطه من ايام المتوسطه شارعنا كله يخيط عندي واختي لقاء دخلت دورة تجميل وفتحت بيت عيالها محل واني اساعدها وتعلمت المهنه وظليت الم فلوس من عمري ١٥سنه
عائلتي كلنا نحب كره القدم وعدنا طقوس معينه من تبدي اللعبه نحضر كيك وعصير ونگعد نتفرج ويوم الي يخسر فريقنا نروح انام والدمعه بعيونا  ومن كبرت وظهر نجم اسمه يونس محمود كان اكبر  احلامي اتزوجه ومن كل عقلي حبيته
اني خربجه محاسبه بالكليه خلصت اربع سنين مااتذكر فد يوم احد گال نتعرف ماادري ليش كنت مرتبه واخلي ميكب واضحك واتشاقى وعندي صديقات عاديات مثلي حبوا بالكليه وتزوجوا
الظاهر اني مستثنى بالا
فد يوم من ايام الكليه اقترب مني ولد وسالني ممكن احجي وياج على انفراد
(اجى الفرج ) لاعفيه اني مو مال هذي السوالف
اختي ياسوالف هو موضوع اريد احجي بيه وياج
(الشغله بيها اختي ) متبشر بخير
تفضل هاي احنا على انفراد
انتي بنيه حبابه ونعرف اهلج ناس طيبين
(دگولها وفضني معجب واريد اتعرف حتى ارفضك وافيك على البنات)
اشكرك اخي والمطلوب
اكو حمله لتنظيف الشوارع بغداد مسويها طلاب الكليه ومحتاجين كم بنيه ويانا شتگولين تشاركين ويانا
اشارك بمشنو اشايفني كناسه دروح اخويه الله يخليك
رجعت صديقاتي سالوني ها شراد منك
ماكو شي هذا بطران
صديقتي دلال كانت حبابه ومثلي عاديه  لكن تلبس عدسات لذلك الكليه متصورينها ملكه جمال محد يدري بسالفه العدسات اني وياها بس وعدها علاقه مع ولد اسمه فاروق كان حباب واتفقوا بس يتخرجون يتقدملها ودائما تكلي الكليه فرصه تشوفين شخص مناسب احنا اداره واقتصاد تاليتنا البنات يگعدون بالبيت والولد يفتحون چنابر باب الشرجي
اني كنت اتصور هذا خطا والنصيب يجي في يوم من الايام
لكن صعب في حايتنا تقنع المحيطين  ان انت سعيد بحياتك بدون ارتباط وتظل الناس تنظرلك نظره عطف واحيانا انتقاص تخرجت من الكليه وتعينت وصار عمري ٢٧سنه وبقيت انتظر النصيب يجي لوحده
وبديت اسمع من امي يوميه
فلانه احسن منج انخطبت
فلانه اصغر منج تزوجت
وصديقاتي مرات التقي بيهم
ها شفاء ماتزوجتي
لا والله بعدني
خطيه بعدج ليش متجربين هذا الدعاء اخذيه شهرين وتنخطبين
مليت واني اسمع هذي القوانه
وحتى المناسبات من احضرها الكل يعتقد دادور عريس
وبليله امي قررت دخلني معترك الزواج  وابحث عن اسرع الطرق لايجاد زوج مناسب او غير مناسب وهذي بدايه المعركه