لست عانس

لست عانس ٦

#لستُ_عانس٦
#زينب_الموسوي#
سالنا وتقصينا الكل گال انطوهم وعاتبونا اذا طلع بيهم نقص اتصلوا بوالدي وانطيناهم الموافقه   تحدد كلشي وصار العقد حضرت اخواتي وبنات خالتي مروه وام انمار  لبست بدله بنفسجي اخته گالت يحب البنفسجي ورسمت لوحه خرافيه على وجهي الي يطخ بيه يصير الوان
كل الي ديصير وممصدكه اخيرا  انتهى الكابوس والشعور بالاختلاف عن الاخريات حيصير عندي بيت واعيش الحب والغيره والاشتياق واللهفه حيصير عندي وزوج يگلي حبيبتي مسامعتها قبل معايشه اي مشاعر قبل
ئي  فتره من الفترات حبيت يونس محمود وبعدين تركته حبيت مسي بعدين تركته حبيت نيمار بعدين حضرتهم كلهم ضوجوني بس يتصلون
صار العقد والهلاهل وامه ظلت تركص  ودخلوا الكل تأهبت ديشوفون العريس الموعود وينه والكاميرات تصور الي قهرني ملابسه مكان لابس قاط نفس التشيرت والجينز ومرتبك اكثر مني التصوير كان كله ضحك علينا  ومحجى وياي باي شي وجهه صاير احمر وخدوده مثل خدود الاطفال ومدنك باكيت الكلينكس خلصه وهو يمسح بالعرگ وراد بس يطلع عبالك متورط والله خايفه بس لا وراي كسرة گلب من هذا ابو كرش خلص العقد مقداد ماباوعلي ولا حجى وياي حجايه وحده وماادري تصرفه خلاني عصبيه وملابسه ليش بالتشيرت اذا هو ميعرف هذي الشغلات امه واخته اكيد يعرفن
همه طلعوا واشتغل الردح بيتنا مابقى احد حتى اخواني وامي وابويه واني اضحك عليهم بنات خالتي سالني ليش ملابس قاط
ماخذ طبع الاجانب ميهتمون بالمظاهر
بس والله ياشفاء صبرتي ونلتي مبين اخلاق هسه اجى الوقت المناسب تنزلين صورةومنشور لازم هذي اهم خطوه نزلت المنشور في عندي صديقات صار سنين ميجاوبن اتصالي عبالك بيه مرض معدي اتصلن وباركن وكلهم نريد صورته وهنيالج راح تسافرين لامريكا وين عرفتيه
شنو وين عرفته غير عندي علاقه. وياه وصار عشر سنين منتظرته وسافر لامريكا علمودي حتى يكون نفسه
ها من هاي كولي ليش تضمين قابل نحسدج الحمد لله طلع ابن اوادم وفى وياج
ئي والله تعبت واني انتظر
بس مو شويه سمين
اني گتله يسمن وصار عشر سنين ياكل حتى يسمن يله قبلت بيه
لا بربج صدوك تحجين
داتشاقى شبيج سمين ضعيف بعد حبيته
الغريب ان مقداد ماخذ رقمي ولااخذت رقمه غير نخلصها حبيات مو صار سنين انتظر هذي الاحداث شبيه هذا
باليل اتصل بوالدي خبره العقد بكرى حتى الاثنين اقدمه للسفاره
بقيت افكر اخذ رقمه من ابويه واخابره اريد اشوفه بالقاط مو يجي بنفس التشيرت لا ياخذ عليه نظره
عندي رقم نوسه اخته
اتصلت بيها وظليت اسولف وياها هي اخر وحده عدهم وصار ست اشهر متزوجه جيرانهم وعدهم تلث اخوان سعد واكرم وارشد من ضمن الحديث
سالتها ليش مقداد ملابس قاط اليوم
اعذريه شفاء ترى ميعرف هذي الشغلات وامي گالتله اخر شي ملحگ يشتري تعرفين قياسه مو بسهوله يلكاه هسه اگله وباجر يلبس
لاعفيه. عيب لاتكولين
مراح اگوله شفاء تكول زين
سديت التلفون مسالتني ليش ماعندج رقمه وتخابريه شنو ذوله مسامعين بسوالف الخطوبه غير يچذب عليه واچذب عليه اشو اخواتي من نخطبن كانن ينامن وجه الفجر مخلصاتها تصفط وچذب وهو حتى ماباوعلي ولا شاف شلابسه وانطاني الذهب بالعلبه وامه لبستني
ياخيه بس لا اخذت بوري واني ماادري ظليت اسال وفاء لان بقت يمنا كانت حامل كالت لاتستعجلين الولد كان مرتبك وشفته يباوع عليج انتي الي مدنكه وخجلانه
الصبح اجى علينا بسيارة اخوه
ردت البس جبه وفاء مقبلت
شنو هالتعقيد شايفه البنات شيلبسون من يروحون يعقدون
لعد شلبس اذا هو لابس تشيرت ونفسه شبيه فگر  مرايدني ممقتنع
ها شبيج شفاء شمسووي الولد
والله اني ماافتهم خبصت روحي على الزواج وهاي مبينه من اولها شايف نفسه عليه
اشش لاتسمع امي من البارحه سجادتها وتصلي مابطلت دعاء وصلاه  اتحملي وهسه راح تطلعين وياه واحجي الي بگلبج  البسي هذا الكوستم حلو عليج
فجاءه تحولت لانسانه عصبيه مرتبكه
شي بداخلي اريد افرغه اريد اتعارك يمكن اريد احمله مسؤوليه سنين الانتظار يمكن بداخلي اريد اگول ليش تاخرت عليه ويمكن خايفه من المجهول وافتقد الشعور بالانتظار من هالگد ماانتظرت
لبست نزلت كان بالهول ويه والدي
انطيته اوراقي الرسميه مافي احد راح ويانا سلمت عليه صباح الخير رد صباح النور اول مره نباوع على بعض بنفس الوقت
مااعرف ليش كنت عصبيه ومخبوصه
طلعنا احنا محمكه الي قريبه من قناه الجيش يم بيتنا بالسياره كان مشغل اغاني يمكن حتى ميحجي وياي واني هم عاملته بالمثل طلعت الموبايل وظليت العب بيه دزيت رساله لوفاء
امداني خرب حضي
شبيج ولج لاتسووين مشكله
ولج خطوبه سكته اني مشايفه ولاسامعه
احجي انتي افتحي اي موضوع
والله لو يصير كرستيانو مااحجي اني كافي روحي گال احم احم يمكن راح يلقي كلمه
تريديها الاغاني لو انصيها
سدها احسن اغاني من الصبح
سياره ارشد وهو الي مخلي الاغاني مواني
عادي الاغاني حلوه بس مو الصبح
اسف على البارحه مكنت لابس قاط بس والله مالحكت وحتى نوسه خبرتني بس كان ليل وماكو محلات مفتحه هسه اذا تريدين اشتري على ذوقج ميصير انتي انيقه واني مبهذل
لا تهتم بس المره الجايه احسب حسابك هنا الناس. تحكم على المظهر
صحيح وهناك ميهتمون نلبس اي شي ونطلع بس بالشتى نلبس الكنتور كله يله نطلع
هيجي بارده عدكم بيا ولايه
بارده موت بيوتا من يجي الهوا بالوجه تنزل الدموع من العيون لااراديه
الله حلو احنا بالصيف تنزل الدموع من العيون خاصة اذا نايم وتنطفي الكهرباء وابو المولد يخبث والبگ يفتر حول الهدف هيج الدموع تصير شلال
ظل يضحك وگال دمج. خفيف
وانت مبين دمك خفيف
اني شبهذلني غير دمي الخفيف وگلبي الطيب هسه فد يوم اسولفلج على الضيم الي صار وشفته بحياتي
احجي هسه ليش تنتظر 
لا هسه عقد وفرح مو مال ضيم
هم صدوك
كمل عقدنا والخجل مسيطر علينا اثنينا مع ان اثنينا كبار  بس الارتباك واضح كان الجو بدايه الصيف وتموت حر
تروحين نشرب عصير حاره راح اموت
عادي نروح كان كله عرگ وجهه احمر عبالك حيطك
انت مبين ممتعود على الحر خلي نرجع على الاقل السياره تبريد
خفت ليموت هذا مبين ميتحمل حر ومتعود على البرد
مقبل نرجع گعدنا بمطعم واكلنا ايس كريم وكيك مو بس الحر ميتحمله الجوع همين انوب من اطلع وياه اخذ لفات احتياط
حجالي عن وصوله لامريكا قبل عشرين سنه تارك الكليه كان يدرس. اداب انكليزي ومترجم قصيده لشاعر  يمدح شخصيه دينيه بدون قصد مبلغين عنه اتحاد الطلاب بالكليه واصله للحزب وكاتبين عنه تقرير مهزوم عن طريق الشمال وبعدين متنقل بالدول لحد وصل لامريكا دارس لغه ومشتغل بشركه تصنيع سيارات عرفته حباب عينه ميشيلها على البنات الي تفوت ومن يباوعلي ميركز خطف وينزل عينه
رجعنا للبيت اهلي كانوا مسووين غدى بس مقبل وخبرنا عازمينا على العشى يمهم كنت اريد اروح حتى اشوفهم واعرف طباعهم
لبست ملابس اول مره البسها كدام اهلي تشيرت مجسم وتنوره طويله
اما الموبايل فمسامع عنه مقداد ابو كرش والله اكو اختراع اسمه موبايل يحجوون بيه الكبلات هذا شلون بيه تالي عمري اني اطلب رقمه اووووف ياحضي وين نايم
رحنا على بيتهم اني وامي وابويه ورفل وفطومه بيت قريب منا بالمشتل جديد بنائه الشي المفزع هو  الاكل عدهم فد شي ممتع وكلهم سمان والجدوره مبالغ بحجمها  اني بالنسبه لاخواتي كنت يكولون ضخمه  تارسه بس يمهم صرت دوده وحتى اطفالهم عبالك يتغزلون باللگمه قبل لتوصل لحلگهم وعمتي (ئي عمتي ام زوجي )حلوه الكلمه كل شويه تكولي اكلي لاتستحين
اني مچنت مستحيه بس خايفه يخلص الاكل وياگلوني
لكن حبونا وحبيناهم بسطاء وطيبين وسوالفهم مابيها تمثيل عفويه مقداد ميحجي هواي بس من احد يساله يجاوب وبدا يباوعني ويبتسم طلعنا بالباب كلي رقمي عند والدج اخذيه واتصلي بيه
لا عفيه استحي انت انطينياه  انطاني الرقم خزنته واخذ رقمي
ااحمد لله هسه تعتبرت وصرت مثل النسوان
بقيت الليل انتظر مااتصل يمكن مشغول ياكل ثاني يوم رحنا للسفاره وقدمنا اوراقنا عرفت لازم يسافر حتى يعجل الاجراءات وشغله
يمتى تسافر
خمس  ايام واسافر
راح اكول فد شي ويمكن تعتبرني جريئه بس مقداد هذا زواج الصراحه حلوه بيه
تفضلي كولي
اني ماعندي قبل اي علاقه من اي نوع واي اي شخص انخطبت كم مره ومصارت القسمه انت مبين خوش ولد بس حاسه في شي داخلك لو مامقتنع بهذا الزواج او بالك وحده معينه بس لسبب ما مصارت قسمتك وياها
والله العظيم مافي اي شي من هذا ليش هيج تكولين
هواي اسباب ملابسك من الخطوبه لحد الان نفسها الذهب امك لبستني
متحجي وياي من نكون سوا الا رسميات  التلفون المفروض من اول يوم تاخذ مني البارحه اخذته ومتصلت
اني مااعرف بهذي العادات بالخطوبه ومااهتم للملابس وماحجي متعود على الوحده  والاتصال خفت اتصل نختلف وتبطلين
وليش نختلف شبيك شراح تكول قابل مقداد لازم اعرفك تعرفني ترى مو سهله اترك اهلي وظيفتي وصديقاتي واروح لرجال مااعرف عنه شي
ليش خايف نختلف گول هسه مدام بعدنا بالبدايه
اليوم اتصل ونحجي واجاوب كل اسالتج
تعالي نتغدى (هذا الفالح بيه بين الريوك والغدا ساعه) ابن المفجوعه
رجعنا نزلني باب بيتنا وحتى مع السلامه مكال
انتظرت الليل مااتصل  صار عندي هاجس شك رحت لدوامي مافي موظف ولاموظفه ما باركولي كنت اضحك بس مخنوكه الساعه ال١٢الظهر اتصل مقداد مجاوبت احسن مبين عنده تردد بالزواج خلي ياخذ قراره
دز رساله اسف مااتصلت البارحه في ناس زارونا يباركون وتاخر الوقت ماحسينا خفت اتصل تكونين نايمه
حجيت ويه البنات ام انمار گالت لاتشيلين هم وهو اذا جامد انتي صيري حركه وشوفي  اكو مثل يگول ابنج على ماتربيه ورجلج على ماتعوديه عوديه على الشي الي تريديه يعرف طبعج
اتصل ب١٢ ونص جاوبت
هلوووو شفاء ليش متجاوبين زعلانه
لا مو زعلانه عندي كان مراجعين
ها راح امر عليج هسه
من سديت التلفون ام انمار
ليش مگلتي اي زعلانه وشفتي شيگول هو انتي مطفيه لچ تدلعي ونعمي كلامج وياه مو عبالك عريف خفر
وصل كان لابس ملابس مرتبه وسلم على البنات وام انمار ومروه ظلوا يحجون وياه ويتشاقون وهو هم ينكت.
الظاهر اني حديه ومااعرف اخليه ينجذب اليه
ام انمار گالتلها انت اخذت كنز شفاء بنيه مؤدبه محترمه ام بيت ربك راضي عليك لازم دير بالك عليه
انشاالله اخليها بعيني يله شفاوي نروح
يله    طلع من الغرفه ام انمار جرتني من القميص
سمعتي الكلمه الاخيره شفاوي گال
سمعت ومامصدكه
شوفي لاتفتحين اي موضوع وياه لحد يكمل اكل لاتغثيه
ههههه لاتخافين مقداد ميگوم من الاكل لو القيامه تصير باي