لست عانس

لست عانس١٢

#لستُ_عانس١٢
#زينب_الموسوي
كنا جميعا نتعاون على رعايه علي بيت باث كل اربع ساعات شخص يراقب ونغير الانابيب كان في غيبوبه تامه مرات يصحى دقايق واني دائما كنت اخذ الصبح من السبعه ل١١ اطلع للشغل  اني مرات احب امر  على الكفتريا اشوف الشغل يجي بمكاني مقداد مر اكثر من شهر  مقداد صار كل وقته هناك مرات يجي للشقه ينام ويرجع والاطباء يجوون يوميه مافد يوم ينطونه امل
كنت بالدوام اتصلت زينب بيه
شفاء عندي سر  اگوله الج ماما وبابا ديخونوج مع بعض
زنوبه شنو هذا الحجي عيب تحجين على اهلج بهذي الصوره
تعالي هسه وشوفي بعينج راح افتح الج الباب
ظليت متردده امشي ورا كلام طفله اذا طلعت كذابه شنو موقفي
اروح بحجه اجيت اشوف علي شيصير يعني الباب كان مفتوح دخلت بغرفة علي كان مقداد نايم على قنفه وبصفه باث  نايمه بدون تشيرت راسها على ايده وايدها حوله  فتحت الباب وظليت اباوع لحظات فزوا اثنينهم
تحسرت وماعرفت شكول ضاع صوتي  وملگيت كلمه مناسبه مقداد حجى
نمت هنا من التعب كلنا نسولف وغفينا مصار شي من الي بالج صدگيني
باث لبست ملابسها وحجت
گوللها على الصار ليش تكذب البارحه كتلي تحبني وعمرك ماحبيت غيري
وغيرت شكلك ومضهرك علمودي
ظل ساكت (افتهمت غوته وهو استسلم واتفقت ويه زينب تتصل حتى اتطلگ من اشوفه وهي يصفالها كلشي وتركت الباب مفتوح)
رديت ودموعي ردت قبلي
اخذيه بس احب تعرفين شي مقداد ميملك غير سيارته الاملاك باسمي
كانت لازمه كتفه من سمعت الحجي بعدت عنه

اخذيها مني معليج من مقداد وقبل لااطلع من حياتكم اثنينكم شنو رائيچ بالف دولار انطيج وتسمعين مقداد الي عافني ونسى كلشي واستسلم لرغبته وياج تسمعيه الصراحه شنو كانت الخطه
سكتت فتحت الجنطه طلعت دفتر الشيكات ها اكتب لولا الف دولار تحتاجينها احسن متروح ليلة البارحه بلاش اني ادفع ثمنها

ليش تريدين ترجعين تحبيه ليش خليتي زينب تتصل بيه
عنده فلوس وبيت ملك وبزنسس
مع الاسف تخطيط فاشل بس اني مو فاشله حتى انطيج الف دولار خلي مقداد ينطيج اذا عنده باي
طلعت من البيت مخنوگه والدمع ميرضى يبطل بداخلي صرخه شفت سياره مقداد تلحگني وگفت بنص الطريق ونزلت على الشارع وهو نزل من السياره
شعندك لاحكني خاين ارجعلها الله ياخذك وياخذها ولك ضل شي مسويته الك بتشريت نزعته غوتك اشو مافتت يوم للبيت مالگيتني عروس گدامك لو الحرام احلى الله لاينطيك حركت گلبي دست كرامتي هنت عليك والله  هم هان عليك وين صلاتك وين حبك الي مو گتلي احبج
حرام عليك حرام
بكد ماضربت بيه ودفعته وهو لازمني خارت قواي گعدت بالشارع مابيه حيل اكمل ولابيه حيل اسوق
حاول يكومني بس يدخلني السياره ماكدر ومخليته لحد السيارات الي ورانا اتصلت بالشرطه حتى يعرفون شكو  بقيت حد سيارتي وابجي  وهًو يمي اشوفه يحجي بس مااسمعه جتي. الشرطه والاسعاف عرفو عندي ضيق تنفس اخذوني بالاسعاف
اباوع على الشوارع من نوافذ سياره الاسعاف اتصور الك يدري بجرحي ويضحكون عليه غمضت عيوني وماحسيت الا بالمستشفى اول مره احس غريبه
ماكان همي التعب والركض والوگفه الي وگفتها وياه همي المشاعر الصادقه الي عشتها وياه كلشي حسيت بيه وعشته وياه  كان لاول مره
كان يگلي على ايدج انولدت رجولتي
كان يگول انتي مو بس زوجتي بيج حنان مثل حنان الامهات
وگال وگال وصدگت لحد نسيت شفاء وتذكرته هو كنت استجدي الاهتمام منه ليليه حتى ترجع ثقته بنفسه ان ممكن يحب وينحب مافد يوم نام اذا فتحت اديه ودخلت بحضنه مينام اذا مو على غزل وحب اله المنظر الي شفته صار تلث سنوات مسواه وياي
وحتى
الاملاك صح كانت باسمي بس ردتها
علموده صورته بعين الناس من عامل بسيط يركض طول اليوم الى صاحب املاك واسهم
بالمستشفى دخلت زينب درت وجهي عنها اول مشفتها
سلامتج شفاء بابا وصلني هنا
اخذي ابوج وروحي مااريد اشوفكم
ماما جبرتني مكان قصدي تنجرحين
ماعاش الي يجرحني ممحتاجتكم واحجي هذا الحجي لبابا روحوا من يمي
طلعت زينب سالت الممرضة اگدر اطلع اريد اروح البيتي سالت الاطباء
جويي عليه سالوني كم سوال
وطلعت رحت لبيتي اول انسان فكرت بيه امي اتصلت بيها كان عدهم الفجر ماگدرت احجي بس ابچي واگلها مخنوگه يمه تعبانه يمه 
اتصورت على شغلة الاطفال وظلت تصيح شنو حضجچن  شبيه عليمن طلعتن لو لان شريفات الحمد لله وغيره من حجي امهاتنا وعرفت اختي وفاء هم دتعاني من عدم الانجاب صارت عدها بنيه وبس
بقيت افكر شاسوي شنو الحل العصر اجى مقداد
وگف يباوعلي تمنيت ماابچي من اشوفه بس بجيت
لاتقترب مقداد الله بخليك كافي تتلاعب بيه روح لباث واطفالك
حوطني باديه محد يستاهل دموعج كافي ردتي تموتين الموضوع مو مثل متتصورين والله
ياموضوع نايمه يمك بدون تشيرت بعد شااتصور  
هذا الي صار بلحظة ضعف تبجي على ابنها خلت راسها على صدري وبوستني ونمت وهي على صدري امنيه قديمه بداخلي باث توگف گبالي وتتوددلي او عقده والبارحه گالت احبك وعمري منسيتك اضطربت مشاعري بس بلحظه معينه مااگدرت اكمل انتي جيتي بالي
لو حجيك صدوگ عفتها وجيت عندي مو نايم حاضنها والتشيرت مشمور على الارض
التشيرت شوكت نزعته ماادري يمكن  نزعته قبل لتجين والله احلفلج لو اريدها مالحگتج بالسياره وعفتها
لحگتني بعد ماعرفت هي مخططه وطردتك من عرفت متملك شي
لا والله شفاء هذا الي صار ومستعد لاي شي تريديه
اريدك تطلگني وارجع لاهلي وانت الرابح راح تاخذ نص بكلشي وارجع لباث واولادك 
انتي هسه منفعله واي قرار  بحالة انفعال  خطا ارتاحي وبعدين نحجي
عوفني اريد اروح انام
نامي بحضني مااعوفج
روح احضن باث خطيه ابنها ديموت والله انتم خوش ام واب ابنكم مدد على فراش الموت وانتم مخلصينها حب بغرفته
تركته وقفلت غرفتي
مرت عليه تلث ايام مثل المطعونه خنجر حتى النفس من اجره ينغزني فجاءه الحياه فقدت كل معانيها وصورتهم على القنفه متروح من بالي مبقى مكان مبچيت بيه تعبت واني اكرر واعيد نفس الافكار وبديت ابحث عن مبررات واعذار
كان لابس ملابسه كامله هي لابسه الجينز بس التشيرت نازعته
مقداد ضخم القنفه هو وياها متكفيهم
وغيرها من المبررات السخيفه بس حتى ارضي گلبي واصدق فكره مصار شي بينهم حسمت امري وقررت انفصل عن مقداد لمن رجع حجيت وياه مقداد لازم نگعد ونتفاهم اني وياك تعرف الاملاك باسمي بس اني مااحب اظلمك انت اخذ البسنزس واني اخذ البيت وتطلگني
شفاء لاتهدين كلشي بلحظه گتلج الي صار افتهمي
ماافتهم ولااريد افتح الموضوع بعد مااگدر اشوفك اصلا راح اسافر للعراق ومن ارجع نكمل الطلاگ
شتريدين اسوي بس ابقي وياي احلف الج احبج وباث ماتعنيلي شي
لو تحلف عمرك كله مااصدگك
لا شفاء انتي گلبچ طيب اغفريلي وابقي وياي لحد علي يصير زين واروح اني وياج للعراق لج شفاء شسوي بالدنيا بلياج
عندك باث وزينب وعلي متحتاجني تدرين نقلنا علي للمستشفى والاطباء گالوا هذي ساعات الاخيره هربت من المستشفى الج لان اعرف انتي تهونين عليه لچ شفاء شسووي حتى تبقين وياي
كان الانهيار واضح عليه والحزن گعد على القنفه واني رحت لغرفتي ابچي
محتاره بين اعوفه وبين اوگف وياه ابنه ديموت اكثر وقت يحتاجني بيه هسه واكثر وقت باعني بيه هسه
الصبح اريد اطلع دگ تلفوني مقداد شلته صوته يبجي
خير مقداد شصاير
علاوي  بالمستشفى باخر نفس طلبج راد يشوفج والله مداكذب تعالي لخاطره
طلبني ليش
ماادري بس تعالي اروحلج فدوه
جايه ربع ساعه
رحت ركض وختلطت عندي المشاعر وصلت المستشفى باث يمها رجال امريكي اول مره اشوفه يجوز اخوها عمها شيخ عشيرتها بت الدايحه
الاطباء مانعين الزياره بس مقداد ديحاول وياهم سالت زينب منو هذا يم ماما تعرفيه
هذا صديقها من زمان من كنا عايشين بولايه ثانيه
وهسه تذكر امج شنو
لا هو على طول يزورنا
سمحوا الاطباء ادخل باوعت على مقداد حتى يدخل وياي
گعدت يم علي كانت عيونه نص مفتوحه ونص مغمضه
عرفني من دخلت  
هاي بيبي علي تعرفني مكان يگدر يحجي هز راسه
وحجى كلمتين ردت اشوف وجه طيب قبل مااموت
حبيبي علي الموت مو نهايه تعرف الجنه سامع عنها هذا مكان للابرياء والمظلومين انت من تغمض عينك تروح هناك وتنتهي الالام والمعاناة والمرض حبيبي انت مسلم وطفل بريء
بدايشهگ ونفسه يروح ويرجع
مقداد اني راح اطلع مااتحمل وخليه يتشاهد مقداد كافي  دموع وخليه يتشاهد
لا الله الا الله محمد رسول الله
ومات علي وضجت اركان المستشفى بالصرخات