لست عانس

#لستُ_عانس٥
#زينب_الموسوي#
كل عام وانتي بخير
مشكوره ام انمار ليش متعبه نفسج حبيبتي
هاي الكيكه حتى اذكرج عمرج صار ٢٩شدي حيلج لازم السنه تتزوجين
الله كريم خليها على الله
مروه عرسها بعد اسبوع مسويه بقاعه تجيين ويايه اخذج لمركز باربي زوجها ضابط والضباط راح يكونون موجودين
اولا اني محجبه التسريحه منو راح يشوفها ولاتنسين اني شاطره بالمكياج ثانيا الي راح بجوون كلهم متزوجين وزوجاتهم وياهم
بلكي واحد يحب يجدد يتزوج على مرته
مستحيل اسويها اقبل اخواتي احد يهجم بيوتهن ليش اقبلها على بنات الناس والي يريد يجدد ياخذ بنيه صغيره مو اني
المهم تجين سمعتي تخلين عدسات ومكياج غير شكل تطلعين
بعد الالحاح سويت تاتو لحواجبي بس هذا الي سويته وحضرت العرس وياي فطومه بنت اختي ولبست فستان اني كله البس جبه لان منطقتنا شعبيه واستحي من الجوارين البس شي مودرن
ام انمار شافت فاطمه وياي انجنت تخبلتي لچ اني بنتي وابني ماجبتهم وياي انتي جايبه طفله هسه كلهم عبالهم متزوجه
فدوه اروحلج ام انمار خلينا نفرح ونتونس وكافي تفكير بالزواج شوفي مروه اليوم طالعه گمر تعالي نروح ناخذ صور يمها
يوم الالج يارب ليش هيج بنات الاوادم حظهن قليل
تعالي كافي مأسي القاعه كانت مختلطة واكثر البنات محجبات
مروه هواي بچت مع ان هي ماخذه ولد يحبها واهله ماقبلوا بيها بالبدايه لان لبسها جريء وممحجبه بس والله مافي اطيب منها وداخلها نظيف
خلصت الحفله نريد نطلع ام انمار وزوجها يوصلوني دورت على الموبايل مالگيته كنت اصور بيه بس نسيت وين تركته انخبصنه اني وام انمار فد شويه اجى ولد سال تدورون على هذا الموبايل الج مو عرفتج من الصور البيه
اخذت الموبايل وشكو تباوع على الصور موعيب
غير حتى اعرفج
عفناه وكلي ارجف صوري وصور اخواتي بيه
صاح اوكفي شفاء
انداريت عليه
على كيفج عرفت اسمج من المحادثات والسلف وقسمه ماكو وخرب حظي بس ماعرفت وين تشتغلين ممكن اعرف
انت صدوك متستحي شلون تقرا رسائل
ام انمار اداركت الموقف وحجت وياه
انت شرايد متگلي
مرايد الا الخير  كنت اگدر اخذ رقمها من الجهاز بس اريد العنوان شغلها ونتفاهم
انطته العنوان ام انمار ورحنا
ام انمار لج شفاء شفتي الخلقه والچتاف والشعر
فدوه اروحلج انتي متزوجه ميصير لازم عينج مليانه
عيني مليانه بس يعجبني اباوع الموديلات النازله جديد واشوف اخر تحديث نازل يمكن افرمت العندي
ههههه ولاتكعدين راحه بس اني بقيت فقيره شتتصورين شيريد ترى بايده حلقه وجديده
مانتبهت بس الي مثل هذا لازم يتقسم على اثنين تلاثه خلي الشعب يستفاد من خيراته
ههههه ام انمار  انحرفتي ترى ابو انمار   مقاصر حلو وشخصيه ورجال يخاف الله  بس اخاف هذا اخذ صوري وراح يهددني
الي يسمعج يگول صورج كلها على البحر  هو انتي لو بالدائره لو بيت اهلج
رجعت البيت رفل كانت مريضه هي من فقدت ابنها الي كانت حامل بيه حيل تعبت راحت امي وياها للمستشفى واني بقيت بالبيت كانت جمعه وبيت اخوي عادل انتقلوا لبيتهم قبل شهر بقيت بعدها رفل حيل تعبت حالتها النفسيه انعزلت عنا اضطريت اخذ اجازه اسبوع حتى اداريها وادري بنتها مااعرف ليش دائما الانسان الطيب يواجه صعوبات بحياته رفل انسانه رقيقه عطوفه والله عمري ماحسيت هي مرة اخوي كانت اخت وصديقه مرات ارجع الظهر هي نايمه تطلع من غرفتها حتى تقدملي غدى  واگلها ميحتاج اني اسويه تگول لا اذا من ايدي تشتهي اكثر وكل الي تحلم بيه. اخ لبنتها ولد تسكت بيه حلوگ العالم مو سهله تحبل تسع اشهر وبالاخير تدفنه
ام انمار كل يوميه تخابر عصام اجى عليج
ياعصام هذا    عصام الولد الصاك شفناه بالحفله.    اساليه شرايد ولاتنطيه رقمي الله يخليج
ميريد الرقم ويگول احجي وياها شخصيا      شرايد هذا والله اذا طلع يدور زوجه ثانيه الا افشخه وهسه تشوفين
بعد الاسبوع داومت يعرف اليوم اداوم من الصبح بوجهي دخل الغرفه طلع صديق زوج مروه اسمه عصام
خير اخويه شرايد
اعصابج اريدج
بس انت متزوج حلقتك تلمع
هسه اني گلت اريدج الي خليني اكمل اخو زوجتي رجال عايش بامريكا فايته القطار مثلج.     ليش متحترم نفسك شاكيه عندك اني.    دشوفي موبايلج كله ادعيه وختمات للقسمه خلينا صريحين
اخو مرتك ليش فايته القطار كان يركض ورا النسوان اكيد وهسه يريد عراقيه ها
ان بعض الظن اثم  مقداد رجل مكافح كان يصرف على عائلته بالعراق بين ما اخوانه تخرجوا وتزوجوا فكر يستقر مبقت وحده ماعرضناها عليه يريد مثقفه عمرها مناسب شريفه ماعدها علاقات قبل والحمد لله كلهن بيج الموبايل يصوصي وقافله الخاص موبايلچ مابيه رمز ورسائلج كلها السلفه والادعيه
ام انمار سالتها هومخولك تدورله عروس
بلي هو موجود وشاف صورتج اسف اخذت صوره وحده بس
ميصير  سدت حلگي ام انمار
الولد موجود ليش مااجى يشوفها
الرجال كلش خجول والله ويصلي ويصوم ماعنده اي مكسرات والله وحب ياخذ رايها اول يمكن متقبل
عمره اربعين اكيد
والله اربعين ويشتغل بشركة سيارات بس رجال بسيط مو غني تريدين تشوفين صورته
لا ميحتاج المهم يصلي ويصوم  كمزت ام انمار عيني نريد  صورته شنو نشتري سمج بالشط
طلع صورته الرجال ولده بشوش سمين خدوده نفس خدود فطومه الصوره كان واگف ضخم والصفه الغالبه عنده سمين من ذولي الناس الي يكونون طيبين وعلى نياتهم ماعلقت على الصوره لان اكيد راح يكوله
عندي سوال يريدني زوجه هنا لو بامريكا لان وظيفتي شلون
يريدج بامريكا واختي لازم تتنازلين شويه يعني عرس وسفر وظيفه ميصير
ام انمار على ماتصير معاملتج قدمي سنه اجازه بدون راتب وبعدين اكيد وانشالله تقدمين امومه والله كريم تدبر
اگل لاهلي وارد الجواب
زين هذا رقم نوسه زوجتي نسرين اسمها دگي عليها حتى تخزن رقمج وباليل ناخذ الجواب
طلع الولد گلبي مقبوض كنت اتمنى. مااخسر وظيفتي مااريد  اختار بين الزواج والوظيفه كعدت ام انمار تقنعني زواج ورجال مبين حباب ويخاف الله وسفر بعد شتريدين
الله كريم بس اريد وظيفتي
هسه هو منو گال تصير لاتعقديها
وام انمار سمين حيل وضخم هذا وين ويونس محمود وين
شوفي احنا لو مو بالدائره وعيب من الناس كان بسطتج بسطه لج شوفي الي گاموا يتقدمولج كلهم متزوجين وشياب هذا على الاقل بطرگ روحه وعمره مناسب وبامريكا ياحضي واذا سمين يعني مو احسن متاخذين واحد عظم
حجيت ويه امي وحجت ويه ابويه واخواني ميحتاج اكول فرحوا  رديت الجواب خلي تتفضل النسوان حتى نمهد الامور للرياجيل
دزيت على لقاء اختي وامي حذرناها تحجي ومرت اخويه عادل ورفل
جتي امه مره كبيره سمينه مثله واخته نوسه وعمته وحده جوارينهم بعد المقدمات والفحص اليه كل المعلومات طلعت صحيحه عنه طلعن المغرب من البيت حددنا ثاني يوم نتشاوف بيت اهلي
وصار وقت الي نتشاوف اجتمعنا كلنا گدام شباك المطبخ حتى نشوفه هذا المكان السري للبنات حتى ياخذن الانطباع الاول عن العريس دخل ولد مثل الصوره سمين ضخم ابيض لابس تشيرت بيجي وجينز  ابويه الي  فتح الباب الولد كان خجلان ليگدام  ومدنگ وبيده كنيلكس يمسح بگصته وباوع ليفوك وبعدين وگف على صفحه ينتظر رجل اخته يدخل وابوه وامه اجى دوري لازم يشوفني  توسلوا بيه انزع الجبه مقبلت استحي من اهلي
واني گعدت ويه امه بالهول اجى ابويه سمعته گال تعال ابني تفضل وبعدين كالت امه تعال يمه مقداد هذي شفاء تعال شوفها وهي هم تشوفك اني والله مارفعت عيني  لان شايفته وهو ماطول ثواني سمعته گال 
السلام عليكم رديت وعليكم السلام ابويه گله اگعد يم والدتك  ابني هذا زواج لازم تشوفها وتشوفك جاوبه لاعمي   من نعقد انشاالله ورجعوا هو وابويه للاستقبال بقت امه يمي وجوي امي ورفل وفطومه حجت عنه فقير حباب يخاف الله وامي هم سوتني منال العالم بالطبخ وجويل بالمكياج وخياطه واصلح مولدات همين ابويه مقبل يطلعون الا يتعشوون مقبلوا شلون يصير جاوبهم
يابه اني عازم مقداد ترى هو مو بس ابنكم ضيف على العراق خلينا نتعارف ونترك هذي الشكليات بقوا صار لازم اگوم اساعد وامه لحكتني للمطبخ وبما ان همه كلهم من الوزن الثقيل عادل راح استعان بالمطعم مع ان احنا مسووين عشى دجاج وبرياني ورفل خبزت
اتعشوا يمنا وطلعوا اتفقوا بعد يومين يجوون الرياجيل ونتمم العقد ولازم عقد محكمه بين المصدگه وبين لا اصريت اخواني يسالون عليهم وجاوبوني صار نسال ولو الولد مبين فقير ويستحي حتى يحجي ومدنك بس حضري نفسج تخلصيها بالمطبخ لان ماشاء الله مبقى شي بس دولكة المي
(سوده عليه جوعان ابو كرش )
داخلي كنت مرتاحه لشكله في ناس يدخلون گلبك اول متشوفهم وترتاحلهم الي قاهرني الوظيفه
وعادل گال قابل بامريكا ماكو شغل روحي عيشي حياتج تونسي شهر شهريين وبعدين دوري شغل
والدي هم حجى نفس المضمون اقتنعت
ولو صعب اعوف يونس محمود وميسي وامسح صورهم بالموبايل
بليلتها منمت بس افكر خايفه لا مثل الخطوبات قبلها دائما يصير شي يخرب كلشي
فتحت الموبايل اتفرج على البدلات فكرت اخيط بدلتي اني وبقيت افكر اروح اشتري قماش وافصلها ماريد موديل عادي اريدها يختلف عن الكل
وبعدين گلت ويه روحي اروح انام احسن مااحلم والحلم يتحول كابوس