لست عانس

لست عانس ٧

#لستُ_عانس٧
#زينب_الموسوي#
رحنا على مطعم وگعدنا كان لقائنا بدون حديث  ردت اساله عن حياته  بامريكا وترددت لان كان مهتم بتفاصيل الغدى  قليل يباوعلي ملتهي ياكل ويطلب طلبات عبالك مشايف اكل ويناقش هواي ويه الي يقدمون الاكل انحرجت من كثر المواعين الي موجوده على الطاوله بس بعد يخلي ماعون بحضنه
بعد مااتحمل ولااگدر ادعي السعاده
ليش متاكلين خجلانه
لا بس الجو حار برا ميصير واحد هالگد ياكل
لعد واحد بيش يذب قهره غير بالاكل
ياقهر من شنو من الغربه من شغلك من خطوبتنا لاتسكت وتگول بعدين اتصل بيج اريد اعرف شنو قاهرك
ترى مجرد كلمه گلتها مااقصد شي اكولي احسن
ها انت مطول هنا بالمطعم اريد اروح للبيت راسي يوجعني
بس مااكلتي شبيج عصبيه
انت صدوك لو تتشاقى گاعد يمي تاكل الكلمه اجرها منك جر وبعدين تكلي قهري اطلعه بالاكل شنو هاي ترى محد جابرك على القهر
هاي انتي گلتيها محد جابرني شفاء انتي لابت عمي ولا بنت خالي حتى جبروني عليج هذا طبعي هاديء والاكل الگه بيه راحتي حتى مو قصة جوع كافي تعصبين وتدققين ترى ماجاي من اخر الدنيا حتى اغشج
بعد هذا سكتت محجيت وقررت ابد ما اساله هو بعدين من خلص اكل گال حجايه تهد جبال ماادري شلون تحملتها
اريد اطلب طلب منج ومااريد لااهلي ولااهلج يعرفون بيه (خيالي شطح كلش بعيد نفس تفكيركم بالضبط)
گول شنو الطلب
تدرين احنا واحد ميعرف الثاني بس مبينين راح نتفاهم لان انتي مبينه حبابه وخوش بنيه بس الغربه صعبه كل الي اريده ناجل موضوع الاطفال من نتزوج سنه لا سامح الله اذا صار بينا خلاف الاطفال شنو ذنبها وتربية الاطفال هناك كلش صعبه ننتضر سنه اذا تفاهمنا نسووي اطفال واعتبريه شهر عسل طويل شتكولين
دنگت فكرت ارگعه بالجنطه لزمت نفسي
هسه اني بالي رد عليك طوله سبع امتار بس مااگدر احجي لان ريحه الطرشي ذبحتني والبهارات والدهن فاسكت احسن وانت رد على نفسك وكوم رجعني للبيت
كمت وطلعت برى اغلي (ابو كرش ماخذني للونسه واطفال ميريد وسنه يجربني من حورك ) اجى وراي بالسياره اسف  كل الي يتزوجون هناك  يخططون لحياتهم وبعدين يله ياخذون قرار الاطفال واذا ماعاجبج خلص. اعتبريني محجيت
لاتاخذ هذا الطريق ازدحام اريد اوصل لاهلي بسرعه
ظل يعتذر ويبرر واني ماارد ردته يطلع كل الي عنده
من وصلنا كال اريد ادخل اسلم على عمي
سلم عليه وگله اريد بنتك للونسه  متعه سنه شوفه شيگول
حرك السياره اوگفي لتنزلين شنو هذا الحجي يامتعه شتخربطين  مساله اخذت رائيج بيها مموافقه گولي وانسي
لا مموافقه وعندي شرط جديد  اتزوج هنا يم اهلي وابقى لمده ست اشهر وانت وياي مااروح اتغرب واترك وظيفتي على واحد ميريد اطفال من عندي
نزلت ودخل سلم على والدي
جتي وفاء ورفل وراي للغرفه شافوني عصبيه وامي على الدرج سمعتها خير يمه شصاير
رديت مصاير شي
بالغرفه وفاء ها گال شي مثير حجي وياج حجي حلو باسج لزم ايدج مو بالله
اصلن كل طلعتنا اثاره گال لبو المطعم الطرشي مو حامض وطلب خبز مرتين شايفه واحد ياكل التمن بخبز  شنو هالحظ
رفل شفاء لاتتعافين والله امج تموت والقران ابوج ناذر ذبيحه من تتزوجين وامج الفجر تدعي وتبجي اسكتي هذي قسمتج
اسكت شسووي بس خلي ابويه يگله نتزوج هنا حتى اذا طلع موخوش مااخسر اهلي ووظيفتي
رفل بعد ميصير نشرط هذا اتفاق الزلم الولد گال مااگدر اتاخر عن شغلي صيري حبابه ياعيني هاي انضربتي عين العصر نروح اني وياج للزياره
ماحجيت على الي گاله وامي من عرفت ابجي صعدت طينت عيشتي متستحين موعيب تبجين لان ميتصل وميلزم ايدج عيب خلي عندج عفه
منو گال اريده يلزم ايدي والله ماگلت
انتي شاكيه لوفاء
وفاء لايمه انتي سالتيني شصار بينهم محاجاها حجايه حلوه جاوبتج لا
وحتى ايدها مالزمها  وهي تبجي
فدوه اروحاكم اطلعوا عني وعوفوني لاتخافين يمه تريدين اتزوجه صار اتزوجه بس والله راح انظلم ظلم بهذا الزواج يخليني اتمنى باقيه عانس
العصر اجتي ام مقداد وهو وياها واخذوني لبيتهم لان عدهم مولد 
رحت وياهم  مولد واقاربهم جايين امه مبينه حبابه اخذتني لغرفتها كانت جايبه محبس  من بيت الله وضامته گالت صار سنين ضامته لعروس مقداد اخذيه البسيه
وحجت تحمليه هو شال الحمل وعمره ضاع يكد على اخوانه ميعرف شنو حب ومشاعر انتي علميه وحجالي على الاطفال ورزلته فوگ مااعمره اربعين يريد ياجل سنه
معليج بيه گوليله ئي وحبلي گوليله نسيت اخذ الحبايه ماكو رجال مايفرح بالاطفال يله ضحكي النسوان راح تجي تشوفج  ام مقداد مخلصه متوسطه وفاهمه ومثقفه طلعت اساعدهم مقبلوا روحي گعدي بين متجي النسوان مقداد كان گاعد بالصاله واني بالهول اخذت الريموت طلعت العراقيه الرياضيه طول عمري اتمنى اخذ رياضي شافني مقداد اجى گعد گبالي
تحبين الطوبه مبين عليج
كل بيتنا يحبوها ومن تصير لعبه نتجمع ونحضر كيك وببسي ونصرخ ونعيط وانت تحب الطوبه
احبها بس ماعندي وقت اتابع
هسه من نتزوج اخليك اتابع وياي
نتزوج وين هنا لو هناك
بكيفك بس مساله الاطفال جرحتني
اصلا لازم تكيفين لان في حالة الخلاف لاسامح الله المراه الي تكسر ضهرها الاطفال مو الرجال
ليش مخلي احتمال الخلاف بينا اني راح احاول كل جهدي مانفشل وانت حاول
اكيد احاول بس شفاء انتي متعرفين الحياة هناك صعبه وقت الزوج يشوف زوجته ماكو مناسبات عيد وحزن متحسين بيها الناس ملتهيه كلها تركض انتي متعوده هنا اسواق وطلعه وصديقات هناك مراح تلگين احد تحجين وياه الضغط النفسي يولد مشاكل وصعاب
ليش هناك ماكو حياة شنو
حياتي مثلا اطلع بالسته الصبح يخلص شغلي بالوحده ارجع للبيت بالاربعه عندي شغل ثاني يخلص بالعشره باليل ارجع ارتاح ساعه وانام وين الحياة بيوم. العطله اتسوك واغسل ملابسي وانظف الشقه
كلامه خوفني وبنفس الوقت حملني مسوولية افهم هذا الانسان گدامي مبين حياته تعب وحرمان ولازم ابدي وياه بخطوات صغيره وتكبر لحد متوصل لوزنه وادمانه على الاكل گمت من مكاني گعدت يمه
خلي ناخذ اني وياك صوره بموبايلي راح تسافر واشتاقلك
ابتسم وبالصوره خله ايده ورا ظهري
طلعت صوره علقت خدودك مثل خدود فطومه بنت اخوي شايفها
ضحك حيل وشفت امه تباوع من المطبخ
همست باذنه عمتي دتباوع فرحانه گاعدين سوا اخذ ايدي وباسها گال خلي نفرحها اكثر
خلص المولد ام مقداد گالت ظلي عدنا للعشى وبعدين مقداد يوصلج
لا خاله استحي من اهلي يوصلني هسه ويرجع
طلعنا ديوصلني مقداد بالسياره منطق ولا كلمه سالته ‏
شنو مزاعلني
لا ليش ؟
لعد ليش متحجي ويايه
عندي صداع والجو هنا حار بغداد مكانت هيج حاره هسه نسمة الهوا تهب تخنگ
(هذا راح يناقش اسباب ارتفاع الحراره بله شحجي ويايه اسكت احسن)
ليش سكتي
دافكر ليش بغداد صارت حاره بلگي نعالج المشكله اني وياك اگولك متوصلني لاهلي عندي دوام باجر
ها يعني راح تروحين تنامين مااتصل بيج حتى نسولف
على شنو نسولف هذي احنا سوا متسولف
سكت مارد عليه وصلنا نزلت حتى مگتله مع السلامه
دخلت البيت اريد اخبي دموعي عن اهلي
رحت بهدوء لغرفتي شافتني فطومه
عمه رجعت ركضت على غرفتي
صعدت وفاء شبيج شفاء تونستي بالمولد
الحمد لله كان مرتب ولبست بدله وردي ام مقداد جايبتها الي تعالي شوفي الصور
سكتت ماحجيت شافت الصور
الله يهنيج شفاوي لعد ليش گئيبه
اسالج سوال وتجاوبيني بصراحه
اسالي واجاوبج
من كنتي تطلعين مع صبري عن شنو تحجون شتسوون
يعني الحجي العادي بين الخطيبين ومرات يتحارش بيه
تدرين رجعت ويه مقداد بالسياره ناقشنا اسباب الحراره والتصحر بغداد
ظلت تضحك
وفاء لاتفتهميني غلط بس اني انتظرت الخطوبه حتى اعيش تفاصيلها ومقداد مو يمي ابد ومااحس عاجبته او مقتنع مبين مجبور داحجيلج لان خايفه هم غربه وهم رجال ميريدني
لاتستعجلين يمكن خجول ثگيل متعرفين طبعه