لست عانس

لست عانس ٩

#لستُ_عانس٩
#زينب_الموسوي#
حياتي العشر ايام الاولى من زواجي اطبخ الصبح اقل شي ست ساعات املي الثلاجه اكل ومو اي اكل جدوره عبالك عندي عيال يرجع مقداد يتغدى ينام يطلع للشغل اطبخ للعشى وباليل لازم ميصير اذا ميتقرب اليه ماكو بحياتنا حب حنيه غزل مدح مواضيع نحجي بيها تلفزيون منتفرج سوا مااعرف هو المن يشتغل شغلين من حسبت مصاريفنا من سالته والايجار وبانزين السياره طلع هو ديشتغل زايد المن وين يروح وهو يگول ماعندي رصيد بالبنك هذا الحجي ميفيد لازم اعرف كلشي
الحبسه بالبيت مامتعوده عليها اهلي وصديقاتي اتواصل وياهن وخاصة مروه كانت تگلي زيدي الاغراء عليه
واني مصدگه وهو نفس الشي فد يوم طگت روحي من گعدت البيت تمشيت لهذي البنيه الي شفتها محجبه ودگيت الباب شافتني تعارفنا وگعدنا نسولف وصرنا صديقات وظلينا يوميه نلتقي سوا اتفقنا تعلمني سياقه هي عدها بنيه وحده اسمها يسر وهي زوجه ثانيه الاولى بالعراق وكانت استاذه ورئيسة قسم بامور الزواج هي مكانت تعرف مقداد معرفه شخصيه بس علمتني شلون اتصرف وياه
فد ليلة رجع كنت لابسه ملابس خارجه عن الادب كولش شافني
هاي شلابسه اليوم
عجبك مو كلشي متحصل اذا ماتعبر عن اعجابك مقداد ترى روحي طلعت من الي دتسويه
شتريدين بالضبط
متعرف صار ١٤يوم متزوجين كم مره گتلي احبج حبيبتي انتي حلوه اموت عليج تدري هذي السوالف كنت اسمعها من امشي بالشارع الولد تگولها وانت ماادري شبيك حضن متحضني تطلع ساكت وترجع ساكت تشتغل ومااعرف فلوسك وين
يعني مو بعينج اني معاجبج تنامين وياي خلص ارجعي لبيت اهلج
مگلت معاجبني اريدك تحبني مقداد احنا بغربه لازم نصير  لبعضنا وطن وكلمة ارجعي لاهلج بعد لتكولها ترى اسويها صدوك
حضري العشى بين مااغسل
اووووف شنو هذا  بعد العشى كنت بالحمام اغسل واجدد مكياجي
دفر باب الحمام وينج شدتسوين
دارتب نفسي
يله فضيها اريد انام وراي دوام
روح نام منو لازمك
يطبج مرض  المن لابسه هذي الملابس اذا تريديني انام
اريدك تحبني وتخليني احس عاجبتك مقداد تصدك واحد ينام ويه مرته ميگلها احبج  ترى داحس داستجدي المشاعر منك كمت ابچي
عافني وراح
يا خيه هذا عباله مسوي فضل عليه
دشوف بعد منو يعبرك والله جنت مرتاحه بيت اهلي شنو الفرق الي صار بحياتي اشو انحرمت شوفة امي وابويه يمكن منا وجاي انام بملابسي الي اطبخ بيها يمكن يحس بيه
بقينا منتحاجه وبديت اطلع اتعلم سياقه لان هو طلبت منه گال ماعندي وقت صار عشرين يوم على زواجنا
وظليت اسهر اشوف مسلسلات وافلام حتى اتعلم كم كلمه وانام على القنفه واني نايمه گعدني مقداد كومي نامي يمي المن ماخذج اذا نايمه بالصاله محجيت وياه واثناء مكان وياي نزلت دموعي عبالك كرهته مخليته ظليت اضربه وابچي   وخر عني مااريدك وانت متريدني ليش تتقربلي عوفني وانطيني اوراقي اعيش وحدي هذا مو زواج گلب ماعندك  
متفهميني شبيچ
انت شبيك شايف نفسك عليه مو صار اسبوع منتحاجى تاخذني للفراش حتى بدون منتصالح اني مااگدر اعيش بهالوضع الله يخليك عوفني
تركت السرير وخلصت الليل بچي  الليله الي بعدها رجع من الشغل اكل بدل ملابسه وگعد على القنفه الي انام عليها ليليه وفتح التلفزيون
مو عندك دوام باچر متروح تنام
مجايني نوم تعالي گعدي يمي دنسولف
شعجب اليوم تريد تسولف
انتي يرادلج خلگ واني مالي خلگ
ليش اتزوجت لعد مچان انتظرت لحد يصير عندك خلگ
سكت شويه وبعدين گال وتالي تجين تگعدين لو لا
انت كوم وصالحني مثل كل البشر بالدنيا اني مو حيوانه وتعاملني بدون احترام معاجبتك فضها كلمن يروح بطريقه ومراح اضيع هنا اعيش والي خسرته عليه مستعده ارجعه الك وهسه بتلفون واحد للعراق الفلوس عندك
انتي ليش مسويه مشكله من لا شي ولچ اني الي بيه مكفيني مناقصج تتفلسفين براسي
شنو الي بيك احجيه تحب وحده ومتريدك اهلك رادوا يزوجوك اختاروني اني وباقي بين حبك الها وحاجتك لمره فراش وبس صح
والله صوجي اني مضيع وقتي وياج اروح انام احسن
الصبح باوعلي وگال شبيها عيونج مورمه من البجي طبعا اذا گاعده تالفين قصص بكيفج
والله اطلع ثوله وماافتهم اذا مطلع حجي صدوك واكو وحده غيري
ثاني يوم على العشى  دگ تلفونه جاوبه وحده تبچي اسمعها وتحجي انگليزي انخبص راسا گام من مكانه وشفته ديبدل يريد يطلع
وين بهاليل ياستار
شغله طارئه   احتمال اتاخر
غير افتهم     مو اله تفتهمين وخري عن طريقي   طلع ركض
بقيت افكر اجيب واودي الشغله مو خاليه انتظرت رجع الساعه عشره الصبح تعبان وضايج ومبين باچي
باوعلي بعد مااگدر اضم اكثر شفاء اگعدي احجيلج
انت متزوج مو      كنت متزوج قبل سنين امريكيه وعندي بنيه ولد من عدها اسمها باث بنتي زينب وابني علي مريض بتليف الكبد
والشغل والركض وبيت ماعندك وسيارتك قديمه اثاث مستعمل لان تصرف عليها وعلى اطفالك
القانون الامريكي هذا وحتى لو مو قانون ابني وبنتي مااتخلى عنهم اخذتهم مني غصب بعد مادعت اني ااذيهم تعهدت الها اصرف عليها طول عمري بس متحرمني منهم قبلت اروح ازورهم  ويتصلون بيه وكل متنقل لولايه انتقل وراها
وليش طلگتوا
هي عافتني هواي اسباب ماحبتني حبت غيري
يعني خانتك   لا مخانتني اجتي كالت طلگني مااحبك احب شخص ثاني
وليش ماتزوجت الثاني
ماادري تركته بعد فتره
شنو ذنبي من كل هذا اني ليش كذبت
ردت زوجه وردتها بمواصفات تقبل باي شي
وعصام من تلفوني عرف عانس واريد اتزوج وبلغك
اخذت تلفوني.     شدتسووين شفاء
اتصل بابويه يتفاهم ويه اهلك واشوف اخواني شيقررون ارجع لو اطلك وابقى هنا
الله يخليج لاتكولين ماريد اطلع جذاب كدام اهلج الناس يحترموني
لعد انت ليش ماحترمتهم واهلك مو عيب يچذبون شبيهم جهال
انتظري اليوم فكري وباجر سوي الي تريديه
عفته دخلت للغرفه مااعرف شسوي متزوج وعنده جهال ويكد عليها وعلى جهالها واني جايبني اطبخ وانظف وباليل ينام وياي مثل الي ديسووي واجب دخل بعد نص ساعه  ردت اطلع من الغرفه سد الباب شفاء ابني مريض ومحتاجني لاتركيني
باوعتله كسر خاطري بس ولو ميصير يچذب
ادعيله الله يشافيه عندك صوره اله اريد اشوفه.      ئي هذي صورته  عمره 
١٢سنه وهذي زينب.عمرها ١٤ماتشبهني.      الله يخليهم الك  
تعبان والله شفاء حياتي ضاعت بزواج غلط والاطفال مالهم ذنب
واني هم مالي ذنب منو تقبل بهذا الوضع
من يومها ابتعدت عنه بكلشي حتى حجي مااحجي وياه  واشوفه ميروح للشغل اكثر الاوقات يم ابنه بالمستشفى ماگلت لاهلي اعرف اذا اگول راح يعاتبوه وبعدين يقبلون بالامر الواقع ومااريد صورته تنكسر.  بعينهم  اتصلت فد يوم امه حجت وياي
تعتذر وفهمتني زواجه كان خطا ودفع ثمنه عمره اخذته وبعدين ظلت تعيره سمين قبيح هو حجالي ومخبرناكم بقصة زواجه اخاف ترفضوه واحنا حبيناكم يمه لخاطري اعتبريني امج واطلب منج هذا الشي لا تركيه
خاله هو مو بس شغلة. زواجه خطا حياته كلها  لاعنده بيت لااثاث فلوس بالبنك ماعنده سيارته قديمه كل شغله الها واطفالها
هو اني اختاريتج اله علمود تلميه والله من اجانه ملابس ميهون عليه يشتري كل لخاطر جهاله
خاله مااريد اهلي يعرفون اخاف تصير مشاكل
فدوه لعينج يمه امانه عليج والله مقداد خطيه
سديت التلفون يعني يريدني اتحمل تعامله وضعه المادي التعبان وحبستي بالبيت  وكل هذا لازم اكونه واسوي عنده بيت وفلوس
رحت على ام يسر
حجيتلها الي عرفته
وشراح تسووين هسه ترجعين تلحكين  على وظيفتج على الاقل
اوووف ياام يسر  هو اني عانس والمجتمع مرحمني انوب مطلگه ورا شهر رجعت والله امي وابويه يموتون
حقج والله زين هو بعد بتعامله وياج جامد
يمعوده ياجامد اصلا صخر تدرين العانس مو بس الممتزوجه في زوجات عوانس شهر   مافد يوم حضني ونام هسه اعتبرني جدر دولمه واحضني
ههههه چماله تنكتين
ولج حتى هسه غير زعلانه والشقه بكد الشخاطه مافكر يتحارش بيه يكول كلمه حلوه حتى البنيه بعد شهر من الزواج هم تتجرا  اگلج هذا الزواج مبين فاشل اني لازم افكر بالمستقبل اريد امتحن على اجازه السوق وعندي فلوس اشتري سياره
يمته تريدين اخذج تمتحنين على الاجازه الموقته ورا شهر تاخذين الاجازه
بكرا اروح واريد شغل ماابقى اطبخ ل ابو زينب
بسيطه ومقداد شتسووين وياه
في مثل كانت بيبيتي دائما تگوله اسمك رجل يافلان عن وحشة الليل
يعني ابقى عنده اسمي متزوجه ولا مطلگه او عانس
رجعت لشقتي بعدها مقدادرجع خليت گدامه الاكل ورحت عنه گعدت بالصاله عاف الاكل واجى يمي
ليش متاكلين وياي
اكلت قبل لتجي اكل انت
ولشوكت تبقين متحجين وياي ومقاطعتني
هو احنا من بدايه زواجنا متقاطعين واذا قصدك على النومه مالك حق عليه الرسول عليه الصلاة والسلام يگول الي يخطب وحده وهو يصبغ شعره لازم يصارحها يگله اني ترى اصبغ وانت چذبت ومااحترمت وماقدرتني بغرفة اخشاب مثل كل البنات
اني غلطان واسف خلي نبدي من جديد الله يخليج بداعت امج وابوج سامحيني وتعالي اكلي وياي والله اكلج طيب عاشت ايدج
تروحين وياي تشوفين علي هو يريد يشوفچ
اروح تغدى وخلص واروح وياك
طلعت وياه اشوف ابنه
شفته الولد نموه مو طبيعي وضعيف بس شكله حلو مماخذ شكل ابوه ولاامه بس عيونه ملونه ورشيق على امه
باث سلمت عليه وزينب كانت موجوده لازمه الموبايل وتخابر  وسلمت من بعيد
اولاده ميحجون عربي لذلك مااحجيت وياهم اني افتهم انگليزي بس عندي حاجز  من الكلام اخجل
بقينا ساعتين بالمستشفى باث مبينه مكاره وتستخدم اولاده ورقه ضغط على مقداد
بسيطه بنت الامريكي خايبه اني عراقيه اله خليج تموتين هم
كانوا يتناقشون على حذاء تريده زينب وهي تكله سعره ٣٠٠دولار وهو ميقبل يكلها هواي شفته يطلع فلوس
وگفت
مقداد ممكن ترجم لزينب اني اخذها اشتريلها الحذاء هديه من عندي اريد اتعرف عليها
ترجم وافقت زينب
مكان هدفي اشتري لزينب حذاء اريد اشوف سعره الحقيقي
اخذنا مقداد اختارت الحذاء طلع سعره ٦٥ دولار دفعت اني
البنيه رغم اني محجيت وياها مبينه ضايعه وكلشي متعرف على الاسلام
شفتي شفاء هذي شلون تستغل شافتني مشغول وتطلب فلوس واني ادفع صار سنين
مقداد انت ممنتبه على شي مهم اطفالك مسلمين  متربين عند امهم وكلشي ميعرفون عن الدين
هو الخلاف كان على هذا بعد الطلاك ودعت اني ااذي الاطفال واخذتهم
هسه همه اكبار غير اتفاقك وياها
شلون يعني          على شنو تدفع الها ٦٠٠دولار بالشهر انت عليك بمصاريف اطفالك ولتخاف وتهددك بالاولاد اذا اشتكت راح يسالوها ليش مابلغتي كل هذي السنين وشغله الثانيه هددها متنطي مصاريف اولادك الها انت تصرف واطلب يباتون عندك بنهايه الاسبوع
شلون فكرتي بهاي عقلج مينوزن بالذهب صدوك اني هالمره حظي گعد وتزوجتج
(هذا منو الي يحجي )
اسال زنوبه تروح عدنا تتعشى وتخابر امها يله
اخذنا زنوبه بموافقة امها
البنيه ماوارثه عاده الاكل من ابوها  ا كنت احجي وياها وابوها يترجم
ارتاحت بالشقه اتصلت بامها خبرتها ابات هنا ظلت تحجي الاطفال هنا محد يجبرهم
فرشنا بالصاله اني وياها
مقداد اني هم راح انام يمكم
صارت زينب بالوسط ردت احضنها واسولف وياها بالعربي
مقداد ترى هنا الاطفال مفهميهم ميصير يحضنهم غريب يعتبر تحرش الا بموافقة الطفل
ها وانت اكثر واحد ملتزم بهذا القانون متحضن لا غريب ولاقريب
بس بنتك احسن منك شوفها حضنتني
ظل يضحك
راح اسميج بزونه  زنوبه افتهمتي صدقه لهل العيون
فهمها ابوها

اخذت اجازه السوق المؤقته وخبرت  مقداد
راح اشتري سياره وبعد شهر اسوق وراح اشتغل
الشغل هنا بهذله شفاء مدام ماعندج شهاده معترف بيها عادلي شهادتج احسن
احاول اشتغل وادرس اني شاطره بكلشي وهسه تشوف اذا مو بسنه اطلع من هاي الشقه واشتري بيت واحصل شهاده منا وشغل محترم
والله اذا مو اسبوع واجيتي تبچين من التعب والبهذله هنا عبالج شغل العراق مخلصيها عطل وگاعدين بالدوائر لاشغله ولامشغله هنا الاجر على الساعه وماعدهم فرق هذي مره وهذا رجال كله واحد اگعدي بيتج احسن
انت متعرفني اني عراقيه مخلوقه للضيم عراقيه وگفت بالحروب وبالحصار وبالاعمار  تحملت جوع وخوف وعوز ونزوح وگفت عمرت بيوت وربت زلم
مافي بيت بالعراق انبنى مابيه عرگ مره وگفت ولمت وخططت
جربني وشوفني امشي ورا كلامي ومتخسر
على راحتج بس بشرط مافد يوم تجين تلوميني وتكولين بهذلتني انتي اختاريتي
موافقه اني هم عندي شرط كل امور حياتك اني اتولها ال٦٠٠دولار الي تاخذها باث اني اخذها  لاتخاف مااصرفها اعرف اتصرف اطفالك تصرف عليهم انت وتجيبهم كل اسبوع مره يمنا
كله افتهمته بس اطفالي ليش مصره اخذهم
اگلك ليش راح ادخل تحدي من تلث محاور  ومصره اكسب وانتصر
وغرفتج شوكت ترجعين ترى مليت
يمعود انت متسوي واهس خليني نايمه هنا احسن
تعالي يمي حرام عليج
انت حرام عليك متحبني ليش اخذتني
منو كال مااحبچ  شنو مقياس الحب عندج
انت شنو مقياس الحب عندك انطيني دليل واحد تحبني اذا انت حتى متكول  احبچ
تحسر وسكت وتقرب مني
وخر مقداد وخر شگد ثگيل شنو جبل
حاولت ابعده بس هو ضخم صعب ادفعه  هذي المره الي تقربلي حسيت شي مختلف  عبالك كان مشتاقلي واول مره يداعب خصل شعري واخر شي گلي
ارجعي شفاء البسي مثل قبل خليني احس نفسي عايش
اذا تحبني البس وانتظرك واتلهف عليك عاملني بالمثل اخذني بحضنك لك اني عفت اهلي علمودك المفروض تعوضني فتحت اديه ورحت بحضنه يامقداد ياخبيث كل هذا حضن وبخلان عليه
كافي تحجين نامي
اسكت بس انت احجي گول اي شي شنو تحس هسه
سكت محجى انداريت عليه تدري اني شنو احس احبك شگد انتظرتك بس اجيت بطبع ماحسبت احسابه خايف تحبني وخايفه اتعب واعوفك
ظليت ابوسه ويه كل بوسه اكوله احبك
تجاوب وياي وتحول كتله مشاعر  مثل مااريده ومن انتهينا الجمله الي گاله فسرت هواي امور
لچ كلج مشاعر واحاسيس المفروض تخاذين واحد شاب رشيق مو اني سمين و
سديت حلكه لاتكمل اني اريدك انت لو اريدغيرك اخذت مسي لو يونس محمود اصلا عاف الغرافه عل مودي
ظل يضحك شدتخرفين يايونس محمود
دتشاقى حبيبي بس اني احبك انت واموت عليك لو مااحبك مسامحتك وحتى اهلي ماوصلتهم خبر
صدوك والله ماگلتي         وداعتك محجيت
من كلام مقداد وكلام امه
بهذي الليله اكتشفت مقداد عايش عقده نفسيه بسبب زوجته الي كانت تسمعه كلمه قبيح وسمين خلت عنده عدم الثقه بالنفس دفن نفسه ومشاعره بالاكل وكان خايف يفتح گلبه من جديد
والدليل الثاني على كلامي بليلتنا هذي مقداد حلفني
احلفي تحبيني ومضايجه من وزني وشكلي
والله العظيم احبك واذا معاجبني ليش اخذتك اخاف عبالك عانس ترى كنت انخطب بس قسمه متصير والي قراه عصام  بتلفوني تحشيش بيني وبين صديقاتي ومافي بنيه متتمنى تتزوج لاتتصور انت كنت المركب الاخير. وصعدته
اني عشت ويه باث  سنين كانت تسمين القبيح السمين اني سمين من كان عمري تسع سنين
اذا معاجبها ليش اخذتك بنت الدايحه هذي وخلفت منك وانت شبيك باقي متحمل  سنين من حورها اصلا انت احلى منها وجهك طفولي وبريء
معليك من حجيها اني اريدك تبقى مثل ماانته على الاقل تدفيني
من هنا اطلقت الصافره لبدا المباراه بين فريقين اني ضد عقده مقداد وزوجته وضعه المادي
وماقبل بالخساره ولا تعادل