#لستُ_عانس٤
#زينب_الموسوي#
ست سهير ام مشتاق اعرفها مدرستني سنتين احياء كانت عصبيه بس طيبه تتساهل بالدرجات دخلت سلمت عليه كانت لابسه مناظر قربت المناظر من عيونها
هلا بيج شلونج تعرفيني مدرستج اني مااتذكر
بلي مدرستني اني واخواتي
خلي اگعد يمج حتى اشوفج خليج بمكانج انتي مكسوره اعذروني هو هلولد وامنيتي الگاله بنيه تناسبه
تدرون شكد صعبه هذا الموقف على البنيه ورغم اني كبيره بس وجهي صار احمر من الخجل باوعت عليه على شعري عيوني مدت ايدها على وجهي اخاف مخليه ابيض ومسحت وشافت
امي هي حنطيه من دون خواتها لان تشتغل وتطلع لو تگعد بالبيت تصير بيضه
لزمت اديه رفعت الفستان وينها رجلج المكسوره ها خطيه
اشتمتني مرتين (شنو كلب بوليسي )
شفاء شكد عمرج خاله
٢٨سنه ومتخرجه من فرع المحاسبه موظفه بدائره قريبه منا تابعه لوزارة الاسكان
تعرفين تطبخين تنظفين لو مثل بنات هذا الوكت
بلي اعرف اطبخ ومرات اساعد بس بصراحه الطبخ على ام فاطمه وام حسن طبخهن لايعلى عليه ويعلمني
سالت امي ام عادل عندج بنات بعد اصغر منها
عندي لقاء اكبر منها ودعاء اصغر منها متزوجات وفاء مخطوبه
ها ليش اتزوجن قبلها شعجب شفاءماناقصها شي
والله ياام مشتاق هي تدقق على كلشي وقبل كم يوم خطبها مهندس معماري وماقبلت لان رادها تترك الوظيفه (امي حمت ربيع صار مهندس معماري)
زين تسووي شنو تعوف الوظيفه
زين انتم شنو شروطكم الحاضر شكد تردون والمهر والغايب
(مدا اصدگ وصلنا للمهر )
احجي شفاء خاله لاتستحين ترى هو واحد واريد ازوجه زواج مصاير
ست هو المهر الي متعارف عليه والغايب مجرد رقم انشاالله مانختلف
بطلي ست وست راح تصيرين جنتي
امي انشاالله تصير بنتج والله ماكو بندارتها هذا البيت هي لمته وابوها يجمع فلوسه عندها واخوانها كانوا يشتغلون بالسوك قبل الوظيفه من يومياتهم سوت سلف وزوجتهم
اني اريد هيج وحده لابني وكل الي تريدوه حاضره مدام مشتاق راغب عيوني الكم
امي سالمه عيونج ام مشتاق
بس عندي طلب واحد من شفاء
أأمري ست
شوفي شفاوي هو هلولد ضيعت عمري عليه وانحرمت من كلشي وصلته ماريدج تفرقين بيني وبينه والبيت الكم كله واني بغرفتي مااضايقج بس لاتحرميني شوفته اني مرات اصير عصبيه اتحمليني
ست امي هم عصبيه عليه وعلى رفل وفاتن
باستني احلفي بكلام الله ماتاخذين ابني ومتطلعين بيت لوحدكم
(هاي صدوك تحجي بيت لوحدي راح تصير صدوك ويصير عندي عمه )
ست وكلام الله مااطلع بيت ولا اخربه عليج اني مو من هاي البنات
لهنا الحجي حلو
كانت رفل كاعده وكامت سالت ام مشتاق هاي جنتج حامل
ئي حامل هاي رابع بطن الها تجيبهم ويموتون بس بنيه عاشت الولد ماتوا
هيه گرايبكم
گرايبنا من بعيد
خطيه الله يعينها اليوم ادعيلها بصلاة الليل انشالله تجيب ولد تمام
اشرت لامي اسكتي بس امي شلون تسكت لازم تحجي قصة حياتنا
امي فدوه لعينج وادعي ل لدعاء بنتي ميصيرون عدها جهال (ها ي هيه نبع الحنان ختمتيها مسك وعنبر)
اخت شفاءماعدها اطفال
امي ئي والله ماعدها ولقاء جابت كرار وحالت شگد راجعت يگولولها ماعندج بيوض
حجت فاتن خاله عمي يريدج بالمطبخ (كذب ردناها تكوم لان المره صار وجها الوان )
طلعت المره وعلى اساس يجوون رياجيل على ابويه ويقرون الفاتحه والخطوبه والعقد بعد ماافتح الجبس
ظلن البنات يبوسني ويدعلي الله يتمم على خير وبدينا نخطط البيت لازم نكمله بسرعه الموعد كان الجمعه
كانت ام انمار ومروه يوميه يتصلون ومروه گالت اني اجي عليج اخليلج مكياج لاحبي محد يخليلي مكياج اني انتظر هذا اليوم الي ازوگ نفسي بيه
وابويه خبر عمامي حتى يحضرون
الفرحه الي شفتها بعين والدي وامي متنوصف ادري گلبهم عليه
بعدها بيومين دگت الباب ام حماده خبرتنا ام مشتاق مموافقه تگول عدهم وراثه بناتهم ميخلفن واني ابني وحيد اريد اشوف اطفاله
كان الخبر محزن ومخجل بنفس الوقت لان صار يومين موضوع البيت خطوبتي اخيرا
امي من سمعت حست هي السبب
صعد عدها الضغط وتمرضت يومين
نايمه بالفراش ومتقبل تاكل لحد ماحجيت وياها
شنو القصه يمه على شنو ضايجه قابل عاشگته اني قسمه وماصارت
ولشوكت قسمتج متصير
يمه كلشي بيد الله وماكو احسن من قسمته وكتبته يايمه ترى الزواج مو هو السعاده وراحة البال ياما بنات تزوجن وتطلكن ياما ترملن او تزوجوا عليهن اني بعدني شابه وعندي راتب بقى الزواج اجى الحمد لله مااجى امنا بالله فدوه يمه لاتضوجين اصلا مبين بيد امه ورادني علمود رجليه لو ماخذني يعوفني بس يشوف وحده رجليها احلى خلي يولي
مر شهر رحت افتح الجبيره اني ورفل وياي اتفقنا منروح لنفس العياده اخذنا تكسي ورحنا لبغداد الجديده
سايق التكسي الي وصلنا گام يسولف
تعرفون بنيه مكسوره لازم يعرف فضول
خويه شلون نكسرت رجلج
ابيتنا اصعد الدرج وگعت ونكسرت رجلي
الحمد لله على كل حال متزوجه انتي خويه اسف على السؤال
لامامتزوجه گلبت خلقتي حتى يبطل حجي
تشتغلين گاعده بالبيت
اشتغل موظفه ليش تسال
اعتذر بس عندي حجايه ومااكدر احجي اذا متنطيني الامان متفهميني غلط
گول شنو الحجايه
اني ادور على عروس والله مو قصدي اتحارش لو تفكرين هاي كليشه اگولها لكل وحده تصعد بس انطيني مجال
اگولك شعرفت مني ترى عيب. هذا الاسلوب
ظل يحلف وانتي مبينه بت اوادم ومن هالصبغ
نزلنا للدكتور ورفل بس تضحك
ولج صدوك كثرت خواطيبج وبرتي حتى بالتكسي
كملنا من يم الدكتور وطلعنا بعده واگف وتوجه علينا
ها اوصلكم لو تفترون بالسوك
انت شرايد تعال اگولك ترى. لااخذ رقمك ولاانطي رقمي
اوصلكم واعرف بيتكم وادز والدتي باچر وانطيني رقم والدج اخوانج واتفاهم وياهم
وشتگلهم شفتها بالتكسي
وشكو بيها هي قسمه
باوعت على رفل تبتسم هي وجهه ضحوك دائما
گالت انصعد وياك توصلنا وتدز اهلك غيرها ماعدنا
صعدنا بالسياره بقى يحجي عن نفسه خريج اعلام ومتتعين نفس عمري
بيتهم بالغدير قريب من بيتنا وحجى هواي
وصلنا وراح ورفل حجت لامي وامي مصدگت نصبت سيطره باب البيت اخاف تجي امه
اجتي ثاني يوم اني كنت بالدوام بس عرفت الانباء العاجله تلگتني امي
شفاء تغدي وتعالي لغرفتي
رحت على رفل شكو شصاير
اجتي ام كرار ابو التكسي ولج كلش خوش ناس بس متزوج
شنو متزوج فدوه ل الله وليش يريد يتزوج اكيد امه گالت مريضه لو مامرتاح وياها
اسكتي امج متقبل احد يتدخل بالموضوع ولاتگولين اني حجيت
دخلت على امي والجمله الي گالتها
واذا متزوجه الشرع حلل اربعه
يمه مدام حلل اربعه يعني لازم هم تقبلين يتزوج عليه وتقبلين دعاء رجلها ياخذ عليها ليش يمه احرگ گلب بنيه يمكن عدها رجلها وبيتها اغلى من روحها شنو السبب
يمه شفاء ماادري شگلج بس شوفي الي بعمرج وين صارن اريد اشوفج متزوجه
الله كريم يمه اذا مكتوبلي قسمه محد ياخذها غيري بس مو على حساب بنات العالم
ردت امي تمرضت من جديد وبقت الى ان صار عرس وفاء
تحسنت صحت امي وفاء خطيبها من البصره اجتي الناس باتت عدنا والعرس يصير بالفندق واهله يرجعون للبصره ثاني يوم لان تعب على عليهم يسافرون بنفس اليوم الجبس وظلينا نركض من كثرت الطلبات في وحده من النسوان كانت تضحك وتنكت بشكل وتحجي حجي اول مره اسمعه وتخوف بوفاء من الزواج بقت عينها عليه اني احب العجايز باليل فرشتلها للحجيه گالت
شسمج يامهره (عزا هذي تطلع عدها سوالف مكسره الحجيه)
شفاء حجيه وانتي شتصيرين من صبري (العريس)
گرايب امه متزوجه انتي
لاحجيه مامتزوجه ولاتساليني ليش قصه طويله
احجيها الليل طويل ويخلص بالمسامر (شلون مااشوف. هذي الحجيه مو بريئه)
حجيتلها صفنت گالت
ليش ممسويه حواجبج تاتو مثل باقي البنات
اخاف من الابر
اذا تخافين من الابر لاتتزوجين الزواج اقوى من الابر
حجيه انتي من كنتي شابه شلون خلصتي حياتج مبين عليج جنتي وكحه
شني من چنت شابه هازه كاروكي انتي
چنت كمر والولد تركض وراي
لازم كنتي عدائه ساحه. وميدان
اخر الكلام گالت شنو بيج اصطناعي انتن بنات هذا الوكت گلجن تلزيك مخليه اسفنج
لاحجيه كلي طبيعيه ولو ادور تلزيگ سويت حواجبي بس ليش تسالين
اريد اخطبج لواحد يخرب على وحده مثلج
يعني شنو مثلي حجيه ترى اني مو ذاك الجمال عاديه
بيج مواصفات هو يحبها شگد عمرج انتي
٢٨وبعد شهرين ادخل ٢٩
عز الطلب شوفي حمى بنتي رجال مقتدر بيوت واراضي الله أ مكنه ارمل وعنده اطفال تلاثه ويريد بنيه الي وصفها الي مثلج
شگد عمره واطفال اعمارهم شگد
عمره٥٠سنه شعره ابيض وميقبل يصبغه من هسه اگلج واطفاله اصغر واحد بيهم تسع سنين بيته ملك مو واحد يمكن خمس ست بيوت شگلتي
جبير هواي وسالفه اطفاله ايتام تخوف استحرم اخاف فد يوم اضربهم اقسي عليهم واتحمل ذنب
وشغلي هنا وهو بالبصره الوظيفه مااتركها
هو مايريد موظفه ميقبل مامحتاج
اني محتاجه وظيفتي مااهدها الانسان كلشي يصادفه حجيه اذا قبل ابقى بالوظيفه هلا بيكم اذا مقبل شوفيله غيري بدون متبلغين اهلي فدوه
خلي اتصل بيه حتى باجر يشوفج وتشوفيه بالزفه
حجيه عندج موبايل
عندي موبايل وفيس اخ لو الفيس جاي من كنت جاهله الا اصادق عشره
لعد شتسووين بيه الفيس هسه
اباوع على الصاكين
خو دزيلهم طلب صداقه وصادقيهم
مااعرف اكتب خايبه
دزي بصمه مو اله كتابه
جا مو يعرفوني عجوز من صوتي
هم صدوك حجيه اني شاكه بيج الله يدري شنو شغلج قبل
مالحكت اشتغل من عمري ١٣تزوجت
زين سويتي الي مثلج ينخاف منها
خايبه بنادم شماخذ منها هي الضحكه والسالفه والي يحجي لاتخافين منه هذا ماعنده شي الي يسكت خافي منه هذا مليان
صار الصبح الحجيه اتفقت ويه الرجال اسمه ابو احمد يوصلنا لصالون لقاء من الصبح متفقين وياها هي عليها التسريحه واني عليه اللبخ اقصد المكياج من فتحنا الباب هو طلع من السياره والحجيه اشرتله عليه
مبين معدل وخوش رجال لكن مااعتقد عمره بالخمسين مبين اكبر
والشغله الي معجبتني ان يباوعلي بالمرايه حسيت نفسي رخيصه صح هذي نظره شرعيه لكن نظره وحده مو الف مره وفي اماكن معينه بالمره ميصير يباوع وعمره كبير شايب مبين واطفاله هواي ومحافظه ثانيه ثكلت وجهي عليه وعگدت حواجبي المهم وصلنا للصالون من رجعنا العريس الي ساق وراحوا ياخذون صور
بعد الزفه الحجيه حجت وياي
ترى وافق تبقين بالوظيفه وگال اذا وافقت انتقل لبغداد اشتري بيت هنا
حجيه سدي الموضوع الرجال كبير مبين اكبر من عمره اعتذر منج ومنه
خاله ترى انتي مو زغيره وهو لان شعره ابيض
حجيه مو بس شعره ظهره محدب وجهه مصفط چبير كلش بيه ستين يمكن
باليل عرفت حاجي ويه بابا وانعقد مجلس الوزراء بيتنا امي ترأست الجلسه وصدر القرار اني جبيره ولازم نشوف الرجال ويگعدون وياه
الفرق بيني وبينه تقريبا تلاثين سنه لان عمره طلع ٥٨ سنه
يمه والله چبير بالعمر هسه لو اربعين خمسه واربعين اقبل بس مو ستين شباقي بيه وشگد اعيش وياه ميصير
هذا ظلم
مفاد ويه اهلي كنت بالدائره ورا. ساعه شفته جاي عليه راد يعرف شنو سبب الرفض
الاسباب هوايه فرق بالعمر بينا
واطفالك مااحب اتحمل مسوليتهم
ماعندي اطفال كلهم كبار واحد ١٦ واحد ١٥ واحد تسعه
ارجوك ميحتاج تشرحلي اني رافضه الموضوع وخلص
اذا اگلج اشتريلج بيت باسمج ويم اهلج شتكولين
ابو احمد اكولك حجايه ومتزعل مني
انت رجال چبير وعندك خير وتزوجت وعشت حياتك هسه محتاج مره مو عروس في نسوان بعمرك واقل منك محتاجات الزواج اكثر مني ويعرفن يربن اولادك ويتحملن اني حياتي مااشوفها وياك الله يخليك لاتلح اكثر
على راحتج بلغي الوالد سلامي
يمكن البعض يشوفني غلطانه لكن اني مااشوف نفسي كذلك
شراح اشوف من رجال عمره ستين
يجوز اني بنظر المجتمع عانس لكن انسانه واحب الحياة واريد اعيشها مع شاب يركض ويتعارك ويتناگر يسهر مو شايب اخاف يرتفع ضغطه ويموت
اكيد ربي كاتب الي شي حلو يستحق صبري واكيد هذا الشخص مثلي صابر والله كاتبني اله دتعال ياعيني شمنتظر ادري ماتعبت من العزوبيه اذا متعبت فاني تعبت بس راح انتظرك ويوم الي تجي الا اخليك تندم على كل هذا التاخير بس تعال
أنت تقرأ
لست عانس
Romanceالقصه تتحدث عن نظرة المجتمع العراقي لفتاة بعمر ال ٢٨ ولم تتزوج ووصف الناس لها بالعانس القصه حقيقيه من قصص الغربه
