لست عانس

لست عانس ٣

#لستُ_عانس٣
#زينب_الموسوي#
خبرت ام انمار وانتظرنا الخميس اجى ربيع كان شكله يختلف وملابسه مرتبه بقينا بنفس غرفتنا وگعدنا اني وام انمار گباله ونسولف وياه كان عفوي واخويه محمد مصورني اني طايحه وبس ناقص اسوي اعلان حتى واحد ياخذني يمكن مكان قصده او ميدري ربيع ناوي يتقدم لي
ام انمار شكد عمرك خاله
٢٥سنه
(هاي اول فاول الفرق بالعمر هواي )
تدري شفاء عمرها ٢٨سنه
عادي مايهمني العمر مدام خوش بنيه ومستوره وتقبل بظروفي
(خوش جواب بس اني يهمني الفرق)
احجيلنا عن حياتك وضعكم بالبيت
احنا ناس على گد حالنا اني الجبير وتزوجت مرتين بس مصار تفاهم
(فاول وضربة جزاء وانذار حمر طرد )
حجيت اني شلون تزوجت ومصار تفاهم يعني احجيلنا
الاولى اتزوجتها عمرها ١٦ وكل يوم والثاني اهلها عازميها اختها تريدها امها بالمستشفى واني اودي واجيب
شكو بيها اهلها وتتواصل وياها وتگدر تتفاهم وياها تتفقون على يوم بالاسبوع تروح لاهلها
بيتنا مابيه احد امي تشتغل لوحدها بالبيت واخواتي مايشتغلن لعد الچنه المن ماخذيها
هم صدوك الچنه للخدمه والثانيه ليش طلگتها
تعاركت ويه اخوانها وطلگتها
زين ناوي تشتري بيت لو تبقى بالتجاوز
لا نبقى هسه الحكومه تنطي قرار تمليك ونبني اني واخوي انتي حجيلي شعندج ماعندج راتبج خو ماماخذه عليه سلفه من الدوله
ها بلي ماخذه سلف وقرض ومطلوبه واني مريضه همين اخاف مگالولك وشعري يوگع وباليل اگعد اصرخ وخنگ الي بصفي
اشو اخوج سواج عندج سياره وتسووين سلف وقطعه ارض الحكومه منطيتج
اخويه يردون يمشوني عليك بس حرام اغشك اني اجرة الكيا اخذها من ابويه كلشي ماعندي
وهذا الذهب برازيلي
طبعا برازيلي اخويه گوم اني مافيدك خطيه امك يرادلها چنه مريشه وتخدمها الله وياك
طلع ظليت صافنه همزين حجاها ليكدام الزواج صار ربح وخساره شنو عندك وشنو عندي ارجع البيت واتفاهم ويه محمد
رجعت فهمت ابويه الولد متزوج ومطلك على اشياء تافهه ويسالني على راتبي وعاتبت محمد ليش گايل عندي سياره وقطعه ارض وسلف وذهب بعد فد مره مگتله اتزوجها بلاش
هاشبيج والله حجيت قبل لااعرف يريد يتقدملج وبعدين شكو بيها اخذيه وكونيه
احد گالكم اني ميته على الزواج شنو اكونه وليش مااخذ واحد مكون نفسه من اليوم سيره الزواج لاتفتحوها لاتخلوني احلف مااتزوج طول عمري
ردت امي ايباه على اساس انتي هسه الزواج جايج وانتي گلتي لا شدعوه خابصتنا وتصيحين يطبج مرض ظلي لمي فلوس وذهب وخليهن على گلبج
رفل وفاتن زوجات اخواني واطفالهم كانوا واكفين وسمعوا الحجي
حجيها كان طلقه ضربت گلبي
محمد ماقبل على حجيها زادت
كافي تكبرون راسها شلعت گلبي من دون اخواتها  من الها اذا متت وابوها رجال گاضي انتم راح تطلعون كل واحد بيته وجهاله ومرته تبقى هي مثل البومه مگابله الحياطين
كانت حاره وجوعانه جايه من الدوام والاهانه گدام الكل حسيت على نفسي  شي يطلع من روحي وينسلب حاولت اصعد الدرج كان في قواطي صبغ باقيه من شغل العمال عثرت بيها وگعت من سابع درجه للگاع وقواطي الصبغ عليه وعلى اهدومي ردت اتحرك ماگدرت الكل ركض عليه شالوني دخلتني اختي ونسوان اخوتي للحمام حتى بس يطلعن الصبغ من عيوني مهانت عليه نفسي طلعتهن من الحمام وأقمت على كرامتي عزاء بوسط روحي
اذا امي تسمعني هذا الحجي الغريب شيكول بتلك اللحظه عرفت ان البنيه مهما بلغت من شرف وعلم وجمال وثقافه تبقى النظره الها بيها عيب مدام مو على ذمة رجال
الالم برجلي موتني ومااگدر احركها  عرفت رجلي مكسوره اخذوني بتكسي  للعياده حتى اخذ اشعه العياده قريبه تشتغل بيها جارتنا ام حماده من زمان مشايفتها
ها ام عادل خيرها شفاء شبيها
وگعت ورجلها يمكن مكسوره
ياخطيه هي ماتزوجت
لا والله داده قسمتها عوجه
اگلج خاله الدكتور يشوف رجلي من ياخذ الاشعه
ئي خاله بس ظلي بالجواريب عادي
يمه انطيني جواريبج اني ملابسه
دالبس الجواريب علقت ام حماده شبيها العالم عميان رجلج تسوا ست نسوان والله لااجيبلج رجال بيومين وهسه تشوفين
امي لزكت لام حماده فدوه لعينج الله يخليج تسووين فضل
يعني اذا اكو وحده بايره بالدنيا ومعفنه فهي اني هسه اني رجلي مكسوره وذني يريدن يزوجني
الدكتور حولني على الاشعه وطلعت رجلي مكسوره وجبروها اليه الولد الي جبر رجلي سالني مرتين شسمج وجاوبته مع ان اسمي مكتوب بالباص عنده
بعدين من دنطلع گال لامي بيتكم بعيد خاله اوگفلكم تكسي
امي جاوبته قريب خاله احنا ناخذ تكسي جتي ام حماده سالت امي ها ام عادل محتاجه شي گولي
امي ردت لا رايحين للبيت فوگ ضيمها انوب مكسوره صعدنا التكسي طبعا امي ماسكتت بالتكسي حجت للسايق قصتي وشلون اني صرت طرشي من دون بنات حواء ودي افتح باب السياره واذب نفسي وارتاح
اتصلت بمروه خبرتها وثاني يوم قدمتلي اجازه وبدت الجواريين والموظفات يجوون عليه
اخذت راحه وبقيت يم فطومه سوالفها الحلوه ومكيفه على العصير الي يجيبوه بالواجب واتفرج على مباريات الغرافه
وراها بيومين اجتي ام حماده علينا الصبح
مو گتلج اجيبلج رجل لا وشلون رجال معاون دكتور  وحيد امه وجيرانكم بالمنطقه
اجتي بالي اغنيه     بشره خير  لحسين الجسمي بس مكسوره مااگدر ارگص
يمكن راح اعرس
كل الي بالبيت گعدوا يم ام حماده امي نسوان اخوتي وفاء فطومه حسن وحسين ميثم ذولي اطفال اخواني
حجت واحنا متابعين كل كلمه تكولها شايفين من ينفرد مسي بالهدف واحنا عيونه مترمش هيج كان الموقف
حجت
مشتاق ولد وحيد امه ابوه متوفي وامه باقيه عليه مامتزوجه وامه مدرسه وبيتهم ملك ست سهير  معروفه
اعرفها اني واخواتي درستنا احياء بالمتوسطه
ابنها
الي جبر رجلج بس صعدتي التكسي سالني وانطيته معلومات كامله وثاني يوم گلي انطيهم خبر حتى امي تزورهم
امي خلي تتفضل هلابيها اليوم خلي تجي ولج لوادري كاسره رجليج اثنينهن من زمان
خاله ام حماده شگد عمره ٢٧ انتي شكد عمرج
امي هي هم ٢٧ متناسبين فدوه ام حماده لج هديه اذا تمت على خير
عيني بدون هديه شفاء تستاهل ماانسى موقفها من قدمت اسم حماده بالسلفه وهي ظلت اخر وحده  بس من تجي ام الولد  البسي قصير خلي تشوف رجليج
خاله ام حماده انتي تعرفيه خوش ولد
اعرفه صار سنتين يشتغل بهذي العياده والصبح بالمستشفى ولد حباب بس ها امه تدقق صار سنتين تدور على بنيه ومعجبتها وحده
خاله يعني الامر بيد امه
بس انتي عاجبته اكيد ياثر على امه ها شگلتي تتفضل
هلا بيها خلي تتفضل بس اني مكسوره شلون
عادي حادث مو تنسين البسي قصير واني اجي وياها
العصر بلغنا والدي واخواني والدي ظل يدعي ويصلي
اني شفته الولد وعرفت عنده اهتمام وحاول يسالني عن اسمي وعنواني وعرف من امي موظفه
ساعه ثمانيه باليل جتي ام حماده وام مشتاق
وفاء انطتني محاضره اشو انتي تعدلين بالعرايس وناسيه نفسج هذي حواجب بقت وحده بالعالم ماسوت حواجبها
اني حواجب ماعندي كلش خفيفه وشعري خفيف رسمت حواجبي
وخليت حمره هذا الي سويته وابد ما غيرت مظهري وبقيت لابسه فستان بسيط اذا امه تدقق لازم تشوفني على طبيعتي احسن