لست عانس

لست عانس ١٠

#لستُ_عانس١٠
#زينب_الموسوي#
اخذت اجازه السوق والشهر الثاني من زواجي حصلت شغل مع امراءه عربيه اسمها شذى تشتغل في المستشفى تغسل المرضى العجزى والكبار بالعمر وتحتاج وحده وياها وشغل ثاني مع دار العجزه نهتم بيهم
اشتغلت بس شرطت نساء بس الي اساعدهم بيها وقبلت كنت اشتغل معاها تلث ايام بالاسبوع والدوله تدفع اجر مجزي لهذي المهن نظمت وقتي بين بيتي وشغلي وخصصت يومين بالاسبوع للدراسه ونهايه الاسبوع عطله مااريد حياة بس شغل وعمري يخلص معايشه مشاعر ويه زوجي وخاصة ان زوجي محتاج احد يحبه ويحسسه ان وزنه مو عائق يخليه منعزل عن العالم  وكل اليالي بيني وبين مقداد كنت اني الي ابادر والبس واتشاقى يله يتجاوب وياي ومع ذلك تحملت لان كان عنده طبع حلو  يخاف عليه يتصل بالشغل ويسالني تعبانه الله عليج اذا علمود الفلوس اشتغل ساعات زايده علمودج
ومرات من يجي يلگاني نايمه يتركني بمكاني واگعد الصبح مغطيني كانت عنده التفاتات حلوه بس العقده كانت اكبر
. يوم طالعه من الشغل الجمعه اخر يوم دوام بالاسبوع وامريكا شوارعها بهذا اليوم تنگلب عشاق وحبيات وغراميات يبدون من الساعه اربعه العصر الي شايل ورد الي طالعه من صالون وووو ممكن نقلدهم بالشي الحلو
رحت على الشقه  طبخت لبست حلو ورتبت مكياجي ورحت على شغل مقداد
حجيت ويه الموظف الي مسوول عنهم اني اعرفه شفته كم مره ومقداد عرفني عليه اسمه جيري خبرته اريد اجي على زوجي بدون ميدري قبل
فتحلي باب القاعه الي يشتغلون بيها كان مقداد واگف رحت عليه من ظهره غمضت عيونه منو اني
شجابج هنا    اشتاقيتلك ياعمري
كانوا العمال ديشوفون وابد مشايفين مقداد عنده صديقه لو حبيبه المجتمع الامريكي مجتمع قاسي على الناس الي يعانون من السمنه ومقداد منعزل تماما عن الناس
كنت مخليه ايديه حول رگبته جبتلك غدى وحسبت حساب زملائك ثواني يصير كلشي جاهز خليت الاكل على طاولات العمال جمعوها برا وبدوا ياكلون والعيون علينا گعدنا اني ومقداد سوا واتعمد ياكل من ايدي
شبيك خجلان ترى احنا بامريكا وحتى بالعراق هم الناس صارت تعبر عن حبها بالشوارع مشايف بالزوراء شيصير  حبيات وختلات
وانتي شمدريج بالزوراء
اسمع هاشبيك الحدايق مثلي بس يسمعون
حلوه ان فكرتي بيه وجيتي للشغل
فكرت بيك شنو ليش اني اگدر انساك لحظه يله المره الجايه انت تعال عليه للشغل
العمال كانوا بعد ميخلصون اكل يكولولي شكرا ويكولون لمقداد اختيار حلو او البنيه حلوه
رحت على البيت وهو وياي اخذ اجازه وطلع
مقداد صار هواي مشايفه طوبه اريد اشوفها
في قنوات تنقل بس الامريكان ميعتبروها لعبه شعبيه
خلي نجيب زنوبه وعلي ونطلع باجر نلعب طوبه
وانتي تعرفين تلعبين
طبعا مو كنت مخطوبه ليونس محمود وعلمني
ها نسيت بس اخاف باث تجي وتضوجين
وين الله وتجي حتى اكسرها تكسير باللعب هالمعصعصه هاي يمكن بعمرها مماكله صحن تمن
الله شنو هالمفردات هذي وين تلكيها
دخابر زنوبه فدوه خلي نطلع نتونس مو بس نشتغل
بس اگلج من هسه اذا لعبت طوبه باجر باليل اتعب لا تعتبين عليه
هو انت تريد بس حجه  ميخالف قابله
طلعنا ثاني يوم ابنه علي كان صعب يلعب بس كنا نشجعه
اكيد عرفتوا قصدي من كل هذا (مقداد ينزل وزنه بدون مااحسسه اريده يضعف ويقترب من اولاده ويطلع من هاي العزله)
بقينا ساعتين نلعب  وكانت في ناس شاركونا اللعب ونضحك وتواعدنا  كل سبت نجي كانت قاعه مغلقه لان شتى مافي حدايق ومقداد فرح لان اولاده وياه خلص عمره يشتغل ويوفرلهم الي يريدوه ومحروم من شوفتهم هذا الوضع لازم يتغير   اني بديت احجي انكليزي
علي شنو رائيك نروح للشقه تعلمني انكليزي واعلمك عربي
العربي صعب مااتعلمه
اني اسوي سهل بس تعال ويانا واسويلكم اكله جديده تعلمتها
اول نروح على ماما اخذ الادويه
رحنا تعمدت انزل وتشوفني ويه اولادها
سلمت عليها ردت وين رايحين
راح اخذ الاولاد وياي حتى ترتاحين منهم اطلعي تونسي وخليهم عندي يومين اجيبهم
اخذتهم وطلعنا بالبيت گلبنها حفله  نضحك ونلعب وصور واغاني
بدوا يتعلقون بابوهم وبديت اعرف الشي الي يحبوه زينب كانت تحب الاغاني وتسمعها ليل ونهار وعلي يحب الرياضه بس صحته متساعده
نقطه لصالحي
زنوبه هذي الاغنيه عن شنو صار ساعه يصيح ومافتهمت شي
هذا اغاني روك تصير على طبقه عاليه واكثر مطربين هذا النوع يكونون مدمنين مخدرات
خوش بشاره لعد ليش تسمعوهم
حلوه اغانيهم وبيها عبره
ياعبره وهو مدمن على العموم زنوبه حبيبتي اكيد انتي تفتهمين وتعرفين المخدرات دمار للانسان وحرام
لا شفاء اني بس اسمعهم مااتاثر بيهم
بدت زنوبه تحجيلي عن الموسيقى والاغاني والاصدارات وبديت اشاركها الحديث والاهتمام
باليل حجيت ويه مقداد تدري علي يحب الرياضه بس صحته متساعده
اني هم احب الرياضه بس وزني ميساعدني
انت لاتظل كل شويه وزني وزني ترى مابيه شي وزنك لو تريد تضعف حتى البنات تركض وراك
يابنات زغير اني بس افكر اسجل اني وعلي بنادي رياضي حتى اساعده على الاقل ابقى يمه
والله خوش فكره هم يلعب يتونس ويلكه اصدقاء اشو مخلصها ادويه واطباء وانتم متخلوه يتحرك واني هم اسجل وياكم
لا انتي متسجلين خليج مثل ماانتي احبج هالشكل
شگلت تحبني منين طلعت الشمس اليوم دنطقها يمعود