لست عانس

لست عانس ٢

#لستُ_عانس٢#
#زينب_الموسوي#
بالوظيفه كانت علاقاتي طيبه مع الكل
بالغرفه ويايه بنات اثنين ام انمار  مره مواليد ٧٠  متزوجه وعدها اطفال حكيمه تعرف كلشي
ومروه بنيه حلوه حبابه وتعرف بسوالف البنات كلها المكياج الملابس الشعر الخلطات مخطوبه وعلى وجه زواج حديث الغرفه كان البحث عن زوج الي وباسرع وقت
لمن تعبرين العشرين ماادري شي لاارادي يخلي الناس يتصورون انتي بازمه وداخله معركه مع الوقت في سبيل تتزوجين
وبدون مااتفلسف عليكم اني بداخلي كنت احس صار الوقت اتزوج عمري صار ٢٨سنه اكثر صديقاتي صارلهم خمس سنين متزوجات
اجتي ام انمار الصبح
لج شفاوي شلون ولد صعد ويانا البارحه بالكيا تمنيته الج
مروه ام انمار انتي متزوجه ومخلفه وعينج على الولد اثكلي
ام انمار ولج غير ادور لشفاء رجل
تدورين رجل بالكيا
مروه والقران لو تسمعين كلامي شهر تنخطبين ومن واحد طاگ وصاك همين بس انتي متريدين تصرفين فلوس هي روحه وحده لمركز باربي كم تغيير. وكم تنوره وتشيرت يجذبن وتشوفين العرسان
العريس الي يجي علمود تنوره وتشيرت يعوفني علمود تنوره وتشيرت ثاني عند غيري
مروه ظلي بهذي الفلسفه وتندمين
ام انمار اگولج ليش متخليني اخذج لام صالح ها تاخذلج خيره وتسويلج عمل وحجاب تشيليه باسبوع تتزوجين
اسبوع واحد اكيد تنطي ضمان
ام انمارضمان لج هاي ياما زوجت بنات شگلتي وترى بيتها قريب وتعرفني تتساهل وياج بالسعر
ماادري ذني سحارات اخاف منهن
ام انمار لج ام صالح مو سحاره مره عدها بركات وتعالج بالقران ومامتزوجه بس يسموها ام صالح من كثر اعمالها الصالحه
اذا هي ممتزوجه شلون راح تزوجني
ام انمار هي مانعيها من الزواج الاولياء والصالحين
افكر ويه الراتب اردلج خبر
مروه دروحي هسه بس اخذي خيره شخسرانه
قنعوني اروح اخذ خيره طلعنا من الدوام زمنيه ورحنا  النسوان الي گاعده مالها عدد وكلهن يتوسلن بيها تشوفلهن حل مالومهن مجتمعنا هواي بيه ظلم للمراءه ومن متلگه المعين الها تلجا ل امور السحر والغيبيات شفت ام صالح مره سمينه بالخمسين كوه تتحاجى بس الظاهر علاقتها قويه بام انمار اخذتنا على غرفه ثانيه حجت وياي
طلعي بياضج اخذلج خيره
ام انمار طلعي عشره الالاف خلي تشوف بيها
ميصير خمسه
ام صالح لاتداهريني  عندي شغل قيامه فضيني
انطيتها العشره باوعت بيها
وحجت شنو مشكلتج ماعرفت احجي لان ماعندي مشكله ام انمار حجت
فدوه لعينج ماعدها نصيب قسمه ماتجيها وعمرها راح يصير ٣٠ شوفيها شبيها
باوعت معكوده ذيالج وكل قسمه ماالج الا اسويلج عمل واسحب العمل القديم ولازم اكفنج واسبحج واسويلج فتح قسمه عندج واحد بالج تريديه انطيني اسمه اسم امه
ماعندي احد
لعد نسويلج على العام واخلي الخطابه يجوون وفود وفود عليج
لحظه سمحت لعقلي يتوقف ومشيت ورا حجي وحده جاهله حتى لفظها للايات القرانيه خطا وهي تصورلي افواج الخطابه الي راح تحاصر باب بيتنا
شنو المطلوب مني
تجيبيلي خيط على طولج ودشداشه من دشاديشج ابيتها عندي وگومي اكفنج واسبحج
كفنتني وقرت جزء حافظته من صوره الانعام والبخور خنگني وطفت المروحه حتى الشموع متنطفي حسيت عرگت واحتريت ونفسي ضاق
هاهيه مادام عرگتي العمل بطل
(عايزه كل هذا الحر والدخان ومااعرگ)
يله اسبحج
لاعفيه مااگدر شعري مسويته كرياتين ويخرب من المي واستحي
مراح اغسل شعرج بس كتفج الايمن والايسر
دخلت للحمام مالتهم عبالك گبر  من كل عقلي اني انزع ملابسي بحمام ناس غرب علمود اتزوج كانوا بنات واگفين سرى  على الحمام يعني قابل اني احسن من هاي البنات
دخلت ذبت طاسة مي على اليمين وطاسه على اليسار وياها تقرا ايات
لبست هدومي واني احس بالخجل من نفسي وردت بس انهي الموقف واطلع
رجعت للغرفه يم صديقاتي بدينا نتحاسب وياها
اليوم ١٥٠ بس للسبح والتكفين
شنو القصه سابحه بالشيراتون هي طاستين مي
ام صالح هاي صاحبتجن مبين متريد تعرس
ماادفع هذا المبلغ هي خمسين غيرها ماكو وبطلت لااريد تفتحين على العام ولا على الخاص حطيت الخمسين وطلعت
شلت فكرة الزواج عن طريق عمل طبعا الطريق كله يضحكن عليه ويتشاقن
والله حرامات ستين الف راحن مني على كلاوات وقشمريات اني صوجي سمعت كلامكم
رجعت للبيت ضايجه على فلوسي صدوك ماافتهم كانت لقاء اختي عدنا وابنها واطفال اخوتي عرك  والبيت صاير مهرجان
لقاء ولج شنو قصتج شفاء ماكو واحد منا منا مامعقوله اخاف متانيه واحد معين
چنت متانيه يونس محمود وهسه منتظره مسي
اسكتي انتي الثانيه هسه تسمعج امي وتقدم قاىمه البنات الاصغر مني وانخطبن هذا الاسبوع طلعت امي من المطبخ
ولج اني گلبي عليج اريدج تتزوجين ويصير براسج خير الاب مادايم والام مادايمه
يعني بس الرجل يدوم وميصير براسي خير الا اذا اتزوجت لا شهادتي الجامعيه لا الوظيفه الها قيمه عند الناس بس الزواج يعتبر فتح عظيم وانتصار مابعده انتصار
ظلت امي تحجي نفس الحجي
بالدوام گاعدين اني يمي الاوامر الاداريه للتعيينات الجديده كلها يمي وداىما غرفتي ازدحام مراجعين جتي مروه
اسمعي شفاء اكو شاب واگف سرى بالباب وشغلته يمج  حلو ومرتب وايده مابيها حلقه حركي نفسج
يعني شسوي مثلا
تعالي اخذي هذي الحمره  واني راح اخليه يدخل قبل السرى اوكي وانتي جريه بالحجي زين
راحت ولطخت الحمره على حلگي دخل ولد مبين فقير رحمه على والديج اختي والله صارلي شهر اراجع بالدوائر
مروه دفوت يم شفاء حبابه وهسه تمشيك بسرعه
تفضل اخويه معاملتك
انطاني الفايل عنده امر تخصيص مالي بس غلطانين بالاسم الثلاثي
طلعت الاوليات
اسم جدك سلاح  وهمه كاتبيه سامح
جايب صور
بلي هذي صور
بسيطه باوعت مواليده ٨٥ اصغر مني يله هي كلها سنتين مروه تاشر من وراه لاغيه احجي وياه
تدري ناسين يشدولك زوجيه
لا اختي اني مااستحق مخصصات زوجيه
ها افتهمت ممتزوج يعني
لا متزوج بس زوجتي موظفه وهي تاخذ زوجيه
متزوج هاك المعامله وروح الزم سرى واحتمال بعد شهر يله تخلص معاملتك والبس حلقه
ااحلقه بعتها حتى ابني مشتمل شسوي ياخويه ساعديني الله يخليج
زين تعال باجر اكملك المعامله
اكيد باجر الله يستر عليج يخلي جهالج  يارب
ها مروه ارتاحيتي متزوج والله يخلي جهالي مادري عبالك الرياجيل كلهم تزوجوا واني بقيت زايده مافي واحد الي
رجعت مروه تلح ولج مركز باربي بدال ماتلمين سلف وتعمرين بيت اهلج وتشترين سبلت لكل غرفه سوي سلفه عشر ملايين وتغيرات بسيطه صدگي
كلها حواجب تاتو بدل حواجبج المنتفه وكحل دائمي وتوريد شفه انتي خشمج زين ميراد گص وبشرتج صافيه وخدود يرادلج تبينين اصغر  شكلتي
لا عيني الي ياخذني مثل مااني ليش الي بمركز  باربي اشطر مني بالمكياج بس هو الحظ
مروه لعد محد راح ياخذج ولج اختج اخر وحده انخطبت بقيتي بس انتي الناس شتگول عنج عاشگه لو مسويتلها عمله سوده
معقوله الناس هيج تفكر ليش ميگولون قسمة الله بعدها مجايه
هذا الحجي انتي تكولين والله اذا وصلتي للثلاثين الي راح يتقدمولج لو مطلگ لو متزوج ويريد الثانيه لو ارمل وعنده كومه جهال
كافي مروه ليش تخليني ايأس بعدي عمري ٢٨
واختج وفاء ٢٢وانخطبت شبيه حظج متكوليلي
لمن يكون كل الي حولك راسملك صوره ان انت بنظر الاخرين فاشل تبدي تصدگ انت فاشل وتحس بالنقص
قبضت سلفه عشر ملايين مسويتها ويه الموظفين اني الي الم السلف يسموني بالدائره ام السلف ومرات اقدم اسم واحد عن واحد حسب الحاجه
اختي وفاء كانت مخطوبه ولد وياها بالكليه وتخرجوا وحالتهم الماديه زينه
وبيتنا كان تعبان وعيب من الناس اخذت السلفه حتى اعدل وارمم البيت غيرنا الكاشي والاستقبال صبغناها وكان البيت هوسه والعمال داخله طالعه كنا نصعد بالطابق الفوك الى ان يخلصون وبيوم جمعه كان الطبخ عليه شفت واحد من العمال يتحجج يدخل للمطبخ ويسولف ويه اخويه محمد بصراحه باوعتله واني ضايجه ميحتاج اوصفه الله يعينه عماله تعبان العصر اجى محمد يضحك تعالي شفاء
اول مره بتاريخ البشريه واحد يتخبل ويتقدملج امي سمعت يمه محمد صدوك منو موافقين  يمه صلوات تعال ابوسك بگصتك
هذا الولد الخلفى ربيع خوش ولد وشاغول وديبني غرفه حتى يتزوج وسالني عن شفاء حجيتله القصه وهي ماعدها حظ وموظفه گال اني مستعد اتقدملها اذا تقبلون
شنو مستعد ليش شنو فاتحين باب التطوع خلي يولي
محمد شفاء ترى بعمرح مراح تلگين واحد ممتزوج ياخذج
ماريد وبعدين هذا دارس بيتهم ملك كم واحد بالعائله
مخلص ثالث وبيتهم بالقناه تجاوز وهمه اخوان اثنين عماله واربع بنات وامهم
سدوا الموضوع والنبي اكتل نفسي وبعدين محمد عيب تحجي عني گدام الناس شنو ماعندي حظ وتگله موظفه
محمد صوجي اني فوگ مشايل همج احسن ماظاله بايره
الكلمه نزلتني للگاع وامي نزلت دموعها
صعدت لغرفتنا احنا البنات عدنا غرفه بجيت بجي على حظي اهلي يعتبروني بايره مو احسن ماجيبلهم العار بعلاقات وفيس بوك وصور اشو ذني محد يطلع عليهن القاب والشريفه وتعبانه على روحها مية لقب عليها معقده بايره نفسيه عانس
حتى غدى منزلت اجتي رفل زوجه محمد جايبه الغدى وياها فاطمه بنته
فطومه اني مربيتها وتنام بحضني اموت عليها
ها شفاوي ليش هنا جبتلج الغدى بتج متقبل تاكل بدونج
تعالي فطومه حبي ليش شايله الصينيه رفل وانتي حامل احنا ماصدكنا تحبلين ورا فاطمه
يمعوده ادري يموت مثل اخوانه
گولي ياالله وتفائلي ربج بابه واسع
ياالله ترى محمد حيل متاذي عليج ويگول گلتها من باب الشقى مو قصدي هي دائما تسميني ابو خشم ونتشاقى
ادري ميقصد حمودي گلبه طيب بس اني صايره حساسه زايد
حقج والله ماادري حظج شبيه اشو اخلاق وخلقه اناقه شرف سمعة اهلج طيبه موظفه ونصيب ماكو
هذا الي يقهرني مااشوف ناقصني شي
والناس اسألتها متخلص وتنظرلج عبالك بيج نقص مرض صديقاتي يحبلون ويجيبون يخافون اعرف لااحسدهم حتى بطلت اسال عليهن وبنات خالاتي يخافن ازورهم لااخطف ازواجهن يعني الي متاخره بالزواج هيج شريره ماادري
الله كريم حبي اكلي وتعالي جوى حتى محمد يحجي وياج خطيه ضايج
صار حبيبتي وبعد لتصعدين دوگي الموبايل وانزل
ظليت اني وفطومه ناكل ونزلت المواعين على الدرج كان محمد اول مشافني باسني براسي
شفاوي والله ماقصد تدرين بيه
ادري بيك ابو خشم گلبك طيب
باليل صاحني والدي وكان اخواني عادل ومحمد وامي عرفت يريدون يقنعوني بربيع اني مو ضد اتزوج عامل بسيط لكن مو هالدرجه ظروفه تعبانه والشهاده فرق صح في ناس مدارسه وتفكيرها وثقافتها احسن من الدارسين لكن تبقى الشهاده مهمه ضمان للمستقبل واحنا بمجتمع شرقي الرجال ميحب مرته اعلى منه
ابويه بدا بالحديث
شفاوي بنيتي عرفتي بالولد ربيع متقدملج
بلي يابه عرفت محمد گلي
ترا اني اعرفه للولد بنى بيت صديقي ومدح اخلاقه بشكل وعادل اليوم راح شاف مكانهم سال عليه خوش ولد بس تعبان
يابه مااشوف مناسب الي لاعنده بيت لاوظيفه وهاي دنيا يمكن يتمرض يحتاج راح يوكع على راتبي واهله واخواته كله يصير عليه
بنتي ترى انتي هسه هم شايله حملنا اخوانج يبنون وماعدهم وحولتي البيت قصر وسلف وشاركتي بسياره ويه علي رجل اختج المره هي تلم الرجال وتسوويه وانتي كبرتي والله يابنتي مامتضايق منج اشو انتي الشايله البيت بس اريدلج الستر
محمد شفاوي وداعة فاطمه خوش ولد وفقير وانتي تسوويه مراح تخسرين شي
عادل شوفي خليه يجي عليج للدائره واحجي وياه وشوفيه وافتهمي منه اذا شفتي گلبج لاعب منه هاي هيه نرفضه
مثل متريدون الخميس خلي يجي للداىره واحجي وياه بحضور ام انمار لان مره جبيره وتفتهم
بارك الله بيج بنيتي وانشالله الولد قسمتج
گلت هذا الحجي واني مامقتنعه ياناس ترى اني مو چبيره ٢٨سنه مو ذنبي اذا سن الزواج فجاءه صار ١٥والعنوسه تبدي ب٢٠
الولد ممناسبني موافقتي عليه معناها داگل للناس هاي اخر امل عندي واخر مركب واني غرگانه وچلبت بيه
ترى الزواج مو بس رجال يخليج بغرفه وسرير فرشته حمره وعليها ورد وتلبسين سيت نوم وتتمكيجين
بالنسبه الي الزواج لازم يكون من رجال يشاركني حياتي هوايتي تفكيره قريب مني عنده اهداف يريد يحققها
الزواج مسؤوليه واطفال الطرفين لازم يكونون عارفين حجمها وبعدين ربيع مااشوفه خوش ولد مثل ميگولون اهلي اتجرأ دخل للمطبخ وباوع عليه المفروض هذا مكان رزقه والعوائل مأمنه بيه 
حجيت ويه امي الصبح انطتني محاضره طويله عريضه عن ارتفاع نسب العنوسه في بغداد وضواحيها شفت اهلي مچلبين مشيت ورا حجيهم يجي الخميس والله يحلها