Tuldukuwit

✎ Umaasang Kay Ganda

Pagbutihin ang paghilod ng puso,

padaanan ng pag-asa

ang bawat singit ng pagkatao,

pagkatapos, magkilay ka,

iporma, para maayos tignan,

guhitan mo, kulayan mo

kung kulang pa,

dahil kulang pa ang pag-iyak

mo para sa kanya.

Maglagay ng lipstik

na ayon sa kapal ng kirot

na nararamdaman mo,

at pabanguhin ang hininga,

iwasan ang pagbanggit

sa pangalan niya.

Magpaganda ka,

dahil ikaw ay muling aasa.

Umasa ka sa mga pangakong

hindi man lang niya nagawa,

kasi mahal mo siya,

umasa kang

hindi siya magsasawa.

Bumangon ka, magpaganda ka,

dahil ngayong araw, ikaw ay aasa,

bukas ulit, at sa isang araw pa,

araw-araw, tanggapin mo na.

Mahirap umasa na mahalaga ka,

kung ang lagi lang namang

kausap niya ay iba,

mahirap umasa na

magiging kayo pa ulit,

kung ikaw naman pala

ay isa na lang alaala sa kanya.

Hindi na matatagpuang muli

ang nakaraang matagal

mo pa ring hinahanap,

dahil ang natira na lang

ay ang sakit

na pilit kinakalimutan,

minsan hindi na importante

kung ano ang simula ng pag-iibigan,

kung ang meron na lang naman

ay simula ng katapusan.